Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) FEBRERO 2016

Te Jehová la yal te jaʼ yamigoe

Te Jehová la yal te jaʼ yamigoe

«Haʼat, Israel, ha aʼbatat cuʼun, haʼat, Jacob, te tsahbilat cuʼun, stsʼumbalex Abraham te machʼa jun coʼtan soc.» (ISAÍAS 41:8)

KʼAYOJIL 91 SOK 22

1, 2. 1) ¿Bin yuʼun ya jnaʼtik te ya xjuʼ ya kamigointik te Diose? 2) ¿Bin ya yalbey skʼoplal ta articulo ini?

TE KʼALAL ya x-ayinotik ta kʼinal jaʼto te kʼalal ya xlajotike, te bin kʼax mukʼ skʼoplal ta koʼtantike, jaʼ te kʼuxul oʼtanile. Jpisiltik ya jkʼantik te ayuk lekil kamigotaktik te ya skʼanotike, ma jaʼuknax te ay machʼa ya smulanotike. Jaʼukmeto te bin mukʼ skʼoplale, jaʼ te ya kamigointik te Dios sok te kʼuxotik ta yoʼtane. Bayal machʼatik ya yalik te ma xjuʼ-abi, ta skaj te maba chikan ta ilel sok te kʼax bayal yuʼele. Jaʼukmeto ya jnaʼtik te ya xjuʼ ya kamigointik te Jehovae.

2 ¿Bin yuʼun te jnaʼojtike? Melel te Biblia ya yal ta swenta ants winiketik te la yamigoinik te Diose. Kʼax lek te ya jnoptik ta swentaike sok te ya jkʼayinbeytik te bin la spasike. ¿Bin yuʼun? Melel te yamigoinel Diose, jaʼ te bin kʼax mukʼ skʼoplal ta koʼtantike. Ta articulo ini, ya kalbeytik skʼoplal te Abraham (kʼopona te  sjun Santiago 2:23). * (Kʼopona te nota.) Jaʼ la yamigoin te Dios ta skaj te ay schʼuunel yoʼtan ta stojole. Jaʼ yuʼun te Biblia ya yal ta swenta Abraham te «ha tatil yuʼun spisil machʼatic ay schʼuhunel yoʼtanic» (Romanos 4:11). Te kʼalal yakotik ta snopel bael te articulo ini, akʼa jojkʼoybey jbatik: «¿Bin ya xjuʼ ya jpas swenta ay schʼuunel koʼtan jich bitʼil te Abraham sok jich ya kamigoin te Jehovae?».

¿BIN-UTʼIL KʼOT TA YAMIGOINEL DIOS TE ABRAHAME?

3, 4. 1) ¿Bin-a te kʼax mukʼ la yichʼ kʼanbeyel ta swenta schʼuunel yoʼtan te Abrahame? 2) Ta swenta-abi, ¿bin-a te jkʼaxel schʼuunej yoʼtane?

3 Nopa awaʼiy ta swenta ini, te Abraham ayniwanix 125 yaʼbilal-a te kʼunkʼun yak ta moel bael ta witse [1] (ilawil te nota ta slajibal te articulo ini). Ta spat te Abraham yak ta talel te Isaac jaʼ te snichʼan te ayix 25 yaʼbilal. Te Abrahame yichʼoj bael jun kuchiyo sok te bintik ya stiles kʼajkʼ-ae. Te Isaac jaʼ yichʼoj bael te siʼe. Te beel-abi, kʼax wokolniwan la yaʼiy ta skuxlejal te Abrahame. ¿Bin yuʼun? Ma ta skajuk te ayix yaʼbilale, melel ayto bayal yip-a. Wokol la yaʼiy, melel te Jehová la skʼanbey ta chikʼbil majtʼanil te snichʼane (Génesis 22:1-8).

