Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) MARZO 2016

¿Chapalatixbal swenta ya awichʼ jaʼ?

¿Chapalatixbal swenta ya awichʼ jaʼ?

«¿Machʼahex a te yac acʼan yac apasic toyol ilo-qʼuinal, te ma nahiluc yac ahuhcan abahic ta spasel cuenta teme ticʼ ya xhuʼ a te jayeb ay awuʼune?» (LUCAS 14:28)

KʼAYOJIL 120 SOK 64

Te articulo ini sok te yanxane jaʼ ta swenta jchʼieletik te snopoj ya yichʼik jaʼe

1, 2. 1) Te j-abatotik yuʼun te Diose, ¿bin ya yakʼbotik stseʼelil koʼtantik? 2) ¿Bin ya xjuʼ ya spasik te meʼil tatiletik sok te ancianoetik swenta ya skoltayik te jchʼieletik ta snaʼel te bin yilel ya xkʼot skuxlejalik te kʼalal ya yichʼik jaʼe?

TE Christopher aytonax lajchayeb yaʼbilal-a sok yoʼtanuk ya yichʼix jaʼ. Jich albot yuʼun jtul anciano: «Ya jnaʼbat aba te kʼalal alalat-to-ae. Ya yakʼbon stseʼelil koʼtan yuʼun te ya akʼan ya awichʼ jaʼe, jaʼukmeto ay bin ya jkʼan ya jojkʼoybat: ¿Bin yuʼun te ya akʼan ya awichʼ jaʼe?». Te anciano snaʼoj ta lek bin yuʼun te jich la sjojkʼoybeye. Te j-abatotik yuʼun te Diose ya yakʼbotik stseʼelil koʼtantik kʼalal ya kiltik te ya yichʼik jaʼ bayal ta tul jchʼieletik ta jujun jaʼbile (Eclesiastés 12:1). Jaʼukmeto te meʼil tatiletik sok te ancianoetik ta kongregasion ya skʼan ya yilik ta lek teme yuʼun-nix lokʼem ta yoʼtanik-a te ya yichʼik jaʼe sok teme snaʼojik te bin ya skʼan ya yale.

2 Te Biblia ya yakʼ ta nopel te kʼalal ay machʼa ya yakʼ sba ta stojol te Jehová sok te ya yichʼ jaʼe, ya xjajch jun achʼ kuxlejalil yuʼun te bitʼil j-abat yuʼun te Diose. Te bin ya skʼan ya yal-abi, jaʼ te ya sta bayal utsilaletik yuʼun Jehová, jaʼukmeto jaʼnix jich ya sta utsʼinel yuʼun te Satanase (Proverbios 10:22; 1 Pedro 5:8). Jaʼ yuʼun te meʼil tatiletik te testigoetik yuʼun Jehová ya skʼan ya slokʼesik tiempo ta skoltayel te yal snichʼnabik yuʼun ya snaʼbeyik  swentail te bin ya skʼan ya yal te ya x-ochotik ta jnopojel yuʼun te Cristoe. ¿Jaxan teme ay jtul jchʼiel kerem te maba testigo yuʼun Jehová te smeʼ state? Teme jich-abi, te ancianoetik yuʼun kongregasion yame skoltayik sok yutsil yoʼtanik ta snaʼbeyel swentail te bin ya skʼan ya yal te ya kakʼ jbatik ta stojol te Jehová sok te ya kichʼtik jaʼe (kʼopona te sjun Lucas 14:27-30). Te kʼalal ay machʼa ya skʼan ya spas jun mukʼul nae ya skʼan ya schajpan sba ta lek. Jaʼ pajal sok te kʼalal ay jtul jchʼiel ya skʼan ya yichʼ jaʼe, yame skʼan ya schajpan sba ta lek. Jaʼme jich ya xjuʼ jun yoʼtan ya yakʼ sba ta stojol te Jehová «cʼalal ta slajibal» (Mateo 24:13). ¿Bin ya xkoltayot te jchʼieletik swenta jun yoʼtan ya x-abatinik ta stojol Jehová ta sbajtʼel kʼinal? Yame kiltik bael.

