Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) FEBRERO 2016

Akʼa jtʼunbeytik stalel te yamigotak Jehová

Akʼa jtʼunbeytik stalel te yamigotak Jehová

«Te Jehová jun yoʼtan soc te machʼatic ya yichʼic ta mucʼ.» (SALMO 25:14)

KʼAYOJIL 106 SOK 118

1-3. 1) ¿Bin yuʼun ya jnaʼtik te ya xjuʼ ya kamigointik te Diose? 2) ¿Machʼatik ya kilbeytik skʼoplal ta articulo ini?

TE Biblia ya yal oxeb buelta te jaʼ yamigo (o jun yoʼtan) sba sok Jehová te Abrahame (2 Crónicas 20:7; Isaías 41:8; Santiago 2:23TNM). Ta Biblia maʼyuk yan machʼa jich ya sbiiltes. ¿Yuʼunbal ya skʼan ya yal te ma xjuʼ ya kamigointikix te Diose? Maʼuk. Jpisiltik ya xjuʼ ya jmulantik te mukʼul majtʼanil-abi. ¿Bin-utʼil ya jnaʼtik?

2 Te Biblia bayal ya yalbey skʼoplal ta swenta winiketik sok antsetik te la spasik tulan ta schʼuunbeyel smantal te Jehová, la yakʼ schʼuunel yoʼtanik sok la yamigoinik te Diose (kʼopona te sjun Salmo 25:14). Jaʼik skʼoplal te «tsobol ta tuhl testigohetic» te la yalbey skʼoplal te jpuk-kʼop Pabloe (Hebreos 12:1).

3 Ta articulo ini, yame kilbeytik te bin lek la spasik oxtul ants winiketik te ya yalbey skʼoplal ta Biblia te la yamigoinik te Diose. Ta sbabial ya kalbeytik skʼoplal te Rut, jaʼ jtul ants te talem ta lum Moab te la yakʼ ta ilel te jun yoʼtan la yakʼ sbae. Ta patil ya kalbeytik skʼoplal te Ezequías, jaʼ jtul tojil ajwalil ta Judá. Ta slajibal ya kalbeytik skʼoplal te María te pekʼel yoʼtane, jaʼ te smeʼ Jesús. Yame kiltik bael bin la spasik ta jujuntul swenta jich la yamigoinik te Diose.

 TE RUT JUN YOʼTAN LA YAKʼ SBA

4, 5. 1) ¿Bin-a te wokolniwan ta nopel la yaʼiy spasel te Rute? 2) ¿Bin yuʼun te wokol la yaʼiye? (Ilawil te lokʼomba ta sjajchibal te articuloe.)

4 Te Noemí jaʼ tul Israel ants te yak ta lokʼel bael ta Moab swenta ya xkʼot kʼalal ta Israel. Jokinbil bael yuʼun te chaʼtul yalibe, jaʼ te Rut sok Orfa. Te kʼalal ayik ta bee la snop ta yoʼtan te ya sujt bael ta Moab te Orfa. Jaʼukmeto te Noemí yakʼoj ta yoʼtan te ya xkʼot ta Israel. ¿Binwan ya snop-euk te Rute? ¿Yabal sujt bael ta lum Moab swenta ya sjokin te sfamiliae? ¿O yabal sjokin bael te Noemí te jaʼ yalib meʼele? (Rut 1:1-8, 14.) Jaʼ ini wokolniwan ta nopel la yaʼiy spasel te Rute. ¿Bin yuʼun?

5 Te ayuk la snop ya sujt bael ta Moab te Rute, ya xjuʼ ya sujt bael ta sna sok jichniwan ya skanantay te sfamiliae. Jaʼnix jich tey ya xkuxin sok-a te machʼatik pajal skuxlejalik soke, soknix te pajal skʼop yaʼiyejike. Te Noemí ma xjuʼ ya yalbey ta jamal te Rut te ya yakʼbey spisil-abi te kʼalal ayikix ta Israel-ae. Te Noemí la smel yoʼtan yuʼun te maniwan ya xjuʼ ya skoltay ta stael te machʼa ya xjuʼ xnujpun sok o jun familia. Jaʼ yuʼun la yalbey te yakuk sujt bael ta Moab te Rute. Jich bitʼil la kiltikixe, te Orfa sujt bael ta «stojol te pueblo yuʼun soc ta stojol te diosetic yuʼune» (Rut 1:9-15). Te Rute la snop ta yoʼtan te maba ya sujt bael ta slumal sok ta yichʼel ta mukʼ te lotil diosetike.

