Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Agosto yuʼun 2016

¿Kʼoembal ta koʼtantik te tulan skʼoplal te ya jpʼijubtestik te yantike?

¿Kʼoembal ta koʼtantik te tulan skʼoplal te ya jpʼijubtestik te yantike?

«Ya caʼbeyex lequil nohptesel» (PROVERBIOS 4:2).

KʼAYOJIL 93 SOK 96

1, 2. ¿Bin yuʼun ya skʼan ya jpʼijubtestik te yantik swenta ya yichʼ yaʼtelik ta swenta Dios?

TE Jesús la spas tulan ta scholbeyel skʼoplal te lek yachʼil kʼop yuʼun te Ajwalinele. Jaʼukmeto la slokʼes bayal tiempo ta spʼijubtesel te jnopojeletik yuʼune. La snojptes swenta ya xkʼotik ta lekil jpʼijubteswanejetik sok ya xkʼotik jich bitʼil lekil jkanantuminchijetik te ya skanantayik te j-abatetik yuʼun Dios (Mateo 10:5-7). Te Felipe jaʼ jtul j-abat yuʼun Dios te spisil-ora la schol skʼop Dios. Jaʼukmeto la snojptes-euk te yantsil snichʼnab ta scholel skʼop Dios (Hechos 21:8, 9). Ta ora ini jaʼnix jich ya skʼan ya jpʼijubtestik te yantike. ¿Bin yuʼun?

2 Ta kongregasionetik ta swolol Balumilal ay bayal ants winiketik te mato jaluk la snopik te smelelil yuʼun Biblia sok mato yichʼojik jaʼ. Te ants winiketik-abi ya skʼan ya jpʼijubtestik. Ya skʼan ya jkoltaytik swenta ya xkʼot ta yoʼtanik bin yuʼun lek te ya snopik skʼoponel te Biblia sok snopel ta stukelike. Sok ya skʼan ya jpʼijubtestik ta scholel skʼop Dios sok ta snojptesel te yantik ta swenta te Ajwalinele. Te hermanoetik te mato jaluk la yichʼik jaʼ jaʼnix jich ya skʼan ya yichʼik pʼijubtesel swenta ya x-ochik ta siervo ministerial o ta  anciano. Spisil te kongregasion bayal bin ya xjuʼ ya spas ta skoltayel te machʼatik yachʼiliktoe (Proverbios 4:2).

KAKʼBEYTIK SNOP TE MACHʼA YACHʼILIKTO TE AKʼA SNOPIK TE BIBLIA TA STUKELIK

3, 4. 1) Jich bitʼil la yal te Pablo, ¿bin-utʼil snitojbey sba skʼoplal te snopel te Biblia sok te scholel skʼop Diose? 2) Swenta ya jtijbeytik yoʼtan te yantik ta snopel ta stukelik te Biblia, ¿bin ya skʼan ya jpastik?

3 Jpisiltik te machʼatik ya x-abatinotik ta stojol te Jehová ya skʼan ya jkʼopontik sok ya jnoptik te Biblia yuʼun jich ya jnaʼtik bin-a te skʼanojel yoʼtane. Te jpuk-kʼop Pablo jich la scholbey te yermanotak ta lum Colosas, la yal: «Ma ba ya xquehchajotcotic ta scʼoponel Dios ta atojolic, ha ya jcʼambecotic te yacuc snojesbeyex ta awoʼtanic snaʼel bin ya scʼan yoʼtan», te jaʼ te skʼanojel yoʼtan te Diose. ¿Bin yuʼun tulan skʼoplal te ya skʼoponik sok ya snopik te sJun Dios te jnopojeletik-abi? Jich bitʼil la yal te Pablo teme jich ya spasike ya sta spʼijilik sok ya xkuxinik jich bitʼil ya skʼan te Jehová te jich lek ya x-ilotik yuʼun-a. Sok jich ya xjuʼ yuʼunik spasel «spisil lequil aʼteliletic» te ya smulan te Jehová, kʼaxemtoxan-a kʼalal ya scholik skʼop Diose (Colosenses 1:9, 10). Jaʼ yuʼun kʼalal ya kakʼtik nojptesel yuʼun Biblia jkoltaytik te ants winiketik te akʼa kʼotuk ta yoʼtanik te bitʼil te skʼoponel sok snopel te Biblia ta spisil-ora ya xkoltayotik ta abatinel ta stojol Jehová.

