Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) MARZO 2016

¿Bin-utʼil ya xjuʼ ya achajpan aba ta swenta te ichʼjaʼe?

¿Bin-utʼil ya xjuʼ ya achajpan aba ta swenta te ichʼjaʼe?

«Ya jmulan spasel te bin ya scʼan awoʼtan, Dios cuʼun.» (SALMO 40:8)

KʼAYOJIL 51 SOK 58

1, 2. 1) ¿Bin yuʼun te kʼax tulan skʼoplal te ichʼjaʼe? 2) ¿Bin ya skʼan ya awil nailuk te kʼalal ya awichʼ jaʼe?

¿JCHʼIELATBAL sok yabal akʼan ya awichʼ jaʼ? Teme jiche, jaʼ jun mukʼul majtʼanil ay ta atojol. Jich bitʼil la kiltikix ta yan articulo, te ichʼjaʼe, jaʼ te bin tulan skʼoplal ya skʼan nopele. Te kʼalal jich ya apase, jich ya awakʼbey yil yantik te awakʼojix aba ta stojol Jehová. Jaʼ te la awalbey ta jamal te ya x-abatinat ta stojol sok te ya apasbey te skʼanojel yoʼtan ta spisil-ora sok te jaʼ kʼax mukʼ skʼoplal ta akuxlejale. Ta skaj te jaʼ kʼax tulan skʼoplal ya yil Dios te la awalbey ta jamal te ya x-abatinat ta stojole, ya skʼan ya awil nailuk teme yijubenatix ta swenta schʼuunel awoʼtane, jichme ta atukel ya xtal ta awoʼtan spasel sok jich kʼoem ta awoʼtan te bin ya skʼan ya yal te ya awakʼ aba ta stojol Dios.

2 Jaʼukmeto yaniwan awaʼiy te maba chapalat ta swenta te ichʼjaʼe. O ayniwan chapalatix ya awaʼiy aba, jaʼukmeto te ameʼ atate yaniwan yalbat te yakuk amaliyxan jaʼto te kʼalal mukʼatix-ae sok te kʼalal ay bayal bin ya anaʼix-ae. Mame xchebaj awoʼtan. Pasa tulan swenta ya xyijubat ta swenta schʼuunel awoʼtan yuʼun jich chapalat ta swenta te ichʼjaʼe. Te articulo ini ya skoltayat ta spasel oxchajp te bin ya skʼan ya awakʼ ta awoʼtan spasele. Ta sbabial, te bintik achʼuuneje. Schebal, te bintik ya apase. Ta yoxebal, te bin ya awaʼiy ta awoʼtan ta stojol te Jehová.

 TE BINTIK ACHʼUUNEJE

3, 4 ¿Bin ya xjuʼ ya snopik te jchʼieletik ta swenta te Timoteoe?

3 Jojkʼoybeya aba ini: «¿Bin yuʼun schʼuunej koʼtan te yuʼun-nix ay-a te Diose? ¿Bin yuʼun schʼuunej koʼtan te yuʼun-nix lokʼem tal ta yoʼtan Dios-a te Bibliae? ¿Bin yuʼun te ya jchʼuunbey smantal te Dios sok ma jaʼuk ya jchʼuun spasel te kostumbreetik yuʼun ants winiketike?». Te jojkʼoyeletik-abi, ya skoltayat ta stʼunel te bin la yal te jpuk-kʼop Pablo: «Jich me ya awaqʼuic ta ilel te scʼanjel yoʼtan te Diose, jaʼ bi, jaʼ te bila leque, te bila ay yutsile, soc te bila toje» (Romanos 12:2, XCD). Jaʼ-abi, ya skʼan ya yal te jaʼatnix ya awil te ya ata alekilal yuʼun teme jaʼ ya apas te bin ya yal te Diose. ¿Bin yuʼun te jich ya skʼan ya apase?

