Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Lek yachʼil kʼop te talem ta stojol Dios

 LECCIÓN 12

¿Bin utʼil ya xjuʼ ya xnoptsajotik ta stojol te Diose?

¿Bin utʼil ya xjuʼ ya xnoptsajotik ta stojol te Diose?

1. ¿Yabal yaʼiybey skʼop spisil te machʼatik ya xkʼoponot yuʼun te Diose?

Te Dios ya yikʼ spisil te ants winiketik te yakuk xkʼoponot yuʼune, swenta jich ya xnoptsajik ta stojol-a (Salmo 65:2). Jaʼukmeto ma jaʼuk ya skʼan ya yal te ya yaʼiybey skʼop spisil te machʼatik ya xkʼoponot yuʼune. Te Bibliae ya yal teme ay jtul winik te ma xyichʼ ta mukʼ te yiname yame xjuʼ xmakot yuʼun te kʼalal ya skʼopon te Diose (1 Pedro 3:7). Te kʼalal la spasulanik te bintik chopol te israeletike, maba aʼiybot skʼopik yuʼun te Diose. Manchukme ay machʼatik spasojik tulan muliletik, jaʼukmeto teme ya sujtes yoʼtanike yame x-aʼiybot skʼopik yuʼun te Diose. Akʼa yichʼ kʼoponel te sjun Isaías 1:15 sok 55:7.

2. ¿Bin utʼil ya skʼan ya jkʼopontik te Diose?

Te skʼoponel Diose jaʼnix jich ochem tey-a te yichʼel ta mukʼ te Diose, jaʼ yuʼun jaʼnax ya skʼan ya jkʼopontik te Jehovae (Mateo 4:10; 6:9). Soknix, ta skaj te bitʼil jmulawilotike ya skʼan ya jkʼopontik Dios ta swenta sbiil te Jesuse, melel jaʼ laj ta swenta jmultik stukel (Juan 14:6). Te Jehová ma skʼan te jaʼnax ya jsutilantik te bin jilemix ta koʼtantike, jaʼ ya skʼan te yakuk xlokʼ ta koʼtantik te bin ya kalbeytike. Akʼa yichʼ kʼoponel te sjun Mateo 6:7 sok Filipenses 4:6, 7.

Te Jpaswanej kuʼuntike jaʼnix jich ya yaʼiybey skʼop te machʼatik muken ya xkʼoponot yuʼun ta yoʼtanike (1 Samuel 1:12, 13). Te Dios ya yalbotik te yakuk jkʼopontik ta biluk orae, jich bitʼil te kʼalal ya xjajchotik ta sab sok te kʼalal ya x-ochotikix ta wayele, soknix te kʼalal ya xweʼotike o te kʼalal ya xtal kʼopetik ta jtojoltike. Akʼa yichʼ kʼoponel te sjun Salmo 55:22 sok Mateo 15:36.

3. ¿Bin utʼil ya skoltayotik te tsoblejetik yuʼun te smelelil jchʼuunjeletik yuʼun Cristoe?

Joytaybilotik ta ants winiketik te maʼyuk schʼuunel yoʼtanik ta stojol te Diose soknix ya slabanik ta swenta te bin yaloj te bitʼil ya yichʼ tal lamal kʼinal ta Balumilale. Jaʼ ini yaniwan xjuʼ ya schebajtesbotik  koʼtantik yuʼun jich ma xnoptsajotik ta stojol-a te Diose (2 Timoteo 3:1, 4; 2 Pedro 3:3, 13). Jaʼ yuʼun ya skʼan ya jtsob jbatik sok te smelelil jchʼuunjeletike yuʼun jich ya jtatik smukʼul koʼtantik-a. Jaʼnix jich ya skʼanik euk te ya jmukʼubtesbeytik yoʼtanike. Akʼa yichʼ kʼoponel te sjun Hebreos 10:24, 25.

Te kʼalal ya jtsob jbatik sok te machʼatik kʼux ta yoʼtanik te Diose jich nopol ya kaʼiy jbatik ta stojol te Diose. Te tsoblejetik yuʼun te stestigotak te Jehovae yame skoltayotik te kʼalal ya kiltik te bin yilel schʼuunel yoʼtanik te machʼatik ya stsob sbaik tey-ae. Akʼa yichʼ kʼoponel te sjun Romanos 1:11, 12.

4. ¿Bin utʼil ya xjuʼ ya xnoptsajat ta stojol te Diose?

Yame xjuʼ ya xnoptsajat ta stojol te Dios te kʼalal ya anopilan ta awoʼtan te bin ya anop ta swenta te Bibliae. Nopa ta awoʼtan ta swenta te bintik spasoje, te tsitseletik yuʼune soknix te bintik yaloj te yato spase. Te kʼalal jich ya apas ini, soknix te kʼalal ya akʼopon te Diose yame skoltayat ta snaʼbeyel swentail te bitʼil kʼax mukʼ skʼoplal te skʼuxul yoʼtane soknix te spʼijil yoʼtane. Akʼa yichʼ kʼoponel te sjun Josué 1:8 sok Salmo 1:1-3.

Jaʼnaxme ya xjuʼ ya xnoptsajat ta stojol Dios teme ya awakʼ schʼuunel awoʼtan ta stojole. Jaʼukmeto te chʼuunel oʼtanile jichme kʼoem te bitʼil jpejt nichim te ya skʼan ya yichʼ yaʼlel ta spisil orae, jaʼnix jich te joʼotike yame skʼan ya stsak yip te schʼuunel koʼtantik te kʼalal ya jnopilantik ta koʼtantik te bintik jchʼuunejtike. Akʼa yichʼ kʼoponel te sjun Mateo 4:4 sok Hebreos 11:1, 6.

5. ¿Bintik lekilal ya yichʼ tael te kʼalal ya xnoptsajotik ta stojol te Diose?

Te Jehovae ay skʼoplal ta yoʼtan te machʼatik kʼux ya x-aʼiyot yuʼune. Yame skanantay ta swenta spisil te bintik ya xjuʼ ya x-utsʼimbotik schʼuunel yoʼtanik yuʼune soknix ta swenta te kuxlejalil te yakik ta smaliyel ta sbajtʼel kʼinale (Salmo 91:1, 2, 7-10). Jaʼnix jich ya yalbey te manchuk ya snopik spasel te bintik chopol te ya xjuʼ ya x-utsʼimbot sbakʼetalike sok jich ya schʼay stseʼelil yoʼtanik yuʼun soknix ya x-akʼbot snopik te bin utʼil ta tael te lekil kuxlejalile. Akʼa yichʼ kʼoponel te sjun Salmo 73:27, 28 sok Santiago 4:4, 8.

 

Naʼbeyaxan skʼoplal

¿Bin yuʼun ya skʼan ya jnoptik te Bibliae?

Te Biblia skoltayoj bayal millón ta jtul ants winiketik ta snaʼbeyel sujtib te jojkʼoyeletik te tulanik skʼoplale. ¿Yabal akʼan ya anaʼbey te sujtib euke?

Kʼalal ya jkʼopontik te Diose ya xnoptsajotik ta stojol

¿Yabal yaʼiy jkʼoptik te Diose? Swenta ya anaʼbey sujtib, yame skʼan ya anop te bin ya yal te Biblia ta swenta te skʼoponel Dios.