Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) AGOSTO 2016

¿Yabal xkʼot ta koʼtantik te ya skʼan ya xchʼiotikxan ta swenta skʼop Diose?

¿Yabal xkʼot ta koʼtantik te ya skʼan ya xchʼiotikxan ta swenta skʼop Diose?

«Aʼtelina yilel te Shun Dios, soc aʼtelina tsitsaw soc pʼijubteswanej» (1 TIMOTEO 4:13).

KʼAYOJIL 45 SOK 70

1, 2. 1) ¿Bin-utʼil kʼoem ta pasel te bin ya yal te Isaías 60:22 ta slajibal kʼajkʼal ayotike? 2) ¿Bintik ya skʼan pasel ta organisasion yuʼun te Jehovae?

«TE MACHʼA tut, ta mil ya xcʼoht; te ihtsʼinal ya xcʼoht ta jun nación te ay yip» (Isaías 60:22). Te albilkʼop-abi yak ta kʼoel ta pasel ta slajibal kʼajkʼal te ayotike. Ta jaʼbil 2015 ayix-a 8,220,105 testigoetik yuʼun Jehová te yakik ta scholel skʼop Dios ta swolol Balumilal. Te Jehová jich la yal ta swenta te bitʼil ya xchʼi te lum yuʼune: «Hoʼon Jehovahon, ta yorahil ya jcʼohtes ta pasel ta ora». Jaʼ-abi ya skʼan ya yal te aytoxan bayal kaʼteltik. ¿Yakotikixbal ta scholbeyel sok ta yakʼel ta nopel skʼoplal te Ajwalinel yuʼun Dios chikan te bantito kʼalal ya xjuʼ ta pasele? Bayal machʼatik yakik ta aʼtel ta precursor regular sok ta auxiliar. Ay yantik ya xbajtʼik ta yan lugar swenta ya xkoltaywanik ta scholel skʼop Dios. Yantikxan yakik ta tulan aʼtel ta spasel sNail Tsoblejetik.

2 Ta jujun jaʼbil ya xjajch jteb ma sta 2,000 kongregasionetik. Te kongregasionetik-abi ya skʼan ancianoetik sok siervo ministerialetik. Jaʼ yuʼun, ta jujun jaʼbil ya skʼan bayal ta mil machʼatik ya x-ochik ta siervo ministerial sok bayal ta mil ya x-ochik ta ancianoil. Chikan ta ilel ta ay bayal bin ya xjuʼ ya jpastik ta swenta «yaʼtel  te Cajwaltic» manchukme hermanootik o hermanaotik (1 Corintios 15:58).

¿BIN YA SKʼAN PASEL SWENTA YA XCHʼIOTIKXAN TA SWENTA SKʼOP DIOSE?

3, 4. ¿Bintik ya xjuʼ ya jtatik ta nopel spasel ta jkuxlejaltik ta swenta yaʼtel Dios?

3 (Kʼopona te 1 Timoteo 3:1). Te jpuk-kʼop Pablo lek la yalbey skʼoplal te hermanoetik te «yoʼtanuc ya yichʼ» yaʼtelik ta kongregasion. Te bin la yal te Pablo ya yakʼ xjul ta koʼtantik jtul ants winik te ya spas tulan ta stael te bin namal aye. Jich bitʼil, jnoptik te ay jtul hermano te ya skʼan ya x-och ta siervo ministerial. Yaniwan yil te ya skʼan ya spas tulan swenta ya xchʼi ta yoʼtan te lekil taleliletik yuʼun te j-abat yuʼun Dios. Kʼalal jich juʼemix yuʼun sok te staojix yaʼtel ta siervo ministerial, yame yakʼbeyxan yipal ta spasel te bintik ya yichʼ kʼanbeyel yuʼun ya xkʼot ta ancianoil.

4 Ay chaʼoxtul hermanoetik yakik ta sjelel skuxlejalik swenta ya x-abatinikxan ta stojol te Jehovae. Ayniwan ya skʼan ya x-ochik ta precursor, ya x-aʼtejik ta Betel o ta spasel sNail Tsoblejetik. Kiltik bin-utʼil ya xjuʼ ya skoltayotik te Biblia swenta ya xchʼiotikxan ta spasel yaʼtel te Diose.