4 Nopa awaʼiy ta swenta te jchʼiel Timoteo. Ta skaj te smeʼ sok te syameʼe akʼbot snop te bintik ya yakʼ ta nopel te sJun Diose. Jaʼukmeto te jpuk-kʼop Pablo jich la yalbey te Timoteo: «Teyuc ay awoʼtan spisil ora a te bin anopoj soc te bin cʼohem ta awoʼtan» (2 Timoteo 3:14, 15). Ta swenta te kʼopil la stuuntes «te bin cʼohem ta awoʼtan» te xie, ya skʼan ya yal «te ay bin chʼuunbil ta lek sok te ma chebuk oʼtanil ta swenta te bin smelelile». Jich yuʼun te Timoteo schʼuunej yoʼtan te jaʼ yak ta snopel-a te smelelil kʼope. La schʼuun yoʼtan, jaʼukmeto ma ta skajuk sujbil yuʼun te smeʼ sok te syameʼe, jaʼ koltayot te bintik snopojix-ae sok te bin kʼoemix ta yoʼtan-ae (kʼopona 1 Tesalonicenses 5:21). Ta melel ay bayal bin ya xjuʼ ya snopik te jchʼieletik ta swenta te Timoteoe.

5, 6. ¿Bin yuʼun tulan skʼoplal te ya xjajchatix ta snopel stsajtayel te bin lek o ma lekuk sok te ya ana scholbeyel skʼoplal te bin kʼoem ta awoʼtane?

5 Ayixniwan bayal tiempo te la anop te bintik ya yakʼ ta nopel te Bibliae. Teme jiche, tʼunbeya stalel te Timoteo te ya awakʼ ta awoʼtan ta snopilanel te bintik swentail te jich schʼuunej awoʼtan te bin anopoje. Jaʼme ya skoltayat ta yakʼbeyel yip te schʼuunel awoʼtan sok jich maba ya awakʼ aba ta tenel yuʼun te ajoʼtak ta nop jun sok te yantik ants winiketik o te bin ya anop ta awoʼtan atukele.

6 Tulan skʼoplal te ya anaʼ stsajtayel te bin lek o maba lek ta chʼuunel jich bitʼil jchʼielatoe, jich ya xjuʼ awuʼun sujtesel te jojkʼoyeletik yuʼun te ajoʼtake, jich bitʼil: «¿Bin-utʼil ya jnaʼtik teme yuʼun-nix ay-a te Diose? Teme ay skʼuxul yoʼtan te Diose, ¿bin yuʼun ya yakʼ xkʼot ta pasel te bintik chopole? Teme jaʼ la spas spisil te Diose, ¿machʼa pasot yuʼun? Te kʼalal jich ya achajpan abae, yame schʼuun lek awoʼtan te  sujtib te jojkʼoyeletik-abi sok ya stijbatxan awoʼtan ta stʼunel ta lek te bin ya anop ta Bibliae.

7-9. Cholbeya skʼoplal bin-utʼil ya xkoltaywan ta yakʼbeyel yip te bintik achʼuunej te guías de estudio ¿Qué enseña realmente la Biblia?

7 Te stʼunel ta lek te kʼalal ya anop ta atukel te Bibliae, ya skoltayat ta stabeyel sujtib jojkʼoyeletik, jich ya schʼuun awoʼtan ta lek sok ya yakʼbey yip te bin schʼuunej awoʼtane (Hechos 17:11). Te testigootik yuʼun Jehová ay junetik kuʼunkotik te lokʼemik ta Biblia te ya skoltayat ta spasel-abi. Bayal jchʼieletik staojik koltayel kʼalal ya snopik te foyeto El origen de la vida sok te libro ¿Existe un Creador que se interese por nosotros? Jaʼnix jich bayal koltaybilik yuʼun sok smulanojik te serie yuʼun te «¿Qué enseña realmente la Biblia?» te ay ta jw.org. Ya xjuʼ ya ata te banti ya yal ENSEÑANZAS BÍBLICAS > JÓVENES. Te jujun guías de estudio, chajpanbil yuʼun ya skoltayat ta snaʼbeyelxan ta lek te bintik ya yakʼ ta nopel te Bibliae.

