Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Agosto yuʼun 2017

¿Bin-utʼil ya xjuʼ te spisiluk-ora jlapojtik te yachʼil kuxlejalile?

¿Bin-utʼil ya xjuʼ te spisiluk-ora jlapojtik te yachʼil kuxlejalile?

«Lapahic me te yachʼil cuxlejal» (EFESIOS 4:24).

KʼAYOJIL 126 SOK 28

1, 2. 1) ¿Bin-utʼil ya jnaʼtik te ya xjuʼ ya jlaptik te yachʼil kuxlejalile? 2) ¿Bin taleliletik yuʼun te yachʼil kuxlejalil ya yalbey skʼoplal te Colosenses 3:10-14?

TA Biblia ya jtatik te kʼopil «yachʼil cuxlejal» (Efesios 4:24; Colosenses 3:10). Jaʼ ya yalbey skʼoplal te talelil «te hich pasbil te bin utʼil ay te Diose». ¿Yanixbal xjuʼ ya jlaptik te yachʼil kuxlejalile? Yak, melel te Jehová la spasotik jich bitʼil yilel stukel. Jich yuʼun ya xjuʼ ya jkʼayinbeytik te tʼujbil taleliletik yuʼune (Génesis 1:26, 27; Efesios 5:1).

2 Te Adán sok te Eva la skʼasesbotik jilel te mulil, jaʼ yuʼun ay bintik chopol ya skʼan koʼtantik. Jaʼnix jich te bin ya xkʼax ta joyobaltik ya xjuʼ te ay bin ya stijotik ta spasel. Jaʼukmeto ya xjuʼ xkʼootik jich bitʼil ya skʼan te Jehová, melel jaʼ ya skoltayotik. Swenta ya stsakxan yip ta koʼtantik te ya jkʼantik te jich ya xkʼootike, ya kilbeytik skʼoplal taleliletik te la scholbey skʼoplal ta Biblia te Pablo yuʼun te yachʼil kuxlejalile (kʼopona te sjun Colosenses  3:10-14). Jaʼnix jich ya kiltik bin-utʼil ya xjuʼ ya kakʼtik ta ilel te kʼalal ya jcholtik skʼop Dios.

JUNUKME YA X-AYINOTIK

3. Ala jchajp talelil yuʼun te yachʼil kuxlejalile.

3 Patil te la stij koʼtantik te Pablo ta slapel te yachʼil kuxlejalil, la yal te jchajp talelil yuʼun te ya xchiknaj ta ilel jaʼ te ma skʼan ya xtsaawanotike. Ta Colosenses 3:11 la yal: «Mayuc griego o judío, teme yichʼoj circuncisión o ma ba yichʼoj circuncisión, bárbaro o jyanlum, moso o machʼa libre ay». Maʼyuk machʼa ya skʼan ya stoy sba ta kongregasion ta skaj stsʼumbal, snasion o stakʼin. ¿Bin yuʼun? Melel te Biblia ya yal te jun kʼoemotik jpisiltik te smelelil j-abatotik yuʼun Dios (Gálatas 3:28).

4. 1) ¿Bin-utʼil ya skʼan ya yil sbaik te j-abatetik yuʼun te Diose? 2) ¿Bin yuʼun ya xjuʼ te wokol ya yaʼiyik te jun ya x-ayinike?

4 Kʼalal ya jlaptik te yachʼil kuxlejalil ya kichʼtik ta mukʼ sok lek skʼoplal kuʼuntik spisil te ants winiketik manchukme yan stsʼumbalik o ay lek o maʼyuk lek stakʼinike (Romanos 2:11). Ay lumetik banti wokol ya yaʼiyik spasel. Jich bitʼil, ta namey talel te ajwalil yuʼun Sudáfrica parte parte la yakʼ machʼatik sak stsʼumbalik, te machʼatik ijkʼ stsʼumbalik sok te kaxlanetik. Jteb ma spisil te Testigoetik teyto ayik ta kuxinel-a. Jaʼukmeto te Jtsojb Jwolwanejetik yoʼtanuk ya stijbeyik yoʼtan te hermanoetik yuʼun ya spas ta skuxlejalik te tsitsel ya yakʼ te 2 Corintios 6:13 te jich ya yale: «Jama awoʼtanic ec». Jaʼ yuʼun ta octubre yuʼun 2013 ay bin yachʼil jajch yakʼik ta pasel yuʼun jich te hermanoetik te ayik ta Sudáfrica lekxan ya snaʼbey sbaik-a.