3. 1) ¿Bin la yal te Jesús sok te Pedro ta swenta te ichʼjaʼe? (Mateo 28:19, 20; 1 Pedro 3:21.) 2) ¿Bin jojkʼoyeletik ya kiltik ta articulo ini? 3) ¿Bin yuʼun tulan skʼoplal te jich ya jojkʼoybey jbatike?

3 ¿Jchʼielatbal sok yabal akʼan ya awichʼ jaʼ? ¡Kʼax lek-abi! Te yichʼel jaʼ swenta ya x-ochotik ta testigo yuʼun Jehová, jaʼ jun mukʼul majtʼanil. Te Jesús la yakʼ ta nopel te spisil ya skʼan ya yichʼik jaʼ te machʼatik ya schʼuunike. Jaʼnix jich te jpuk-kʼop Pedro la yal te ya skʼan pasel-abi swenta jich ya xkolotik jilel te kʼalal ya xtal te tulan wokolile (Mateo 28:19, 20; 1 Pedro 3:21). Ta articulo ini, yame kiltik bael oxeb jojkʼoyeletik te ya skoltayat ta snaʼel teme chapalatix swenta ya awichʼ te jaʼe: «¿Yijubenixbal te schʼuunel koʼtane? ¿Bin yuʼun te ya jkʼan ya kichʼ jaʼe? ¿Yabal jnaʼix bin ya skʼan ya yal te ya kakʼ jba ta stojol te Jehovae?». Tulan skʼoplal te jich ya ajojkʼoybey aba-abi. ¿Bin yuʼun? Melel te kʼalal ya awichʼ jaʼe, tey ya awakʼ ta ilel te la awalbey ta jamal te ya x-abatinat ta stojol te Jehová ta spisil-ora. Te jojkʼoyeletik-abi, yame skoltayat ta skʼotesel ta pasel te bin ya awalbey ta jamal te ya apase.

¿YIJUBENIXBAL TE SCHʼUUNEL KOʼTANE?

4, 5. 1) ¿Bin yuʼun ma puersa ya jmaliytik te ayix kaʼbilaltik yuʼun ya kichʼtik jaʼe? 2) ¿Bin ya skʼan ya yal te yijubenotikix ta swenta schʼuunel koʼtantike?

4 Te Biblia maba ya yal jayeb kaʼbilaltik ya skʼan ayuk-a te kʼalal ya kichʼtik jaʼe. Te sjun Proverbios 20:11 ya yal ta swenta te «tut querem, naʼbil sba yuʼun te bintic ya spas, teme lec soc toj te bin ya spase». Jich yuʼun te tut kereme ya xjuʼ ya snaʼ te bin lek o te bin maba lek ta pasele. Sok ya xjuʼ ya snaʼbey swentail te bin ya skʼan ya yal te ya kakʼ jbatik ta stojol te Jehovae. Jich yuʼun teme ay jtul jchʼiel ya yakʼ ta ilel te yijubenix ta swenta schʼuunel yoʼtan sok te yakʼojix sba ta stojol te Jehovae, tulan skʼoplal sok snujpʼ ya yichʼ jaʼ (Proverbios 20:7).

5 ¿Bin ya skʼan ya yal te yijubenotikix ta swenta schʼuunel koʼtantike? Ma jaʼuknax ya skʼan ya yal te ayix bayal kaʼbilaltike. Te Biblia ya yal te jaʼ ya skʼan ya yal te ya snopik tsajtayel te bintik lek sok te bintik ma lekuke (Hebreos 5:14) (ilawil te recuadro «¿Bin ya skʼan ya yal?»). Jaʼ ya skʼan ya yal te ya jnaʼtik te bin lek sok te ya jkʼantik spasel sok spisil koʼtantik. Te machʼa yijubenix ta swenta schʼuunel yoʼtan ya spas tulan ta spʼajel te bin chopol sok ma puersauk te ay machʼa ya x-alulanbot te yakuk spas te bin leke. Teme ya awichʼ jaʼe, yame skʼan te yakuk anaʼ stsajtayel te bin lek ta pasele, jaʼnix jich te kʼalal maba ya yilat te ameʼ atat o te yantik ants winiketike (ta sjun Filipenses 2:12 yame ataxan te bin pajal skʼoplal soke).

