Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Nojptesa te awal anichʼnabike

 LECCIÓN 3

Te Rahab la smukʼulin yoʼtan te Jehová

Te Rahab la smukʼulin yoʼtan te Jehová

¿Yabal akʼan ya anaʼ stojol te bin kʼot ta pasel ta nameye? Nopa awaʼiy te ayukotik ta antiguo lum yuʼun Jericó ta skʼinal Canaán. Te ants winiketik te yakik ta nainel tey-abi ma xyichʼik ta mukʼ te Jehovae. Jaʼukmeto ay jtul ants tey-a te ma jichuk stalel te bitʼil yantike. Rahab te sbiile.

Te Rahab ta yalalilto bayal bintik yaʼiyojbey skʼoplal ta stojol te Jehovae. Snaʼoj stojol-a te bin utʼil la skoltay te lum Israel ta skʼab te skontratake. Jich bitʼil te kʼalal la stuuntes te Moisés ta slokʼesel tal te israeletik ta Egipto. ¡Soknix te kʼalal la xat ta cheb te Mar Rojo swenta tey kʼaxik-a! ¡Ta yorail-abi la yaʼiy stojol te Rahab te nopol ayikix ta Jericó te israeletike!

Te Rahab la skoltay te jtsajtaywanejetike, melel ay smukʼul yoʼtan ta stojol Jehová

Ta jun ajkʼabal chaʼtul israeletik ochik bael ta Jericó ta yilel ta muken te lume. Kʼotik ta sna te Rahab ikʼotik ochel yuʼun. Ta ajkʼabalnix-abi te ajwalil yuʼun Jericó la snaʼ stojol te ay ochik jtsajtaywanejetik ta banti te lume soknix te ayik ta sna te Rahab. Jich yuʼun la stikun winiketik ta sleel te jtsajtaywanejetike. ¿Binwan ya spas te Rahab? La snakʼtiklan te jtsajtaywanejetik ta sba sna, sok jich la yaltiklambey te winiketik yuʼun te ajwalile: «Lokʼikix bael te jtsajtaywanejetike. Jaʼukmeto teme ya anutsik baele yatome ataik». ¡Jich la yakʼbey koltayel te jtsajtaywanejetike! ¿Yabal akʼan ya anaʼ te bin yuʼun jich la spase?... Yuʼun ay schʼuunel yoʼtan ta stojol te Jehovae. Sok kʼoem lek ta yoʼtan te jaʼnix ya xkoltayotik yuʼun Jehová te israeletik ta yuʼuninel te lum Jericó soknix te skʼinal Canaán.

Te kʼalal mato xlokʼik bael-a te jtsajtaywanejetik ta sna te Rahabe la yalbeyik ta jamal te kuxul ya xjil te Rahab sok te jayeb machʼatik ay yuʼun te kʼalal ya yichʼ lajinel te lum Jericó. Jaʼukmeto ayme bin ya skʼan ya spas yuʼun jich ya skoltay-a te skuxlejale. ¿Yabal akʼan ya anaʼ stojol?... Te jtsajtaywanejetike jich la yalik: «Yame skʼan ya ajojkʼan ta aventana te tsajal chʼajan ini soknix tsoba ta ana te jayeb machʼatik ay awuʼune». Te Rahab jich la spas te bitʼil albotik yuʼun te jtsajtaywanejetike. ¿Yabal akʼan ya jcholbatxan awaʼiy te bin kʼot ta pasel ta patile?...

Te Jehová ma la yakʼ lajuk te Rahab sok te jayeb machʼatik ay yuʼune

Cheʼoxeb kʼajkʼal ta patil, te israeletike la sbeentayik cheʼoxeb buelta ta sjoyobal te lum Jericó. Jujun buelta ta jujun kʼajkʼal la sbeentayik ta sjoyobal te lume, wakeb kʼajkʼal jich la spasik sok maʼyuk awunik. Te sjukebal kʼajkʼale, jukeb buelta la sbeentayik ta sjoyobal te lume, patil tulan awunik ta spisilik. Tey-abi ay bin chajpnax kʼot ta pasel: ¡Te Jehová la yakʼ jinuk koel te toyol tsʼajkʼetik te joytaybil yuʼun-a te Jericó! Jaʼukmeto, ¿bin kʼot ta pasel ta swenta te sna te Rahab? Maba jin koel stukel, jaʼ ta  swenta te bitʼil jokʼol te tsajal chʼajan ta sventanae. ¿Yabal awil te chʼajan te ay ta lokʼombae?... ¡Jaʼme jich te bin utʼil kuxul jil te Rahab sok te jayeb machʼatik ay yuʼune!

¿Labal awil te kuxul jil te Rahab ta swenta te bitʼil la schʼuumbey smantal te Jehovae?... Melel snaʼoj-a te ya xkoltayot yuʼun te Diose, jaʼ yuʼun la yakʼ smukʼul yoʼtan ta stojol. Te kʼalal la scholbeyik yaʼiy te Rahab spisil te bintik spasoj te Jehovae kaj yakʼ smukʼul yoʼtan ta stojol. Jaʼnixme jich bayal bintik yakat ta snopel ta swenta te Jehovae. ¿Yabal achʼuumbey euk te smantal jich bitʼil la spas te Rahab?... ¡Ya jnaʼtik te jich ya xbajtʼ apase!

AKʼA JKʼOPONTIK TA BIBLIA:

  • Josué 2:1-24; 6:1-5, 14, 15, 20-25

  • Hebreos 11:31