CHʼIUKOTIKXAN TA SWENTA SKʼOP DIOS

5. Jich bitʼil lekto ayik te jchʼieletike, ¿bin-utʼil ya xjuʼ x-aʼtejikxan ta swenta te Ajwalinele?

5 Te jchʼieletik lekto ayik sok ay yipik, jaʼ yuʼun bayal bin ya xjuʼ ya spasik ta swenta te Jehová (kʼopona te sjun Proverbios 20:29). Ay chaʼoxtul jchʼieletik te ayik ta Betel ya spasik imprimir sok ya spasik libroetik. Ay yantikxan te ya xkoltaywanik ta spasel o slekubtesel sNail Tsoblejetik. Ay yantik te ya xkoltaywanik ta swenta te machʼatik ya staik wokol yuʼun te tulan yikʼal jaʼal. Bayal ta tul te jaʼik precursoretik ya snopik yan kʼopil o ya xbajtʼik ta yan lugar ta scholel skʼop Dios.

6-8. 1) ¿Bin koltayot yuʼun jtul jchʼiel kerem swenta ya smulan te yaʼtel ta stojol Dios, sok bin kʼot ta lokʼel yuʼun-a? 2) ¿Bin-utʼil ya xjuʼ ya jtatik ta ilel te «lec yoʼtan te Jehová»?

6 Manchukme kʼux ta koʼtantik te Jehová sok ya jkʼan ya kakʼbeytik te bin lekxan ay kuʼuntike, ayniwan jich ya kaʼiy jbatik bitʼil jtul hermano te Aaron sbiile. Jaʼ ya skʼan-a te ya smulan te bin ya spas ta stojol te Jehová, jaʼukmeto maba tseʼel yoʼtan ya yaʼiy sba. Ta yalalilto ya xkʼot ta tsoblej sok ya schol skʼop Dios, jaʼukmeto spisil-ora ya xchʼajub. ¿Bin la spas?

7 La spas tulan ta skʼoponel te Biblia ta jujun kʼajkʼal, schajpanel sba ta swenta tsoblejetik sok ta yakʼel skomentario. Jaʼnix jich, jajch skʼopon Dios ta spisil-ora. Spisil-abi koltayot yuʼun chʼi ta swenta te skʼop Dios. La snaʼbey sba ta lek te Jehová jich jajch skʼuxultayxan ta lek. Jich tseʼel yoʼtan la yaʼiy sba yuʼun. Och ta precursor, koltaywan ta lugaretik te la staik wokol yuʼun te tulan yikʼal jaʼal sok bajtʼ ta scholel skʼop Dios ta yan nasion. Ta ora ini ochem ta anciano sok ay ta Betel. ¿Bin-utʼil ya yaʼiy sba? Ya yal te yiloj te «lec yoʼtan te Jehová». Jaʼnix jich ya yaʼiy sba te ay sbet sok te Jehová sok ya skʼan ya x-aʼtejxan ta stojol. Snaʼoj te kʼalal jich ya spase ya sta bayal bendisionetik.

8 Jtul te machʼa la stsʼibay jun salmo jich la yal: «Pasahic prueba, ilawilic lec yoʼtan te Jehová». Sok la yalxan: «Te machʼatic ya slehic te Jehová mayuc bin ya xpasbot falta yuʼun te bin leque» (kʼopona te sjun Salmo 34:8-10). Kʼalal jaʼ ya kakʼbeytik te bin lekxan te Jehová tseʼel koʼtan ya kaʼiy jbatik, melel jnaʼojtik te jich ya smulane. Jich te Jehová ya skʼotes ta pasel te bitʼil jamal yaloj te ya skanantayotike.

MAME XLUJBOTIK

9, 10. ¿Bin yuʼun tulan skʼoplal te ya jnaʼtik smaliyel te bin ya jkʼantike?

9 Ayniwan bayalxan te bin ya jkʼantik spasel  ta stojol Jehová. Jaʼukmeto ¿jaxan teme bayalix tiempo yakotik ta smaliyel te ya kichʼtik akʼbeyel jun aʼtelil ta kongregasion o te ay bin ya xjelon ta jkuxlejaltike? Teme jich ya xkʼot ta jtojoltike, akʼa jnaʼtik smaliyel (Miqueas 7:7). Te Jehová yaniwan yakʼ te jich ya x-ayinotikxan. Jaʼukmeto akʼa smukʼulin koʼtantik te ya skoltayotike. Jnop kaʼiytik ta stojol te Abraham. Te Jehová la yalbey ta jamal te ya yakʼbey jtul snichʼan, jaʼukmeto bayal jaʼbil kʼax swenta ayin te Isaac. Kʼalal yak ta smaliyel-a te Abraham, maba animaj yoʼtan sok maʼyuk bin-ora chʼay schʼuunel yoʼtan ta stojol Jehová (Génesis 15:3, 4; 21:5; Hebreos 6:12-15).