5, 6. 1) ¿Bin la yichʼ pasel ta Sudáfrica yuʼun junxan ya yakʼ sbaik te hermanoetike? 2) ¿Bintik lek lokʼem yuʼun-a?

5 Te bin la yichʼ pasele jaʼ te cheb kongregasionetik te yan stsʼumbalik o yan skʼopik ya stsob sbaik ta jujun slajibal semana. Pajal ya xlokʼik ta scholel skʼop Dios sok jun-nax ya yaʼiyik tsoblej soknix ya yulaʼtay sbaik. Bayal ta cien kongregasion jich la spasik te bitʼil la yichʼik albeyele. Tey ta Betel bayal bin lek la yaʼiyik stojol ta swenta te bin la yichʼ pasele, ay machʼatik ma Testigoik te ay bin lek la yalik-euk. Jich bitʼil, jtul jwolwanej yuʼun jun relijion la yal: «Maba Testigoon, jaʼukmeto ya kal ta jamal te chajpanbil ta lek te awaʼtelike sok te jun ayex manchukme yanyantik atsʼumbalike». ¿Bin-utʼil koltayotik yuʼun te hermanoetik ta swenta te bin la yichʼ pasele?

6 Ta sjajchibal, jtul hermana te ya xkʼopoj ta xhosa te Noma sbiil te pobre snae ma mero skʼan ya yikʼ tal te hermanoetik te sakike te ayik ta kongregasion inglés te jaʼ skʼopojelike. Jaʼukmeto, ta patil te la sjokinlan ta scholel skʼop Dios sok kʼot ta snaik jich la yal: «¡Jichnix yilelik bitʼil te joʼotike!». Jaʼ yuʼun kʼalal kʼot ta swenta skongregasion te ya yikʼ te hermanoetik yuʼun inglés, la schajpan weʼelil sok la yikʼtiklan chaʼoxtul ta sna. Jtul te machʼa la yikʼ ta sna jaʼ sakil winik te ancianoe. Jich la yal te hermana: «Yan la kil-a te maʼyuk skʼoplal la yil te jujkaj ta kaja yuʼun plastiko te kʼax pekʼele». Te bin la sjachik spasel te hermanoetik yakto ta pasel ta ora ini. Ta swenta te bin yichʼoj pasel bayal yamigotakik staojik te hermanoetik sok jich staojik ta nopel te yato spasikxan tulan ta snaʼbeyelxan sba ta lek hermanoetik te yan stsʼumbalik o yan yilel skuxlejalik.

JLAPTIK TE KʼUXULTAYWANEJ SOK TE LEKIL OʼTANIL

7. ¿Bin yuʼun ma skʼan ya jkom jbatik ta kʼuxultaywanej?

7 Te jayebxan kʼajkʼal ya xkuxinotik ta balumilal te ay ta skʼab te Satanás yato xkʼax jwokoltik ta skaj te maʼyuk kaʼteltik, tulan chamel, nutsel, tulan yikʼal jaʼal sok yantikxan, te elekʼ sok yantikxan wokoliletik. Ya skʼan te ya jnaʼtik kʼuxultaywanej ta melel yuʼun ya xjuʼ te talel kʼaxel ya jkoltay jbatik-a. Te kʼuxultaywanej ya stij koʼtantik ta yakʼel ta ilel slekil koʼtantik (Efesios 4:32). Te taleliletik ini te jaʼ yuʼun te yachʼil  kuxlejalil ya skoltayotik ta skʼayinbeyel stalel te Dios sok ta yakʼbeyel smukʼul yoʼtan te yantike (2 Corintios 1:3, 4).

8. ¿Bin lek ya xlokʼ teme ya jnaʼtik kʼuxultaywanej sok teme ya kakʼtik ta ilel slekil koʼtantike? Ala junuk ejemplo.

