Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) FEBRERO 2016

Junuk koʼtantik ta stojol te Jehovae

Junuk koʼtantik ta stojol te Jehovae

«Jcʼanojbeytic [Jehová] te yacuc swentainotic ta jchebaltic soc cal-jnichʼan soc awal-anichʼan ta cajalcaj ta sbajtʼel qʼuinal.» (1 SAMUEL 20:42XCD)

KʼAYOJIL 125 SOK 62

1, 2. ¿Bin yuʼun yan-nax ta aʼiyel te bitʼil jkʼaxel yamigoin David te Jonatán sok te jun yoʼtan la yakʼ sba ta stojole?

TA MELEL, te Jonatán yan-naxniwan la yil te bin la spas te Davide, lajeltonax yoʼtan ta smilel-a te mukʼul winik Goliat sbiile sok la yichʼbey bael te sjol ta stojol te Saúl, jaʼ te ajwalil yuʼun te Israel sok jaʼ stat te Jonatán (1 Samuel 17:57). Te Jonatán aynanix ta yoʼtan-a te ya xkoltayot yuʼun Jehová te Davide. Tey jajch yamigoin sbaik-a te Jonatán sok te David. Jamal la yalbey sbaik te spisil-ora jun yoʼtan ta schebalike (1 Samuel 18:1-3). Jichnix kʼot ta pasel-a.

2 Yan-nax ta aʼiyel te bitʼil jkʼaxel yamigoin David te Jonatán sok te jun yoʼtan la yakʼ sba ta stojole. ¿Bin yuʼun? Melel te Jonatán jaʼ nichʼanil yuʼun te Saule. Jich yuʼun jaʼ kʼan kʼotuk ta ajwalil te jichuke. Jaʼukmeto te Jehová ayix ta yoʼtan-a te jaʼ ya yotses ta ajwalil te Davide, ma jaʼuk te Jonatane. Manchukme jich kʼot ta pasel-abi, te Jonatán jun yoʼtan la yakʼ sba ta stojol te Davide. Kʼalal te Saúl yak ta sleel te David ta skaj te ya smile, kʼax bayal la smel yoʼtan te Jonatán ta stojol te yamigoe. Snaʼoj te ay ta jochol takin kʼinal ta Hores, jich  yuʼun bajtʼ tey-a sok la yakʼbey yip yoʼtan ta smukʼulinel yoʼtan te Jehovae. Jich la yalbey: «Ma xiwat ma ba ya stahat te jtat Saúl. Haʼat me ya xʼochat ta ajwalil yuʼun Israel, yan te hoʼone patil ya xcʼohon awuʼun» (1 Samuel 23:16, 17).

3. 1) ¿Bin-a te mukʼxan skʼoplal ta yoʼtan Jonatán te bitʼil jun yoʼtan ta stojol te Davide? 2) ¿Bin yuʼun ya jnaʼtik te jaʼ kʼax mukʼ skʼoplal ta yoʼtan Jonatán te jun yoʼtan ta stojol te Diose? (Ilawil te lokʼomba ta sjajchibal te articulo.)

3 Jpisiltik ya jmulanbeytik stalel te machʼatik jun yoʼtan ya yakʼ sbaike. Jaʼukmeto, ¿jaʼnaxbal ya jmulanbeytik stalel te Jonatán ta skaj te jun yoʼtan la yakʼ sba ta stojol te Davide? Maʼuk. Jaʼ bayal ya jmulanbeytik stalel ta swenta te bin kʼax mukʼ skʼoplal ta yoʼtane, jaʼ te jun yoʼtan la yakʼ sba ta stojol te Diose. Jaʼ swentail te jun yoʼtan la yakʼ sba ta stojol te David sok maʼyuk la sbikʼtal-oʼtantay. Sok la skoltay ta smukʼulinel yoʼtan te Jehovae. Ta schebalik talel kʼaxel jun yoʼtan la yakʼ sbaik sok ta stojol Jehová. La skʼotesik ta pasel te bin talel kʼaxel la yalbey sbaik te ya spasbey sbaike: «Jcʼanojbeytic [Jehová] te yacuc swentainotic ta jchebaltic soc cal-jnichʼan soc awal-anichʼan ta cajalcaj ta sbajtʼel qʼuinal» (1 Samuel 20:42XCD).

