Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Junio yuʼun 2017

Jkoltaybeytik skʼoplal te jaʼnax stukel ay ta swenta Jehová te ya xmantalteswane

Jkoltaybeytik skʼoplal te jaʼnax stukel ay ta swenta Jehová te ya xmantalteswane

«Cajwaltic Dios [Jehová], hich ya scʼan te yac awichʼ awutsilal, ichʼel ta mucʼ, soc awuʼel, como haʼat la apas spisil bintic ay» (APOCALIPSIS 4:11).

KʼAYOJIL 112 SOK 133

1, 2. ¿Bin ma skʼan te xchebet koʼtantik yuʼune? (Ilawil te lokʼomba ta sjajchibal te articulo).

JICH bitʼil la kiltik ta yan articuloe, te Pukuj ya yal te maʼyuk sderecho te Jehová yuʼun jaʼnax stukel ya xmantalteswan sok te jaʼlaj lekxan teme jaʼnix ya swentain sbaik te ants winiketike. ¿Melelnixbal-a? Jnop kaʼiytik te sbajtʼeluk-kʼinal ya xkuxinik te machʼatik jaʼnix ya swentain sbaik. ¿Jaʼbal lekxan ya xkʼotik ta lokʼel teme maba ya swentainotik yuʼun te Diose? Jaxan te jaʼate, ¿jichbal ya akuy te jaʼ tseʼelxan awoʼtan te yakuk xkuxinat ta sbajtʼelkʼinal sok te jkʼaxel maba ya awichʼ ta wenta te Diose?

2 Maʼyuk yan machʼa ya xjuʼ ya sut te jojkʼoyel ta atojol. Jpisiltik ya skʼan ya jnoptik ta lek. Ma skʼan te xchebet koʼtantik ta swenta te jaʼnax te Jehová ay sderecho yuʼun ya xmantalteswan sok te jaʼ lekxan te bitʼil ya xmantalteswan stukel soknix te jaʼ snujpʼ te ya jkoltaybeytik skʼoplal ta jkʼaxele. Ya xjuʼ te jich ya jchʼuuntik ta swenta te bin ya jtatik ta kʼoponel ta Biblia. Kiltik bin ya yal te Biblia ta swenta te ay sderecho te Jehová ta smantaltesel te bintik pastiklanbile.

TE JEHOVÁ AY SDERECHO YUʼUN YA XMANTALTESWAN

3. ¿Bin yuʼun te jaʼnax stukel ay sderecho te Jehová yuʼun ya xmantalteswan?

3 Te Jehová jaʼnax stukel ay sderecho yuʼun ya xmantalteswan, melel jaʼ te Dios te spisil ya xjuʼ yuʼun sok jaʼ te Jpaswaneje (1 Crónicas 29:11; Hechos 4:24). Ta jun najalsitil te 144,000 ta tul te  ya xmantalteswanik sok te Cristo jich ya yalik: «Cajwaltic Dios [Jehová], hich ya scʼan te yac awichʼ awutsilal, ichʼel ta mucʼ, soc awuʼel, como haʼat la apas spisil bintic ay, soc ta scuenta scʼanojel awoʼtan cuxajtic soc la yichʼticlan pasel» (Apocalipsis 4:11). Te Jehová jaʼ la spas spisil, jich yuʼun jaʼnanix ta jkʼaxel ay sderecho te ya swentain te ants winiketik sok te chʼul-abatetike.

4. ¿Bin yuʼun ya yakʼ ta ilel te ma jnaʼtik stuuntesel te bitʼil libre ayotik teme ya jkontraintik te jaʼnax stukel ya xmantalteswan te Jehovae?

4 Te Satanás maʼyuk sderecho yuʼun ya xmantalaj, melel maʼyuk bin spasoj stukel. Kʼalal te Satanás sok te sbabial jmeʼ jtatik la skontrainik te Jehová bitʼil ajwalil yuʼunik, la yakʼik ta ilel stoybailik (Jeremías 10:23). Te bitʼil libre ayotik ta stael ta nopel te bin ya jpastik, ¿yabal yakʼbotik derecho yuʼun ya jkontraintik te mantaltesel yuʼun te Jehová? Maʼuk. Melel te libre ayotik ta stsael te bin ya jpastike, jaʼukmeto maba ya yakʼbotik derecho yuʼun ya jkontraintik te Jpaswanej kuʼuntike. Chikan ta ilel te jkʼaxel ma lekuk teme ya jtuuntestik te bitʼil libre ayotik yuʼun ya jkontraintik te Diose. Te ants winiketik puersa ya skʼan ya yichʼik wentainel yuʼun te Diose.

