Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) JULIO 2016

Jpuktik ta alel te lek yachʼil kʼop yuʼun te yutsil yoʼtan Dios

Jpuktik ta alel te lek yachʼil kʼop yuʼun te yutsil yoʼtan Dios

«Pero mayuc scʼoblal ta coʼtan te jcuxlejal, ha nax ay scʼoblal te yacuc xhuʼ cuʼun slajinel soc yutsil coʼtan te ahnimal soc te caʼtel quichʼoj yuʼun te Cajwaltic Jesús, ha te yalbeyel scʼoblal te lec yachʼil cʼop yuʼun te yutsil yoʼtan te Diose» (HECHOS 20:24).

KʼAYOJIL 101 SOK 84

1, 2. ¿Bin-utʼil la yakʼ ta ilel te Pablo te la yal wokol yuʼun te yutsil yoʼtan Diose?

TE JPUK-KʼOP Pablo la snuts te jchʼuunjeletike. Jaʼ yuʼun snaʼoj ta lek te ma snujpʼ te ya yichʼ naʼbeyel yoʼbolil sba yuʼun te Diose. Jich yuʼun la yal sok spisil yoʼtan te «ma tojoluc te yutsil yoʼtan» Dios te akʼbot yile (kʼopona 1 Corintios 15:9, 10).

2 Te kʼalal jtebxanix ya skʼan xlaj-a te Pabloe, jich la stsʼibay ta stojol te Timoteo: «Ya calbe wocol te Cajwaltic Cristo Jesús te la yaʼbon yip coʼtan, como la yil te jun coʼtan, hich la yaʼbon quichʼcaʼtel ta stojol» (1 Timoteo 1:12-14). ¿Bin-a te aʼtelil-abi? Te Pablo la yalbey te ancianoetik yuʼun te kongregasion ta lum Éfeso: «Pero mayuc scʼoblal ta coʼtan te jcuxlejal, ha nax ay scʼoblal te yacuc xhuʼ cuʼun slajinel soc yutsil coʼtan te ahnimal soc te caʼtel quichʼoj yuʼun te Cajwaltic Jesús, ha te yalbeyel scʼoblal te lec yachʼil cʼop yuʼun te yutsil yoʼtan te Diose» (Hechos 20:24).

3. ¿Bin aʼtelil te tulan skʼoplal la yichʼ akʼbeyel te Pabloe? (Ilawil te lokʼomba ta sjajchibal te articulo).

3 ¿Bin «lec yachʼil cʼop» la schol te Pabloe? ¿Bin yuʼun te lek yachʼil  kʼop-abi la yakʼ ta ilel ta jamal te yutsil yoʼtan te Diose? Te Pablo jich la yalbey te jchʼuunjeletik yuʼun te lum Éfeso: «Awaʼiyejic te aʼboton caʼtel ta atojolic yuʼun yalbeyel scʼoblal te yutsil yoʼtan Dios» (Efesios 3:1, 2). Te aʼtelil la yichʼ akʼbeyel te Pablo jaʼ te ya scholbey yaʼiy te lek yachʼil kʼop te machʼatik maba judioetik yuʼun jich ya snaʼik te ya xjuʼ ya yichʼik ikʼel swenta ya xmantalteswanik sok te Jesuse (kʼopona te sjun Efesios 3:5-8). Sok bayal sbujtsʼ yoʼtan te Pablo la schol skʼop Dios, jich la yakʼbotik jilel lekil ejemplo ta jtojoltik. Jaʼ jich la yakʼ ta ilel te «ma tojoluc te yutsil yoʼtan» te akʼbot yil yuʼun te Dios.

¿YABAL KAKʼTIK TA ILEL TE YA KALTIK WOKOL YUʼUN TE YUTSIL YOʼTAN TE DIOSE?

4, 5. ¿Bin yuʼun ya kaltik te pajal skʼoplal «te lec yachʼil cʼop» yuʼun te Ajwalinel sok «te lec yachʼil cʼop yuʼun te yutsil yoʼtan te Diose»?

