Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Lek yachʼil kʼop te talem ta stojol Dios

 LECCIÓN 9

¿Bin utʼil ya xjuʼ ya x-ayin tseʼel oʼtanil ta yutil na?

¿Bin utʼil ya xjuʼ ya x-ayin tseʼel oʼtanil ta yutil na?

1. ¿Bin yuʼun te tulan skʼoplal te ya skʼan xnujpunik ta stojol juez te ants winiketike?

Te Biblia ya yal «te tʼujbil lek yachʼil kʼop yuʼun te Dios te tseʼel yoʼtane» (1 Timoteo 1:11NM). Te Dios te tseʼel yoʼtane ya skʼan te ayuk tseʼel oʼtanil ta yutil nae. Te Dios jaʼ la schiknajtes te nujpunele. Te nujpunel ta stojol juez, yame yakʼ te junax yoʼtan ayik te machʼatik ya xnujpunike sok te yal snichʼnabike soknix yame staik tseʼel oʼtanil ta yutil snaik. Te jchʼuunjeletike ya schʼuunik te mantaliletik yuʼun te ajwaliletik te ya skʼan ya yakʼik ta jun te nujpunel yuʼunike. Akʼa yichʼ kʼoponel te sjun Lucas 2:1, 4, 5.

Te Dios ya skʼan te spisiluk ora yikʼoj sbaik te machʼatik nujpunemike. Sok ya skʼan te manchuk ya sloʼlay sbaike (Hebreos 13:4). Te Jehová ya yilay teme ay machʼa ya slajimbey sjunal te nujpunele (Malaquías 2:16). Jaʼukmeto ya yakʼ te ay machʼa ya xjuʼ slajimbey sjunal te nujpunel sok te ya xjuʼ ya xchaʼnujpune, jaʼnax teme te smamlal o te yinam ya xway sok yan te ma jaʼuk te machʼa nujpunem soke. Akʼa yichʼ kʼoponel te sjun Mateo 19:3-6, 9.

2. ¿Bin utʼil ya skʼan ya xkuxinik te machʼatik nujpunemike?

Te Jehová la spas te winik sok te ants yuʼunme jich pajal ya skoltay sbaik te kʼalal ya xnujpunike (Génesis 2:18). Te winike jaʼme jolol ta yutil na, jich yuʼun yame skʼan te jaʼ ya sle te bin ya xtuun yuʼun te machʼatik ay yuʼune, soknix yame skʼan te ya spʼijubtes ta swenta te Diose. Jaʼnix jich te winike yame skʼan ya slokʼes sba ta yoʼtan yuʼun ya yakʼbey yil skʼuxul yoʼtan te yiname. Te machʼatik nujpunemike yame skʼan te kʼux ya yaʼiy sbaik sok te pajal ya yichʼ sbaik ta mukʼe. Jich bitʼil te maʼyuk machʼa toj ta schebalike, yame skʼan te yakuk spasbey sbaik perdón yuʼun jich ya staik tseʼel oʼtanil ta skuxlejalik. Akʼa yichʼ kʼoponel te sjun Efesios 4:31, 32; 5:22-25, 33, sok 1 Pedro 3:7.

 3. ¿Yabal skʼan ya yichʼ lajimbeyel skʼoplal te nujpunel teme yuʼunax ay kʼope?

Teme ay kʼop ta swenta jtul ants sok jtul winik te nujpunemike yame skʼan te yakuk spasik tulan te kʼuxuk ya yaʼiy sbaike (1 Corintios 13:4, 5). Maba ya yal te Biblia te ya xjuʼ ya yijkʼitay sbaik te machʼatik nujpunemik teme ay jajch kʼop yuʼunike. Akʼa yichʼ kʼoponel te 1 Corintios 7:10-13.

4. ¿Bin ya skʼan Dios ta swenta te alnichʼanetike?

Te Jehová ya skʼan te ayuk stseʼelil yoʼtan te alnichʼanetike. Jich yuʼun ya yakʼbey snop te bin utʼil ya xjuʼ smulambeyik yutsilal te schʼielike. Jaʼnix jich ya skʼan te yakuk snopbeyik spʼijil te smeʼ statike soknix te bintik kʼaxem ta skuxlejalike (Colosenses 3:20). Jaʼnix jich ya skʼan te ayuk sbujtsʼ yoʼtanik te alnichʼanetik te kʼalal ya x-abatinik ta stojol te Jehová soknix ta stojol te Nichʼanile. Akʼa yichʼ kʼoponel te sjun Eclesiastés 11:9–12:1; Mateo 19:13-15, sok 21:15, 16.

5. ¿Bin ya xjuʼ ya spas te meʼil tatiletik swenta tseʼel yoʼtanik te alnichʼanetike?

Te meʼil tatiletik yame skʼan ya yakʼbeyik sweʼel, skʼuʼ spakʼ sok sna te yal snichʼnabike (1 Timoteo 5:8). Jaʼukmeto ma tikʼuknax-abi, ya skʼan ya yakʼbey yil bin utʼil ta kʼuxultayel te Diose sok te bin utʼil ta kʼayimbeyel te stalele (Efesios 6:4). Te kʼalal ya yakʼik ta ilel te meʼel tatiletik te kʼux ta yoʼtanik te Diose, jichme ya xjuʼ ya stijbey yoʼtan-a te yal snichʼnabike. Te kʼalal lokʼem ta Biblia te bin ya yakʼbeyik snop te alnichʼanetike jaʼme ya xkoltayotik ta lek yuʼun. Akʼa yichʼ kʼoponel te sjun Deuteronomio 6:4-7 sok Proverbios 22:6.

Te alnichʼanetik yame skʼan te ya yichʼik mukʼubtesel yoʼtanik sok te ya yichʼik albeyel utsil kʼopetik ta swenta te bintik lek ya spasike. Jaʼnix jich ya skʼan ya yichʼik tojobtesel sok tsitsel, yuʼunme jich ma spasik te bin ya xjuʼ ya x-utsʼinotik yuʼun ta patile (Proverbios 22:15). Jaʼukmeto mame skʼan te sok yilimba yoʼtanik ya yakʼik te tojobtesele sok te ya smilik ta majel te yal snichʼnabike. Akʼa yichʼ kʼoponel te sjun Colosenses 3:21.

Te stestigotak te Jehová spasojik chaʼoxpajk libroetik te ya xtuun yuʼunik te meʼil tatiletik sok te alnichʼanetike. Spisil te libroetik ini lokʼemik tal ta Biblia. Akʼa yichʼ kʼoponel te sjun Salmo 19:7, 11.

 

Naʼbeyaxan skʼoplal

Tojobtesel yuʼun Dios swenta stael tseʼel oʼtan jich bitʼil te nujpunemex

Cheb jojkʼoyel ya skoltayex jich bitʼil te nujpunemexe.

¿Bin utʼil ta chajpanel te kʼopetike?

Ta swenta te bin utʼil ya achajpanik te kʼopetike yaniwan xjuʼ te ma orauknax ya axat abaik sok te ayuk stseʼelil awoʼtanike, o teme maʼuke.

¿Bin-utʼil ta tael tseʼel oʼtanil ta yutil na?

Te kʼuxul oʼtanil la yakʼ ta ilel te Jesús, jaʼ jun lekil ejemplo ta stojol te mamlaliletik, inamiletik, meʼil tatiletik sok te alnichʼanetik te ya xjuʼ skʼayinbeyik. ¿Bin ya xjuʼ ya jnoptik ta stojol?