10 Ta melel maba kʼun te smaliyele (Proverbios 13:12). Jaʼukmeto teme jaʼ ya xbajtʼ ta koʼtantik snopilanel te bin maba jtaojtike ya xchebaj koʼtantik yuʼun. Jaʼ lek te ya jtuuntestik te tiempo ta schʼitesel te taleliletik te ya xtuun kuʼuntik ta patil ta spasel te aʼtelil ta kongregasion. Kiltik oxchajp te bin ya xjuʼ ya jpastik te kʼalal yakotik ta smaliyele.

Te skʼoponel Biblia sok snopilanel ta koʼtantike, ya yakʼ jpʼijiltik sok ya yakʼ jnoptik ta lek te bin ya jpastike

11. 1) ¿Bintik talelil ya xjuʼ ya jpastik tulan ta stael? 2) ¿Bin yuʼun tulan skʼoplal te jich ya jpastike?

11 Chʼitestik ta koʼtantik te taleliletik te ya xtuun kuʼuntike. Teme ya jkʼopontik te Biblia sok ya jnopilan ta koʼtantik te bin ya jkʼopontike, ya jta jpʼijiltik, ya jnaʼtik pensar ta lek sok ya jnoptik ta lek te bin ya jpastike. Kʼax tulan skʼoplal te ya yakʼik ta ilel te hermanoetik te taleliletik-abi swenta ya skanantayik te kongregasion (Proverbios 1:1-4; Tito 1:7-9). Kʼalal ya jnoptik te Bibliae, ya jtatik ta ilel te bintik snopjibal te Jehová. Ta jujun kʼajkʼal ya xjuʼ ya jtuuntestik te bin jnopojtik kʼalal ay bin ya jtatik ta nopel spasel te ya smulan te Diose. Jich bitʼil, ya jnaʼtik bitʼil ya kiltik te yantike, bin-utʼil ta tuuntesel ta lek te takʼin sok bin-utʼil ya jtsatik ta lek te jkʼuʼ jpakʼtik o te bin ya jkʼasestik kʼajkʼal-ae.

12. ¿Bin-utʼil ya yakʼik ta ilel te machʼatik ayik ta kongregasion te ya xjuʼ ya kakʼ smukʼul koʼtantik ta stojolike?

12 Jpastik tulan ta spasel ta lek te aʼteliletik te ya kichʼtik akʼbeyele. Kʼalal yakik ta schaʼpasel-a te templo yuʼun Dios te lum yuʼune, te Nehemías la stuuntes bayal winiketik te ya spasik bayal aʼteliletik. ¿Machʼatik la stsa? Jaʼ te machʼatik lek albil skʼoplalike. Snaʼoj te kʼux ta yoʼtanik te Dios sok te ya spasik ta lek biluk aʼtelil te ya x-akʼbotike (Nehemías 7:2; 13:12, 13). Jaʼnix jich ta ora ini, teme jtul hermano jun yoʼtan ya yakʼ sba sok tulan ya x-aʼtej, lekme ya yichʼ albeyel skʼoplal ta stojol yantik. Jich yuʼun yaniwan sta yantik aʼteliletik (1 Corintios 4:2). Manchukme winikotik o antsotik, spisiluk-ora akʼa jpastik ta lek te aʼtelil te ya kichʼtik akʼbeyele (kʼopona te 1 Timoteo 5:25).

13. ¿Bin-utʼil ya jtʼunbeytik stalel te José kʼalal ay machʼa ay bin ya spasbotik te ma stojiluke?

13 Jkʼanbeytik koltayel te Jehová. Kʼalal ay machʼa ay bin ya spasbotik te ma stojiluke, ¿bin ya xjuʼ ya jpastik? Ya xjuʼ ya jcholbeytik bin yaʼiyel ya kaʼiy jbatik. Jaʼukmeto teme jaʼ ya xbajtʼ ta koʼtantik te ya jkoltay jbatik yuʼun jich ya kakʼtik ta ilel te ma jaʼuk jmultike, ya xjuʼ xbatsʼej te kʼope. Jnop kaʼiytik te bin lek la spas te  José. Maba lek ilot yuʼun te sbankiltak, ta patil lebot smul te maba spasoj sok otsesot ta karsel. Jaʼukmeto la sle koltayel ta stojol Jehová. La snop ta yoʼtan te bin jamal yaloj ya spas te Jehová sok jun yoʼtan la yakʼ sba ta stojol (Salmo 105:19). Kʼalal yak ta kʼaxel swokol-ae, la schʼites ta yoʼtan lekil taleliletik te jaʼ koltayot yuʼun te kʼalal la yichʼ jun aʼtelil te tulan skʼoplale (Génesis 41:37-44; 45:4-8). Teme ay machʼa ay bin la spasbotik te ma stojiluke, akʼa jkʼanbey jpʼijiltik te Jehová. Jaʼ ya skoltayotik te lamaluk sok te ayuk slekil koʼtantik kʼalal ya xkʼopojotik sok te machʼa la yutsʼinotike (kʼopona te 1 Pedro 5:10).