4 Ta slajibal kʼajkʼal ini, te Jehová yakʼojbotik te aʼtelil ta scholel «te lec yachʼil cʼop» yuʼun te Ajwalinele. Yame skʼan te ya jpastik te aʼtelil-abi «ta swohlol bahlumilal [...], scuenta testigo-c’op ta stojol spisil nacionetic» (Mateo 24:14). «Te lec yachʼil cʼop» yuʼun te Ajwalinel pajalnix skʼoplal sok «te lec yachʼil cʼop yuʼun te yutsil yoʼtan te Diose». ¿Bin yuʼun te jich ya kaltike? Melel spisil te bendisionetik ya yichʼ tal te Ajwalinel yuʼun te Diose, yame xkʼot ta pasel ta swenta te yutsil yoʼtan te Jehovae (Efesios 1:3). Te Pablo sok sbujtsʼ yoʼtan la schol skʼop Dios, jich la yakʼ ta ilel te la yal wokol yuʼun te yutsil yoʼtan Dios. ¿Yakotikbal ta stʼunel te stalele? (Kʼopona te sjun Romanos 1:14-16).

5 Ta yan articulo la kiltik te manchukme jmulawilotik ya xjuʼ ya jtatik jlekilaltik ta swenta yutsil yoʼtan Dios. Sok la kiltik te bayal bendisionetik ya yakʼbotik tal te yutsil yoʼtan Dios. Jaʼ yuʼun ay ta jwentatik yalbeyel skʼoplal te yantik ta swenta te skʼuxul yoʼtan te Jehová sok te bin ya skʼan ya spasik swenta ya sta slekilalik yuʼun te kʼuxultayel yuʼun Diose. ¿Bin-utʼil ya xjuʼ ya jkoltaytik te yantik yuʼun ya yalik wokol ta swenta yutsil yoʼtan te Diose?

AKʼA JPUKTIK TA ALEL TE LEK YACHʼIL KʼOP YUʼUN TE LA YAKʼ SBA TA LAJEL TE JESUSE

6, 7. ¿Bin yuʼun te scholbeyel skʼoplal te stojol kolele jaʼ jchajp te bitʼil ya yichʼ pukel te lek yachʼil kʼop yuʼun te yutsil yoʼtan te Diose?

6 Ta kʼajkʼal ini, bayal ta tul ants winiketik maʼyuk bin ya yaʼiyik ta yoʼtan te kʼalal ya spasik mulile. Jaʼ yuʼun ma xkʼot ta yoʼtanik bin-utʼil ya xtuun yuʼunik ta skuxlejalik te bitʼil la yakʼ sba ta lajel te Jesuse. Jich bitʼil yak ta kʼaxel te tiempo tsobolikxan ya yilik te maba stsʼeel yoʼtanik te bitʼil yakik ta kuxinele. Jaʼukmeto te kʼalal ya xkʼopojik sok te testigoetik yuʼun Jehovae, ay chaʼoxtul te ya xkʼot ta yoʼtanik bin ya skʼan ya yal te mulile, bin-utʼil ya x-utsʼinbot skuxlejalik yuʼun, sok te bin ya skʼan ya spasik yuʼun maba ya yichʼikix mosoinel yuʼun te mulile. Teme yuʼun-nix mukʼ skʼoplal ta yoʼtanik-ae, ya yalik wokol te kʼalal ya xjajch snopik ta swenta Dios te bitʼil la stikun tal te sNichʼan ta Balumilal yuʼun ya yakʼotik ta libre yuʼun te mulil sok te lajele. Jaʼnix jich ya snopik te jaʼ jich la spas te Jehová ta skaj te skʼuxul sok yutsil yoʼtan (1 Juan 4:9, 10).