4. 1) ¿Bin-a te ya yakʼ stseʼelil koʼtantike? 2) ¿Bin ya jnoptik bael ta articulo ini?

4 Te joʼotike ya skʼan jun koʼtantik ta stojol-euk te jfamiliatike, kamigotaktik sok te kermanotaktik ta kongregasione (1 Tesalonicenses 2:10, 11). Jaʼukmeto te machʼa kʼaxto jun koʼtantik ta stojole, jaʼ te Jehová melel jaʼ la spasotik stukel (Apocalipsis 4:11). Ya yakʼbotik stseʼelil koʼtantik sok ya yakʼ te ay skʼoplal ta koʼtantik te jkuxlejaltik te kʼalal jun koʼtantik ta stojol te Diose. Jaʼukmeto jnaʼojtik te ya skʼan jun koʼtantik ta stojol spisil-ora manchukme ayotik ta tulan wokolil. Ta articulo ini, ya jnoptik bael bin-utʼil ya skoltayotik te bin la spas te Jonatán, swenta jich jun koʼtantik ta stojol te Jehová ta chanchajp te ay jich ya xkʼot ta pasele. Ta sbabial, te kʼalal ay machʼa yichʼoj mukʼ yaʼtel te ya kaltik te ma snujpʼuk ya kichʼtik ta mukʼe. Ta schebal, te kʼalal ya jtsatik te machʼa ya jkʼantik te jun koʼtantik ta stojole. Ta yoxebal, te kʼalal ay jtul hermano yichʼoj mukʼ yaʼtel te maba stojil te bin ya spasbotike. Ta schanebal, te kʼalal wokol ya kaʼiytik skʼotesel ta pasel te bin kalojtik ta jamal te ya jpastike.

TE KʼALAL AY MACHʼA YICHʼOJ MUKʼ YAʼTEL TE YA KALTIK TE MA SNUJPʼUK YA KICHʼTIK TA MUKʼE

5. ¿Bin yuʼun te israeletik wokol la yaʼiyik te jun yoʼtan ya yakʼ sbaik ta stojol Jehová te kʼalal ay ta ajwalil-a te Saule?

5 Te Jonatán sok te yantik israeletik ayik ta tulan wokolil-a. Te stat Jonatán kʼatpʼuj ta jkʼaxuntayej mantale, jich yuʼun te Jehová la yal te ya slokʼes ta ajwalil yuʼun te Israele (1 Samuel 15:17-23). Jaʼukmeto te Jehová la yakʼxan ta ajwalil bayal jaʼbil. Ta swenta te bitʼil ay «ta huctajibal yuʼun Jehová» te Saúl sok te yakʼ ta spasel te bintik chopole, te israeletik wokol la yaʼiyik te jun yoʼtan ya yakʼ sbaik ta stojol te Jehovae (1 Crónicas 29:23).

6. ¿Bin yuʼun ya jnaʼtik te Jonatán jun yoʼtan la yakʼ sba ta stojol te Jehovae?