4 Teme ya jkʼan ya jtijbeytik yoʼtan te machʼa ya kakʼbeytik nojptesel te yakuk skʼoponik te Biblia ta stukelik, ya skʼan te jichnix ya jkʼopontik-euk. Skʼoponel te Biblia ta spisil-ora sok snopilanel ta koʼtantik ya skoltayotik ta jkuxlejaltik sok ta scholel skʼop Dios. Jich bitʼil teme ay machʼa ya spasbotik jun tulan jojkʼoyel te kʼalal yakotik ta scholel skʼop Dios, ya xjuʼ ya kakʼbeytik sujtib ta Biblia. O kʼalal ya jkʼopontik bitʼil te Jesús, te Pablo sok te yantik te maba la skom sbaik ta scholel skʼop Dios, ya yakʼ yip koʼtantik sok ya jcholtik te skʼop Dios manchuk maba kʼun ta pasel. Kʼalal ya kalbeytik yaʼiy te yantik te bin jnopojtik ta Biblia sok te bin-utʼil skoltayojotik, jichniwan ya xtijbot yoʼtanik ta snopel ta skʼubulil-euk swenta ya sta slekilalik-a.

5. Ala junuk bin-utʼil ya xjuʼ ya jkoltaytik te machʼa ya kakʼbeytik nojptesel ta Biblia swenta spisiluk-ora ya skʼopon te Biblia ta stukel.

5 Ayniwan ya jojkʼoybey jbatik bin-utʼil ya xjuʼ ya jkoltaytik te machʼa ya jnojptestik ta Biblia swenta spisiluk-ora ya skʼopon te Bibliae. Ya xjuʼ ya kakʼbeytik yil bin-utʼil ta chajpanel te bin ya xbajtʼ jnoptik soke. Jich bitʼil, ya xjuʼ ya kalbeytik te yakuk sle te versiculoetik te ayik ta parrafoetike. Teme jaʼ yakotik ta snopel te libro Snopel te Bibliae, ya xjuʼ ya kalbeytik te yakuk skʼopon te bin ya yalbeyxan skʼoplal te apéndice yuʼun te libro. Ta patil ya xjuʼ ya kakʼbeytik yil bin-utʼil ya schajpan sba ta swenta te tsoblejetik  yuʼun jich ya yakʼ skomentario. Ya xjuʼ ya jtijbeytik yoʼtan ta skʼoponel spisil te revistaetik Te J-ilkʼinal ta toyol sok te ¡Despertad! Soknix teme ya jnojptestik ta stael sujtib te jojkʼoyeletik yuʼun Biblia, ya xjuʼ ya jtuuntestik te programa ay ta komputadora Watchtower Library o te BIBLIOTECA TA INTERNET Watchtower. Kʼalal ya stuuntes te bayal ta chajp te bitʼil ya xjuʼ ya jnoptik te Bibliae, yame smulan sok ya skʼan ya snopxan.

6. 1) ¿Bin utʼil ya xjuʼ ya akoltay te machʼa ya anojptes ta Biblia swenta ya skʼuxultay te sKʼop Diose? 2) ¿Binwan ya xjuʼ ya spas te machʼa ya anojptes teme kʼux la yaʼiy ta yoʼtan te Bibliae?

6 Kʼalal ay machʼa ya jnojptestik ta Biblia, ya jkʼantik te yakuk xkʼot ta yoʼtan te bayal skʼoplal te Bibliae, melel ya xkoltayot ta snaʼbeyelxan sba ta lek te Jehovae. Akʼa jkoltaytik yuʼun ya smulan snopel te Biblia, jaʼukmeto mame jsujtik ta spasel. Kʼalal ya snaʼbeyxan skʼoplal te Biblia ya xbajtʼ smulanxan snopel. Jichniwan ya yaʼiy sba bitʼil te machʼa la stsʼibay te salmo te jich la yale: «Lec te nopol ayon ta stojol Dios. La jcacʼ te ha smucʼul coʼtan te Cajwaltic Jehová» (Salmo 73:28). Ta smelelil jaʼnix te schʼul espiritu te Jehová ya skoltay te machʼa yakotik ta spʼijubtesele yuʼun ya skʼan ya xkʼot ta yamigo.