7 Kiltik te bin la yal te Pablo ta swenta te sNichʼan Jehová te kʼax kʼux ta yoʼtane: «Ha ta scuenta te colotic ta libre ta scuenta schʼichʼel, te ay perdón yuʼun mulil, ha chican te scʼuhlejal te yutsil yoʼtan». Jaʼnix jich te Pablo la yal ta swenta-abi te jich la spas Dios ta skaj yutsil yoʼtan (Efesios 1:7). Ta swenta te la yakʼ sba ta lajel te Cristoe jaʼ te bitʼil mukʼxan skʼoplal la yakʼ ta ilel Dios te kʼuxotik ta yoʼtan sok jich ya yakʼ ta ilel te kʼax mukʼ te yutsil yoʼtane. Teme ya kakʼtik schʼuunel koʼtantik ta stojol te Jesús te la yakʼ sba ta lajele, ya xjuʼ ya jtatik perdon yuʼun te jmultik sok maʼyuk bin ya yalbotik te koʼtantike, jich bujtsʼan kʼinal ya kaʼiytik yuʼun (Hebreos 9:14). ¡Kʼax lekil kʼop-abi! ¿Mabal jichuk te ya jkʼan ya jcholbeytik yaʼiy spisil te yantike?

JKOLTAYTIK TE ANTS WINIKETIK TA YAMIGOINEL TE DIOSE

8. ¿Bin yuʼun ya skʼan te ya xchaʼlekubxan yoʼtan te ants winiketik ta stojol Dios?

8 Te machʼatik maʼyuk schʼuunel yoʼtanik ta stojol te bitʼil la yakʼ sba ta lajel te Jesuse, skontratak ya  yil te Diose. Jaʼ yuʼun ay ta jwentatik te ya kalbeytik te ants winiketik te ya xjuʼ ya yamigoinik te Diose. Jich la stsʼibay te jpuk-kʼop Juan: «Te machʼa ya schʼuhun te Nichʼanil ay scuxlejal sbahtel qʼuinal; yan te machʼa ma scʼan ya schʼuhun te Nichʼanil, ma ba ya yil te cuxlejal stuquel, ha ayix ta stojol te yilimba Dios» (Juan 3:36). Ya yakʼ stseʼelil koʼtantik te bitʼil ta swenta slajel te Jesús ya xjuʼ jchaʼlekubtestik koʼtantik ta stojol Dios (ilawil te recuadro «¿Bin ya skʼan ya yal?»). Jich la schol te Pabloe: «Ha nix hichex, ta nahil to namal ayex ta stojol Dios soc ha scontrahex ta scaj apensaric soc ta scaj chopol awaʼtelic, pero ta ora ini, la schaʼlecubtesbeyex awoʼtanic soc ta scuenta te sbaqʼuetal Cristo te laje» (Colosenses 1:21, 22).

9, 10. 1) ¿Bin aʼtelil la yakʼbey Cristo te yermanotak te tsabilik ya xbajtʼik ta chʼulchane? 2) ¿Bin-utʼil ya xkoltaywanik te «yantic tuminchijetic» ta swenta te aʼtelil-abi?

9 Te machʼatik tsabilik te ya xbajtʼik ta chʼulchan akʼbilik yuʼun Cristo ta Balumilal te aʼtelil ta skoltayel te «junuc yoʼtan sbahic ya xcʼoht soc Dios te yantique» (ilawil te recuadro «¿Bin ya skʼan ya yal?»). Jich albotik yuʼun te Pabloe: «Ta spisil ini talem ta stojol Dios, te la yacʼ te jun coʼtan jbahtic cʼohotic soc ta scuenta Cristo, soc la yaʼbotic caʼteltic yuʼun te junuc yoʼtan sbahic ya xcʼoht soc Dios te yantique. Como te Dios, ta scuenta Cristo, la yacʼ te junuc yoʼtan sbahic ya xcʼoht soc Dios te ants-winiquetic, ma ba ichʼbot ta cuenta te smulique, soc la yaʼbotic caʼteltic ta yalel bin utʼil jun yoʼtan sbahic ya xcʼohtic soc Dios. Ha yuʼun ticombilotic yuʼun Cristo, hich cʼohem te bin utʼil Dios yac ta cʼop ta stojolic ta jcuentatic. Ya calbeyex wocol ta scuenta sbihil te Cristo: Junuc me awoʼtan abahic soc Dios» (2 Corintios 5:18-20).