8 Jich bitʼil anopojix te Bibliae, ayniwan anaʼojix sujtib cheʼoxeb jojkʼoyeletik te ya ata ta guías de estudio. Jaʼukmeto ¿yabal schʼuun awoʼtan te sujtib ya yakʼe? Te guías de estudio ya skoltayat ta snopilanel ta awoʼtan bayal textoetik yuʼun Biblia sok jich ya stijbat awoʼtan ta stsʼibayel te bintik achʼuuneje. Sok jaʼme ya skoltayat ta scholbeyel yaʼiy te yantike. Teme ya xjuʼ x-ochat ta Internet ta yilel te guías de estudio ya xjuʼ ya atuuntes swenta ya awakʼbey yip te bintik anopoj ta Bibliae.

9 Tulan skʼoplal te jaʼatnix kʼoemuk ta awoʼtan te jaʼ smelelil kʼop spisil te bintik anopoj ta Bibliae. Jaʼme ya skoltayat ta schajpanel aba ta swenta te ichʼjaʼe. Jtul hermana te jchʼieltoe, jich la yal: «Te kʼalal mato kichʼojuk jaʼ-ae, bayal buelta la jnop te Biblia jaʼto te kʼalal la kil te yuʼun-nix jaʼ smelelil relijion-ae. Ta jujun buelta te kʼalal ya jpas ta jkuxlejal te bin ya jnope, jich ya yichʼxan yip te bintik schʼuunej koʼtane».

TE BINTIK YA APASE

10. ¿Bin yuʼun ya skʼan ya xchiknaj ta awaʼtel te ay schʼuunel awoʼtan te kʼalal awichʼojix jaʼ-ae?

10 Te Biblia jich ya yal: «Te schʼuhunel-oʼtanil, teme mayuc yaʼtelul, chamen» (Santiago 2:17). Teme yuʼun-nix ay schʼuunel awoʼtan-a sok teme kʼoem ta awoʼtan te bin achʼuuneje, yame xchiknaj ta awaʼtel. Yame xchiknaj ta ilel te ya apas te bin ya yal te Biblia: «Ya scʼan te chʼultesbiluc acuxlejalic soc junuc awoʼtanic ta stojol Dios» (kʼopona te 2 Pedro 3:11).

11. ¿Bin ya skʼan ya yal te kʼopil «ya scʼan te chʼultesbiluc acuxlejalic» te xchie?

11 ¿Bin ya skʼan ya yal te «ya scʼan te chʼultesbiluc acuxlejalic» te xchie? Jaʼ te maba kapal ta bintik chopol te bintik ya apase. Jich bitʼil, nopa awaʼiy te bin apasoj te wakeb u kʼaxixe. Te kʼalal la asitintay aba sok te yiljibal awoʼtane, ¿labal anaʼ stsajtayel te bin lek sok te bin maba leke? (Hebreos 5:14.) ¿Yabal xjul ta awoʼtan te kʼalal maba yalat ta spasel te bin chopol o te kʼalal la awichʼ tenel yuʼun yantik jchʼieletike? ¿Lekbal te atalel ya awakʼ ta ilel ta eskuelae? ¿Yabal apas te bin ya yalbat te Jehovae o jaʼ ya apas te bin ya yalbatik te ajoʼtak swenta maba ya slabanatik-a? (1 Pedro 4:3, 4.) Ta melel maba tojotik. Jaʼnix jich te machʼatik ayix bayal jaʼbil yakik ta abatinel ta stojol te Jehovae, ayto ya xtal xiwel ta yoʼtanik-euk sok wokolto ya yaʼiyik scholbeyel skʼop Dios te yantike. Jaʼukmeto te machʼa yakʼojix sba ta stojol te Diose, tseʼel yoʼtan ta swenta te jaʼ testigo yuʼun Jehová sok ya yakʼ ta ilel te maba chopol stalele.

