Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Ya xjuʼ ya ata tseʼel oʼtanil sok te afamiliae

 YOʼEBAL LECCIÓN

¿Bin utʼil lek ya awil aba sok te smeʼ stat te ajoye soknix te ameʼ atate?

¿Bin utʼil lek ya awil aba sok te smeʼ stat te ajoye soknix te ameʼ atate?

«Lapahic te [...] lequil-oʼtanil, peqʼuel-oʼtanil, manso-oʼtanil, soc acʼa cuhchuc awuʼunic.» (Colosenses 3:12)

Te kʼalal ya xnujpun jtul winik sok jtul ants jaʼ jich ya xjajch yan familia. Manchukme maba ya awijkʼitay yichʼel ta mukʼ sok skʼuxultayel te ameʼ atate, jaʼukmeto te machʼa mukʼxan skʼoplal ta awoʼtane jaʼ te machʼa nujpunemat soke. Ayniwan ma xkʼot ta yoʼtanik te ameʼ atat ta swenta-abi. Jaʼukmeto te tojobtesel ya yakʼ te Bibliae yame xjuʼ ya skoltayat yuʼun ya ataik lamal kʼinal sok te smeʼ stat te ajoye soknix te ameʼ atate. Jaʼ-abi smakojbey skʼoplal euk te machʼatik ay bin awutoj aba soke.

 1 MAME JAʼUKNAX YA XBAJTʼ TA AWOʼTAN TE AMEʼ ATATE

TE BIN YA YAL TE BIBLIAE: «lchʼa ta mucʼ te atat soc anan» (Efesios 6:2). Chikan te jayebix awaʼbilale, yananix skʼan ya awichʼ ta mukʼ-a te ameʼ atate. Jaʼukmeto mame xchʼay ta awoʼtan te ya skʼan ya yakʼbey tiempo smeʼ stat euk te machʼa nujpunemat soke. Te Biblia ya yal: «Te cʼuxul-oʼtanil [...] mayuc sbicʼtal yoʼtan», jich yuʼun mame xakuy te yakat ta utsʼinel ta skaj te kʼax lek ya yil sba sok smeʼ stat te awinam o te amamlale (1 Corintios 13:4; Gálatas 5:26).

TE BIN YA XJUʼ YA APASE:

  • Mame jichuk xawal ini: «Spisil ora ya slabanon te machʼatik ay awuʼune» o «Maʼyuk bin ora ya smulan te bin ya jpas te ameʼe»

  • Pasa tulan te ya awaʼiy ta awoʼtan te bitʼil ya yaʼiy sba te ajoye

 2 KʼOTESAIK TA PASEL TE BIN LA ACHAPIKIX TEME JICH YA SKʼANE

TE BIN YA YAL TE BIBLIAE: «Ha scuentahil te winic ya yihquitay hilel te stat soc snan, ya yicʼ sba soc te yihnam, junax ya xcʼoht schebalic» (Génesis 2:24). Te kʼalal nujpunematixe, aytoniwan ta swenta ya yaʼiy sba te ameʼ atat te ya swentainate sok yaniwan skʼan schʼik sbaik ta jkʼaxel ta akuxlejalik.

Jaʼ ay ta awentaik snopel te bantinax ya awakʼ swentainexe sokme yutsil awoʼtanik ya skʼan ya awalbeyik. Ya xjuʼ jamal ya xkʼopojat mame xlajinwanat sok te akʼope (Proverbios 15:1). Te spekʼelil oʼtanil, te manso oʼtanil, sok te snaʼel smaliyele jaʼme ya skoltayat yuʼun lek ya awil aba sok te machʼatik ay awuʼune sok te «talel cʼaxel cuhchuc awuʼunic ta scuenta scʼuxul awoʼtanic» (Efesios 4:2).

TE BIN YA XJUʼ YA APASE:

  • Teme ya amel awoʼtan yuʼun te jkʼaxel ya schʼik sbaik ta akuxlejalik te ameʼ atatike, chajpana sok te awinam o amamlal te kʼalal lamal awoʼtanik-ae

  • Chapa akʼopik ta swenta te bin ya skʼan ya apasik yuʼun te bintik ya xkʼax ta atojolike