5. ¿Bin yuʼun ya xjuʼ ya jchʼuuntik sok spisil koʼtantik te toj te bin ya yal te Jehová?

5 Yan te bin yuʼun jaʼ ay sderecho te Jehová te ya xmantalteswane, jaʼ te stojil ya xmantalaj. Jaʼnix te Jehová jich ya yal: «Hoʼon Jehovahon, te ya caʼiy cʼuxultaywanej, te toj ya caʼiy chahpanwanej soc te ya jpas te bin stojil ta pasel, como ha ya scʼan coʼtan ini» (Jeremías 9:24). Te Jehová jaʼ slokʼib jaʼ yuʼun te bin stojil ta pasele. Ma puersauk te ya yil leyetik te jaʼ spasojik te jmulawil ants winiketik yuʼun jich ya snaʼ bin toj ta pasel. Te leyetik yakʼoj ta Biblia la yakʼ jaʼ chikan te bin toj ta pasel ya yil stukel. Te Biblia jich ya yal ta stojol te Jehová: «Ha yichʼo-ip te amucʼul-huctajib te bin toj ta pasel soc te stojil chahpanel». Jaʼ yuʼun ya xjuʼ ya jchʼuuntik sok spisil koʼtantik te spisil te leyetik, te bintik ya xtojobteswan te ayik ta Biblia sok te bin ya sta ta nopel, spisil tojnanix-a (Salmo 89:14; 119:128). Yan stukel te Satanás te ya yal ta jamal te ma lekuk te bitʼil ya swentainotik te Diose, ma juʼem yuʼun yakʼel te bin stojil ta pasel ta balumilal.

6. ¿Bin yan yuʼun te ay sderecho te Jehová yuʼun ya xmantalteswane?

6 Yan te bin yuʼun ay sderecho te Jehová yuʼun jaʼnax stukel ya xmantalteswan jaʼ te ya snaʼ sok ay spʼijil te ya xtuun yuʼun ta skanantayel te bintik spastiklanoje. Jnop kaʼiytik te yuʼel la yakʼbey te sNichʼan yuʼun ya spoxtay bayal ta chajp chamel te maʼyuk jtuluk doctor ya xjuʼ ya spoxtaye (Mateo 4:23, 24; Marcos 5:25-29). Te bin la spastiklan te Jesús maba milagro la yil te Dios, melel ya snaʼ bin-utʼil ya x-aʼtej te jbakʼetaltik sok ya xjuʼ ya slekubtes. Jaʼnix jich bayal bin ya snaʼ te jich ya xjuʼ ya schaʼkuxajtes te machʼatik lajemik sok ya xjuʼ ya skom te tulan yikʼal jaʼal sok yantikxan.

7. ¿Bin yuʼun jaʼ toyolxan spʼijil te Jehová te bitʼil te pʼijilal ay ta balumilal te ay ta skʼab te Satanase?

7 Te balumilal te ay ta skʼab te Satanás yakto ta spasel tulan yuʼun ya slajin te kʼopetik ta yutil jpam nasion sok te kʼopetik staojik ta skontrainel sbaik te nasionetik. Jaʼukmeto, jaʼnax te Jehová ta skaj te spʼijile ya xjuʼ ya yakʼ lamalkʼinal ta swolol Balumilal (Isaías 2:3, 4; 54:13). Te kʼalal ya xkʼotxan ta koʼtantik bantito kʼalal smakoj te bin ya snaʼ sok te spʼijil te Jehová jich pajalxan ya kaʼiy jbatik ta stojol bitʼil te jpuk-kʼop Pablo te la yale: «¡Cʼax cʼubul ay te yutsil spʼijil soc te bin ay ta naʼel yuʼun Dios! ¡Ma xhuʼ ta naʼel te chahpanel yuʼun soc ma xhuʼ ta naʼel te behetic yuʼune!» (Romanos 11:33).