JNOJPTESTIK TE MACHʼA YACHʼILIKTO TA SCHOLEL SKʼOP DIOS SOK TA NOJPTESWANEJ

7. ¿Bin-utʼil la schajpan te Jesús te jnopojeletik yuʼun ta scholbeyel skʼoplal te Ajwalinele? (Ilawil te lokʼomba ta sjajchibal te articulo).

7 Bayal bin ya xjuʼ ya jnoptik ta swenta te bin-utʼil te Jesús la spʼijubtes te jnopojeletik yuʼune. La schol skʼop Dios sok te jnopojeletike, jich la yilik bin-utʼil nojpteswan. Te Jesús la yal te bintik ya skʼan ya spasik kʼalal ya scholik te skʼop Diose (Mateo, kapitulo 10) [1] (ilawil te nota ta slajibal te articulo). Te jpuk-kʼopetik maba jal la snopik te bin-utʼil ya yakʼik ta nopel te smelelil kʼop yuʼun te Dios (Mateo 11:1). Kiltik chaʼchajp te bin ya xjuʼ ya kakʼbeytik snop te machʼatik yachʼilikto kʼalal yakotik ta scholel skʼop Diose.

8, 9. 1) ¿Bin-utʼil ya skʼopon-a te Jesús te ants winiketike? 2) ¿Bin koltayel ya xjuʼ ya kakʼbeytik te yachʼil jcholkʼopetik swenta ya xkʼopojik sok te ants winiketik te bitʼil la spas te Jesuse?

8 Kʼalal ya xkʼopojotik sok te ants winiketike. Te Jesús maba spisiluk-ora la skʼopon ta mukʼul tsobol jtsojb te ants winiketike. Jteb ma spisiluk-ora la snojptes ta jujuntul. Sok spisil-ora la yakʼ ta ilel slekil yoʼtan. Jich bitʼil ta jun buelta kʼopoj sok jtul ants te bajtʼ slokʼes jaʼ ta jun poso te nopol ay ta lum Sicar (Juan 4:5-30). Ta yan buelta kʼopoj sok jtul jkʼan patanil te Mateo Leví sbiil. Te Jesús la yikʼ swenta ya x-och ta jnopojel yuʼun, te Mateo la schʼuun. Ta patil te winik-abi la yikʼ ta weʼel te Jesús sok yantik ta sna. Tey-a, te Jesús kʼopoj sok bayal ta tul ants winiketik (Mateo 9:9; Lucas 5:27-39).

Teme ya kakʼtik ta ilel slekil sok yutsil koʼtantik ta stojol te ants winiketik, jichniwan ya skʼan ya yaʼiyik te bin ya jcholbeytik

9 Jtul winik te Natanael sbiil ay bin maba lek la yal ta stojol te ants winiketik yuʼun Nazaret, te jaʼ slumal te Jesuse. Manchukme jich-abi, te Jesús la yakʼ ta ilel slekil yoʼtan ta stojol. Jaʼ yuʼun, te Natanael jelon te bin snopoj ta swenta te Jesús sok la skʼan la snopxan ta stojol  (Juan 1:46-51). ¿Bin ya snojptesotik te bin la spas te Jesuse? Teme ya kakʼtik ta ilel slekil sok yutsil koʼtantik ta stojol te ants winiketik, jichniwan ya skʼan ya yaʼiyik stojol te bin ya jcholbeytike [2] (ilawil te nota ta slajibal te articulo). Jnojptestik te machʼa yachʼilikto swenta ya yakʼik ta ilel lekil oʼtanil sok utsil oʼtanil. Jich ya smulanikxan ta lek te scholel skʼop Diose.

10-12. 1) ¿Bin la spas te Jesús swenta ya skʼanikxan snopel skʼop Dios te ants winiketike? 2) ¿Bin-utʼil ya xjuʼ ya jkoltaytik te yachʼil jcholkʼopetik swenta lekil jpʼijubteswanej ya xkʼotik yuʼun te smelelil kʼope?