8 Ta jkongregasiontik ayniwan hermanoetik te talemik ta yan nasion o te maʼyuk lek stakʼinike. ¿Bin-utʼil ya kakʼbeytik yilik ta lek te slekil koʼtantike? Jaʼ te ya kamigointik sok te ya kakʼbeytik yilik te bayal skʼoplalik ta kongregasion (1 Corintios 12:22, 25). Kiltik te bin kʼot ta stojol te Dannykarl te lokʼ bael ta Filipinas, bajtʼ ta Japón. Ta banti ya x-aʼtej maba lek ya x-ilot ilot jich bitʼil ya x-ilot te machʼatik jaʼ slumalik Japón. Jaʼukmeto ta jun kʼajkʼal bajtʼ ta jun tsoblej yuʼun te testigoetik yuʼun Jehová. Jich yato xjul ta yoʼtan: «Jteb ma spisilik jaʼ slumalik te Japón. Jaʼukmeto sok slekil yoʼtanik la yikʼonik, jich yilel te ya snaʼbonikix jbae». Te hermanoetik ma la skom sbaik ta yakʼel ta ilel slekil yoʼtanik ta stojol, jaʼ koltayot yuʼun ta yamigoinel te Diose. La yichʼ jaʼ, ta ora ini ochem ta anciano. Te yantik ancianoetik ya yalik ta stojol te bayal ya xkoltaywan sok te yinam te Jennifer sbiil. Jich ya yalik: «Te hermanoetik ini maba baem ta yoʼtanik sleel bayal sbilukik, ya yakʼik ta ilel ta stojol yantik bin ya skʼan ya yal te jaʼ nail ya jlejtik te Ajwalinel o Wentainel yuʼun te Diose» (Lucas 12:31).

9, 10. ¿Bintik lek staojik chaʼoxtul hermanoetik yuʼun te snaʼbeyojik yoʼbolil sba te ants winiketike?

9 Te scholel skʼop Dios ya yakʼ «jpastic te bin lec ta pasel ta stojol spisil yantic» (Gálatas 6:10). Bayal Testigoetik jajchem snopbelik yachʼil kʼopil yuʼun ya snaʼbeyik yoʼbolil sba te machʼatik talemik ta yan nasion (1 Corintios 9:23). Bayal bintik lek lokʼem yuʼun. Jich bitʼil, jtul precursora te Tiffany sbiil te jaʼ slumal Australia yoʼtanuk ya xkoltaywan ta jun kongregasion ta kʼopil suajili te ay ta lum Brisbane. Manchukme mero wokol la yaʼiy snopel te kʼopile, jich la yaʼiy te bayal bin tʼujbil la sta ta skuxlejale. Jich ya yal: «Te machʼa ya skʼan te bayal bintik tʼujbil ya sta te kʼalal ya schol skʼop Diose, yame skʼan te ya xbajtʼ ta abatinel ta jun kongregasion ta yan kʼopil. Jaʼ jich kʼoem te ya xbaat ta yan lum, manchukme maba ya xlokʼat baele. Sok ya xjuʼ ya amulan te bitʼil jun-nax ayik te hermanoetik ta swolol Balumilal».

¿Bin ya stijbey yoʼtan te j-abatetik yuʼun Dios ta skoltayel te machʼatik talemik ta yan nasion? (Ilawil te parrafo 10).