JAʼ LEKXAN TE MANTALTESEL YUʼUN TE JEHOVÁ

8. Ta swenta te bitʼil ya xmantalteswan te Jehová, ¿bintik ya stijbat awoʼtan?

8 Te Biblia ma jaʼuknax ya yakʼ ta ilel ta jamal te jaʼ ay sderecho te Jehová yuʼun ya xmantalteswan. Jaʼnix jich ya yal bin yuʼun jaʼ  lekxan te bitʼil ya xmantalaje. Jun swentail jaʼ te ya xmantalteswan sok skʼuxul yoʼtan. Ta melel ya stij koʼtantik te bitʼil ya smantaltesotike. Te Jehová «ay bayel scʼuxul yoʼtan soc te ay yutsil yoʼtan, ma orahuc ya xʼilin, mero mucʼ scʼuxul yoʼtan soc stalel jun yoʼtan» (Éxodo 34:6). Leknax ya yilotik sok ya yichʼotik ta mukʼ. Jaʼ lekxan ya skanantayotik te bitʼil te joʼotiknixe. Ma jichuk te bitʼil ya yal te Satanás, melel te Jehová maba ya smak te bin lek ta stojol te j-abatetik yuʼun te jun yoʼtanik ta stojole. Lato yakʼ sNichʼan te kʼax kʼux ta yoʼtan yuʼun ya xjuʼ xkuxinotik ta sbajtʼelkʼinal (kʼopona te sjun Salmo 84:11 sok Romanos 8:32).

9. ¿Bin-utʼil ya jnaʼtik te ay jkʼoplaltik ta yoʼtan Dios ta jujuntulotike?

9 Te Jehová kʼux ta yoʼtan te lum yuʼune, jaʼukmeto ay skʼoplal ta yoʼtan te jujuntul ants winike. Jnop kaʼiytik te bin kʼot ta pasel ta skʼajkʼalel te juesetik ta Israel. Ta trescientosniwan jaʼbil te Jehová la stuuntes juesetik ta skoltayel ta skʼab skontratak te israeletik. Ta yorail te bayal kʼop-a, te Jehová la yichʼ ta wenta te Rut te ma jaʼuk israel-ants te bayal bin la yijkʼitay yuʼun yoʼtanuk ya x-och ta lum yuʼun te Diose. Te Jehová la yakʼbey bendision, la sta smamlal sok la sta jtul yal. Ma jaʼuknax-abi, kʼalal ya xchaʼkuxaj te Rut ya snaʼ stojol te tal te Mesías ta stsʼumbal te yale. Jaʼnix jich ya snaʼ te la yichʼ tsʼibayel te bin la spas ta skuxlejal ta jun libro ta Biblia te yichʼoj te sbiile. ¡Nopanax awaʼiy te bin-utʼil ya yaʼiy sbae! (Rut 4:13; Mateo 1:5, 16).

10. ¿Bin yuʼun ya xjuʼ ya kaltik te maba ya schukotik te mantaltesel yuʼun te Jehová?

10 Te Jehová ma xtenawan te bitʼil ya xmantalteswan sok ma tulanuk yoʼtan. Te machʼatik mantaltesbilik yuʼune libre ya yaʼiy sbaik sok tseʼel yoʼtanik (2 Corintios 3:17). Jich la yakʼ ta naʼel te Davide: «Utsilal soc sacal qʼuinal ay ta stojol; ay yuʼel soc yutsil qʼuinal ta banti nahinem» (1 Crónicas 16:7, 27). Jtul machʼa la stsʼibay te salmo te Etán sbiil jich la yal: «Bayel yutsil te machʼatic ya snaʼic yalel yutsil acʼoblal, te ya xbehenic ta sacal qʼuinal yuʼun te sit awelaw, Jehová. Sjunal cʼahcʼal tseʼel yoʼtanic ta scuenta abihil, tseʼel yoʼtanic yuʼun te toj-oʼtanil awuʼun» (Salmo 89:15, 16).

11. ¿Bin ya xjuʼ ya jpastik yuʼun ya xkʼotxan ta koʼtantik te jaʼ lekxan te bitʼil ya xmantalteswan te Jehovae?