10 Snojptesel te machʼatik ya skʼanik yaʼiyel skʼop Diose. Te Jesús maʼyuk bin-ora jochol. Jaʼukmeto kʼalal te ants winiketik la smulanik yaʼiyel skʼop Diose, la yakʼbey stiempoil sok bayal bintik la yakʼbey snopik. Jich bitʼil, ta jun buelta jtsojb ants winiketik kʼotik ta stiʼil jaʼ swenta ya schʼam yaʼiyik te Jesuse. Jich mo ta jun barko sok te Pedroe tey jajch snojptes te ants winiketike. Ta patil-abi ay bin la skʼan la yakʼbey snop te Pedro. La spas jun milagro kʼalal la skoltay ta stsakel bayal chayetik. Ta patil la yalbey: «Yoʼtic jtsob-ants-winiquetic ya xcʼohat». Te Biblia ya yal te oranax te Pedro sok te machʼatik ayik soke «la sloqʼueslanic hilel ta tiʼhaʼ te sbarcohic, tey ora la yihquitayic hilel spisil a». Jich ochik ta jnopojel yuʼun te Jesús (Lucas 5:1-11).

11 Jtul winik te Nicodemo sbiil jaʼnix jich la skʼan la snopxan ta swenta te Jesús. Jaʼukmeto jaʼ jtul te machʼa yichʼoj yaʼtel ta Sanedrín yuʼun te judioetik. Jaʼ yuʼun ya sxiʼ te ay bin ya yalik te yantik teme ya x-ilot te yak ta kʼop sok te Jesuse. Jaʼ yuʼun bajtʼ yulaʼtay te Jesús ta ajkʼabal. Te Jesús lek la yil te bitʼil kʼote, la slokʼes tiempo ta skʼoponel sok la scholbey te bintik smelelil te tulan skʼoplal (Juan 3:1, 2). Te Jesús spisil-ora la slokʼes stiempo ta snojptesel te smelelil kʼop ta stojol te ants winiketik sok ta yakʼbeyel yip te schʼuunel yoʼtanike. Jaʼnix jich ya skʼan chapalukotik ta schaʼulaʼtayel te ants winiketik kʼalal ya xjuʼ yuʼunik sok ta slokʼesel jtiempotik ta skoltayel yuʼun ya yichʼbeyik swentail te bin ya yal te Bibliae.

12 Kʼalal ya jcholtik skʼop Dios sok te machʼatik yachʼiliktoe, ya xjuʼ ya jnojptestik ta schaʼulaʼtayel te ants winiketik te ya skʼanikxan snopele. Jichnix ya xjuʼ ya kikʼtik ta schaʼulaʼtayel te ants winiketik sok ta yakʼel nojptesel yuʼun Biblia. Jich ya snopik ta lek pʼijubteswanej ta Biblia soknix ya x-akʼbot stseʼelil yoʼtanik skoltayel te yantik ta snaʼbeyel sba te Jehovae. Ta patil ta stukelik ya schaʼulaʼtayik te ants winiketik sok ya yakʼik nojptesel yuʼun Biblia. Jaʼnix jich, ya snopik smaliyel sok maba ya skom sbaik ta ora teme maba nakal ya staik te ants winiketike (Gálatas 5:22) (ilawil te recuadro « Maba la skom sba ta sleel»).

JNOJPTESTIK TE MACHʼA YACHʼILIKTO TA SKOLTAYEL TE HERMANOETIKE

13, 14. 1) ¿Bin ya jnoptik yuʼun te hermanoetik te la spasik tulan ta skoltayel te yantike? 2) ¿Bintik-utʼil ya xjuʼ ya jnojptestik te jchʼieletik sok te machʼa yachʼilikto swenta ya yakʼik ta ilel kʼuxul oʼtanil ta stojol te hermanoetike?

13 Te Jehová ya skʼan te j-abatetik yuʼune kʼuxuk ya yaʼiy sbaik sok te ya skoltay sbaik jich bitʼil yermano sbaike (kʼopona te sjun Lucas 22:24-27 sok te 1 Pedro 1:22). Te Biblia ya yal ta swenta Jesús te la skoltay te ants winiketik te bantito kʼalal juʼ yuʼune. Sok lato yakʼ skuxlejal ta jwentatik (Mateo 20:28). Jtul jchʼuunjel ants yuʼun Cristo te Dorcas sbiil spisil-ora kʼayem ta spasel-a te bin lek ta stojol te yantike (Hechos 9:36, 39). Sok ay yan ants te María sbiil jichnix bayal aʼtej ta stojol te yermanotak ta Roma (Romanos 16:6). ¿Bin-utʼil ya xjuʼ ya jkoltaytik te machʼatik yachʼilikto swenta ya xkʼot ta yoʼtanik te tulan skʼoplal spasel te bin lek ta stojol te yantike?