10 Ta ora ini, kiltik te bin la spas jun familia yuʼun Japón. Te yantsil snichʼanik te Sakiko sbiil jich ya yal: «Ta yaʼbilal talel 1990 bayal ants winiketik te talemik ta Brasil ya jtakotik te kʼalal ya jcholkotik te skʼop Diose. Kʼalal ya jkʼoponbeykotik ta sBibliaik te ay ta portugués textoetik jich bitʼil te Apocalipsis 21:3, 4 o Salmo 37:10, 11, 29 ya schʼam yaʼiyik ta lek sok ay yato x-okʼik yuʼun-a». Te familia ini ay bin tijbot yoʼtanik ta spasel yuʼun te la snaʼbeyik yoʼbolil sbaike. Te Sakiko jich ya yalxan: «Kʼalal la kilkotik te yoʼtan ya snaʼbeyik sba te  Jehová la jtakotik ta nopel te ya xjajch jnopkotik portugués». Ta patil bael koltaywanik ta sjachel jun kongregasion ta kʼopil portugués. Te kʼalal kʼax talel te jaʼbil juʼ skoltaybelik bayal ants winiketik te yan slumalik yuʼun ya x-ochik ta j-abatetik yuʼun te Jehová. Te Sakiko jich ya yal: «Mero la jpastik tulan yuʼun jich ya xnojp kuʼunkotik-a te kʼopile, jaʼukmeto bayal bintik lek jtaojtik yuʼun. Ya kalbeykotik bayal wokol te Jehová» (kʼopona te sjun Hechos 10:34, 35).

JLAPTIK TE PEKʼEL-OʼTANILE

11, 12. 1) ¿Bin yuʼun ya skʼan te lekuk te bin ya stij koʼtantik ta slapel te yachʼil kuxlejalile? 2) ¿Bin ya skoltayotik yuʼun spisil-ora ya kakʼtik ta ilel spekʼelil koʼtantike?

11 Te bin ya skʼan ya stij koʼtantik ta slapel te yachʼil kuxlejalil jaʼ te akʼa yichʼ ichʼel ta mukʼ te Jehová, ma jaʼuk te joʼotike. Juluk ta koʼtantik te ay jtul tojil chʼul-abat la spas te bin chopol ta skaj te la stoy sbae (paja sok te sjun Ezequiel 28:17). Te joʼotike wokolxan ya kaʼiytik spʼajel te toybail, melel jmulawilotik. Manchukme jich-abi, ya xjuʼ ya jlaptik te pekʼel-oʼtanile. ¿Bin-utʼil?

12 Ya skʼan ya jlokʼestik tiempo ta jujun kʼajkʼal yuʼun ya jkʼopontik te Biblia sok ya jnopilantik ta koʼtantik (Deuteronomio 17:18-20). Jchajp te bin ya skoltayotik jaʼ te ya jpastik pensar te bintik la yakʼ ta nopel te Jesús sok te kʼax tʼujbil ejemplo la yakʼ ta ilel yuʼun te pekʼel-oʼtanile (Mateo 20:28). Kʼax pekʼel yoʼtan stukel te la spokbey yok te jpuk-kʼopetik yuʼune (Juan 13:12-17). Jaʼnix jich ya skʼan te spisiluk-ora ya jkʼanbeytik schʼul espiritu te Jehová yuʼun ya skoltayotik ta slokʼesel ta koʼtantik teme ay jich ya kaʼiy jbatik te toyolxan jkʼoplaltik ta stojol te yantike (Gálatas 6:3, 4; Filipenses 2:3).

13. ¿Bintik lek ya jtatik teme pekʼel koʼtantike?

13 (Kʼopona te sjun Proverbios 22:4). Te Jehová ya skʼan te spisil te j-abatotik yuʼun ya kakʼtik ta ilel spekʼelil koʼtantik. Teme pekʼel koʼtantik bayal bintik lek ya jtatik yuʼun. Jich bitʼil, ya xkoltaywanotik yuʼun jun-nax ya x-ayinotik ta kongregasion sok te ayuk lamalkʼinale. Jaʼnix jich te Jehová ya yakʼ kiltik te yutsil yoʼtane. Te jpuk-kʼop Pedro jich la yal: «Ta apisilic, talel cʼaxel me xachʼuhumbe aba amandaric, peqʼuel me xawacʼ abahic, como hich ya yal: Dios ya scontrahin te jtoybahetic, pero ya scʼuxultay te machʼatic peqʼuel yoʼtanic» (1 Pedro 5:5).

JLAPTIK TE MANSO-OʼTANIL SOK AKʼA JNAʼTIK MALAB

14. ¿Machʼa kʼax lekil ejemplo ta yakʼel ta ilel te lamal-oʼtanil sok te ya snaʼ malab?