Ma yuʼunuk ma la snop nailuk te Abraham te kʼalal la schʼuunbey skʼop te Diose. La schʼuun te mantal ta skaj te yuʼun-nix ay schʼuunel yoʼtan ta smelelil-ae

4 Jaʼ-abi, jaʼ te bin kʼax mukʼ la yichʼ kʼanbeyel ta swenta schʼuunel yoʼtan te Abrahame. Ay machʼatik ya yalik te kʼaxto utsʼinwan te Dios kʼalal la skʼanbey te ya yakʼ ta chikʼbil majtʼanil te snichʼane. Ay yantik ya yalik ta swenta te Abraham la yakʼ ta majtʼanil te snichʼane melel malaj kʼuxuk ta yoʼtan. Te machʼatik jich ya yalike, maʼyuk schʼuunel yoʼtanik sok ma snaʼik bin-nix-a te chʼuunel oʼtanile (1 Corintios 2:14-16). Ma yuʼunuk ma la snop nailuk te Abraham te kʼalal la schʼuunbey skʼop te Diose. La schʼuun te mantal ta skaj te yuʼun-nix ay schʼuunel yoʼtan ta smelelil-ae. Jaʼnix jich jkʼaxel schʼuunej yoʼtan te maʼyuk bin-ora ya xkʼanbot yuʼun Jehová te bin ya x-utsʼinote. Jaʼnix jich jkʼaxel schʼuunej yoʼtan teme ya schʼuunbey smantal te Diose ya sta bayal utsilal sok te snichʼane. Swenta ayin te schʼuunel yoʼtan jich-abi, te Abraham la skʼan ayuk bin snaʼoj  ta lek sok te ayuk bintik lek kʼaxem ta stojole. ¿Bin-utʼil la sta?

5. 1) ¿Binwan-utʼil la snaʼbey sba Jehová te Abrahame? 2) ¿Bin-utʼil koltayot te bin snaʼoj ta swenta Dios te Abrahame?

5 Te bintik snaʼoj ta leke. Te Abraham ayin ta skʼinal Ur. Te ants winiketik tey-ae, jaʼ yichʼojik ta mukʼ te lotil diosetike, jaʼnix jich-euk te stat Abrahame (Josué 24:2). Jich yuʼun, ¿bin–utʼil la snaʼbey sba Jehová te Abrahame? Te Biblia ya yal ta swenta te Abraham te chiknaj tal ta stsʼumbal Sem, jaʼ jtul snichʼan te Noé. Te Sem laj te kʼalal ayniwanix 150 yaʼbilal-a te Abrahame. Ay bayal schʼuunel yoʼtan te Sem ta stojol te Jehová, jaʼniwan la scholbey yaʼiy sfamilia ta swenta te Jehovae. Jichniwan la snaʼbey sba Jehová te Abrahame. Ta swenta-abi, te Abraham kʼux la yaʼiy ta yoʼtan sok la yakʼ schʼuunel yoʼtan ta stojol.

6, 7. ¿Bin-utʼil la sta te bintik lek kʼax ta stojol te Abraham swenta la yichʼ yip schʼuunel yoʼtan?

6 Te bintik lek kʼaxem ta stojole. ¿Bin-utʼil la sta te bintik lek kʼax ta stojol te Abraham swenta la yichʼ yip schʼuunel yoʼtan? Ay machʼatik ya yalik ta swenta te bin ya jpastik pensare tey ya yakʼ ta ilel-a te bin ya kaʼiy ta koʼtantike, jaʼnix jich te bin ya kaʼiy ta koʼtantike ay bintik ya yikʼotik ta spasel. Jaʼ jich kʼot ta swenta te Abrahame. Bayal bintik la snop ta swenta te Diose. Te bintik snaʼoje tijbot yoʼtan ta yichʼel ta mukʼ te Jehová, te «Dios te mero toyol ay» (Génesis 14:22). Jaʼ ya skʼan ya yal te «jun nax yoʼtan yichʼoj ta mucʼ» o maba la spas te bin chopol ta sit te Jehovae (Hebreos 5:7XCD). Te bin la yaʼiy ta yoʼtane jaʼ tijbot yoʼtan ta schʼuunbeyel smantal spisil-ora te Jehovae. Teme ya jkʼantik lekil amigootik yuʼun te Diose, yame skʼan jkʼaxel ya kichʼtik ta mukʼ-euk (Salmo 25:14).