6, 7. 1) ¿Bintik-a te maba lek ta pasel te la sitintay te Daniele? 2) ¿Bin-utʼil la yakʼ ta ilel te yijubenix ta swenta schʼuunel yoʼtane?

6 ¿Yabal xjuʼ ya yakʼ ta ilel te yijubenix ta swenta schʼuunel yoʼtan te machʼa jchʼieltoe? Nopa awaʼiy ta swenta te jtul j-abat yuʼun Dios te Daniel  sbiile. Maba jokinbil bael yuʼun smeʼ stat te kʼalal jchʼieltoniwan-a te la yichʼ ikʼel bael ta lum Babiloniae. Tey la sitintay bayal ta chajp te bin maba lek ta pasele. Jich bitʼil yak ta kuxinel ta yolil te machʼatik maba ya schʼuunbeyik smantal te Diose. Jaʼnix jich mukʼ skʼoplal la yichʼ ilel tey-a. Te Daniel la yichʼ tsael jich bitʼil te chaʼoxtul jchʼieletik swenta ya x-abatinik ta stojol te ajwalile (Daniel 1:3-5, 13). Te bin yilel skuxlejal ta Israel te Daniele, jich yaʼiyel te jaʼ lekxan te skuxlejal te kʼalal ay ta Babiloniae.

7 Jaʼukmeto ¿bin la spas te jchʼiel kerem Daniele? ¿Labal yakʼ te ya xjelbot stalel o ya xpejkʼanbot schʼuunel yoʼtan yuʼun te ants winiketik ta Babiloniae? Te Biblia ya yal te «la snop ta yoʼtan te ma ba ya sbohlobtes sba» te Daniele. Jaʼ-abi ya skʼan ya yal te maba la sbolobtes sba ta swenta te bintik kapal sok te lotil relijione (Daniel 1:8). Jaʼ jich la yakʼ ta ilel te yijubenix ta swenta schʼuunel yoʼtane.

 

Te jchʼieletik te yijubenikix ta swenta schʼuunel yoʼtanik, maba yakʼik ta ilel te jaʼ yamigoinejik Dios kʼalal ay ta sNail Tsoblej sok te ya yakʼ ta ilel te jaʼ yamigo te sjoʼtak ta eskuelae

8. ¿Bin ya xjuʼ ya anop ta swenta te Daniele?

8 ¿Bin ya xjuʼ ya anop ta swenta te Daniele? Teme jchʼielat te yijubenatix ta swenta schʼuunel awoʼtane, yame achʼuunbey smantal te Jehová soknix kʼalal ya xtal wokoliletik. Mame jichukat te bitʼil jkojt chambalam te camaleón sbiile, te chambalam-abi ya xjelon skoloril jaʼ chikan te bin yilel skoloril te bintik ay ta sjoyobale. Maba lek teme ya awakʼ ta ilel te jaʼ amigoat yuʼun Dios te kʼalal ayat ta sNail Tsoblej sok te ya awakʼxan ta ilel te ya amulan spasel te bin ya spasik te ants winiketik te kʼalal ayat ta eskuelae. Yame skʼan jun awoʼtan ta stojol te Diose, jaʼnix jich te kʼalal ya xtal wokoliletik ta atojole (kʼopona te sjun Efesios 4:14, 15).

9, 10. 1) ¿Bin yuʼun ya skʼan ya ajultes ta awoʼtan te bin yaʼiyel la awaʼiy aba yuʼun te la asitintay te bin chopol ta pasel te jkʼaxelto awuʼune? 2) ¿Bin-a te ichʼjaʼe?