6 Te Jonatán jun yoʼtan la yakʼ sba ta stojol te Jehovae. ¿Bin yuʼun te ya jnaʼtike? Jaʼ ta swenta te bin la spas te kʼalal mato ayuk bayal kʼajkʼal-a te la skʼaxuntaybey smantal Dios te Saule (1 Samuel 13:13, 14). Ta yorail-abi, ay jtsojb soldadoetik te jaʼ skontratakik te israeletik te ay 30,000 karroetik yuʼunik ta swenta guerra kʼan bajtʼikuk ta yakʼbeyel guerra te israeletike. Te soldadoetik yuʼun te israeletike jaʼnax ayik 600 ta tul. Jaʼnax te Saúl sok te Jonatán yichʼoj yaʼtejibik ta swenta guerra. Jaʼukmeto te Jonatane ma xiw yoʼtan. Ay ta yoʼtan te bin la yal te j-alwanej Samuel te jich la yal: «Te Jehová, ta scuenta te smucʼul sbihil, ma ba ya spihtes te pueblo yuʼune» (1 Samuel 12:22). Jich yuʼun te Jonatán jich la yalbey te jtul soldado: «Te Jehová, como ma  ba wocol ya yaʼiy stuquel te ya yacʼ tsalaw, teme ay tsobolic o teme mayuc tsobolic». Jich yuʼun ta schebaliknax bajtʼik ta smilel 20 ta tul skontratakik. Tey ya kiltik-a te Jonatán yuʼun-nix ay schʼuunel yoʼtan ta stojol-a te Jehovae. Te Diose la yakʼbey bayal utsilal ta swenta-abi. Te Dios la yakʼ taluk tulan nijkʼel sok jajchik ta tulan xiwel te jich talel kʼaxel la smil sbaik te skontratakike. Jaʼ jich juʼ yuʼunik tsalaw ta guerra te israeletike (1 Samuel 13:5, 15, 22; 14:1, 2, 6, 14, 15, 20).

7. ¿Bin-utʼil la spas sba te Jonatán ta stojol te state?

7 Manchukme la skʼaxuntaybeyxan smantal Jehová te Saule, te Jonatán la schʼuunbey smantal te stat te kʼalal jich ya skʼan pasele. Jich bitʼil, la sjokin bael te stat ta yakʼel guerra ta swenta skoltayel te lum yuʼun Jehová (1 Samuel 31:1, 2).

8, 9. ¿Bin yuʼun ya skʼan ya kichʼtik ta mukʼ te machʼatik yichʼoj mukʼ yaʼtelike?

8 ¿Bin-utʼil ya jtʼunbeytik stalel te Jonatán yuʼun jich jun koʼtantik ya kakʼ jbatik ta stojol te Jehovae? Jaʼ te kʼalal spisil-ora ya jchʼuunbeytik smantal te ajwaliletik te kʼalal jich ya skʼan pasel te banti nainemotike. Te Jehová ya yakʼ te ya xmantalajik te «machʼatic mucʼ yaʼtelic» sok ya skʼan te yakuk kichʼtik ta mukʼe (kʼopona te sjun Romanos 13:1, 2). Jaʼ yuʼun ya kichʼtik ta mukʼ spisil te machʼatik yichʼoj mukʼ yaʼtelik yuʼun te ajwaliletik manchukme ay maba smelelil ya xkʼopojik te ya kaltik te ma snujpʼuk ya kichʼtik ta mukʼe. Te Jehová jaʼnix jich ya skʼan te yakuk kichʼtik ta mukʼ te machʼatik yakʼojbey mukʼ yaʼtelik ta familia sok ta kongregasion (1 Corintios 11:3; Hebreos 13:17).

Te bin-utʼil ya kakʼtik ta ilel te jun koʼtantik ta stojol te Jehovae, jaʼ te kʼalal ya kichʼtik ta mukʼ te jmamlaltik o te kinamtik manchukme maba testigo yuʼun Jehová (Ilawil te parrafo 9)