7 Te Dios la yalbey ta mantal te Abraham sok te Sara te yakuk xlokʼik bael ta slumalik swenta ya xbajtʼik ta nainel te banti maba yilojike. Maba jchʼielikto-a sok ya xnainik ta nailpakʼ. Jaʼnix jich te Abraham snaʼoj te ay bayal bin wokolil ya stae. Jaʼukmeto yakʼoj ta yoʼtan schʼuunel smantal te Jehovae. Ta skaj te la schʼuun te mantale la sta utsilal sok kanantayot yuʼun te Jehovae. Jich bitʼil, te Biblia ya yal te ay cheb buelta la yikʼ bael te Sara ta skaj te kʼax tʼujbile. Te Abraham ay ta wokol yuʼun teme ay ya yichʼ milele. Jaʼukmeto, te Jehová ta schebal buelta la spas milagro sok la skanantay te Abraham sok te Sara (Génesis 12:10-20; 20:2-7, 10-12, 17, 18). Te bintik lek kʼax ta stojol te Abrahame, akʼbotxan yip te schʼuunel yoʼtane.

8. ¿Bin-utʼil ya xjuʼ te ay bin ya jnaʼtik sok te bintik lek ya xkʼax ta jtojoltik swenta ya yichʼxan yip te bitʼil kamigoinej jbatik sok te Diose?

8 ¿Yabal xjuʼ ya kamigointik ta lek te Jehovae? Yak. Ta swenta-abi, ya skʼan ya jnopbeytik  skʼoplal te Jehovae, jich bitʼil te Abrahame. Jaʼnix jich ya skʼan ayuk bayal bin ya jnaʼtik sok te bin lekik ya xkʼax ta jtojoltike. ¿Bin-utʼil? Jaʼ ta swenta te ay kuʼuntik te Bibliae, yan stukel te Abrahame maʼyuk yuʼun (Daniel 12:4; Romanos 11:33). Te Biblia nojel ta bintik ya xjuʼ ya jnaʼtik ta swenta «te Dios te mero toyol ay». Te bintik ya jnaʼtik ta swenta te Jehovae, jaʼme ya stij koʼtantik swenta kʼux ta koʼtantik sok te jkʼaxel ya kichʼtik ta mukʼe. Te skʼuxul koʼtantike, jaʼ ya yakʼ te ya jchʼuunbeytik smantale. Jichme ya skanantayotik sok ya yakʼbotik bayal utsilal, jaʼ ya yakʼ te ay bin lek ya xkʼax ta jtojoltik yuʼun jich ya stsakxan yip te schʼuunel koʼtantike. Te ya x-abatinotik ta stojol Jehová sok spisil koʼtantike, ya yakʼbotik stseʼelil koʼtantik sok lamalkʼinal (Salmo 34:8; Proverbios 10:22). Te kʼalal ay bayal bin ya jnaʼtik ta swenta Jehová sok te bayal bintik lek ya xkʼax ta jtojoltike, ya yakʼbeyxan yip te bitʼil kamigoinej jbatik sok te Diose.

¿BIN-UTʼIL TE ABRAHAM LA SKANANTAY TE BITʼIL YAMIGOINEJ SBA SOK TE JEHOVAE?

9, 10. 1) Swenta spisil-ora ayuk kamigotik, ¿bin ya skʼan ya jpastik? 2) ¿Bin-utʼil te Abraham la skanantay ta lek te bitʼil yamigoinej sba sok te Jehovae?

9 Te bin kʼax bayal skʼoplale, jaʼ te lekil amigoinele. Teme ya jkʼantik spisil-ora ayuk kamigotike, yame skʼan ya jkanantaytik (kʼopona te sjun Proverbios 17:17). Ma jichuk te bitʼil jun oxom te toyol stojol te jaʼnax ya xtuun awuʼun swenta ya achʼal ana. Te lekil amigoinele jaʼ jich kʼoem bitʼil jun tʼujbil nichim te ya skʼan kanantayel ta leke. Te Abraham snaʼoj te bayal skʼoplal ta yoʼtan te yamigoinej sba sok te Jehovae. Jich yuʼun spisil-ora la skanantay. ¿Bin-utʼil la spas?