12. 1) ¿Bin ya skʼan ya yal te «jun awoʼtan [...] ta stojol Dios»? 2) ¿Bintik yilel ya skʼan ya awil-abi?

12 ¿Bin ya skʼan ya yal te «jun awoʼtan [...] ta stojol Dios»? Jaʼ te bintik ya apas ta kongregasione, jich bitʼil te ya xbaat ta tsoblejetik sok scholel skʼop Dios. Jaʼukmeto tey ochem skʼoplal-a te bintik ya apas ta atukele, jich bitʼil te kʼalal ya akʼopon Dios sok te ya anop te Bibliae. Te machʼa yakʼojix sba ta stojol te Jehovae, ya smulan spasel te aʼteliletik-abi, maba sujbil ya yaʼiy sba. Jich ya yaʼiy sba bitʼil te David kʼalal jich la yal: «Ya jmulan spasel te bin ya scʼan awoʼtan, Dios cuʼun; ay ta coʼtan te Ley awuʼun» (Salmo 40:8).

13, 14. 1) ¿Bin ya skoltayat ta yakʼel ta ilel te «jun awoʼtan [...] ta stojol Dios»? 2) ¿Bin-utʼil skoltayoj chaʼoxtul jchʼieletik te tabla-abi?

13 ¿Bin ya xjuʼ ya skoltayat swenta ya awakʼ ta ilel  te jun «awoʼtan [...] ta stojol Dios»? Ya xjuʼ ya atuuntes te tabla te ay ta libro Lo que los jóvenes preguntan, volumen 2, pajina 308 sok 309. Tey ya xjuʼ ya atsʼibay sujtib te jojkʼoyeletik jich bitʼil ini: «¿Yabal awalbey te Dios ta jamal te bin ya xtuun awuʼun te kʼalal ya akʼopone? ¿Yabal xchiknaj ta aʼiyel ta akʼop te yuʼun-nix kʼux ta awoʼtan-a te Jehová te kʼalal ya akʼopone?», «¿Bintikxan ya anopbey skʼoplal te kʼalal ya anop te Biblia ta atukele? sok ¿Yabal xlokʼat ta scholel skʼop Dios atukel manchukme maba ya xlokʼik te ameʼ atate?». Ta jlejch jun-abi, jaʼnix jich ya xjuʼ ya atsʼibay te bintik ya akʼan ya apas ta swenta te skʼoponel Dios, te snopel Biblia ta atukel sok bin-utʼil ya achol te skʼop Diose.

14 Bayal jchʼieletik te snopojikix ya yichʼik jaʼe, yalojik te bayal ya xtuun yuʼunik te tabla te banti ya stsʼibayik te yaʼtelike. Ay jtul hermana te jchʼielto te Tilda sbiile, jich la yal: «La jtuuntes te jlejch jun swenta ya jpas te bin ya jkʼan ya jpas ta jkuxlejale, la kil te jujunchajp kʼot ta pasel kuʼune sok chapalonix-a te kʼalal lokʼ jun jaʼbil yuʼun ya kichʼ jaʼ». Jaʼnix jich ay jtul hermano te jchʼielto te Patrick sbiile, jaʼ jich kʼot ta swenta-euk, jich la yal: «Jnaʼoj te bintik ya jkʼan ya jpas ta jkuxlejale. Jaʼukmeto te kʼalal la jtsʼibaye, la skoltayon swenta la jkʼotes ta pasel ta oranax».

Teme ya yijkʼitayik te smelelil kʼop te ameʼ atate, ¿yatobal x-abatinat ta stojol-a te Jehovae? (Ilawil te parrafo15)

15. ¿Bin yuʼun te joʼotiknix ya skʼan ya jtatik ta nopel te ya kakʼ jbatik ta stojol te Jehovae?