 9 Kiltik bin-utʼil jtul hermana te Olga sbiil te ay ta Sudamérica la yakʼ ta ilel te jun yoʼtan la yakʼ sba ta stojol te Jehová [1] (ilawil te nota ta slajibal te articulo). Te Olga bayal ya x-utsʼinot yuʼun te smamlale. Ay baeltik maba ya xkʼoponot sok bayal bintik chopol ya x-albot yuʼun ta skaj te jaʼ testigo yuʼun Jehová. Albot yuʼun te ya x-ijkʼitayot jilel sok te ya yikʼ bael te snichʼnabe. Jaʼukmeto spisil-ora la yichʼ ta mukʼ sok maʼyuk la sutbey ta bin chopol te bin ya xpasbot yuʼun te smamlale. Te Olga la spas tulan ta yakʼel ta ilel te jaʼ lekil inamile. La spasbey sweʼel, la sakʼbey skʼuʼ spakʼ sok la swentainbey te yantikxan sfamiliae (Romanos 12:17). Te kʼalal ya xjuʼ yuʼun te Olgae, ya sjokin bael te smamlal te kʼalal ya xbajtʼ ta yulaʼtayel te sfamiliatak sok yamigotak. Jich bitʼil te kʼalal laj te sniʼalmamale, te Olga la schajpan spisil te bintik ya xtuun ta swenta te ya xbajtʼ yichʼ mukel ta yan lum. Ta skaj te la stsob sbaik ta yutil iglesia ta swenta te sniʼalmamale, la smaliy ta spat iglesia jaʼto kʼalal lokʼ tal te smamlale. Te kʼalal kʼax bayal jaʼbile, kʼunkʼun lek jajch ilotuk yuʼun te smamlale. Ta swenta-abi, jaʼ ta skaj te maba animaj yoʼtan sok te la yichʼ ta mukʼe. Jich yuʼun ta ora ini, jaʼnix ya x-albotix yuʼun smamlal te manchuk ya skom sba ta tsoblejetik sok ya x-ikʼot bael yuʼun ta sNail Tsoblej. Jaʼnix jich ay baeltik ya xjil ta tsoblej te smamlal Olgae (1 Pedro 3:1).

TE KʼALAL YA JTSATIK TE MACHʼA YA JKʼANTIK TE JUN KOʼTANTIK TA STOJOLE

10. ¿Bin koltayot te Jonatán ta stsael te machʼa ya skʼan jun yoʼtan ya yakʼ sba ta stojole?

10 Kʼalal te Saúl la yal te yoʼtanuk ya smil te Davide, te Jonatán la stsa teme jaʼ ya skʼan jun yoʼtan ya yakʼ sba ta stojol te stat o ta stojol te Davide. Wokolniwan la yaʼiy-abi, melel te Jonatán ya skʼan jun yoʼtan ya yakʼ sba ta stojol schebalik. ¿Bin koltayot ta stsael? Te Jonatán snaʼoj te jaʼ yichʼoj koltayel yuʼun Dios te Davide, ma jaʼuk yichʼoj koltayel te Saule. Jaʼ yuʼun jun yoʼtan la yakʼ sba ta stojol te Davide. Ta sbabial, te Jonatán la sjultesbey ta yoʼtan te David te yakuk snakʼ sbae, ta patil la yalbey te stat te manchuk ya smil te Davide (kʼopona te 1 Samuel 19:1-6).

11, 12. Teme kʼux ta koʼtantik te Diose, ¿bin ya jpastik?

11 Kiltik ta swenta jtul hermana te Alice sbiil te talem ta Australia. Jaʼ la stsa te machʼa ya skʼan jun yoʼtan ya yakʼ sba ta stojole. Te kʼalal yak ta snopel te Bibliae, la scholbey yaʼiy sfamilia te bin yak ta snopel-ae. Ta jun buelta la yalbey te maba ya skʼan ya spasbeyix skʼinul te bin-ora ayin te Jesús sok la scholtiklanbey bin yuʼun te maba ya spasixe. Ta sjajchibal la smel yoʼtanik yuʼun. Ta patil bayal ilinik. Jich la yaʼiyik te ma xkʼanotikix yuʼun te Alice. Albot yuʼun te smeʼ te maʼyuk bin-ora ya skʼan ya x-ilotixe. Te Alice jich la yal: «Jich kʼoem te tulan la smajone sok kʼux la kaʼiy, melel kʼux ta koʼtan te jfamiliae. Jaʼukmeto kakʼoj ta koʼtan te jaʼ nail ya jpas ta jkuxlejal te bin ya skʼan yoʼtan te Jehová sok te Jesuse, jich yuʼun la kichʼ jaʼ ta mukʼul tsoblej te maʼyukix bayal kʼajkʼal ya skʼan ya yichʼ pasel-ae» (Mateo 10:37).

