Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Ya xjuʼ ya ata tseʼel oʼtanil sok te afamiliae

 SWAXAKEBAL LECCIÓN

Te kʼalal ya xtal tulan wokolil ta jtojoltik

Te kʼalal ya xtal tulan wokolil ta jtojoltik

«Tseʼel awoʼtanic yuʼun, aunque jtsʼihn xanix ya scʼan te ya xcʼax awocolic ta chahpal chahp tsajel.» (1 Pedro 1:6)

Manchukme ya apas tulan swenta lekuk ay te nujpunel awuʼun sok tseʼeluk awoʼtanik sok te jayeb machʼatik ay awuʼune, ay baeltik ya xjul wokolil te ya yakʼbeyex bayal mel oʼtane (Eclesiastés 9:11). Jaʼukmeto te Diose, sok skʼuxul yoʼtan ya yakʼbotik bayal koltayel te kʼalal ya xjul wokoliletik ta jtojoltike. Teme ya apas ta akuxlejalik te bintik ya yal ta Biblia te ya yichʼ cholel koele, te jaʼat sok te machʼatik jayeb ay awuʼune ya xjuʼ awuʼunik stsʼikel tulan wokolil te ya xjuʼ ya xtal ta atojolike.

 1 AKʼA SMUKʼULIN AWOʼTAN TE JEHOVAE

TE BIN YA YAL TE BIBLIAE: «Aʼbeya ta stojol spisil te bintic yac amel awoʼtanic yuʼun, como ayex ta canantayel yuʼun» (1 Pedro 5:7). Ayukme ta awoʼtan te ma jaʼuk smul Dios te wokoliletik ataoje (Santiago 1:13). Teme ya xnoptsajat ta stojole, yame skoltayat yuʼun te awokole (Isaías 41:10). «¡Halbeyahic bin ay ta awoʼtanic!» (Salmo 62:8.)

Te bin ya yakʼbatxan smukʼul kʼinale, jaʼ te ya akʼopon sok ya anop spisil ora te Bibliae. Jich yame awil bin utʼil te Jehová «ya smucʼubtes qʼuinal caʼiytic ta spisil te jwocoltic» (2 Corintios 1:3, 4; Romanos 15:4). Te Biblia jich ya yal: «Te lamal qʼuinal te ya yacʼ te Diose [...], ya me scanantaybeyex awoʼtanic soc apensaric» (Filipenses 4:6, 7, 13).

TE BIN YA XJUʼ YA APASE:

  • Kʼambeya koltayel te Jehová yuʼun ya slamantesbat awoʼtan sok ya ata ta nopel ta lek te bin ya apase

  • Ilawil bintik-a te ya xjuʼ ya apas swenta ya achajpan ta lek te wokolil ataoje

2 KANANTAYAME ABA EUK SOKNIX TE MACHʼATIK AY AWUʼUNE

TE BIN YA YAL TE BIBLIAE: «Te yoʼtan te machʼa pʼij yoʼtan ya sta xan spʼijil; te schiquin te machʼa pʼij, ya sle te bintic ay ta naʼel» (Proverbios 18:15). Ilawil te bintik yak ta kʼaxel ta stojolik ta jujuntule. Teme la anaʼix-a te bintik ya smel yoʼtanik yuʼune, kʼopojanme sok te jayeb machʼatik ay awuʼune sok chʼama awaʼiy te bin ya yalike (Proverbios 20:5).

¿Bin ya xjuʼ ya apas teme ay laj te machʼa kʼax kʼux ta awoʼtane? Mame xkʼexawat ta yalel te bin yaʼiyel ya awaʼiy abae. Julukme ta awoʼtan te jaʼnix jich «ocʼ» te Jesuse (Juan 11:35; Eclesiastés 3:4). Tulanme skʼoplal te ya akux awoʼtan sok te ya xwayat ta leke (Eclesiastés 4:6). Jichme maba wokol ya awaʼiy sitintayel te wokoliletike.

TE BIN YA XJUʼ YA APASE:

  • Kʼaytesame aba te ya xkʼopojat sok te machʼatik ay awuʼun te kʼalal mato xjul tulan wokolil ta atojolike. Jich yuʼun te kʼalal ayix-a te wokolile, mame wokoluk ya yaʼiyik-a te ya yalbatik awaʼiye

  • Kʼopojan sok te machʼatik ay jich kʼaxem ta stojolik euk te bin wokolil ataoje

 3 LEA TE KOLTAYEL YA XTUUN AWUʼUNE

TE BIN YA YAL TE BIBLIAE: «Te machʼa jun yoʼtan sbahic, spisil ora ay scʼuxul yoʼtan, soc hich cʼoem te bin utʼil sbanquil ta yorahil wocol» (Proverbios 17:17). Te awamigotake yaniwan skʼan ya skoltayat, jaʼnax te maniwan snaʼik te bin utʼil ya spasike. Albeya te bin ya xtuun awuʼune (Proverbios 12:25). Jaʼnix jich kʼambeya koltayel te machʼatik pʼijubenikix ta lek ta swenta te Bibliae. Te tojobtesel ya yakʼbeyex sok te Bibliae yame skoltayat ta stsʼikel te tulan wokoliletik ay ta atojole (Santiago 5:14).

Teme ya akʼaytes aba ta sjokinel te machʼatik tulan schʼuunel yoʼtanik ta stojol Dios sok te smukʼulinoj yoʼtanik te bin yaloje, jichme ya ata te koltayel ya xtuun awuʼune. Jaʼnix jich ya xmukʼub kʼinal awaʼiy te kʼalal ya akoltay te machʼatik chebajem yoʼtanike. Albeya yaʼiy ta swenta te schʼuunel awoʼtan ta stojol te Jehová sok ta swenta te bintik yaloje. Lea bintik ya apas ta stojol te yantike sok mame xawijkʼitay te machʼatik kʼuxat ta yoʼtane sok te machʼatik ayat ta yoʼtane (Proverbios 18:1; 1 Corintios 15:58).

TE BIN YA XJUʼ YA APASE:

  • Kʼopona te machʼa kʼax jun awoʼtan aba soke jaʼnix jich akʼa aba ta koltayel yuʼun

  • Ala ta jamal te bin ya xtuun awuʼune

Naʼbeyaxan skʼoplal

¿Bin yuʼun te maba slajinoj Dios te bintik chopol sok te wokolile?

¿Bin utʼil chiknaj te chopolile, sok bin yuʼun te mato slajinoj te Dios? ¿Yabal sta yorail te maʼyukix chopolil sok te wokolile?