6. 1) ¿Bin-a te lek la sta ta nopel te ya spas te Rute? 2) ¿Bin yuʼun te Booz la yal te la sle koltayel ta yeʼtal «xicʼ» Jehová te Rute?

6 Jich yaʼiyel te Rut la snaʼbey sba te Jehová ta swenta te smamlal o ta swenta te Noemí. La snop ta maba pajal sok yantik diosetik ta Moab te Jehovae. Ayin skʼuxul yoʼtan ta stojol te Jehová sok kʼot ta yoʼtan te jaʼnax stukel ya skʼan ichʼel ta mukʼ sok te kʼuxuk ta oʼtanile. Jaʼ yuʼun lek te bin la sta ta nopele. Jich la yalbey te Noemí: «Ha jlumal ya xcʼoht te alumale, soc ha Dios cuʼun ya xcʼoht te Dios awuʼune» (Rut 1:16). Ta melel ya stij koʼtantik te bitʼil kʼax bayal skʼanoj ta yoʼtan yalib meʼel te Rute. Jaʼukmeto te bin yan-nax ta aʼiyele, jaʼ te kʼax kʼux la yaʼiy ta yoʼtan Jehová te Rute. Jaʼ swentail te Booz kʼax lek skʼoplal yuʼun te Rut ta skaj te la sle koltayel ta yeʼtal «xicʼ» te Jehová (kʼopona te sjun Rut 2:12). Te bin la yal te Booz ya yakʼ juluk ta koʼtantik te alal mutetik te ya schʼik sbaik ta yeʼtal sxikʼ te smeʼ swenta jich ya staik kanantayel yuʼun-a (Salmo 36:7; 91:1-4). Jaʼ jich la spas te Rut. La sle te skʼuxul yoʼtan sok kanantayel yuʼun te Jehovae, te jich majtʼantesot yuʼun ta skaj te schʼuunel yoʼtan te Rute. Maʼyuk bin-ora sujt yoʼtan ta swenta te jich la spase.

7. ¿Bin ya xjuʼ xkoltayot te machʼatik maba ya xtal ta yoʼtanik te ya yakʼ sbaik ta stojol te Jehovae?

7 Bayal ants winiketik ya snaʼbeyik sba te Jehovae, jaʼukmeto maba ya sleik kanantayel ta yeʼtal «xicʼ». Maba ya xtal ta yoʼtanik te ya yakʼ sbaik ta stojol sok te ya yichʼik jaʼe. Teme jich ya awaʼiy aba-euke, ¿bin ya skoltayat? Ta sbabial, nopa awaʼiy bin yuʼun te maba ya akʼan ya awakʼ akuxlejal ta stojol te Jehovae. Ta schebal, juluk ta awoʼtan te liʼ ta Balumilale, jpisiltik ya jnoptik teme jaʼ ya kichʼtik ta mukʼ te Jehová o yan dios (Josué 24:15). Te bin lek ta nopele, jaʼ te ya x-abatinotik ta stojol te smelelil Diose. Ta yoxebal, juluk ta awoʼtan te kʼalal ya awakʼ akuxlejal ta stojole, jich ya awakʼ ta ilel te ay schʼuunel awoʼtan ta stojol te bitʼil jaʼ ya skanantayat sok te jaʼ ya skoltayat te kʼalal ya xtal biluk wokolil ta atojole. Jaʼ jich la spas Dios ta stojol te Rute.

TE EZEQUÍAS LA STA TA NOPEL TE YA YAMIGOIN TE JEHOVAE

8. ¿Bintik la yil ta skuxlejal te kʼalal tut-to-a te Ezequiase?

8 Te Ezequías maba pajal sok te Rute, melel te Ezequías chʼi ta yolil jun nasion te la yal ta  jamal te jun yoʼtan ya yakʼ sba ta stojol te Diose. Jaʼukmeto maba spisil jun yoʼtan la yakʼ sbaik ta stojol Jehová te israeletike. Jich bitʼil, te stat Ezequías jaʼ jtul ajwalil te kʼax chopole. Maʼyuk la yichʼ ta mukʼ te templo yuʼun Dios sok la stijbey yoʼtan te israeletik swenta ya yichʼik ta mukʼ lotil diosetike. Jaʼnix jich te chopol ajwalil-abi, kuxul la schikʼ ta kʼajkʼ bayal ta tul yijtsʼinab te Ezequías swenta la yakʼbey ta chikʼbil majtʼaniletik ta stojol jtul lotil dios. Ta melel, bayal bintik xiweltik sba la yil te Ezequías te kʼalal tut-to-ae (2 Reyes 16:2-4, 10-17; 2 Crónicas 28:1-3).