Jnojptestik te machʼa yachʼilikto ta yakʼel ta ilel kʼuxul oʼtanil ta stojol te hermanoetik sok ta yakʼel koltayel. (Ilawil te parrafo 13 sok 14).

14 Te machʼatik yachʼiliktoe ya xjuʼ ya kikʼtik  bael ta yulaʼtayel te hermanoetik te ayix yaʼbilalik o te machʼatik ayik ta chamele. Te meʼil tatiletik ya xjuʼ ya yikʼik bael te yal snichʼnabik kʼalal jich ya xjuʼ ta pasele. Te ancianoetik ya xjuʼ ya skʼanbeyik te jchʼieletik o te machʼa yachʼilikto te yakuk yichʼbeyik bael sweʼelik te machʼa ayix yaʼbilalik o te ya schaʼpasbeyik te bin jinem ta snaike. Kʼalal te jchʼieletik sok te machʼa yachʼilikto ya yilik bitʼil te hermanoetik talel kʼaxel ya skanantay sbaike, jaʼnix jich ya snopik spasel. Kiltik bin kʼayem ta spasel-a jtul anciano. Kʼalal ya schol skʼop Dios ta jpam tut lum, ya yulaʼtay te hermanoetik te tey slumalik swenta ya snaʼ bin yilel ayik. Ta swenta te lekil ejemplo-abi, jtul jchʼiel kerem te bayal buelta la sjokin te hermano la snop te ya skʼan kʼuxuk aʼiybilik ta oʼtanil ya yaʼiy sbaik spisil te hermanoetik yuʼun te kongregasion (Romanos 12:10).

15. ¿Bin yuʼun tulan skʼoplal te ya yilik te ancianoetik te bin-utʼil yakik ta chʼiel ta swenta skʼop Dios te hermanoetik ta kongregasion?

15 Te Jehová ya stuuntes winiketik swenta ya yakʼ ta nopel sKʼop ta kongregasion. Jaʼ yuʼun tulan skʼoplal te ya snopik bin-utʼil ya xnojpteswanik ta lek ta sdiscursoik te hermanoetike. Te ancianoetik ya xjuʼ ya skoltay te hermanoetik-abi swenta ya snopik spasel. Jich bitʼil, ya xjuʼ ya schʼambey yaʼiyik te sdiscurso jtul siervo ministerial kʼalal yak ta schajpanel-ae (Nehemías 8:8) [3] (ilawil te nota ta slajibal te articulo).

16, 17. 1) ¿Bin-utʼil la yakʼ ta ilel te Pablo te tulan skʼoplal la yil te bitʼil ya xchʼi ta swenta skʼop Dios te Timoteoe? 2) ¿Bin-utʼil te ancianoetik ya xjuʼ ya spʼijubtesik te hermanoetik swenta ya xkʼotik ta ancianoil ta patil?

16 Yato skʼan ya yichʼik pʼijubtesel bayalxan hermanoetik swenta ya xkʼotik ta jkanantuminchijetik ta kongregasion (ilawil te recuadro «¿Bin ya skʼan ya yal?»). Te Pablo la spʼijubtes te Timoteo sok la yalbey te akʼa spʼijubtes yantik. La yakʼbey te tsitsel ini: «Ayuc me yip awoʼtan ta scuenta te yutsil-oʼtanil te ay ta scuenta te Cristo Jesús. Te bintic awaʼiyej cuʼun ta stojol tsobol testigohetic ha me xawaʼbe snop winiquetic te jun yoʼtanic, te ya xhuʼ ya yaʼbeyic snop yantic» (2 Timoteo 2:1, 2). Te Timoteo bayal bin la snop ta stojol te Pablo te jaʼ anciano sok jpuk-kʼop-a, jich bitʼil te slekubtesel te bin-utʼil ta cholel skʼop Dios sok bin-utʼil ta koltayel yantik ta kongregasion (2 Timoteo 3:10-12).