11 Te kʼalal ya jnopilantikxan ta koʼtantik te yutsil yoʼtan te Jehová jich ya xkʼotxan ta koʼtantik te jaʼ lekxan te bitʼil ya xmantalteswane. Jich ya kaʼiy jbatik bitʼil jtul te machʼa la stsʼibay te salmo te jich la yal: «Ha lec te jun cʼahcʼal ta amaqʼuetic awuʼun te bin utʼil jmil cʼahcʼal ta yan lugar» (Salmo 84:10). Te bitʼil jaʼ la spasotik te Jehová ya snaʼ bin ya yakʼbotik stseʼelil koʼtantik ta smelelil sok ya yakʼbotik sok yutsil yoʼtan. Spisil te bin ya skʼanbotik jaʼ ta skaj jlekilaltik. Teme ya jchʼuuntike, jich tseʼel koʼtantik ta smelelil manchukme ay bintik ya skʼan ya jlokʼestik jbatik yuʼun (kʼopona te sjun Isaías 48:17).

12. ¿Bin-a te tulanxan skʼoplal yuʼun ya jkoltaybeytik skʼoplal te Jehová te jaʼnax ay ta swenta stukel te ya xmantalteswane?

12 Te Biblia ya yal te ay ants winiketik ya xbajtʼ skontrainik te jaʼnax ay ta swenta stukel Jehová te ya xmantalteswan kʼalal kʼaxemix-a te jmil jaʼbil te ya xmantalaj te Cristoe (Apocalipsis 20:7, 8). Jich ya spasik, melel te Satanás te kolemix lokʼel-ae ya sloʼlay te ants winiketik, ya spas tulan yuʼun ya sjachbey sbikʼtal yoʼtanik jichnix bitʼil spasojnanix-a. Yaniwan spas tulan yuʼun ya schʼuunik te ants winiketik te ya xjuʼ xkuxinik ta sbajtʼelkʼinal manchukme maba ya schʼuunbeyik smantal te Jehová. Ta melel jkʼaxel ma xjuʼ te jich ya xkʼot ta pasele. Jaʼukmeto ya skʼan ya jojkʼoybey jbatik teme ya yikʼ koʼtantik te lotil ya yal te Pukuje. Teme kʼux ta koʼtantik te Jehová sok ya x-abatinotik ta stojol yuʼun te lek yoʼtan sok yuʼun kʼoem ta koʼtantik te jaʼ ay sderecho yuʼun ya xmantalteswan, jkʼaxel ya kilaytik te lotil yuʼun te Pukuje. Spisil-ora ya xbajtʼ jkʼantik te jaʼ ya smantaltesotik te Dios sok skʼuxul yoʼtan.

 KAKʼTIK TA ILEL TE JAʼNAX AY TA SWENTA STUKEL JEHOVÁ TE YA XMANTALTESWANE

13. ¿Bin-utʼil snitojbey sba skʼoplal te skʼayinel stalel Dios sok yakʼel ta ilel te jaʼnax stukel ay ta swenta te ya xmantalteswane?

13 Jich bitʼil la kiltikix, te Jehová ay sderecho yuʼun ya xmantalteswan sok jaʼ lekxan te bitʼil ya spas stukele. Ta melel, chikan ta ilel te ya skʼan ya jkoltaytik sok spisil koʼtantik te jaʼnax ay ta swenta stukel Jehová te ya xmantalteswane. Jich ya kakʼtik ta ilel teme jaʼnax stukel ya kichʼtik ta mukʼ, teme jun koʼtantik ya x-abatinotik ta stojol sok teme ya jkʼayinbeytik stalel. Teme jich ya jpastike, ma jaʼuknax ya kakʼtik ta ilel te lek ya kaʼiytik te bitʼil ya swentainotike, jaʼnix jich te kʼux ta koʼtantik te bitʼil ya smantaltesotike (kʼopona te sjun Efesios 5:1, 2).

14. ¿Bin-utʼil ya xjuʼ ya skʼayinbeyik stalel Jehová te ancianoetik sok te jololetik ta yutil na?

