Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Ya xjuʼ ya ata tseʼel oʼtanil sok te afamiliae

 SJUKEBAL LECCIÓN

¿Bin utʼil ta pʼijubtesel te alnichʼanetike?

¿Bin utʼil ta pʼijubtesel te alnichʼanetike?

«Acʼa ta awoʼtan spisil te bintic la jcalbat awaʼiy ta ora ini; soc ya me awalulambe yaʼiyic te awal-anichʼnab.» (Deuteronomio 6:6, 7)

Kʼalal te Jehová la sjachbey skʼoplal te familiae, jaʼ la yakʼbey ta swenta te meʼil tatil te skanantayel te alnichʼanetike (Colosenses 3:20). Jich bitʼil te tatilate, jaʼme ay ta awenta yakʼbeyel snop te alaletik te kʼuxuk ta yoʼtanik euk te Jehovae yuʼun jich ya snaʼik spasel te binix ay ta swentaik spasel-ae (2 Timoteo 1:5; 3:15). Soknix yame skʼan ya anaʼ te bin ay ta yoʼtanike. Jich yuʼun tulanme skʼoplal te ya awakʼbey yil te bintik lek sok te atalele. Te bin utʼil ya anojptes ta lek ta sKʼop Dios te alnichʼanetik awuʼune, jaʼme te kʼalal jaʼ nail kʼoem ta awoʼtan te jaʼate (Salmo 40:8).

 1 MAME WOKOLUK YA YAʼIYIK TE KʼALAL YA SKʼOPONAT TE AWAL ANICHʼNABE

TE BIN YA YAL TE BIBLIAE: «Chapaluquex me apisilic yuʼun yaʼiyel ta ora te bin ya yichʼ halel, ma me orahuc ya xcʼopojex» (Santiago 1:19). Stalel te ya akʼan te manchuk ya xiwik te alnichʼanetik awuʼun te kʼalal ya skʼoponexe. Ta swenta-abi, yame skʼan ya awakʼbeyik yil te ya akʼan ya achʼam awaʼiyik te kʼalal ya skʼan ya skʼoponexe. Ayukme lamal kʼinal awuʼunik yuʼun jich ma wokoluk ya yaʼiyik te kʼalal ya skʼoponexe (Santiago 3:18). Teme kʼax tulan awoʼtanik ya yaʼiyik o te ora ya alabanike, maniwan ya yalik ta jamal te binix ay ta yoʼtanik-ae. Ayukme yutsil awoʼtan sok albeyame spisil ora te kʼux ta awoʼtan te alnichʼanetik awuʼunike (Mateo 3:17; 1 Corintios 8:1).

TE BIN YA XJUʼ YA APASE:

  • Lokʼesame atiempo te kʼalal ya skʼan ya xkʼopojik te awal anichʼnabike

  • Kʼopojanme spisil ora sok te awal anichʼnabike, mame jaʼuknax te kʼalal ay wokolile

2 PASA TULAN YUʼUN YA XKʼOT TA AWOʼTAN TE BINIX YA SKʼAN YA YALIK-AE

TE BIN YA YAL TE BIBLIAE: «Te machʼa ya yichʼ ta cuenta te cʼop ay bintic lec ya sta yuʼun» (Proverbios 16:20). Ayme maba tikʼuk-a te jaʼnax ya achʼam awaʼiyik te bin ya yalik yuʼun ya xkʼot ta awoʼtanik te binix yaʼiyel ya yaʼiy sbaik-ae. Te jchʼieletike ayme bayal ya xjelawik ta kʼop te manix jichuk-ae. Te Biblia jich ya yal: «Te machʼa nahil ya sjacʼ te ma ba yaʼiyej ta lec, ma snaʼ qʼuinal soc qʼuexlaltic sba» (Proverbios 18:13). Jaʼ yuʼun, mame orauk ya x-ilinat (Proverbios 19:11).

TE BIN YA XJUʼ YA APASE:

  • Pasame tulan te ma xachʼuybey skʼop te awal anichʼnabike sok mame xkʼajkʼubex ta ora, chikan biluk-a te ya yalbeyex awaʼiyike

  • Julukme ta awoʼtan te bin yaʼiyel la awaʼiy aba te kʼalal jchʼielato-ae sok bin-a te tulan skʼoplal la awaʼiy ta awoʼtane

 3 JUNUKME AKʼOPIK TA ACHEBALIK

TE BIN YA YAL TE BIBLIAE: «Jnichʼan, aʼiybon awaʼiy te nohptesel yuʼun te atate, soc ma me xapʼajbe te tojobtesel yuʼun te anane» (Proverbios 1:8). Meʼil tatiletik, te Jehová yakʼojbeyex mukʼ awaʼtelik ta stojol te awal anichʼnabike. Ta achebalik yame skʼan ya anojptesik te alaletik yuʼun ya yichʼex ta mukʼ sok ya schʼuumbeyex amantalik (Efesios 6:1-3). Te alnichʼanetike ya yilik te kʼalal ma «junuc snopojibal awuʼunic» (1 Corintios 1:10). Jaʼ yuʼun, teme ay bin ma pajaluk kʼot ta nopel awuʼunike, mame xawut abaik ta sit te awal anichʼnabike, melel teme jich ya apasike ya xjuʼ xchʼay yuʼunik te bitʼil ya yichʼex ta mukʼe.

TE BIN YA XJUʼ YA APASE:

  • Chapaik ta lek te bin utʼil ya awakʼbeyik tsitsel te awal anichʼnabike

  • Teme ma pajaluk snopjibal awuʼun sok te ajoy ta swenta te bin utʼil ya atojobtes te alaletike, pasame tulan te yakuk xkʼot ta awoʼtan te bin yuʼun jich ya snope

 4 NOPAIK TE BIN YA APASIKE

TE BIN YA YAL TE BIBLIAE: «Nohptesa te alal ta stojil be, aunque mamalix, ma ba ya yihquitay hilel» (Proverbios 22:6). Teme ya akʼan te ya xpʼijubik ta lek te awal anichʼnabike, mame xamaliy te binto ora ya xjul ta awoʼtan spasele. Nopaik te bin ya apasik ta swenta te bin utʼil ya apʼijubtesik sok te ya atojobtesike (Salmo 127:4; Proverbios 29:17). Jaʼ-abi, mame jaʼuknax te ya amaj o ya awakʼbeyik castigoe, jaʼnix jich smakojbey skʼoplal te ya akoltayik ta snaʼbeyel swentail bin yuʼun te ya apasik ta mantale (Proverbios 28:7). Jaʼnix jich nojptesaik ta yichʼel ta mukʼ te sKʼop Diose sok te yakuk snaʼbeyik swentail te bin ya yakʼ ta naʼele (Salmo 1:2). Jich ya xtojobtesbotik ta lek te bin ya x-albot te yoʼtanike (Hebreos 5:14).

TE BIN YA XJUʼ YA APASE:

  • Ilawilik ta lek te kʼoemuk ta yoʼtanik te awal anichʼnabik te yuʼunix ay-a te Jehovae sok te ya xjuʼ ya smukʼulin yoʼtanike

  • Koltayaik ta snaʼel sok ta spʼajel te bintik ya xjuʼ ya x-utsʼinotik yuʼune, jich bitʼil te bintik ya xchiknaj ta Internet o redes sociales. Akʼbeyaik snop te bin utʼil ya spʼajik te machʼatik kʼayemik ta spikbeyel sbakʼetal alaletik yuʼun ya yutsʼinike

«Nohptesa te alal ta stojil be»