Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Ya xjuʼ ya ata tseʼel oʼtanil sok te afamiliae

 SWAKEBAL LECCIÓN

¿Bin ya xjelon te kʼalal ya x-ayin jtul alale?

¿Bin ya xjelon te kʼalal ya x-ayin jtul alale?

«Te al-nichʼanetic ha te bin ya xʼaʼbo[to]tic quichʼtic yuʼun te Jehová.» (Salmo 127:3)

Te kʼalal ya x-ayin jtul alal ta sbabialtonax bueltae ya x-akʼbot stseʼelil yoʼtanik yuʼun te smeʼ state sok yaniwan xjajch smel yoʼtanik yuʼun. Chajpnaxniwan ya yaʼiyik-a te bitʼil ya yichʼ bayal tiempo sok ya xlujbik ta skanantayel te alale. Ta skaj te ma skuxix lek yoʼtanik sok te ay maba bujtsʼan kʼinal ya yaʼiyike, jaʼ ini ayme ya xjajch kʼop yuʼun ta schebalik. Jich yuʼun ay bin ya skʼan ya spasik ta schebalik swenta jich ya skanantayik te alale sok te lekuk ya x-ayin te nujpunel yuʼunike. ¿Bin utʼil ya skoltayex te mantaliletik yuʼun te Biblia ta swenta-abi?

 1 KʼAYTESA ABA-A TE BIN YA XJELON TA AKUXLEJALIKE

TE BIN YA YAL TE BIBLIAE: «Te machʼa ay xcʼuxul yoʼtane, spisil ya xcujchʼ yuʼun, soc ay yutsil yoʼtan [...], ma stuqueluc nax ya sle te bila ya scʼan yoʼtane. Ma xʼilin» (1 Corintios 13:4, 5; XCD). Te kʼalal sbabial buelta ya x-ayin te awale, stalelnanix-a te jaʼ ya xbajtʼ ta awoʼtan yilel te alale. Ta swenta-abi, ayniwan ya yaʼiy sba te maba ichʼbilix ta wenta te amamlale, jich yuʼun mame xchʼay ta awoʼtan te ya skʼan ilel euke. Akʼbeya yil te ya xtuun awuʼun te koltayel ya yakʼbat ta skanantayel te alale, mame x-ilinat ta ora, ayukme yutsil awoʼtan.

Te Biblia ya yal: «Ha nix hichex, winiquetic, socuc spʼijil awoʼtanic ya xʼayinex soc te awihnamique» (1 Pedro 3:7). Teme tatilatixe, kʼotukme ta awoʼtan te bitʼil jaʼ ya xbajtʼxan ta yoʼtan yilel alal te awiname, sok jaʼniwan bayal ya xlujb yuʼun sok ayniwan ma bujtsʼanuk kʼinal ya yaʼiy o yaniwan xjajch smel yoʼtan ta skaj te bayalix yaʼtele. Ayniwan ya yilintayat, jaʼukmeto lamalukme awoʼtan, melel «ha lec xan te machʼa ma xʼilin ta ora te bin utʼil machʼa ay yip» (Proverbios 16:32). Pʼijanme ta yilel te bin ya xtuun yuʼune sok akʼbeyame te bin ya skʼane (Proverbios 14:29).

TE BIN YA XJUʼ YA APASE:

  • Teme tatilatixe: Koltayame te awinam ta yilel te alale, jaʼnix jich ta ajkʼabal. Jaʼme xalokʼesbeyxan stiempoil ta sjokinel te awiname sok te alal awuʼunike

  • Teme meʼilatixe: Te kʼalal ya skʼan ya skoltayat te amamlal ta yilel te alale, chʼuuname. Teme ma jichuk ya spas te bitʼil ya amulane, mame xalaban, nojptesame sok yutsil awoʼtan

 2 TULANTESAIK TE BITʼIL JUN AWOʼTAN ABAIKE

TE BIN YA YAL TE BIBLIAE: «Junax ya xcʼoht schebalic» (Génesis 2:24). Manchukme ayix jtul alal awuʼunik mame xchʼay ta awoʼtan te junax kʼoemex ta achebalik. Pasaik tulan yuʼun junax awoʼtanik ya x-ayinex.