Te lekil amigoinele jaʼ jich kʼoem bitʼil jun tʼujbil nichim te ya skʼan kanantayel ta leke

10 Te Abraham spisil-ora la stʼun yaʼiy teme yak ta schʼuunbeyel smantal sok teme yak ta yichʼel ta mukʼ te Diose. Jich bitʼil te kʼalal yak ta bael ta lum te la yichʼ alel ta mantal te ya xkʼot sok te sfamilia soknix te j-abatetik yuʼune, spisil-ora la stʼun te tojobtesel yuʼun Dios ta swenta te bin la sta ta nopel manchukme mukʼ o ma mukʼuk skʼoplale. Jun jaʼbil mato x-ayin-a te Isaac, te Jehová la yal ta mantal te ya spasbey circuncisión (ya yichʼ joybeyel lokʼel ta bojel snujkʼulel sjol skʼunil te winike) spisil te winiketik te ay ta snae. Ta yorail-abi ayix 99 yaʼbilal-a te Abrahame. ¿Bin la spas? ¿Aybal bin yan la yal yuʼun te mantalile? ¿Aybal bin la smak sba-a yuʼun ma schʼuun te mantalile? Maʼuk. La smukʼulin yoʼtan te Jehová sok la spas «ta ora nax» (Génesis 17:10-14; 17:23XCD).

11. 1) ¿Bin yuʼun la smel yoʼtan te Abrahame? 2) ¿Bin-utʼil koltayot yuʼun te Jehovae?

11 Te Abraham la yamigoin te Diose, melel spisil-ora la smukʼulin yoʼtan chikan teme mukʼ o ma mukʼuk skʼoplale. La yaʼiy ta yoʼtan te ya xjuʼ ya yalbey spisil te bin ya skʼan sok te bintik ma xkʼot ta yoʼtane. Jich bitʼil, kʼalal te Jehová la yal te ya slajin te lum Sodoma sok Gomorra, bayal la smel yoʼtan yuʼun te Abrahame. ¿Bin yuʼun? Melel la skuy te ya xlajik te machʼatik lek yoʼtanik sok te chopol yoʼtanike. Julniwan ta yoʼtan te sobrino Lot sok te sfamilia te ayik ta nainel ta Sodoma. Jaʼukmeto te Abraham smukʼulinej yoʼtan te Jehová, jaʼ «te Jchahpanwanej yuʼun swohlol te bahlumilal». Jaʼ yuʼun la yalbey sok spekʼelil yoʼtan te bin la smel yoʼtan yuʼune. ¿Bin-utʼil koltayot yuʼun te Jehovae?  Maba animaj yoʼtan sok akʼbot yil te ya snaʼ yoʼbolil jbatike. Cholbot yaʼiy yuʼun Jehová te kʼalal ya yichʼ ta kʼop te ants winiketike, jaʼ ya sle te machʼatik lek yoʼtanik sok ya skoltaybey skuxlejalik (Génesis 18:22-33).

12, 13. 1) Kʼalal te Jehová la skʼanbey te Abraham ta chikʼbil majtʼanil te snichʼane, ¿bin-utʼil koltayot te bin snaʼoj sok te bintik lek kʼaxem ta stojole? 2) ¿Bin yuʼun ya jnaʼtik te ay schʼuunel yoʼtan te Abraham ta stojol Jehová?

12 Jamal chikan te bin snaʼoj ta lek sok te bintik lek kʼaxem ta stojol te Abrahame, jaʼ koltayot ta skanantayel te bitʼil yamigoinej sba sok te Jehovae. Jaʼ yuʼun te kʼalal kʼanbot yuʼun Jehová ta chikʼbil majtʼanil te snichʼane, te Abraham snaʼoj te lek yoʼtan te Diose, ma x-animaj yoʼtan sok te ya snaʼ yoʼbolil jbatik. Kʼoem ta yoʼtan te maba oranax kʼatpʼuj ta chopol sok te kʼaxto ya x-utsʼinwan te Jehová. ¿Bin yuʼun te jich ya kaltike?