9, 10. 1) ¿Binwan yuʼun te pichʼil yoʼtan te Ezequías te jichuke? 2) ¿Bin yuʼun manchuk ay bin-ora ya x-ilinotik ta stojol te Jehovae? 3) ¿Bin yuʼun maba lek teme ya jkuytik te jaʼ ya staik ta nopel te lek o chopol ya xkʼootik te jmeʼ jtatike?

9 Jich bitʼil te maba lek te bin la yichʼ akʼbeyel snop yuʼun stat te Ezequiase, ayniwan la spichʼ sba yoʼtan o ilin ta stojol Jehová te jichuke. Jaʼukmeto maʼyuk jich la spas-abi. Ay machʼatik te ma jichuk kʼaxem ta stojolik te tulan wokolil jich bitʼil te kʼax ta stojol te Ezequiase, jaʼukmeto ya yalik te aylaj swentail te pichʼil yoʼtanik o ya x-ilinik ta stojol te Jehová o ta stojol te organisasion yuʼune (Proverbios 19:3). Ay yantik ya yalik ta swenta te bitʼil chopol stalel te sfamiliaik ta sjajchibale, te jaʼlaj swentail te chopol skuxlejalik-euk o te ya xchʼayik-euke (Ezequiel 18:2, 3). Jaʼukmeto ¿melelbal-abi?

10 Te bin la spas te Ezequiase ya yakʼ ta ilel te maba melele. Manix ayuk bin yuʼun-a te ya x-ilinotik ta stojol te Jehovae. Ma jaʼuk smul te bintik chopol ya xkʼax ta stojol te ants winiketike (Job 34:10). Melelnix-a te meʼil tatiletik ya xjuʼ ya yakʼbeyik snop yal snichʼnabik teme lek ya spas sbaik o chopol ya spas sbaike (Proverbios 22:6; Colosenses 3:21). Jaʼukmeto maba lek teme ya jkuytik te jaʼ ay ta swenta jmeʼ jtatik te stael ta nopel teme lek o chopol ya xkʼootike. ¿Bin yuʼun? Melel te Jehová yakʼojbotik ta jujuntul majtʼanil te ya xjuʼ kuʼuntik stsael te bin ya jkʼan ya jpastike (Deuteronomio 30:19). ¿Bin-utʼil te Ezequías la snaʼ stuuntesel te majtʼanil-abi?

Bayal ta tul jchʼieletik staojik ta nopel te jaʼ ya x-abatinik ta stojol te Jehová manchukme maba lek stalel te smeʼ statike (Ilawil te parrafo 9 sok 10)

11. ¿Bin yuʼun te Ezequías jaʼ jtul lekil ajwalil te kʼax ta Judá?

11 Manchukme te stat Ezequías jaʼ jtul chopol ajwalil kʼax ta Judá, te Ezequías jaʼ jtul lekil ajwalil kʼax stukel (kʼopona te 2 Reyes 18:5, 6). ¿Bin yuʼun te jaʼ lekil ajwalil stukele? Melel la sta ta nopel te maba ya stʼunbey stalel te state. La schʼam yaʼiy te tsitsel sok te tojobtesel yuʼun  te j-alwanejetik yuʼun te Jehová jich bitʼil te Isaías, Miqueas sok Oseas. Ta swenta-abi ay bayal bin lek la spas te ma jichuk la spas te state. La slokʼes te bintik maba lek te ay ta yutil templo sok la skʼanbey perdon Jehová ta swenta smul te israeletike sok la swuy spisil te lokʼombaetik te ay ta spamal te nasione (2 Crónicas 29:1-11, 18-24; 31:1). Ta patil te kʼalal kʼan yochintay Jerusalén jtul ajwalil te jaʼ skontraike, te Ezequías la yakʼ ta ilel te ay schʼuunel yoʼtan sok te ma xiw yoʼtane. Jaʼnix jich la yalbey te israeletik te yakuk yakʼ smukʼul yoʼtanik ta stojol te Jehová, melel jaʼ ya xkanantayotik (2 Crónicas 32:7, 8). Ta jun buelta la stoy sba, jaʼukmeto la schʼuun te tsitsel yuʼun Jehová jich la yakʼxan ta ilel spekʼelil yoʼtan (2 Crónicas 32:24-26). Jich bitʼil te la kiltikixe, maba la yakʼ utsʼinotuk te stalel smeʼ stat swenta ya yamigoin te Jehovae. Ta melel jpisiltik ya xjuʼ ya jnopbeytik te slekil talele.