Albeya wokol te amamlal yuʼun te ya skoltayate. Teme lek te kʼopiletik ya awalbeye jichme kʼoem te «ya xpoxtaywan[e]» (Proverbios 12:18). Winik te nujpunematixe, albeya te awinam te kʼax kʼux ta awoʼtane, te ay bayal skʼoplal ta awoʼtan sok te bintik ya spas ta swenta te afamiliae (Proverbios 31:10, 28).

Te Biblia ya yal: «Ma me ayuc machʼa te stuquel nax ya sle yutsil slequil, acʼa slehbe yutsil slequil te yantique» (1 Corintios 10:24). Spisil ora pasa te bin ya smulan te ajoye, sok akʼbeya snaʼ te kʼalal ay bin lek yak ta spasele. Lokʼesa atiempoik swenta ya xkʼopojex sok ya achʼambey abaik te akʼopike. Ta swenta te ya ajokin abaik ta wayele, mame jaʼuknax ya xbajtʼ ta awoʼtan te bin ya skʼan abakʼetal atukele, jaʼnixme jich ichʼa ta wenta te bin ya skʼan sbakʼetal te ajoye. Te Biblia ya yal ta mantal: «Ma me talel cʼaxeluc ma xacʼan yac ata abahic, ha nax teme hich achapojic» (1 Corintios 7:3-5). Jamalme xawalbeyik skʼoplal ta swenta-abi. Teme ya xkʼot ta awoʼtanik te bin utʼil ayexe sok teme ya anaʼik smaliyele jichme jun awoʼtanik ya x-ayinex.

TE BIN YA XJUʼ YA APASE:

  • Yame skʼan te ya alokʼesik tiempo yuʼun ya xkʼopojex

  • Pajalme xawakʼbey aba awilik te kʼux ya awaʼiy aba ta awoʼtanik te kʼalal ya awutsil kʼoptay abaik sok te ya awakʼbey abaik majtʼanile

 3 PʼIJUBTESAIK TE ALAL AWUʼUNIKE

TE BIN YA YAL TE BILBIAE: «Ta awalalil to anaʼoj bin tsʼihbabil ta schʼul Shun Dios, te ha ya xhuʼ ya yaʼbat apʼijil scuenta colel» (2 Timoteo 3:15). Chapaik te bin utʼil ya apʼijubtesik te alale. Ayukme ta awoʼtanik te manchukme mato ayinem-a te alale bayal bintik ya xjuʼ yuʼun snopel. Jich bitʼil, ya xjuʼ ya snaʼ ta ora te kʼalal jaʼex ya xkʼopojexe, soknix ya yaʼiy te sbujtsʼ kʼinal ya awaʼiyike o teme ya amel awoʼtanike. Kʼaytesaik-a te ay bin ya akʼopombeyik yaʼiy te kʼalal ayinelto-ae, manchukme mato xkʼot ta yoʼtan te bin ya awalbeye, jaʼ ya xkoltayot ta smulanel skʼoponel jun te kʼalal mukʼix-ae.

Mame xakuyik te ma xjuʼ ya awalbeyik skʼop Dios ta skaj te alaltoe. Kʼoponaik Dios sok te alale (Deuteronomio 11:19). Te kʼalal ya xtajinex sok te alale, albeyaik yaʼiy te bintik spasoj te Diose (Salmo 78:3, 4). Te kʼalal ya xchʼi baele, yame yil te awal anichʼan te bitʼil kʼax kʼux ta awoʼtanik te Jehovae, jichme ya snop bael euk.

TE BIN YA XJUʼ YA APASE:

  • Kʼoponaik Dios yuʼun ya akʼambey apʼijilik ta spʼijubtesel ta lek te alal awuʼunike

  • Albeyaik cheʼoxeb buelta te kʼopiletik te mukʼik skʼoplal ta nopele yuʼun jich ya snop ta ora-a