13 Te kʼalal mato xmo bael ta wits-a te Abraham sok te Isaac, te Abraham jich la yalbey te j-abatetik yuʼune: «Mahliyawonic liʼ soc te burro, lum to ya xbohon soc te quereme, ya xbaht quichʼcotic ta mucʼ te Diose, ya suhtotcotic talel» (Génesis 22:5). ¿Bin yuʼun la yalbey te j-abatetik yuʼun te ya sujt talel sok te Isaac? ¿Yuʼunbal la spas lot? Maʼuk. Te Biblia ya yal te smukʼulinej yoʼtan te jaʼ Jehová ya schaʼkuxajtes talel te Isaac (kʼopona te sjun Hebreos 11:19). Te Abraham ay ta yoʼtan te jaʼnix Dios la yakʼ ayinuk snichʼan sok te Sara manchukme ayix bayal yaʼbilalik-a (Hebreos 11:11, 12, 18). Jich yuʼun te Abraham snaʼoj te spisil ya xjuʼ yuʼun spasel te Diose. Manchukme ma snaʼojuk te bin ya xkʼot ta pasel ta kʼajkʼal-abi. Ay schʼuunel yoʼtan ta swenta teme laj te Isaac, te Jehová ya xjuʼ ya schaʼkuxajtes talel swenta jich ya skʼotes ta pasel te bin yalojixe. Jaʼ yuʼun te Biblia ya yal ta swenta te Abraham te «ha tatil yuʼun spisil machʼatic ay schʼuhunel yoʼtanic».

Te Abraham ay schʼuunel yoʼtan ta swenta teme laj te Isaac, ya xjuʼ ya schaʼkuxajtes talel te Jehová swenta jich ya skʼotes ta pasel te bin yalojixe

14. 1) ¿Bintik wokolil ya sitintayik te j-abatetik yuʼun te Diose? 2) ¿Bin-utʼil ya skoltayotik te stalel Abrahame?

14 Ta ora ini, te Jehová maba ya skʼanbotikix ta chikʼbil majtʼanil te kal jnichʼnabtike. Jaʼukmeto jaʼ ya skʼan te ya jchʼuuntik te mantaliletik yuʼune. Ayniwan baeltik ma xkʼot ta koʼtantik bin yuʼun te ya yakʼbotik jchʼuuntik jun mantal o ayniwan wokol ya kaʼiytik schʼuunel. Jich bitʼil ayniwan wokol ya kaʼiytik scholel skʼop Dios ta skaj te ya xiwotik sok wokol ya kaʼiytik te ya xkʼopojotik sok te machʼatik maba ya jnaʼbeytik sbae. Ay ya xiwotik yuʼun te maba pajalotik sok te joʼtaktik ta aʼtel o ta nop jun (Éxodo 23:2; 1 Tesalonicenses 2:2). Teme jich ya kaʼiy jbatike, ¿bin ya skʼan ya jpastik? Juluk ta koʼtantik te la yakʼ ta ilel schʼuunel yoʼtan te Abraham sok te ma xiw yoʼtane. Teme ya jlokʼesbeytik stiempoil ta snopilanel ta koʼtantik te bin la spasik te ants winiketik jich bitʼil te Abrahame, ya xjuʼ ya jkʼayintik-euk, jich ya kamigointik ta lek te Jehovae (Hebreos 12:1, 2).

TE AMIGOINEL YA YAKʼ STSEʼELIL KOʼTANTIK

15. ¿Bin yuʼun ya jnaʼtik te maʼyuk bin-ora sujt yoʼtan ta schʼuunbeyel smantal Jehová te Abrahame?

15 Te Abraham maʼyuk bin-ora sujt yoʼtan ta schʼuunbeyel smantal te Jehovae. ¿Bin yuʼun te jich ya kaltike? Melel te Biblia ya yal te kʼalal  ayix 175 yaʼbilal-a te Abraham mamalubenix ta lek, bayalix yaʼbilal-a sok jun yoʼtan laj bael (Génesis 25:8). Jaʼ-abi, ma jaʼuk te yuʼun ma skʼan ya xkuxinixe. Jaʼ ya skʼan ya yal te tseʼelnax yoʼtan yuʼun te kʼalal ya snop ta yoʼtan te bintik kʼax ta skuxlejale. ¿Bin yuʼun? Melel te bin-utʼil yamigoinej sba sok te Jehovae, jaʼ kʼax mukʼ skʼoplal ta yoʼtan.