12. Jich bitʼil te Ezequías, ¿bin spasojik bayal ta tul te j-abatetik yuʼun Diose?

12 Ta ora ini te Balumilal nojel ta ants winiketik te maʼyuk skʼuxul yoʼtanike. Jaʼ yuʼun bayal tut alaletik te maba kʼux aʼiybilik sok maba kanantaybilik yuʼun te smeʼ statike (2 Timoteo 3:1-5). Bayal ta tul j-abatetik yuʼun Dios te chʼitesbilik yuʼun sfamiliaik te ay bayal swokolike, jaʼukmeto yakʼoj ta yoʼtanik yamigoinel te Jehovae. Jich bitʼil te Ezequías ya yakʼik ta ilel te ma jichuk ya spasik-euk te bintik chopol la spasik o te banti chʼayik te smeʼ statike. Te Diose yakʼojbotik ta jujuntul te ya xjuʼ kuʼuntik stael ta nopel te bin ya jkʼan ya jpastike. Jaʼ-abi ya xjuʼ ya jtuuntestik swenta ya x-abatinotik ta stojol Jehová sok ya kichʼtik ta mukʼ jich bitʼil la spas te Ezequiase.

¡YABATON TE JEHOVÁ!

13, 14. 1) ¿Bintikwan la smel yoʼtan yuʼun te Mariae? 2) ¿Bin la yal te María ta stojol te chʼul-abate?

13 Bayal cien jaʼbil ta patil te kʼalal kuxin te Ezequías, kuxin jtul achʼix ta Israel te kʼax bayal spekʼelil yoʼtane, jaʼ sbiil María. Jaʼnix jich lekil amiga yuʼun te Jehovae. Jaʼ yuʼun te Jehová la yakʼbey tulan yaʼtel te jaʼ ya x-ayin jtul yal sok ya schʼites te sNichʼan Diose. Te Jehová la yakʼbey te tulan aʼtelil-abi, melel skʼanoj ta yoʼtan sok snaʼoj te ya xjuʼ yuʼun spasele. Jaʼukmeto ¿bin la snop te María kʼalal la yichʼ albeyel te bin ya skʼan ya spase?

¡Yabaton te Jehová! (Ilawil te parrafo 13 sok 14)

14 Bayal ya yichʼ alel ta swenta te mukʼul majtʼanil la yichʼ te María ta swenta te Diose. Jaʼukmeto ¿aybal talem ta koʼtantik te binwan yuʼun bayal la smel yoʼtan te Mariae? Jich bitʼil, te chʼul-abat Gabriel la yalbey te ya x-ayin jtul yal manchukme maʼyuk tabil ta winike. Jaʼukmeto te chʼul-abat maba la yalbey te María teme ya scholbey yaʼiy te sfamilia sok te spatxujk te bin-utʼil ya x-ayin jtul yale. Jich ya jnaʼtik te bayalniwan la smel yoʼtan ta swenta te bin ya xjuʼ ya snopik te ants winiketik ta swenta-abi. ¿Binwan-utʼil ya yakʼbey kʼotuk ta yoʼtan te José te ma yuʼunuk yalem ta mulil sok yan winike? Te schʼitesel sok stsitsel te sNichʼan Diose,  jaʼnix jich jaʼ jun tulan aʼtelil te la yichʼ akʼbeyele. Ma jnaʼtik spisil te bin la smel yoʼtan yuʼun te Mariae. Jaʼukmeto ya jnaʼtik te bin la yalbey te chʼul-abate: «Yaʼbaton te Cajwaltic Dios; acʼa spasbon hich te bin utʼil la awal» (Lucas 1:26-38).

15. ¿Bin yuʼun te bayal schʼuunel yoʼtan te Mariae?

15 Ta melel, bayal schʼuunel yoʼtan te Mariae. Yakʼoj ta yoʼtan spasel spisil te bin ya yichʼ kʼanbeyel jich bitʼil ya spas jtul moso. Ay smukʼul yoʼtan ta stojol Jehová te jaʼ ya xkanantayot yuʼune. ¿Bin yuʼun te bayal schʼuunel yoʼtane? Ya jnaʼtik te maba jich ayix schʼuunel yoʼtan-a te kʼalal ayin ta kʼinale. Ta melel la spas tulan ta schʼitesel te schʼuunel yoʼtan, jich akʼbot bayal utsilal yuʼun Dios ta skaj te la spas tulane (Gálatas 5:22; Efesios 2:8). ¿Bin-utʼil ya jnaʼtik te la spas tulan ta yakʼbeyel yip te schʼuunel yoʼtane? Ta swenta bin ya kiltik baele, ya jnaʼtik yuʼun te bitʼil ya yaʼiy stojol te bin ya x-albot sok te bin ya yalbey skʼoplale.