15 Yanxan jojkʼoyel te ya ata ta libro Los jóvenes preguntan jaʼ ini: «Teme ya yijkʼitayik te smelelil kʼop te ameʼ atat o te awamigotake, ¿yatobal x-abatinat ta stojol te Jehovae?». Julukme ta awoʼtan te bitʼil la awakʼ aba ta stojol te Jehovae, jaʼat la ata ta nopel atukel. Te kʼalal ya awakʼ aba ta stojol Jehová sok te ya awichʼ jaʼe, jichme ya awamigoin te Dios sok jaʼme ya yichʼat ta kʼop ta swenta te bin ya apase. Jich yuʼun teme ay bin ya apas ta stojol te Jehovae, mame jaʼuk ya amaliy te bin ya snop te ameʼ atat o yan machʼa ya yalbat te bin ya skʼan ya apase. Jaʼ yuʼun teme ya xjajchatix ta spasel te bintik lek akuxlejal yuʼune sok te jun awoʼtan ta stojol te Diose, tey ya awakʼ ta ilel te yuʼun-nix kʼoem ta awoʼtan-a te jaʼ smelelil kʼop te bin yakat ta snopel sok te awakʼoj ta awoʼtan te ya achʼuun te mantaliletik yuʼun Diose. Jichme ya xchiknaj ta ilel ta oranax te chapalatix yuʼun ya awichʼ jaʼ.

TE BIN YA AWAʼIY TA AWOʼTAN TA STOJOL TE JEHOVÁ

16, 17. 1) ¿Bin swentail te ya skʼan ya awichʼ jaʼe sok te ya x-ochat ta jchʼuunjele? 2) ¿Bin ya skoltayat swenta kʼax mukʼ skʼoplal ya awil te stojol kolele? Ala junuk seña kʼop.

16 Ta jun buelta ay jtul winik te snopoj ta lek te ley yuʼun Moisese, jich la sjojkʼoybey te Jesuse: «¿Bin mandaril te mero mucʼ scʼoblal?», te Jesús jich la yal: «Cʼux laj me xawaʼiy te Cajwaltic Dios ta spisil awoʼtan, ta spisil achʼuhlel soc ta spisil apʼijil» (Mateo 22:35-37). Teme ay machʼa ya skʼan ya yichʼ jaʼ sok ya skʼan ya x–och ta jchʼuunjel yuʼun te Cristoe, yame skʼan jaʼuk te skʼuxul yoʼtan ta stojol Jehová te ya xtijot ta spasel-abi. ¿Bin-utʼil ya xjuʼ ya kakʼbeytik yip te skʼuxul koʼtantik ta stojol te Jehovae? Jaʼ te ya jnopilan ta koʼtantik ta swenta te stojol kolele, jaʼ mukʼul majtʼanil te la yakʼ Dios ta stojol te ants winiketike (kʼopona te 2 Corintios 5:14, 15 sok 1 Juan 4:9, 19). Te kʼalal ya awakʼbey tiempo ta snopilanel ta awoʼtan te mukʼul majtʼanil yakʼojbat te Diose, bayalme skʼoplal ta awoʼtan sok yame xtal ta awoʼtan yalbeyel wokol te Diose.

17 Ta swenta te ya awal wokol yuʼun te stojol kolele, jich ya jlokʼtaytik ta alel ini. Nopa awaʼiy teme yakat ta sjikʼanel jaʼe, tey-abi, ay machʼa la skoltayat lokʼel. ¿Oranaxbal ya xbaat ta ana sok ya atakijtes aba atukel te jich maba ya awalbey wokol te machʼa la skoltaybat te akuxlejale? Maʼuk. Ya jnaʼtik te spisil-ora ya awal wokol ta stojol te machʼa la skoltayate. Jaʼ pajal sok-abi, ta swenta te mulil sok te lajel jich kʼoem te yakotik ta sjikʼanel jaʼe. Jaʼukmeto te Jehová sok te Jesús la skoltayotik lokʼel, melel kʼax kʼuxotik ta yoʼtan. ¡La skoltaybotik te jkuxlejaltike! Ta swenta-abi, yakotik ta smaliyel te kuxlejalil ta sbajtʼel kʼinal ta Nichimal kʼinal ta Balumilal. ¿Mabal jichuk te ya skʼan kalbeytik bayal wokol yuʼune?

