Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Lek yachʼil kʼop te talem ta stojol Dios

 LECCIÓN 13

¿Bin ya yal te Biblia ta swenta te bin ya xkʼot ta stojol te religionetik ta pajel chaʼbeje?

¿Bin ya yal te Biblia ta swenta te bin ya xkʼot ta stojol te religionetik ta pajel chaʼbeje?

1. ¿Lekbal spisil te religionetike?

Ta spisil te religionetike ayme ants winiketik te pekʼel yoʼtanike. Kʼax lek te ya jnaʼtik te bitʼil te Dios kʼux ta yoʼtan sok te ay skʼoplal ta yoʼtan te ants winiketik-abi. Jaʼukmeto mel oʼtantik sba te bitʼil kʼax bayal te bintik chopol spasoj te yajwal te religionetike (2 Corintios 4:3, 4; 11:13-15). Ay kaʼiyojtik ta noticia te ay chaʼoxchajp religionetik te schʼikoj sbaik ta terrorismo, sok ya smilik te ants winiketik ta skaj te yan stsʼumbalik o yan sreligionik, ya spasik guerraetik, sok te ya stsak yutsʼinik te alaletike soknix te ya smajike. ¡Ta swenta spisil ini jaʼnax schebajtesbeyoj yoʼtan te jchʼuunjeletik te pekʼel yoʼtanike! Akʼa yichʼ kʼoponel te sjun Mateo 24:3-5, 11, 12.

Te smelelil religione ya yichʼ ta mukʼ stukel te Jehovae, yan stukel te lotil religione jaʼnax ya sbolobtesbey skʼoplal te Diose, melel ya yakʼ ta nopel te bin ma smeleliluk ta stojol te Diose, soknix ta swenta te machʼatik lajemike, sok yantikxan nojptesel te ma lokʼemik ta Bibliae. Jaʼukmeto te Jehová ya skʼan te yakuk yichʼ naʼbeyel sba ta smelelil yuʼun te ants winiketike. Akʼa yichʼ kʼoponel te sjun Ezequiel 18:4 sok 1 Timoteo 2:3-5.

2. ¿Bin ya yal te Biblia ta swenta te bin ya xkʼot ta stojol te religionetik ta pajel chaʼbeje?

Te Dios ma xyakʼ sba ta loʼlayel yuʼun te machʼatik ay sreligionik te ya yalik te kʼux ta yoʼtanik te Diose, jaʼukmeto jaʼ jun yoʼtan sbaik sok te balumilal yuʼun te Satanase (Santiago 4:4). Te Biblia yakʼojbey sbiilin «Mucʼul Babilonia» spisil te lotil religionetike, te biilil ini jaʼ ya yalbey skʼoplal te lum Babilonia ta namey kʼinal te banti chiknaj tal te lotil religión te kʼalal kʼaxemix-a te Pulemal ta skʼajkʼalel te Noé. Nopolix yorail te jtsʼinax ya slajin Dios spisil te religionetik te ya sloʼlayik sok te ya yutsʼinik te ants winiketike. Akʼa yichʼ kʼoponel te sjun Apocalipsis 17:1, 2, 5, 16, 17 sok 18:8.

Ay yan lek yachʼil kʼop, jaʼ te bitʼil maba chʼayem ta yoʼtan te Jehová te ants winiketik te ayik ta yanyantik religionetike. Melel yak ta snojptesel te ants winiketik ta swenta te smelelil kʼope sok yak ta skoltayel ta yijkʼitayel te lotil religionetike. Akʼa yichʼ kʼoponel te sjun Miqueas 4:2, 5.

 

 3. ¿Bin ya skʼan ya spas te ants winiketik te pekʼel yoʼtanike?

Ay skʼoplal ta yoʼtan te Jehová te ants winiketik te ya skʼan ya snopik te smelelil kʼope sok te ya skʼan ya spasik te bintik leke. Jich yuʼun ya yal te yakuk yijkʼitayik jilel te lotil religione. Teme yuʼunix kʼux ta yoʼtanik-a te Diose, jaʼme ya spasik te bin ya xkʼambotik yuʼune, swenta jich ya yakʼbeyik stseʼelil yoʼtan-a te Diose. Akʼa yichʼ kʼoponel te sjun Apocalipsis 18:4.

Ta sbabial siglo, bayal ants winiketik te pekʼel yoʼtanik la schʼuunik sok sbujtsʼ yoʼtanik te bin cholbot yaʼiyik yuʼun te jpuk kʼopetike. Te Jehová la snojptes te ants winiketik ini te bin utʼil la sjel te skuxlejalik yuʼun jich la staik tseʼel oʼtanil-a, la stabeyik swentail te skuxlejalike sok te ay bin la smaliyike. Jich bitʼil te ants winiketik-abi te la schʼuunik te bin ya yal te sJun Dios sok te la yakʼik ta ilel te jaʼ bayal skʼoplal ta yoʼtanik te Jehovae jichme ya skʼan ya jpastik euk. Akʼa yichʼ kʼoponel te 1 Tesalonicenses 1:8, 9 sok 2:13.

Sok stseʼelil yoʼtan ya yikʼ te Jehová te machʼatik ya yijkʼitay jilel te lotil religión yuʼun jaʼ ya x-ochik-a te banti smelelile. Spisil te ants winiketik-abi yame smulambeyik yutsilal te bitʼil jun yoʼtan ayik sok te Diose, te bitʼil kʼux ya yaʼiy sbaik sok te hermanoetik ta swolol Balumilal soknix te bitʼil ya smaliyik te kuxlejalil ta sbajtʼel kʼinal. ¿Yabal akʼan ya awichʼ te utsilaletik ini? Akʼa yichʼ kʼoponel te sjun Marcos 10:29, 30 sok 2 Corintios 6: 17, 18.

4. ¿Bin ya spas te Dios yuʼun ya x-ayin lamal kʼinal sok tseʼel oʼtanil ta swolol te Balumilale?

Te kʼalal ya slajin te lotil religionetik te Jehovae, yame yichʼ tal lamal kʼinal ta Balumilal. Te ants winiketike mame xyichʼikix loʼlayel sok xatiklanel yuʼun te lotil religionetike. Spisilik jaʼnax ya yichʼik ta mukʼ te smelelil Diose. ¿Mabal jichuk te jaʼ lek yachʼil kʼop ini? Akʼa yichʼ kʼoponel te sjun Apocalipsis 18:20, 21 sok 21:3, 4.

 

Naʼbeyaxan skʼoplal

¿BIN YA YAKʼ TA NOPEL TA SMELELIL TE BIBLIAE?

Te bin-utʼil ya skʼan ya kichʼtik ta mukʼ te Diose

Ilawil wakchajp te bin-utʼil ya xjuʼ ya anaʼ te machʼatik ayik ta smelelil relijione

¿BIN YA YAKʼ TA NOPEL TA SMELELIL TE BIBLIAE?

Akʼa aba ta swenta te smelelil yichʼel ta mukʼ te Diose

¿Bin wokolil ya xjuʼ ya ata ta skaj te ya acholbey yaʼiy yantik te bintik achʼuuneje? Swenta maba ya awutsʼinbey yoʼtan te yantike, ¿bin-utʼil ya skʼan ya acholbey yaʼiyik te bintik achʼuuneje?