14 Ta ora ini ay machʼatik ya yalik te maʼyuk yip yoʼtanik te machʼatik manso o lamalnax yoʼtanik sok te ya snaʼik malab, jaʼukmeto ma jichuk-abi. Te tʼujbil taleliletik ini talemik ta stojol Jehová te jaʼ machʼa ayxan yuʼel ta spisil te bintik aye. Te Jehová jaʼ te lekilxan ejemplo ta yakʼel ta ilel lamal-oʼtanil sok te ya snaʼ maliywanej (2 Pedro 3:9). Jich ya jtatik ta ilel ta swenta te bin la sutbey te Abraham sok te Lot ta swenta te chʼul-abatetik yuʼune (Génesis 18:22-33; 19:18-21). Jaʼnix jich ya jtatik ta ilel ta swenta te kʼaxem ta mil quinientos jaʼbil la snaʼ malab te Jehová ta stojol te jkʼaxunkʼop nasion Israel (Ezequiel 33:11).

15. ¿Bin ejemplo la yakʼ ta jtojoltik te Jesuse?

15 Te Jesús «manso» la yakʼ sba ta Balumilal (Mateo 11:29). Ma orauk ilin te kʼalal ay ya xchʼayik-a te jnopojeletik yuʼune. Kʼalal xtaluk ta Balumilal kujch yuʼun te la yichʼ leel ta kʼop yuʼun te jwolwanejetik yuʼun te relijionetik sok te jichnax la slebeyik smul. Jaʼnix jich, manso yoʼtan sok la snaʼ malab jaʼto te kʼalal laje. Te kʼalal ay ta wokol yuʼun te jelawen skʼuxul te jipil ta teʼ, la skʼanbey te Jehová te yakuk spasbey perdon te machʼatik yak ta milel yuʼune. Jich la yal: «Ma snaʼic bin yac spasbelic» (Lucas 23:34). Jich bitʼil la kiltikix, te Jesús manso yoʼtan sok la snaʼ malab manchukme jkʼaxel la yaʼiy wokol. ¡Kʼax lekil ejemplo la yakʼ ta jtojoltik! (Kʼopona te 1 Pedro 2:21-23).

16. ¿Bin-utʼil ya xjuʼ ya kakʼtik ta ilel te manso koʼtantik sok te ya jnaʼtik malabe?

 16 ¿Bin-utʼil ya xjuʼ ya kakʼtik ta ilel te manso koʼtantik sok te ya jnaʼtik malabe? Jun te bin-utʼil jaʼ te ya jpasbeytik perdon te yantike. Te Pablo jich la stsʼibay ta stojol te jchʼuunjeletike: «Talel cʼaxel xawaʼbe aba awil yutsil awoʼtanic soc cʼuxultaywanej, talel cʼaxel xapasbe abahic perdón, hich te bin utʼil Dios la spasbeyex perdón ta scuenta Cristo» (Efesios 4:32). Chikan ta ilel te ya skʼan te manso koʼtantik sok te ya jnaʼtik malab swenta ya xjuʼ jchʼuuntik te bin ya spasotik ta mantal te texto-abi. Te kʼalal jich ya jpastike ya xkoltaywanotik yuʼun jun ya x-ayin te kongregasione.

17. ¿Bin yuʼun kʼax mukʼ skʼoplal te manso koʼtantik sok te jnaʼtik malabe?

17 Te Jehová ya spasotik ta mantal te ya jlaptik te manso-oʼtanil sok te snaʼel malabe. Teme ya jkʼantik te ya xkuxinotik ta yachʼil Balumilal puersa ya skʼan ya x-ayin kuʼuntik te taleliletik ini (Mateo 5:5; Santiago 1:21). Te bin mukʼxan skʼoplal ya xlokʼ kuʼuntik teme ya kakʼtik ta ilel te taleliletik-abi, jaʼ te ya kichʼtik ta mukʼ te Jehová sok ya jkoltaytik te jpatxujktik ta schʼuunel spasel te bin ya yakʼ ta nopel te Biblia (Gálatas 6:1; 2 Timoteo 2:24, 25).

JLAPTIK TE KUXUL OʼTANIL

18. ¿Bin-utʼil snitojbey sba skʼoplal te kʼuxul oʼtanil sok te ma xtsaawanotike?

