Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

¿Machʼatik ya spasik te skʼanojel yoʼtan te Jehová ta kʼajkʼal ini?

 LECCIÓN 18

¿Bin utʼil ya jkoltaykotik te kermanotakotik te kʼalal ya staik wokole?

¿Bin utʼil ya jkoltaykotik te kermanotakotik te kʼalal ya staik wokole?

República Dominicana

Japón

Haití

Te kʼalal ay ya xkʼax te bintik ya sjin jilel te bintik ay ta Balumilale, te stestigoonkotik yuʼun Jehová ta oranax ya xjajch kakʼkotik koltayel ta stojol te kermanotakotik te ya skʼanik koltayele. Te kʼalal jich ya jpaskotik ini, jichme ya kakʼkotik ta ilel te kʼux ya kaʼiy jbakotike (Juan 13:34, 35; 1 Juan 3:17, 18). ¿Bin utʼil ya kakʼkotik te koltayele?

Ya kakʼkotik koltayel ta swenta takʼin. Te jchʼuunjeletik ta Antioquía la stikunik bael takʼin ta swenta skoltayel te yermanotakik ta Judea te banti kʼax tulan wiʼnal tey-ae (Hechos 11:27-30). Jaʼnix jich ya jpaskotik euk te kʼalal ay ya kaʼiykotik stojol te yak ta kʼaxel wokol ta stojol te kermanotakotik te namal ayike, ta swenta te congregación kuʼunkotik ya jtikunkotik bael takʼin yuʼun jich ya kakʼkotik koltayel ta swenta te bintik ya xtuun yuʼunike (2 Corintios 8:13-15).

Ya kakʼbeykotik te bintik ya xtuun yuʼunike. Te ancianoetik ya xbajtʼ sleik ta jujuntul te swinkilel te congregación te banti kʼax te wokole swenta ya yil teme lek ayike. Teme tey ay-a te comité yuʼun koltaywaneje jaʼme ay ta swentaik te bin utʼil ya yichʼ pukel te weʼelil, te jaʼe sok te kʼuʼul pakʼetike, jaʼnix jich ay ta swentaik te machʼatik ya skʼanik ilel yuʼun te jpoxtaywaneje soknix ya yilik te banti ya xjuʼ ya xjilik te hermanoetike. Bayal ta jtul Testigoetik te ay bintik ya snaʼik spasel ta leke ya sjap sbaik soknix jaʼ ya slokʼes stakʼinik yuʼun ya xbajtʼik ta koltaywanej ta spasel naetik o sNail Tsoblejetik te jinik jilele. Ta swenta te junax ayonkotike sok kilojkotik te bitʼil junax ya x-aʼtejonkotike, ya xjuʼ ya xkoltaywanonkotik ta oranax te kʼalal ay wokolile. Manchukme jaʼ ya jkoltaykotik te «machʼatic pajal ay schʼuhunel coʼtan[co]tic soque», jaʼukmeto jaʼnix jich ya kakʼbeykotik koltayel te machʼatik yantik sreligionik te kʼalal ya xjuʼ kuʼunkotike (Gálatas 6:10).

Ya kakʼbeykotik smukʼul yoʼtanik ta swenta te Biblia sok ya jkoltaykotik ta swenta te bin yaʼiyel ya yaʼiy sbaike. Te binxan ya skʼanik te machʼatik ya staik swokolike, jaʼ te yakuk x-akʼbotik smukʼul yoʼtanike. Ta yorail-abi te Jehová te «Dios te ya yacʼ spisil mucʼul-oʼtanil» jaʼ ya x-akʼbotik yip yoʼtanik yuʼun (2 Corintios 1:3, 4). Jich yuʼun te machʼatik ayik ta mel oʼtane ya kakʼbeykotik yil ta Biblia te bintik yaloj te Jehová te ya spase, te banti ya yal ta jamal ta swenta te Ajwalinel yuʼun te nopol ya slajin spisil te bintik mel oʼtantik sba te ya yakʼ wokolil sok te bintik kʼuxe (Apocalipsis 21:4).

  • ¿Bin yuʼun te ya xjuʼ ya kakʼkotik koltayel ta oranax te kʼalal ya xkʼax te bintik ya sjin jilel te bintik aye?

  • ¿Bin utʼil ya jmukʼubtesbeykotik yoʼtanik ta swenta te bin ya yal te Biblia te machʼatik kuxul jilike?

Naʼbeyaxan skʼoplal

Yakʼel koltayel sok mukʼul oʼtanil ta swenta te tulan yikʼal jaʼal Sandy

Ilawil bin-utʼil te stestigotak Jehová ya yakʼbeyik koltayel te yermanotak sok te yantik ants winiketik ta skaj te tulan yikʼal jaʼale.