Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

¿Machʼatik ya spasik te skʼanojel yoʼtan te Jehová ta kʼajkʼal ini?

 LECCIÓN 10

¿Bin swentail te yichʼel ta mukʼ te Dios ta sjunal nae?

¿Bin swentail te yichʼel ta mukʼ te Dios ta sjunal nae?

Corea del Sur

Brasil

Australia

Guinea

Kʼalalto ta namey jich kʼinal skʼanoj te Jehová te yakuk sjokin sbaik te sjunal na ta stulantesel te schʼuunel yoʼtanike sok te bitʼil junax ya x-ayinike (Deuteronomio 6:6, 7). Jaʼ yuʼun te stestigotak te Jehová ya slokʼesik jtebuk stiempoik ta jujun semana ta swenta yichʼel ta mukʼ te Dios ta sjunal na te ya xjuʼ ya spasik jich bitʼil ya smulanik stukelik te ya xjuʼ ya xkoltayotik yuʼun ta jujuntule. Jaʼnix jich te machʼatik stukelnax yakik ta nainele ya xjuʼ ya stuuntesik ta lek te stiempoik yuʼun ya xnoptsajik ta stojol Dios te kʼalal ay bin ya snopik ta Biblia te ya smulambeyik skʼoplale.

Jaʼ jun koltayel yuʼun ya xnoptsajotikxan ta stojol te Jehová. «Nohpojanic ta stojol Dios, hich ya xnohpoj ta atojolic.» (Santiago 4:8.) Ya jnaʼbetikxan sba ta lek te Jehová te kʼalal ya jnoptik ta swenta te bin yilel te stalele soknix ta swenta te bintik spasoj te tsʼibaybil ta Biblia. Te bin utʼil ya xjuʼ xjajchat ta snopel te skʼop Dios sok te sjunal anae jaʼ te skʼoponel ta tulan te Bibliae, te banti ya xjuʼ ya atʼun te programa jujun semana Jkuxlejaltik sok Kaʼteltik ta swenta Dios. Ya xjuʼ ya akʼoponik ta jujuntul cheʼoxebuk versiculoetik, ta patil ya xjuʼ ya awalbeyik skʼoplal te bin kʼot ta awoʼtanik ta sJun Diose.

Jaʼ jun koltayel yuʼun ya xlekubxan te bitʼil junax ayotik ta sjunal jnatike. Te winiketik sok te antsetik te nujpunemike, te meʼil tatiletik sok te alnichʼanetike, ya xlekubxan te bitʼil junax ayik te kʼalal pajal ya snopik te Bibliae. Te kʼalal ya yichʼ pasele yame skʼan te ayuk tseʼel oʼtanil sok te lamaluknax te kʼinale, sok te yoʼtanukiknax ya xkʼot yorail te kʼajkʼal-abi. Te meʼil tatiletik yaniwan skʼan ya snopik sok te yal snichʼnabik te bintik yichʼoj tal te Te J-ilkʼinal ta toyol sok te ¡Despertad!, jaʼ chikan te jayeb yaʼbilalike, o yaniwan skʼan ya yilbeyik skʼoplal ta swenta jun wokolil te yak ta kʼaxel ta stojolik ta banti yakik ta nop jun sok te bin utʼil ta chajpanele. Sok ya xjuʼ ya yilik te programa yuʼun telebision JW Broadcasting (tv.jw.org) sok ya xjuʼ ya yalbeyik skʼoplal te kʼalal ya xlaj yoʼtanik ta yilele. Jaʼnix jich ya xjuʼ ya snopik te kʼayojiletik te ya yichʼik kʼayojtayel ta tsoblejetike, te kʼalal ya xlaj yoʼtanike ya xjuʼ te ay bin ya sweʼ yuchʼike.

Te jayeb tiempo ya jlokʼestik ta jujun semana ta yichʼel ta mukʼ te Jehovae yame skoltayotik ta sjunal na ta smulanel snopel te sKʼop te Diose, ta swenta-abi te Jehová ya yakʼbotik bendición ta swenta yuʼun te yakotik ta spasel tulane (Salmo 1:1-3).

  • ¿Bin yuʼun ya skʼan ya jlokʼestik jtebuk jtiempotik ta swenta yichʼel ta mukʼ te Dios ta sjunal nae?

  • ¿Bin ya xjuʼ ya spasik te meʼil tatiletik swenta yuʼun ya smulanik ta spisilik te yichʼel ta mukʼ te Diose?

Naʼbeyaxan skʼoplal

¿BIN YA YAKʼ TA NOPEL TA SMELELIL TE BIBLIAE?

¿Bin-utʼil ta tael tseʼel oʼtanil ta yutil na?

Te kʼuxul oʼtanil la yakʼ ta ilel te Jesús, jaʼ jun lekil ejemplo ta stojol te mamlaliletik, inamiletik, meʼil tatiletik sok te alnichʼanetik te ya xjuʼ skʼayinbeyik. ¿Bin ya xjuʼ ya jnoptik ta stojol?