14 Te Biblia ya yalbotik te sok skʼuxul yoʼtan ya xmantalteswan te Jehová. Jaʼ yuʼun te jololetik ta yutil na sok te ancianoetik te kʼux ta yoʼtanik te bitʼil jaʼnax stukel ay ta swenta Jehová te ya xmantalteswane ya skʼayinbeyik stalel, maba tulan yoʼtanik sok ma xsujawanik. Te bin ya spasike jaʼ te ya skʼayinbeyik stalel te Jehová. Jich la spas te jpuk-kʼop Pablo te la skʼayinbey stalel Dios sok te sNichʼane (1 Corintios 11:1). Maba la skʼexlaltes sok maba la suj te yantik ta spasel te bin stojile, la stijbey yoʼtanik sok yutsil yoʼtan (Romanos 12:1; Efesios 4:1; Filemón 8-10). Jaʼ jich ya spas yaʼtel te Jehová. Jich ya skʼan ya spas yaʼtelik-euk te machʼatik kʼux ta yoʼtanik te bitʼil ya xmantalaj Dios sok te ya skoltaybeyik skʼoplale.

15. ¿Bin ya yakʼ ta ilel te tulan skʼoplal ta koʼtantik te jaʼnax ay ta swenta stukel te ya xmantalteswan te Jehovae?

15 ¿Bin-utʼil yan ya xjuʼ ya jkoltaytik te mantaltesel yuʼun te Diose? Jaʼ teme ya jchʼuuntik spasel te bin ya yalbotik te machʼatik akʼbilik yaʼtelik yuʼun te Jehová. Yame jchʼuunbeytik skʼopik manchukme maba ya xkʼot ta lek ta koʼtantik bin yuʼun ay bin la yichʼ tael ta nopel spasel o teme ma jkʼaxeluk akuerdo ayotik soke. Jkʼaxeluk ma pajal sok te bin ya spas te balumilal, jaʼukmeto jichnanix ya skʼan pasel ta mantaltesel yuʼun te Diose (Efesios 5:22, 23; 6:1-3; Hebreos 13:17). Teme ya jchʼuuntik mantal, ya jta jlekilaltik, melel te Jehová jaʼ ya skʼan te bin lekxan ta jtojoltike.

16. ¿Bin-utʼil ya xjuʼ ya yakʼ ta ilel te ya jkoltaybeytik skʼoplal te jaʼnax ay ta swenta Jehová te ya xmantalteswan te bin ya jtatik ta nopel spasele?

 16 Jaʼnix jich te bin ya jtatik ta nopel spasele ya yakʼ ta ilel teme ya jkoltaybeytik skʼoplal te jaʼnax stukel ay ta swenta Jehová te ya xmantalteswan o maʼuke. Te Jehová maba ya yalbotik te bin ya skʼan pasel ta jujunchajp te bin ya jpastike. Te bin ya spase, jaʼ te ya yakʼ jnaʼtik te bin ya snop stukele. Jich bitʼil, maba ya yakʼbotik jun lista te banti ya yal bin kʼuʼul pakʼal ya xjuʼ jtuuntestike, jaʼukmeto ya yalbotik te ya skʼan te stojiluk sok te lekuk ta ilel te jkʼuʼ jpakʼtik jich bitʼil j-abatotik yuʼune (1 Timoteo 2:9, 10). Jaʼnix jich maba ya skʼan te ay machʼa ya skʼojchin yok kuʼuntik sok te manchuk ay machʼa ya yutsʼinbey yoʼtan te bin ya jtatik ta nopel spasele (1 Corintios 10:31-33). Ya kakʼtik ta ilel te kʼux ta koʼtantik te bitʼil ya xmantalaj te Jehová sok te ya jkoltaybeytik skʼoplal kʼalal jaʼ ya jpastik te bin lek ya yil, ma jaʼuk te bin ya skʼan koʼtantike.

Kakʼtik ta ilel ta jkuxlejaltik te jaʼnax ay ta swenta stukel Jehová te ya xmantalteswan te kʼalal ay bin ya jpastik sok ta yutil familia. (Ilawil te parrafo 16 kʼalal ta 18).

17, 18. Ala chaʼoxchajpuk te bitʼil ya yakʼik ta ilel te machʼatik nujpunemik te jaʼnax ay ta swenta stukel Jehová te ya xmantalteswane.