12 Ma xjuʼ te jun koʼtantik ta stojol te biluknaxe, jich bitʼil te joʼtaktik ta tajimal, te eskuela o te nasion kuʼuntike. Jaʼ ya skʼan kʼax junuk koʼtantik ta stojol te Jehovae. Jnoptik ta swenta jtul jchʼiel hermano te Henry sbiile. Bayal ya smulan xtajin ta ajedrez sok te sjoʼtak ta eskuela sok ay ta yoʼtan te ya spas ganar te banti ya stsal sbaik ta tajimal sok te yantike. Jaʼukmeto ta skaj te sjunal semana ya xtajine, maʼyukix stiempo swenta ya xlokʼ ta scholel skʼop Dios sok ta swenta tsoblejetike. Ta jun buelta la yil te jaʼ jun yoʼtan ta stojol te sjoʼtak ta eskuela, ma jaʼuk jun yoʼtan ta stojol te Jehovae. Jich yuʼun la yijkʼitay te sjoʼtak ta tajimal yuʼun ajedrez (Mateo 6:33).

13. Teme ya jkʼantik te jun koʼtantik ta stojol te Jehovae, ¿bin ya jpastik te kʼalal ay kʼop ta swenta jfamiliatike?

13 Ay baeltik wokol ya kaʼiytik te jun koʼtan  ya kakʼ jbatik ta stojol spisil te machʼatik ay kuʼuntike. Kiltik te bin kʼot ta swenta jtul hermano te sbiilinej Ken. La yal te bayalixlaj yaʼbilal te smeʼe, jich yuʼun yoʼtanuk ya yulaʼtay bayal buelta sok ya yikʼ tal ta sna yuʼun ya xjil cheʼoxebuk buelta tey-a. Jaʼukmeto te smeʼ sok te yiname maba lek ya yil sbaik. Te Ken la yal te ma snaʼix te bin ya spas swenta lek ya yil sbaik. Te Ken jaʼ ya skʼan te jun yoʼtan ya yakʼ sba ta stojol te Jehová. Jich yuʼun jajch snopilan ta yoʼtan te bin ya yal te Bibliae. Tey la yil-a te jaʼ ya skʼan Jehová te lekuk yoʼtan yuʼun te yiname sok te ya skʼan jun yoʼtan ta stojole. Jaʼ yuʼun la sle bin-utʼil ya xjuʼ lek yoʼtan yuʼun te yiname. Kʼopoj sok te yiname sok la yalbey bin yuʼun te ya skʼan ayuk yutsil yoʼtan ta stojol te smeʼe. Jaʼnix jich la yalbey-euk te smeʼ bin yuʼun te ya skʼan ya x-ichʼbot ta mukʼ te yiname (kʼopona te sjun Génesis 2:24 sok 1 Corintios 13:4, 5).

TE KʼALAL AY JTUL HERMANO YICHʼOJ MUKʼ YAʼTEL TE MABA STOJIL TE BIN YA SPASBOTIKE

14. ¿Bin la spas te Saúl ta stojol te Jonatane?

14 Ayxan yan te banti ya kakʼtik ta ilel te jun koʼtan ya kakʼ jbatik ta stojol te Jehovae, jaʼ te kʼalal ay jtul hermano yichʼoj mukʼ yaʼtel te maba stojil te bin ya spasbotike. Te Dios la yakʼbey yaʼtel ta ajwalil te Saule, jaʼukmeto maba stojil te bin la spasbey te snichʼane. Ma xkʼot ta yoʼtan te Saúl bin yuʼun te Jonatán kʼax kʼux ta yoʼtan te Davide. Jich yuʼun kʼalal te Jonatán kʼan skoltay te Davide, bayal ilin yuʼun te Saúl jich la yakʼ ta kʼexlal ta komonsitil. Jaʼukmeto te Jonatán spisil-ora la yichʼ ta mukʼ te state. Jaʼnix jich jun yoʼtan la yakʼ sba ta stojol te Jehová sok ta stojol te David te la yichʼ tsael swenta ya x-och ta ajwalil yuʼun Israel ta patil (1 Samuel 20:30-41).