16. ¿Bin yuʼun ya jnaʼtik te spisil-ora la yaʼiy ta lek te bin ya yichʼ albeyel te Mariae?

16 Te bitʼil ya yaʼiy stojol te bin ya x-albote. Te sjun Santiago 1:19 jich ya yal: «Chapaluquex me apisilic yuʼun yaʼiyel ta ora te bin ya yichʼ halel, ma me orahuc ya xcʼopojex». Te María ya snaʼ schʼamel yaʼiy te kʼope. Te Biblia ya yal te spisil-ora ya yaʼiy ta lek te bin ya x-albote, kʼaxto jich ya spas-a te kʼalal ya yichʼ albeyel yaʼiy ta swenta te Jehovae. Jaʼnix jich la slokʼes tiempo ta snopel te bintik mukʼ skʼoplale. Ta swenta-abi, jich la spas te María kʼalal ayin te Jesús sok te kʼalal tal ta albeyel yuʼun te jkanantuminchijetik te bin la yal te chʼul-abate. Te kʼalal ayix lajchayeb yaʼbilal-a te Jesuse, ay bin la yal te yan-nax la yaʼiy yuʼun te Mariae. Ta schebal buelta la schʼam yaʼiy sok la snopilan ta yoʼtan te bin la yaʼiye sok maʼyuk bin-ora chʼay ta yoʼtan (kʼopona te sjun Lucas 2:16-19, 49, 51).

17. Te kʼalal ya kiltik te bin la yalbey skʼoplal te Mariae, ¿bin ya jnoptik yuʼun?

17 Te bin ya yalbey skʼoplale. Te Biblia maʼyuk bayal ya yalbey skʼoplal te bin la yal te Mariae. Ta sjun Lucas 1:46-55 jaʼnax ya jtatik tey-a te bin la yal te Mariae. Te bin tsʼibaybil tey-ae, ya yakʼ kiltik te snaʼoj ta lek te bin ya yal Escrituras Hebreas. ¿Bin yuʼun te jich ya kaltike? Melel te bin la yal te Mariae, jaʼ pajal sok te bin la yal ta skʼoponel Dios te Ana, te jaʼ smeʼ Samuel (1 Samuel 2:1-10). Ta yorail-abi, jich yilel te la yal jtab buelta te bin ya yal te sJun Diose. Tey ya xchiknaj ta ilel te bayal la smulan te bintik la snop ta stojol te yamigo, jaʼ te Jehovae.

18. ¿Bin-utʼil ya jkʼayinbeytik schʼuunel yoʼtan te Mariae?

18 Teme ay jun buelta ya jpastik jun aʼtelil ta stojol Jehová te wokol ya kaʼiytik spasele, jichniwan ya kaʼiy jbatik te bitʼil la yaʼiy sba te María. ¿Bin ya xjuʼ ya jpastik? Jaʼ te ya jkʼayinbeytik te schʼuunel yoʼtane. ¿Bin-utʼil? Jaʼ te ayuk spekʼelil koʼtantik ya jpastik te aʼtelil sok akʼa smukʼulin koʼtantik te jaʼ ya skoltayotik te Jehovae. Akʼa jchʼam kaʼiytik te bin ya yalbotik te Jehová sok akʼa jnopilan ta koʼtantik te bin jnopojtik ta swentae sok te bin ya spas ta pajel chaʼbeje. Jaʼnix jich sok stseʼelil koʼtantik akʼa jcholbeytik yantik te bin jnopojtike (Salmo 77:11, 12; Lucas 8:18; Romanos 10:15).

19. Teme ya jkʼayinbeytik schʼuunel yoʼtan te machʼatik la yamigoinik te Jehovae, ¿bin majtʼanil ya jmulantik ta pajel chaʼbej?

19 Jich bitʼil la kilbeytikix skʼoplal te Rut, Ezequías sok te María la yamigoinik te Jehová jich bitʼil la spas te Abrahame. Jaʼik te «tsobol ta tuhl testigohetic» te la yichʼik akʼbeyel-euk te majtʼanil jaʼ te ya xjuʼ ya yamigoinik te Diose. Akʼa jkʼayinbeytik te schʼuunel yoʼtanike (Hebreos 6:11, 12). Teme jich ya jpastike yame jmulantik-euk te mukʼul majtʼanil, jaʼ te ya xjuʼ ya kamigointik te Jehová ta sbajtʼel kʼinal.