10 Jaʼ jun tʼujbil aʼtelil ya yilik te «yantic tuminchijetic» skoltayel te machʼatik tsabilik te ya xbajtʼik ta chʼulchan ta spasel te aʼtelil-abi (Juan 10:16). Te «yantic tuminchijetic» jich ya x-aʼtejik bitʼil j-alkʼopetik te tikunbilik yuʼun Cristo, jich ya skoltayik te machʼatik ya xbajtʼik ta chʼulchane. Jaʼik te machʼatik jteb ma spisiluk ya snojptesik te ants winiketik ta swenta te smelelil yuʼun te Bibliae. Jaʼnix jich ya skoltayik yuʼun lek ya yamigoinik te Diose. Jaʼ-abi tulan skʼoplal ta pasel ta swenta te aʼtelil yuʼun scholel «te lec yachʼil cʼop yuʼun te yutsil yoʼtan te Diose».

JNOJPTESTIK TE ANTS WINIKETIK TE YA SCHʼAM YAʼIY DIOS TE KʼALAL YA JKʼOPONTIKE

11, 12. ¿Bin yuʼun jaʼ lek yachʼil kʼop ta swenta te ants winiketik te kʼalal ya snopik te ya xjuʼ ya skʼoponik te Jehovae?

11 Bayal ants winiketik ya skʼoponik Dios yuʼun jichlaj lek ya yaʼiy sbaik. Jaʼukmeto ma schʼuunik te yanix ya x-aʼiybot skʼopik yuʼun te Diose. Yame skʼan ya snaʼik te ya schʼam yaʼiy Dios te kʼalal ya yichʼ kʼoponele. Ta jun kʼayojil, jich la yalbey David te Jehovae: «Haʼat yac awaʼiybe scʼop te machʼa ya scʼoponat, spisilic ya xtalic ta atojol. Te cʼalal la yuʼuntayotcotic te bintic chopol, haʼat la apasbotic perdón yuʼun te jmulcotique» (Salmo 65:2, 3).

12 Te Jesús jich la yaltiklanbey te jnopojeletik yuʼune: «Spisil te bin yac acʼambeyic te Jtat ta scuenta jbihil, ya me yaʼbeyex» (Juan 16:23). Ta swenta-abi, te Jesús la skʼan la yal te ya xjuʼ chikan bin ya jkʼanbeytik te Jehová jaʼnax teme akuerdo ay sok te skʼanojel yoʼtane. Ta swenta te Jehová, jich la stsʼibay te Juane: «Ha smucʼul coʼtantic ini ta stojol Dios: teme hich ya jcʼambetic te bin ya scʼan yoʼtan stuquel, ya yaʼiyotic» (1 Juan 5:14). Ya yakʼ stseʼelil koʼtantik skoltayel te ants winiketik yuʼun ya xkʼot ta yoʼtanik te ma jaʼuknax ya xtuun te skʼoponel Dios yuʼun lek ya yaʼiy sbaik. Te skʼoponel Dios ya skoltayotik yuʼun ya xnoptsajotik ta stojol te «mucʼul-huctajibal yuʼun Dios banti ay yutsil-oʼtanil» (Hebreos 4:16). Yame skʼan ya jnojptestik te ants winiketik te bin-utʼil ya skʼan ya skʼoponik Dios, machʼa ya skʼan ya skʼoponik sok bintik ya xjuʼ ya skʼanik. Jich ya jkoltaytik ta yamigoinel te Jehová sok ta stael te smukʼul yoʼtanik kʼalal ayik ta wokole (Salmo 4:1; 145:18).

TE YUTSIL YOʼTAN DIOS «TA PATIL BAHEL»

13, 14. 1) ¿Bintik tʼujbil majtʼanil ya yichʼik te machʼatik tsabilik ya xbajtʼik ta chʼulchan ta pajel chaʼbej? 2) ¿Bin ya xbajtʼ spasik ta stojol te ants winiketik te machʼatik ya xbajtʼik ta chʼulchane?