9 Ta melel, chikan teme jchʼielotikto o ayix bayal kaʼbilaltike, aynanix banti ya xchʼayotik-a (Eclesiastés 7:20). Jaʼukmeto teme ya akʼan ya awichʼ jaʼe, yame skʼan ya ajojkʼoybey aba teme yuʼun-nix awakʼoj ta awoʼtan-a te ya apas spisil-ora te bin ya skʼan yoʼtan te Jehovae. ¿Ayixbal tiempo te yakat ta schʼuunbeyel smantal te Jehovae? Nopa awaʼiy te bin yaʼiyel la awaʼiy aba yuʼun te la asitintay te bin chopol ta pasel te jkʼaxelto  awuʼune. ¿Labal awakʼ ta ilel te apʼijil ta snopel te bin lek ta pasel ta yorail-abi? O ayniwan pajal te bin kʼax ta awenta jich bitʼil te Daniele. Ayniwan machʼa la yalbat te yakuk atuuntes ta lek te apʼijil swenta ya amulan lekil kuxlejalil ta Balumilal. Te kʼalal ay machʼa ya stijbat awoʼtan ta spasel jich-abi, ¿aybal apʼijil ta snopel ta lek te bin ya skʼan Jehová te ya apas ta yorail-abi? (Efesios 5:17).

10 Kʼax tulan skʼoplal te jich ya ajojkʼoybey aba-abi, melel jaʼme ya skoltayat ta snaʼel te kʼax tulan skʼoplal te ichʼjaʼe. Te kʼalal ya awichʼ jaʼe, jich ya awakʼbey yil yantik te awalojbeyix ta jamal Jehová te kʼux ta awoʼtan sok te ya x-abatinat ta stojol sok spisil awoʼtan ta sbajtʼel kʼinal (Marcos 12:30). Spisil te machʼatik ya yichʼik jaʼe, ya skʼan ayuk ta yoʼtan te ya skʼotes ta pasel te bin la yalbey ta jamal Jehová te ya spas ta stojole (kʼopona te sjun Eclesiastés 5:4, 5).

¿BIN YUʼUN TE YA JKʼAN YA KICHʼ JAʼE?

11, 12. 1) Teme anopojix te ya akʼan ya awichʼ jaʼe, ¿bin ya skʼan ayuk ta awoʼtan? 2) ¿Bin ya skoltayat ta snaʼel teme yuʼun-nix tulan skʼoplal ta awoʼtan-a te ichʼjaʼ jich bitʼil ya yil te Jehovae?

11 Te Biblia ya yal ta swenta te j-abatetik yuʼun Dios «jun yoʼtan ya yacʼ sba[ik]» ta abatinel, jaʼnix jich te jchʼieletike (Salmo 110:3). Jich yuʼun teme yakat ta snopel te ya akʼan ya awichʼ jaʼe, yame skʼan te jaʼukatnix ataoj ta nopel te jich ya apase. Jaʼ-abi, kʼax tulanme skʼoplal, kʼaxto jich mukʼ skʼoplal-a teme awichʼoj chʼitesel yuʼun te ameʼ atat te jaʼ testigoetik yuʼun Jehovae.

12 Te kʼalal yakat ta mukʼubele, yaniwan awil te ay yantik ya yichʼik jaʼe. Ayniwan yichʼojikix jaʼ te awamigotak o abankil awijtsʼinab. Jaʼukmeto yame skʼan ya atsajtay aba. Mame xa akuy te ya xjuʼ ya awichʼ jaʼ ta skaj te ayix awaʼbilal o ta skaj te jich ya spas te yantike. ¿Bin ya skoltayat ta snaʼel teme yuʼun-nix tulan skʼoplal ta awoʼtan-a te ichʼjaʼ jich bitʼil ya yil te Jehovae? Akʼbeya tiempo yuʼun ya anopilan ta awoʼtan ta snaʼel te bin yuʼun kʼax tulan skʼoplal te ichʼjaʼe. Ta articulo ini sok te yanxane, yame awil tey-a te bintik swentaile.

13. ¿Bin-utʼil ya anaʼ teme yuʼun-nix lek-a te bin anopoj ta awoʼtan ta swenta te ya akʼan ya awichʼ jaʼe?