CHʼIUKOTIKXAN TA SCHOLEL SKʼOP DIOS

14, 15. 1) ¿Bin yuʼun ya skʼan ya jtsajtaytik spisil-ora te bitʼil ya jcholtik skʼop Diose? 2) ¿Bin ya xjuʼ ya apas swenta ya acholbey skʼop Dios te ants winiketik manchukme yanyantik yilel-a te skuxlejalike? (Ilawil te lokʼombaetik ta sjajchibal te articulo sok te recuadro « ¿Yabal xjuʼ ya jletik yan bintik-utʼil ya jcholtik skʼop Diose?»).

14 Te Pablo la yalbey te Timoteo te ya skʼan ya slekubtesxan bael te bitʼil ya schol skʼop Dios.  Sok jich la yalbey: «Tsahtaya aba soc tsahtaya te bin yac awacʼ ta nopele» (1 Timoteo 4:13, 16). Te Timoteo pʼijubenix ta scholel skʼop Dios-a. ¿Bin yuʼun-abi te ya skʼan te ya slekubtesxane? Jaʼ yuʼun te bitʼil ya xjelon skuxlejal te ants winiketik soknix te bintik ya xkʼax ta stojolike. Teme yato skʼan ya x-aʼiybot te bin ya yal te Timoteoe, ya skʼan ya slekubtesxan sok ya sjelontes te bitʼil ya xnojpteswane. Jichnix ya skʼan ya jpastik kʼalal ya jcholtik skʼop Diose.

15 Kʼalal ya jcholtik skʼop Diose, ay maba ya jtatik ta snaik te ants winiketik. Ta yantik lugar ayikniwan ta snaik, jaʼukmeto maba ya xjuʼ x-ochotik ta mukʼul naetik yuʼunik o banti ayik ta nainele. Teme jich ya xkʼax ta jtojoltike, yaniwan skʼan ya jletik yan bintik-utʼil ya xjuʼ ya jcholbeytik yaʼiyik skʼop Dios.

16. ¿Bin-utʼil lek ya xlokʼ kuʼuntik te scholel skʼop Dios te banti ya xkʼax bayal ants winiketike?

16 Bayal hermanoetik ya smulanik scholel skʼop Dios te banti ya xkʼax bayal ants winiketik, jich bitʼil banti ya xchojtaj te tren sok autobus, ta merkadoetik sok ta parke. ¿Bin-utʼil ya sjach te yaʼiyejike? Ay chaʼoxtul te ya yalbeyik skʼoplal jun yachʼil notisia. Ay yantik ya yalbeyik te ants winik te bin lek skʼoplal ta swenta te yal snichʼnabik o ay bin ya sjojkʼoybeyik ta swenta yaʼtelik. Teme ya yilik te ya smulane, ya yalbeyik skʼoplal te bin ya yal te Biblia sok ya sjojkʼoybeyik bin ya snop ta swenta. Jich te hermanoetik leknax ya xjuʼ xkʼopojik sok te ants winiketik ta swenta te Bibliae.

17, 18. 1) ¿Bin ya skoltayotik swenta maba ya xiwotik ta scholel skʼop Dios te banti ya xkʼax bayal ants winiketike? 2) ¿Bin yuʼun ya akuy te ya xjuʼ ya skoltayat te kʼalal ya achol skʼop Dios te jichnix ya akʼan ya apas bitʼil te David kʼalal la yalbey yutsilal te Jehová?

17 Ayniwan wokol ya kaʼiytik sjachel jun aʼiyej ta kaye sok te machʼatik maba ya jnaʼbeytik sbae. Jich kʼax ta stojol te Eddie, te jaʼ jtul precursor ta lum Nueva York. ¿Bin koltayot ta schʼayel te xiwel kʼalal ya schol skʼop Diose? Ya yal te kʼalal ya yichʼik ta mukʼ Dios ta sjunal snae, te Eddie sok te yinam ya sleik junetik te ya xkoltayotik ta yakʼbeyel sujtib te bintik ya xmakawanik ta kʼop-a te ants winiketik soknix ta swenta te bintik ya snopike. Soknix ya skʼanbeyik koltayel yantik Testigoetik. Ta ora ini te Eddie bayal ya smulanix scholel skʼop Dios te banti ya xkʼax bayal ants winiketik.

