Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) MARZO 2016

 TEMA TA SBABIAL PAJINA: ¿BIN YUʼUN KʼAX SWOKOL SOK LAJ TE JESUSE?

¿Yuʼun-nixbal kʼot ta pasel ta smelelil-a?

¿Yuʼun-nixbal kʼot ta pasel ta smelelil-a?

Ta yaʼbilal 33 ta jkʼajkʼaleltik, la yichʼ milel te Jesús te jaʼ slumal te Nazaret. La yichʼ kuyel te ya skontrain kʼoem te smantal ajwalile, maʼyuk la yichʼ naʼbeyel yoʼbolil sba ta majel sok la yichʼ jijpanel ta jchʼixnax teʼ, la yil swokol ta lajel tey-a. Jaʼukmeto te Dios la schaʼkuxajtes te Jesús sok te kʼalal kʼaxemix cuarenta kʼajkʼal-ae mo bael ta chʼulchan.

Te bin mukʼ skʼoplal tsʼibaybile, ya xjuʼ ya jtatik ta ilel ta chaneb Evangelio yuʼun te Yachʼil Testamento o Escrituras Griegas Cristianas. Jaʼukmeto, ¿yuʼun-nixbal kʼot ta pasel ta smelelil-a? Jaʼ jun jojkʼoyel te tulan skʼoplal sok te ya skʼan ya jlebeytik sujtibe, melel teme manix jichuk kʼoem ta pasel-ae, te chʼuunel oʼtanil ta stojol Dios sok te yakotik ta smaliyel te kuxlejalil ta nichimal kʼinal ta patile, tojolnax-abi (1 Corintios 15:14). Jaʼukmeto teme yuʼun-nix kʼot ta pasel ta smelelil-ae, ayme bin kʼax tʼujbil yakotik ta smaliyel ta pajel chaʼbej-abi. Jaʼ yuʼun, ¿smelelilbal te bintik ya scholbey skʼoplal te Evangelioetike o lotil?

TE BIN YA YAKʼ TA NAʼEL TE BINTIK KʼOEM TAL TA PASELE

Te yantik junetik tsʼibaybil te manix smeleliluk-ae maba pajal sok te Evangelioetik te tsʼakal tsʼibaybil stukele. Jich bitʼil te Evangelioetik ya yalbey sbiil bayal lugaretik te yato xjuʼ ta ilel ta ora ini sok sbiil ants winiketik te ya yalbeyik  skʼoplal-euk te machʼatik ay bin ya stʼunbeyik skʼoplale (Lucas 3:1, 2, 23).

Te machʼatik ya stsʼibaybeyik skʼoplal ta swenta te kuxlejalil ta sbabial sok ta schebal siglo, la yalbeyik skʼoplal-euk te Jesuse. * Ta swenta te bin-utʼil la yichʼ milel te Jesús sok te bin-nix-utʼil ya scholbey skʼoplal-a te Evangelioetike, ya spaj sba sok te bintik-utʼil ya xmilawanik ta swenta tulan mulil te romanoetik ta yorail-abi. Jaʼnix jich spisil te bintik kʼot ta pasele, ya scholbey skʼoplal te bin-nix smelelil-ae sok maʼyuk bin la smuk jilel ta yoʼtanik soknix la stsʼibayik te bin maba lek la spasik chaʼoxtul te jnopojeletik yuʼun te Jesuse (Mateo 26:56; Lucas 22:24-26; Juan 18:10, 11). Spisil-abi, ya yakʼ te ilel te machʼatik la stsʼibayik te Evangelioetik la yalik te bin smelelil sok la yakʼik ta naʼel te bintik smelelil ya skʼan ya jnaʼtik ta swenta te Jesuse.

¿CHAʼKUXAJBAL TALEL TE JESUSE?

Manchukme jteb ma spisiluk te ants winiketik ya schʼuun yoʼtanik te yuʼun-nix ayin-a te Jesuse, ay yantik te ma schʼuun yoʼtanik te chaʼkuxaj talele. Jaʼnix jich te jpuk-kʼopetik yuʼune, ta sjajchibal maba la schʼuun yoʼtanik te chaʼkuxajemixe (Lucas 24:11). Jaʼukmeto te jpuk-kʼopetik kʼunkʼun la schʼuun yoʼtanik te kʼalal jaʼiknix sok te yantik jnopojeletik la yilik ta yantik buelta te chaʼkuxajemix-a te Jesuse. Jaʼnix jich ta jun buelta kʼaxem ta quinientos ta tul la yil ta spisilik te Jesuse (1 Corintios 15:6).

Te jnopojeletik maba xiw yoʼtanik teme ya yichʼik chukel sok teme ya yakʼ ta woklajel skuxlejalik ta scholbeyel yaʼiy ta spisilik te chaʼkuxajemix te Jesús, jaʼnix jich la scholbeyik te machʼatik la smilik te Jesuse (Hechos 4:1-3, 10, 19, 20; 5:27-32). ¿Labal yakʼ ta woklajel skuxlejalik teme yuʼun-nix maba schʼuunej yoʼtanik-a te chaʼkuxajemix te Jesuse? Maʼuk. Ta swenta te kʼoem ta yoʼtanik te yuʼun-nix chaʼkuxajem-a te Jesuse, jaʼ te bin bayal tijbot yoʼtanik te jchʼuunjeletik ta namey sok te jchʼuunjeletik ta ora ini.

Te bintik ya scholbey skʼoplal te Evangelioetik ta swenta te slajel sok te chaʼkuxaj te Jesuse, yichʼoj te bintik tulan skʼoplal ya skʼan ya jnaʼtik sok tsʼibaybil tey-a te bintik smelelil kʼoemik ta pasele. Teme ya anopbey skʼoplal te bintik cholbil jilele, yame schʼuun awoʼtan te bintik ya yal te yuʼun-nix kʼoemik ta pasel-ae. Jaʼukmeto te bin ya skoltayatxan swenta ya schʼuun awoʼtane, jaʼ te ya anaʼbey swentail bin yuʼun te jich kʼot ta pasel spisil-abi. Te yan articulo yame scholbey skʼoplal.

^ párr. 7 Te Tácito, te ayin ta yaʼbilal 55, jich la stsʼibay: «Te Cristo, te jaʼ yichʼojbeyik sbiil te jchʼuunjeletike, la yichʼ milel yuʼun te ajwalil Poncio Pilato te kʼalal yak ta mantalteswanej-a te Tiberio César». Ayxan yantik te ya stsʼibaybeyik skʼoplal ta swenta te kuxlejalil te la yalbeyik skʼoplal-euk te Jesuse, jaʼ te romano winik Suetonio sbiil sok te judío Josefo (te kuxin ta sbabial siglo) soknix te Plinio el Joven, ajwalil ta Bitinia (te kuxin ta sjajchibal te schebal siglo).