13 Te Jehová yato yakʼ ta ilelxan te yutsil yoʼtan  «ta patil bahel». ¿Bin–utʼil ya spas? Jaʼ te ya yichʼik mukʼul majtʼanil te 144,000 te ya xmantalajik sok te Cristo ta chʼulchan. ¿Bin-a te mukʼul majtʼanil-abi? Jich la yal te Pabloe: «Pero Dios, te bayel ya xcʼuxultaywan, ta scuenta smucʼul scʼuxul yoʼtan ta jtojoltic pajal la yaʼbotic cuxlejal soc Cristo te cʼalal ayotic to ta mulil a (ha ta scuenta yutsil-oʼtanil te colemex). Soc pajal la schaʼcuxajtesotic tal soc Cristo, soc ha nix la yacʼ huhcajucotic soc ta chʼulchan, scuenta yuʼun ya yacʼ ta ilel ta patil bahel te cʼax bayel scʼuhlejal te yutsil yoʼtan te chican ta scuenta te lec yoʼtan ta jtojoltic ta scuenta Cristo Jesús» (Efesios 2:4-7).

14 Wokol ta nopel ta koʼtantik te bintik tʼujbil yak ta schajpanel Jehová ta stojol te machʼatik tsabilik ya xbajtʼik ta chʼulchan te ya xmantalajik sok te Cristo (Lucas 22:28-30; Filipenses 3:20, 21; 1 Juan 3:2). Te Jehová tʼujbil te bin-utʼil ya yakʼtiklanbey yilik «te cʼax bayel scʼuhlejal te yutsil yoʼtan». Jaʼik ya xkʼotik ta «yachʼil Jerusalén» sok ta achʼix te ya nujpun sok te Cristo (Apocalipsis 3:12; 17:14; 21:2, 9, 10). Ya x-aʼtejik sok te Cristo ta «slecubtesel te nacionetique». Jaʼ-abi ya skʼan ya yal te ya skoltayik te ants winiketik te libre ya xjilik yuʼun te mulil sok te lajele, yuʼun jich ya xkʼotik ta tojil ants winiketik (kʼopona te sjun Apocalipsis 22:1, 2, 17).

15, 16. ¿Bin-utʼil ya yakʼ ta ilel Jehová te yutsil yoʼtan ta stojol te «yantic tuminchijetic» ta achʼ balumilal?

15 Te Efesios 2:7 ya yal te ya yakʼ ta ilel Dios te yutsil yoʼtan «ta patil bahel». Ta yorail-abi, spisil te machʼatik ya xjilik ta kuxinel ta Balumilal yame smulanbeyik «te cʼax bayel scʼuhlejal te yutsil yoʼtan» Dios (Lucas 18:29, 30). Jun te bitʼil ya yakʼ ta ilel Jehová te yutsil yoʼtan ta Balumilale, jaʼ te chaʼkuxajele (Job 14:13-15; Juan 5:28, 29). ¿Machʼatik-a te ya xchaʼkuxajik talele? Jaʼik te j-abatetik yuʼun Dios te jun yoʼtan la yakʼ sbaik ta stojol te lajik bael te kʼalal mato lajem-a te Cristoe. Jaʼnix jich ya xchaʼkuxajik te machʼatik jaʼik te «yantic tuminchijetic» te ya xlajik bael ta slajibal kʼajkʼal. Spisilik-abi yame xchaʼkuxajik sok yame x-abatinikxan ta stojol te Jehovae.