18, 19. 1) ¿Bin yuʼun maba ya skʼan ya axiʼ te ya awakʼ akuxlejal ta stojol te Jehovae? 2) ¿Bin yuʼun ya xlekub akuxlejal teme jaʼ ya x-abatinat ta stojol te Diose?

18 ¿Yabal awal wokol yuʼun te bintik spasoj Jehová  ta atojole? Teme jiche, ta swenta te ya awakʼ aba ta stojol te Jehová sok te ya awichʼ jaʼe, jaʼme te bin kʼax lek ya apase. Te kʼalal la akʼopon Dios ta swenta te la awakʼ aba ta stojole, la awalbey ta jamal te ya apasbey te skʼanojel yoʼtan ta spisil-ora. ¿Lekbal teme ya xiwat ta spasel te bin la awalbey ta jamale? Maʼuk. Te Jehová jaʼ ya skʼan te lekuk ya xkʼoat ta lokʼel ta swenta te akuxlejal sok ya smajtʼantes te machʼatik ya spasbot te skʼanojel yoʼtane (Hebreos 11:6). Te kʼalal ya awakʼ aba ta stojol te Dios sok te ya awichʼ jaʼe, kʼaxto ya xlekub te akuxlejale. Ay jtul hermano te ayix 24 yaʼbilal te la yichʼ jaʼ kʼalal jchʼielto-ae, jich la yal: «Te ayukix bayal kaʼbilal-a te kʼalal la kichʼ jaʼe, aytoniwan bayal bin la jnop te jichuke, jaʼukmeto ta swenta te la jta ta nopel te ya kakʼ jba ta stojol te Jehovae, jaʼ la skoltayon ta spʼajel te bintik ya sjap te balumilale».

19 Te Jehová jaʼ ya skʼan te lekuk ya xkʼoat ta lokʼel ta swenta te akuxlejale. Jaʼukmeto te Satanás maʼyuk machʼa ay ta yoʼtan, jkʼaxel maba ya skanantayat stukel. Teme ya apas te bin ya smulane, maʼyuk bin lek ya yakʼbat. ¿Bin-utʼil kʼan yakʼbat te bin maʼyuk yuʼune? Maʼyuk bin lek ya sjapbat sok maʼyuk bin lek ya smaliy stukel. ¡Jaʼnax ya yakʼbat amaliy te wokolile, melel jaʼ jich ya xkʼot ta swenta ta patil stukel! (Apocalipsis 20:10.)

20. ¿Bin ya xjuʼ ya apas yuʼun ya achajpan aba ta swenta te ya awakʼ aba ta stojol Dios sok te ya awichʼ jaʼe? (Jaʼnix jich ilawil te recuadro « Koltayel yuʼun ya xlekub te bitʼil awamigoinej aba sok te Diose».)

20 Ta swenta te ya awakʼ aba ta stojol te Jehovae, jaʼ te bin kʼax lek ya apase. ¿Chapalatixbal ta swenta-abi? Teme jiche, maba ya xiwat ta yalbeyel ta jamal te ya x-abatinat ta stojole. Jaʼukmeto teme mato chapalukat ya awaʼiy abae, pasa te bintik la yal te articulo ini swenta jich ya xyijubatxan ta swenta schʼuunel awoʼtan (Filipenses 3:16). Teme la achʼuun spasel te tsitsele, jich ya xtal ta awoʼtan te ya awakʼ aba ta stojol te Jehová sok te ya akʼan ya awichʼ jaʼe.