15. Teme ay jtul hermano maba stojil te bin ya spasbotike, ¿bin ya skʼan ya jpastik?

 15 Ta kʼajkʼal ini, te ancianoetik ya spasik tulan te stojiluk te bin ya spasik ta stojol te kongregasione. Jaʼukmeto ta skaj te maba tojik-euke, ayniwan maba ya xkʼot ta yoʼtanik bin yuʼun te ay bin ya jpastike (1 Samuel 1:13-17). Teme ay jun buelta maba stojil te bin ya spasik ta jtojoltike, junukme koʼtantik ya kakʼ jbatik ta stojol te Jehovae.

TE KʼALAL WOKOL YA KAʼIYTIK SKʼOTESEL TA PASEL TE BIN KALOJTIK TA JAMAL TE YA JPASTIKE

16. ¿Banti ya kakʼtik ta ilel te jun koʼtan ya kakʼ jbatik ta stojol te Dios sok te maʼyuk sbikʼtal koʼtantike?

16 Te Saúl la skʼan te jaʼuk ya x-och ta ajwalil te Jonatán te kʼalal lokʼemix ta ajwalil-ae, ma jaʼuk te Davide (1 Samuel 20:31). Te Jonatán tal sbikʼtal yoʼtan te jichuke sok la skʼan ochuk ta ajwalil te jichuke. Jaʼukmeto ta skaj te kʼux ta yoʼtan te Jehová sok te jun yoʼtan ta stojole, la skʼotes ta pasel te bin yalojbey ta jamal te Davide. Te Biblia ya yal te machʼa jun yoʼtan ya yakʼ sbaik ta stojol Jehová sok te kʼux ta yoʼtanike, ya skʼotesik ta pasel te bin yalojik ta jamal te ya spasik manchukme ay bin ya xchʼay yuʼunik (Salmo 15:4). Jich bitʼil te kʼalal ay bin ya jchapbeytik stojol ta swenta negosioetik, ya jkʼotestik ta pasel manchukme toyol stojol ya xlokʼ. Jaʼnix jich teme ay ya xjajch kʼop ta jfamiliatike, ta skaj te kʼux ta koʼtantik te Jehová jun koʼtan ya kakʼ jbatik ta stojol te jmamlaltik o te kinamtike (kʼopona te sjun Malaquías 2:13-16).

Teme ay bin ya jchapbeytik stojol ta swenta negosioe, yame jkʼotestik ta pasel te bin kalojtik ta jamal te ya jpastik ta skaj te ya jkʼantik jun koʼtantik ta stojol te Diose (Ilawil te parrafo 16)

17. ¿Bin la anop ta articulo ini?

17 Jich bitʼil te Jonatane, ya jkʼantik jun koʼtantik ta stojol te Jehová sok te kʼalal wokol ta pasele. Jaʼ yuʼun junuk koʼtantik ta stojol te kermanotaktik manchukme ay baeltik maba lek ya kiltik te bin ya spasik ta jtojoltike. Jaʼme jich tseʼel yoʼtan kuʼuntik te Jehová sok jaʼ ya yakʼbotik stseʼelil koʼtantik (Proverbios 27:11). Ayukme ta koʼtantik te jaʼ ya skanantayotik ta spisil-orae. Ta yan articulo ya kalbeytik skʼoplal yantik ants winiketik te kʼalal kuxul-a te Davide. Tey ya kiltik-a te ay machʼatik jun yoʼtan la yakʼ sbaik ta stojol te Jehová sok ay yantik te maba jun yoʼtan la yakʼ sbaike. Yame kiltik bin ya xjuʼ ya jnoptik ta swentaik ta jujuntul.

^ [1] (parrafo 9): Ta articulo ini, ay biililetik te yichʼoj jeltayele.