13 ¿Bin-utʼil ya anaʼ teme yuʼun-nix lek-a te bin anopoj ta awoʼtan ta swenta te ya akʼan ya awichʼ jaʼe? Ay bin-utʼil ya anaʼ, jaʼ te kʼalal ya awil te bin-utʼil ya akʼopon te Diose. Jojkʼoybeya aba: «¿Bayalbal buelta ya jkʼopon te Jehová o jtebnax? ¿Yabal kalbey ta jamal te bin-nix ya jkʼan-ae o biluknax ya kalbey?». Jaʼ-abi, ya skoltayat ta yilel teme yuʼun-nix jaʼ awamigo-a te Diose (Salmo 25:4). Bayal buelta ya sujtesbotik jkʼoptik ta Biblia te Diose. Jich yuʼun te bin-utʼil ya xjuʼ ya anaʼxan teme yuʼun-nix lek-a te bin anopoj ta awoʼtan ta swenta te ya akʼan ya awichʼ jaʼe, jaʼ te ya awil ta lek te bin-utʼil ya anop te Bibliae (Josué 1:8). Jojkʼoybeya aba: «¿Kʼayemonbal ta snopel te Biblia ta spisil semana? ¿Yabal jmulan yakʼel jkomentario kʼalal ya yichʼ pasel te yichʼel ta mukʼ Dios ta sjunal jnae?». Te jojkʼoyeletik-abi, yame skoltayat ta snaʼel teme yuʼun-nix lek-a te bin ataoj ta nopel ta swenta te ya akʼan ya awichʼ jaʼe, te jaʼ ya skʼan ya yal te yuʼun-nix ya akʼan ya awamigoin-a te Jehová sok te ya x-abatinat ta stojol sok spisil awoʼtane.

¿YABAL JNAʼIX BIN YA SKʼAN YA YAL TE YA KAKʼ JBA TA STOJOL TE JEHOVAE?

14. ¿Bin-utʼil maba pajal te ya kakʼ jbatik ta stojol Dios sok te ichʼjaʼe?

14 Ay jchʼieletik ya yalik te yakʼojix sbaik ta stojol te Jehovae, jaʼukmeto mato chapalikuk swenta ya yichʼik jaʼ. ¿Yabal xjuʼ te jich ya jpastike? Te jchʼieletik-abi, ma snaʼik te maba pajal te ya kakʼ jbatik ta stojol Dios sok te ya kichʼtik jaʼe. Te yakʼel jbatik ta stojol te Diose, jaʼ te ya akʼopon te Dios swenta ya awalbey ta jamal te ya awakʼbey akuxlejal yuʼun ya x-abatinat ta stojol ta sbajtʼel kʼinal. Ta patil ya awichʼ jaʼ swenta ya awakʼ ta ilel ta komonsitil te awakʼojix akuxlejal ta stojol te Jehovae. Jich yuʼun te kʼalal mato awichʼojuk te jaʼe, yame skʼan ya anaʼ te bin ya skʼan ya yal te ya kakʼ jbatik ta stojol te Diose.

15. ¿Bin-a te yakʼel jbatik?

15 Te kʼalal ya awakʼ aba ta stojol te Jehovae, jich kʼoem te yakat ta yalbeyel te teyto jajch awakʼbey ta  skʼab akuxlejal te Jehovae. Te yakʼel jbatik ta stojol te Diose jaʼ te ya kalbeytik ta jamal te jaʼ kʼax mukʼ skʼoplal ta koʼtantik te ya x-abatinotik ta stojole (kʼopona te sjun Mateo 16:24). Jaʼ yuʼun te yakʼel jbatik ta stojol te Jehovae, kʼax tulanme skʼoplal (Mateo 5:33). ¿Bin-utʼil ya awakʼ ta ilel te awakʼojbeyix ta skʼab Dios te akuxlejale? (Romanos 14:8.)

16, 17. 1) Ala ta seña kʼop te ma jaʼukix awuʼun te akuxlejale. 2) Te kʼalal ay machʼa ya yakʼ skuxlejal ta stojol te Diose, ¿bin yak ta yalbeyel kʼoem te Diose?

16 ¿Bin-utʼil ya awakʼ ta ilel te maba ayix ta awenta te akuxlejale? Nopa awaʼiy ta swenta te bin ya jlokʼtaytik ta alele. Nopa awaʼiy te ay jtul awamigo ya yalbat te ya yakʼbat ta majtʼanil jkojt karro, ya yakʼbat te junetik sok ya yalbat te jaʼix awuʼune. Jaʼukmeto la yalbat te ya yichʼbey jilel te syabeul sok te jaʼnax ay ta swenta stijel stukele. ¿Yabal xtal ta awoʼtan te yuʼun-nix la yakʼbat-a te karroe? ¿O jaʼto yuʼun?