17 Kiltik bin-utʼil te hermanoetik te nujpunemik ya xjuʼ ya yakʼik ta ilel te lek bitʼil ya xmantalteswan te Diose. Ay machʼatik te nujpunemik kʼax tulan yak ta kʼoel ta lokʼel te nujpunel yuʼunik te ma jichuk bitʼil snopojike, ay te machʼatik yato yalik te tojolnax te nujpunike. ¿Bin ya xjuʼ ya spasik? Ya xjuʼ ya snopilanik te bin yilel la yil sba te Jehová sok te nasion Israel. Jaʼnix te Jehová la spaj sba ta smamlal te nasion-abi (Isaías 54:5; 62:4). Jich kʼoem te kʼax chujkʼultik sba te nujpunel yuʼune. Jaʼukmeto te Jehová ma orauk la yijkʼitay te Israele. Ta bayal buelta la spasbey perdon te israeletik sok jun yoʼtan la yakʼ sba ta swenta te chapbil kʼop spasoj sok te israeletike (kʼopona te sjun Salmo 106:43-45). ¿Mabal jichuk te ya yikʼ koʼtantik ta stojol Jehová te kʼuxul oʼtanil te ma x-ijkʼitaywan te ya yakʼ ta ilele?

18 Te j-abatetik yuʼun Dios te nujpunemike ya spasik tulan ta skʼayinbeyel stalel te Jehová. Manchukme chujkʼultik sba te nujpunel yuʼunik, maʼyuk bin ya spasik yuʼun ya schʼoj sbaik jilel teme ma jichuk ya yal te Biblia te ya xjuʼ ta pasele. Snaʼojik te jaʼ nujpunotik yuʼun te Jehová sok te ya skʼan te spisiluk-ora ya sjokin sbaike. Te sJun Dios ya yal te jaʼnax ya xjuʼ ta lajinbeyel sjunal te nujpunel sok te ya xjuʼ te ay machʼa ya xchaʼnujpun teme ay machʼa ta schebalik ya xyal ta mulil (Mateo 19:5, 6, 9). Te kʼalal ya spasik tulan te bantito kʼalal ya xjuʼ yuʼunik swenta lek ya x-ayin te nujpunel yuʼunike yakik ta yakʼel ta ilel te jaʼnax ay ta swenta stukel Jehová te ya xmantalteswane.

19. ¿Bin ya skʼan ya jpastik te kʼalal ay ya xchʼayotike?

19 Ta skaj te jmulawilotik ay ya jpastik te bin ma jichuk ya skʼan te Jehová. Manchukme snaʼojnanix te ay jich ya xkʼot ta pasele, la stikun sNichʼan yuʼun ya yakʼ skuxlejal ta jtojoltik, melel kʼuxotik ta yoʼtan. Jaʼ yuʼun ya skʼan ya jkʼanbeytik perdon te kʼalal ay ya xchʼayotike (1 Juan 2:1, 2). Kijkʼitaytik snaʼulanel ta koʼtantik te bintik ya yutsʼinotik ta swenta te banti ay chʼayemotik. Jaʼ lek te ayuk bin ya jnoptik yuʼun te bin ma lek la jpastike. Teme nopol ya kakʼ jbatik ta stojol Dios, ya spasbotik perdon sok ya slamantes koʼtantik soknix ya skoltayotik yuʼun ma jkom jbatik ta abatinel ta stojol (Salmo 103:3).

20. ¿Bin yuʼun ya skʼan ya kakʼtik ta ilel te jaʼnax ay ta swenta stukel Jehová te ya xmantalteswane?

20 Te Jehová jaʼ ya smantaltes te ants winiketik ta achʼ balumilal, jpisiltik ya jnoptik te tojil beetik yuʼune (Isaías 11:9). Ta ora ini bayal bin yakotikix ta snopel ta swenta te beetik-abi. Kʼax nopolix yorail te maʼyuk machʼa ya yal te maʼyuk sderecho te Jehová yuʼun ya xmantalteswan. Jaʼ yorail te ya kakʼtik ta ilel te jaʼnax ay ta swenta stukel te ya xmantalteswan. Jich ya xjuʼ ya jpastik teme ya jchʼuunbeytik smantal, jun koʼtantik ya x-abatinotik ta stojol sok teme ya jpastik tulan te bantito kʼalal ya xjuʼ kuʼuntik ta skʼayinbeyel stalel ta spisil te bin ya jpastike.