18 Spisil te taleliletik te la kilbeytik skʼoplal ta articulo ini snitojbey sba skʼoplal sok te kʼuxul oʼtanil. Jich bitʼil, te jpuk-kʼop Santiago puersa la stojobtes te yermanotak, melel jaʼ lekxan ya yilik te machʼatik ay stakʼinik te bitʼil te machʼatik maʼyuk lek stakʼinike. La yaltiklanbey te ma jichuk ya yakʼ ta nopel te tsitsel ini: «Cʼux me xawaʼiy ta awoʼtan te apat-axuhc hich te bin utʼil cʼux yac awaʼiy aba». Jich la yalxan: «Teme tsahbil nax machʼa yac awichʼic ta cuenta, yac ata amulic» (Santiago 2:8, 9). Teme kʼux ta koʼtantik te jpatxujktik maʼyuk machʼa ya jpʼajtik ta skaj stsʼumbal, te maba bayal snopoj jun o ta skaj teme ay lek o maʼyuk lek stakʼin. Ma xjuʼ te sbanax ya kakʼtik ta ilel te ma xtsaawanotik, ya skʼan te jich jtaleltik ta melel.

19. ¿Bin yuʼun tulan skʼoplal te ya jlaptik te kʼuxul oʼtanil?

19 Te kʼuxul oʼtanil jaʼnix jich «ya xcuhch yuʼun, bayel yutsil yoʼtan» sok «ma stoy sba» (1 Corintios 13:4). Jich yuʼun ya skʼan te ya jnaʼtik malab, te ayuk slekil koʼtantik sok te pekʼeluk koʼtantik swenta ma jkom jbatik ta yakʼbeyel snop te ants winiketik skʼoplal te Ajwalinel yuʼun Dios (Mateo 28:19). Jaʼnix jich te taleliletik ini ya skoltayotik yuʼun leknax ya kil jbatik sok spisil te kermanotaktik ta kongregasion. Teme ya kakʼtik ta ilel te kʼuxul oʼtanil-abi junxan ya x-ayin te kongregasionetik sok ya yichʼik ta mukʼ te Jehová. Jaʼnix jich ay ants winiketik te ya x-ikʼbot yoʼtanik yuʼun ta snaʼbeyel skʼoplal te smelelil kʼope. Jaʼ yuʼun jich ya xlaj scholbel te Biblia skʼoplal te yachʼil kuxlejalil: «Ta sba spisil ini, lapahic te cʼuxul-oʼtanil, te ha ya xchuc spisil te jun ya xcʼohtic ta mero smelelil» (Colosenses 3:14).

ACHʼUBENUKME SPISIL-ORA JPENSARTIK

20. 1) ¿Bin jojkʼoyeletik ya skʼan ya jpasbey jbatik, sok bin yuʼun? 2) ¿Bin yakotik ta smaliyel sok spisil koʼtantik?

20 Jpisiltik ya skʼan ya jojkʼoybey jbatik ini: «¿Binxan ya xjuʼ ya jpas swenta maʼyuk bin-ora ya jchaʼlap te jpokol kuxlejale?». Ya skʼan te ya kalbeytik wokol te Jehová te yakuk skoltayotik sok te ya jpastik tulan te bantito kʼalal ya xjuʼ kuʼuntik ta slokʼesel chopol pensaril sok te bintik ma lek ta pasel te ya smakotik ta yichʼel te Ajwalinel o Wentainel yuʼun te Diose (Gálatas 5:19-21). Jaʼnix jich ya skʼan ya jojkʼoybey jbatik ini: «¿Yakontobal ta sjelel jpensar swenta lek ya yilon te Jehovae?». Te jayebto tiempo jmulawilotiktoe, te achʼubtesel sok te slapel te yachʼil kuxlejalil spisil-ora ya skʼan ya jpastik bael (Efesios 4:23, 24). ¡Kʼax tʼujbil ya xkʼot te kuxlejalil kʼalal spisil tojikix-a te ants winiketik sok te sbajtʼelkʼinal slapojik te yachʼil kuxlejalil!