17 Te kʼalal ay machʼa ya yakʼ skuxlejal ta stojol te Diose, jich kʼoem te yak ta yalbeyel ini: «Te jkuxlejale jaʼix awuʼun». Jaʼ yuʼun te Jehová ya skʼan te ya skʼotes ta pasel te bin la yalbey ta jamal te ya spas ta stojole. Jaʼukmeto nopa awaʼiy teme jajch sjokin sba sok te machʼa maba testigo yuʼun Jehová te machʼa la yakʼ skuxlejal ta stojol te Jehovae. O teme ya x–och ta aʼtel te banti maʼyukix stiempo swenta ya xlokʼ ta scholel skʼop Dios o ta tsoblejetike. Te machʼa jich ya spase, maba yak ta skʼotesel ta pasel te bin la yal ta jamal ta stojol te Diose. Jaʼme pajal sok te machʼa ya yichʼbey jilel syabeul te karroe. Jich yuʼun teme ya awakʼ akuxlejal ta skʼab te Diose, jaʼme spisil-ora ya skʼan ya apas te bin ya skʼan yoʼtane, manchukme maba ya apas te bin ya amulan te jaʼate. Yame skʼan jpajbeytik stalel te Jesús te jich la yal: «Cohemon tal ta chʼulchan, ma haʼuc yuʼun te ya jpas te bin ya scʼan coʼtan, pero yuʼun ya jpas te bin ya scʼan yoʼtan stuquel te machʼa la sticonon tale» (Juan 6:38).

18, 19. 1) ¿Bin la yal te Rose sok te Christopher ta swenta te ichʼjaʼe? 2) ¿Bin ya anop-euk ta swenta te ichʼjaʼe?

18 Jamal chikan ta swenta te ichʼjaʼe, kʼax tulan skʼoplal. Te kʼalal kakʼoj jbatik ta stojol te Dios sok te kichʼojtik jaʼe, jaʼ jun mukʼul majtʼanil ta jwentatik. Teme kʼux ta awoʼtan te Jehová sok teme ya xkʼot ta awoʼtan te bin ya skʼan ya yal te ichʼjaʼe, jich maba cheb awoʼtan te ya awichʼ jaʼe. Jaʼnix jich maʼyuk bin-ora ya sujt awoʼtan te jich la apase. Jtul jchʼiel achʼix te Rose sbiil, jich la yal: «Kʼax kʼux ta koʼtan te Jehová sok maʼyuk bin yan ya yakʼbon stseʼelil koʼtan te bitʼil yakon ta abatinel ta stojole. Te kʼalal la jnop te ya kichʼ jaʼe, aynanix ta koʼtan-a te jaʼ kʼax lek te jich ya jpase».

19 Ta sbabial parrafo la kalbeytik skʼoplal jtul jchʼiel te Christopher sbiile. La yichʼ jaʼ te kʼalal aytonax lajchayeb yaʼbilal-ae. ¿Bin yaʼiyel ya yaʼiy sba yuʼun te jich la snop ya spase? La yal te kʼax bayalaj stseʼelil yoʼtane. Te kʼalal ayix juklajuneb yaʼbilal-ae, la yakʼ sba ta precursor regular, te kʼalal ayix waxaklajuneb yaʼbilal-ae, la yichʼ akʼbeyel yaʼtel ta siervo ministerial, ta ora ini yak ta abatinel ta Betel. Jich la yal te Christopher: «Jaʼ kʼax lek te la kichʼ jaʼe. Ya yakʼbon stseʼelil koʼtan te bitʼil yakon ta abatinel ta stojol Jehová sok te organisasion yuʼune». ¿Jaxan te jaʼate? ¿Yakatbal ta snopel te ya awichʼ jaʼe? Teme jiche, ¿bin-utʼil ya achajpan aba? Yame kiltik bael ta yan articulo.