16. ¿Binwan yuʼun te kʼax tseʼelnax yoʼtan ta Nichimal kʼinal te Abrahame?

16 Te Biblia ya yal ta swenta Abraham te «yac smahliybel te pueblo te ay tulan yichʼo-ip, te la yichʼ nopel yuʼun Dios bin yilel ya xcʼoht soc te pasbil yuʼune» (Hebreos 11:10). Te «pueblo» jaʼ ya skʼan ya yal te Ajwalinel yuʼun Diose. Te Abraham ay schʼuunel yoʼtan te ay jun kʼajkʼal ya yil te «pueblo» ya xmantalaj ta swolol Balumilal. Jich ya xkʼot ta pasel. Nopanax awaʼiy te stseʼelil yoʼtan ya yaʼiy ta patil te Abraham kʼalal yakix ta kuxinel ta Nichimal kʼinal sok te kʼaxto ya yamigoinxan te Diose. Tseʼelme yoʼtan te kʼalal ya snaʼ te bitʼil bayal mil jaʼbil koltayot te yantik j-abatetik yuʼun Dios te bitʼil la yakʼ ta ilel te schʼuunel yoʼtan te Abrahame. Yame snaʼ te bin la spas sok te Isaac ta wits, la yakʼ ta ilel te ay bin mukʼ skʼoplal kʼot ta pasel ta patile (Hebreos 11:19). Sok yame snaʼ te skʼuxul swokol la yaʼiy ta yoʼtan te kʼalal kʼan yakʼ ta chikʼbil majtʼanil te Isaac, jaʼ bayal koltayotik te machʼatik jun yoʼtan la yakʼ sbaik ta stojol te Diose. ¿Bin koltayotik? Melel koltayotik ta yaʼiyel ta yoʼtanik-euk te skʼuxul swokol la yaʼiy Jehová te kʼalal la stikun tal te snichʼan swenta tal yakʼ skuxlejal ta stojol te ants winiketike (Juan 3:16). Ta swenta te stalel Abraham, jaʼ skoltayojotik te mukʼuk skʼoplal ta koʼtantik te la yakʼ sba ta majtʼanil te Jesuse, jich la kichʼtik akʼbeyel kiltik te mukʼ skʼuxul yoʼtan te Jehová ta jtojoltik te maʼyuk jich kʼoemxan ta pasele.

17. 1) ¿Bin-a te ya skʼan ya kakʼ ta koʼtantik stʼunele? 2) ¿Bin ya jnopbeytikxan skʼoplal ta yan articulo?

17 Akʼa kakʼ ta koʼtantik stʼunbeyel schʼuunel yoʼtan te Abrahame. Jich te bitʼil la spase, ya skʼan ay bin jnaʼojtik ta lek sok te ay bintik lek ya xkʼax ta jtojoltike. Teme spisil-ora ya jnopbeytik skʼoplal te Jehová sok te ya jchʼuunbeytik te smantale, yame kiltik bin-utʼil ya yakʼbotik utsilal sok ya skanantayotik (kʼopona te sjun Hebreos 6:10-12). Jaʼ jich ya xjuʼ ya kamigointik te Dios ta sbajtʼel kʼinal. Ta yan articulo ya jnopbeytik stalel oxtulxan yamigotak te Diose.

^ [1] (parrafo 3): Te Abraham sok te Sarae, ta sjajchibal jich sbiilinejik Abram sok Sarai. Jaʼukmeto ta patil te Jehová la yakʼbey sbiilin Abraham sok Sara. Ta articulo ini jaʼ ya jtuuntestik te sbiil akʼbotik yuʼun te Jehovae.

[Nota]

^ párr. 2 «Jich kʼot ta pasel te bin ya yal te sjun Dios: “Te Abrahán la yakʼ schʼuunel yoʼtan ta stojol te Jehová, ta swenta-abi, tojil winik la yichʼ albeyel skʼoplal”, jaʼ yuʼun la sbiilin amigo yuʼun Jehová.» (Santiago 2:23, TNM.)