18 Teme ya jmulantikxan sok ya jlekubtestik te bitʼil ya jcholtik skʼop Diose, te yantik ya yilik te yakotik ta chʼiel ta swenta skʼop Dios (kʼopona te 1 Timoteo 4:15). Yawan xjuʼ ay machʼa ya jkoltaytik yuʼun ya x-och ta Testigo. Te David la yal: «Ya calbe yutsil scʼoblal Jehová ta spisil ora; spisil ora ay ta que scʼayojtaybeyel yutsilal. Ay yutsil qʼuinal ya caʼiy yuʼun te Jehová; ya me yaʼiyic te machʼatic peqʼuel ayic soc tseʼel me yoʼtanic yuʼun» (Salmo 34:1, 2).

AKʼA CHʼIUKOTIKXAN SWENTA YA KICHʼTIK TA MUKʼ TE JEHOVÁ

19. ¿Bin yuʼun tseʼel yoʼtan ya yaʼiy sba jtul j-abat yuʼun Jehová te jun yoʼtan yakʼoj sba manchukme ma xjuʼ yuʼun spasel te bantito kʼalal ya skʼane?

19 Te David la yalxan: «¡Ya me yalbat yutsil acʼoblal, Jehová, spisil te bintic apasoj; soc ya me yalbat yutsil acʼoblal te machʼatic awuʼun te chʼultesbilique! Ya me yalbeyic scʼoblal te yutsilal te cuentahinel awuʼun, soc ya me yalbeyic scʼoblal awuʼel, scuenta yuʼun ya yaʼbe snaʼic spisil ants-winiquetic te bintic apasoj ta awuʼel soc te smucʼul yutsilal te cuentahinel awuʼune» (Salmo 145:10-12). Te machʼatik kʼux ta yoʼtanik te Jehová sok jun yoʼtanik ta stojol ta spisil yoʼtan ya skʼan ya scholbeyik skʼoplal ta stojol te ants winiketike. Jaʼukmeto teme ayix bayal kaʼbilaltik o ayotik ta chamel maniwan xjuʼ kuʼuntik scholel skʼop Dios ta nanatik jich bitʼil ya jkʼan ya jpastike. ¿Bin ya xjuʼ ya jpastik? Spisil-ora juluk ta koʼtantik te ya kakʼbeytik  yutsilal te Jehová kʼalal ya kalbeytik skʼoplal ta stojol te machʼa ayotik soke, jich bitʼil te doctoretik o te enfermeraetik. ¿Jaxan teme ayotik ta karsel ta skaj te bin jchʼuunejtike? Manchukme jich-abi, yaniwan xjuʼ xkʼopojotik sok yantik ta swenta te Jehová. Jaʼ-abi ya x-akʼbot bayal stseʼelil yoʼtan yuʼun (Proverbios 27:11). Jaʼ nix jich tseʼel yoʼtan yuʼun kʼalal ya x-abatinotik ta stojol manchukme maba jich ya spas te jfamiliatike (1 Pedro 3:1-4). Kʼalal ayotik ta tulan wokolil jichnix ya xjuʼ ya kakʼbeytik yutsilal te Jehová, yamigoinelxan ta lek sok te ya xchʼiotikxan ta swenta sKʼope.

20, 21. ¿Bin-utʼil ya xtijbot yoʼtan te yantik te bitʼil yakotik ta chʼiel ta swenta skʼop Diose?

20 Ta melel, te Jehová ya yakʼbotik bendision teme ya kamigointikxan sok teme ya x-abatinotik ta lek te bantito kʼalal ya xjuʼ kuʼuntike. Teme ya jelontestik te bin-ora ya jcholtik skʼop Dios o te bin ya jpas ta jkuxlejaltike, ya xjuʼ kuʼuntik skoltayelxan te ants winiketik ta snaʼel te bintik tʼujbil yaloj ta jamal ya spas te Diose. Sok yaniwan xjuʼ ya jkoltaytikxan-a te kermanotaktike. Kʼalal ya yilik te ya jpastik tulan ta abatinel ta kongregasion ya xbajtʼ skʼanotikxan.

21 Chikan jayebix jaʼbil yakotik ta abatinel ta stojol Jehová, jpisiltik ya xjuʼ ya kamigointikxan ta lek sok te ya xchʼiotikxan ta swenta te sKʼope. Ta yan articulo ya kiltik bin-utʼil ya xjuʼ ya jkoltaytik te yantik yuʼun ya xchʼiik ta swenta skʼop Diose.