16 Jaʼnix jich te Dios ya schaʼkuxajtes bayal miyon ta tul ants winiketik te maba la snaʼbeyik sbae. Te Juan jich la stsʼibay: «Soc la jquil te machʼatic chamenic, mucʼ biqʼuitetic, tecʼajtic ta stojol te mucʼul-huctajibal. La yichʼ jamel te librohetic, soc ay yan libro la yichʼ jamel, ha te libro scuenta cuxlejal.  La yichʼic ichʼel ta cʼop te machʼatic chamenic, ha chican te bintic tsʼihbalambil ta hunetic, ha chican bin la spasic. Te mar la yacʼ locʼuc tal te machʼatic lajemic tey a, soc te lajel soc te stsobojibal machʼatic chamenic la yaqʼuic loqʼuel tal te machʼatic ayic tey a. Tuhlutuhl ochic ta ichʼel ta cʼop, ha chican bin la spasic» (Apocalipsis 20:12, 13). Te machʼatik ya xchaʼkuxajik talel yame xjuʼ ya snaʼbeyik sba te Jehová sok te ya yakʼ sbaik ta wentainel yuʼun. Yame snopik spasel ta skuxlejalik te mantaliletik ya yal te Biblia sok ya schʼuunik spasel te yachʼil mantaliletik te ya kichʼtik ta «librohetic». Te bintik yachʼil ya kichʼtik albeyel te ya jpastike, jaʼ yan bitʼil ya yakʼ ta ilel te yutsil yoʼtan te Jehová.

JPASTIK TULAN TA SCHOLEL «TE LEC YACHʼIL CʼOP»

17. ¿Bin ya skʼan ya xjul ta koʼtantik te kʼalal ya jcholtik skʼop Diose?

17 Kʼax nopolix slajibal te bintik chopol ta Balumilale. Jaʼ yuʼun tulan skʼoplal te ma jkom jbatik ta scholel «te lec yachʼil cʼop» yuʼun te Ajwalinele (Marcos 13:10). Spisiluk-ora juluk ta koʼtantik te jaʼ ya skʼan ya kakʼbeytik yutsil skʼoplal te Jehová te kʼalal ya jcholtik te sKʼope. ¿Bin-utʼil ya kakʼbeytik yutsil skʼoplal? Jaʼ te kʼalal ya kalbeytik yaʼiy te ants winiketik te spisil te bin ya xbajtʼ jmulantik ta Nichimal Kʼinal yame xkʼot ta pasel ta swenta te tʼujbil yutsil yoʼtan Diose.

Abatinukotik sok sbujtsʼ koʼtantik jich bitʼil «lequil jcanan yuʼun te bayel ta chahp» te yutsil yoʼtan te Diose (1 Pedro 4:10). (Ilawil te parrafo 17 kʼalal ta 19).

18, 19. ¿Bin-utʼil ya xjuʼ ya kalbeytik lek skʼoplal te yutsil yoʼtan te Jehovae?

18 Kʼalal ya jcholtik skʼop Diose, ya xjuʼ ya kalbeytik yaʼiy te ants winiketik te bin ya xkʼot ta pasel kʼalal te Cristo ya xmantalaj ta stojol te Balumilale. Ta yorail-abi te ants winiketik tsʼakal ya yichʼik te lekilal ta swenta te la yakʼ sba ta lajel te Cristo sok kʼunkʼun ya xkʼotik ta tojil ants winiketik. Te Biblia ya yal: «Te bin pasbile ya xʼacʼot ta libre yuʼun te mosohil yuʼun te ya xcʼaʼ, yuʼun pajal ya yichʼ yutsilal soc te al-nichʼanetic yuʼun Dios» (Romanos 8:21). Jaʼ-abi jaʼnax ya xkʼot ta pasel ta swenta yutsil yoʼtan te Jehovae.

19 Jaʼ jun tʼujbil majtʼanil te ya kalbeytik yaʼiy te ants winiketik te bin jamal albil skʼoplal te ya yal te Apocalipsis 21:4, 5. Tey ya yalbey skʼoplal te bin nopol ya spasix Dios ta stojol te ants winiketike: «Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux, como cʼaxix spisil te bintic ay ta nahil to». Teyto ta smukʼul juktajib te Jehová jich ya yal: «Tsʼihbaya ini, como te cʼop ini ay ta ichʼel ta cuenta soc smelelil». Akʼa jcholtik sok sbujtsʼ koʼtantik te lek yachʼil kʼop-abi, jich ya xjuʼ ya kalbeytik lek skʼoplal te yutsil yoʼtan te Jehovae.