17 Te Pablo la slokʼes bayal tiempo ta skoltayel te Timoteo, melel jaʼ la skʼan te pʼijubenuk ta lek (Hechos 16:1-5). ¿Bin-utʼil ya xjuʼ ya stʼunbeyik stalel te Pablo te ancianoetike? Jaʼ te kʼalal ya yikʼik te siervo ministerialetik te pʼijubenikix ta lek ta yulaʼtayel hermanoetik. Jich te siervo ministerialetik ya snopik snojptesel te yantik sok ya snopik smaliyel sok yakʼel ta ilel kʼuxul  oʼtanil. Jaʼnix jich ya snopik sleel te tojobtesel yuʼun Jehová swenta ya skanantayik te j-abatetik yuʼune (1 Pedro 5:2).

KʼAX TULAN SKʼOPLAL TE YA JPʼIJUBTESTIK TE YANTIKE

18. ¿Bin yuʼun tulan skʼoplal schajpanel te yantik ta swenta te yaʼtel te Jehovae?

18 Ta slajibal kʼajkʼal ayotik ini, bayal te machʼatik yachʼiliktoe, ya skʼan ya yichʼik pʼijubtesel swenta ya slekubtesikxan te bitʼil ya scholik skʼop Diose. Jaʼnix jich yato skʼan te ayuk hermanoetik te ya snopik skanantayel te kongregasione. Te Jehová jaʼ ya skʼan te pʼijubenik ta lek spisil te j-abatetik yuʼune, jaʼ yuʼun yakʼojbotik te aʼtelil ta skoltayel te machʼa yachʼiliktoe. Jaʼ yuʼun mukʼ skʼoplal te ya jpastik tulan ta spʼijubtesel te yantik jich bin-utʼil la spas te Jesús sok te Pablo. Ya skʼan ya jpʼijubtestik yantik chikan bantito kʼalal ya xjuʼ kuʼuntik, melel bayalto bin ya skʼan pasel ta swenta scholel skʼop Dios jich bitʼil mato talem te slajibal te bintik chopol ta Balumilale.

19. ¿Bin yuʼun schʼuunoj awoʼtan te lek bintik ya xlokʼ teme ya apas tulan ta spʼijubtesel te kermanotaktike?

19 Spʼijubtesel te machʼa yachʼiliktoe ya skʼan tiempo sok spasel tulan. Jaʼukmeto schʼuunej koʼtantik te bitʼil te Jehová sok Jesús ya skoltayotik ta snaʼel bin-utʼil ya kakʼbeytik te pʼijubtesel te lekxane. Ya xbajtʼ yakʼ stseʼelil koʼtantik yilel te ya spasik tulan swenta ya x-aʼtejik ta kongregasion sok ta scholel skʼop Dios (1 Timoteo 4:10). Jaʼnix jich, te joʼotike ya skʼan ya jpastik tulan te ya xchʼiotik ta swenta skʼop Diose, slekubtesel te jtaleltik sok te ya kamigointikxan ta lek te Jehovae.

^ [1] (parrafo 7): Jich bitʼil, te Jesús la yalbey te jnopojeletik te ya skʼan ya spasik ini: 1) cholbeyel skʼoplal te lek yachʼil kʼop yuʼun te Ajwalinele, 2) te ya smukʼulin yoʼtanik Jehová te jaʼ ya x-akʼbotik yuʼun te sweʼelik sok te skʼuʼ spakʼik, 3) te maba ya stsak sbaik ta kʼop sok te ants winiketik, 4) te ya smukʼulin yoʼtanik Jehová kʼalal ya yichʼik nutsele, 5) sok te maba ya xiwik te ay bin ya xjuʼ ya yichʼik pasbeyel yuʼun te ants winiketike.

^ [2] (parrafo 9): Ilawil te libro Benefíciese de la Escuela del Ministerio Teocrático, pajina 62 kʼalal ta 64. Tey ya ata te bin-utʼil ya xjuʼ xkʼopojat sok te ants winiketik ta scholel skʼop Dios.

^ [3] (parrafo 15): Ilawil te libro Benefíciese de la Escuela del Ministerio Teocrático, pajina 52 kʼalal ta 61. Tey ya ata te bintik ya xjuʼ ya skoltay te hermanoetik ta slekubteselxan te bin-utʼil ya xnojpteswanik ta kongregasion.