Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Lek yachʼil kʼop te talem ta stojol Dios

 LECCIÓN 11

¿Bin utʼil ya skoltayotik ta jkuxlejaltik te leyetik yuʼun te Diose?

 
¿Bin utʼil ya skoltayotik ta jkuxlejaltik te leyetik yuʼun te Diose?

1. ¿Bin yuʼun te ya jkʼantik tojobtesele?

Te Jehová, jaʼ jTatik sok jaʼ Jpaswanej kuʼuntik, maba ya jpajbeytik te spʼijile. Jaʼnix jich kʼuxotik ta yoʼtan sok ya skanantayotik. Maba la spasotik yuʼun ya jwentain jbatik ta jtukeltiknax (Jeremías 10:23). Jich kʼoem te bitʼil tut alaletik te ya skʼanik tojobtesel yuʼun te smeʼ statike, jaʼnix jich ya jkʼantik euk te tojobtesel yuʼun te Diose (Isaías 48:17, 18). Te tojobtesel ya yakʼbotik te Dios ta swenta te leyetik yuʼune jich kʼoem te bitʼil jun majtʼanil ta jtojoltike. Akʼa yichʼ kʼoponel te 2 Timoteo 3:16.

Te leyetik yuʼun te Jehová ya snojptesotik te bin utʼil lek ya skʼan ya xkuxinotik sok ya yalbotik te bin utʼil ya xjuʼ ya jtatik utsilaletik ta sbajtʼel kʼinal ta pajel chaʼbej. Ta swenta te bitʼil jaʼ spasojotike, ya skʼan te yakuk jchʼuumbeytik sok koʼtantik te tojobtesel yuʼune. Akʼa yichʼ kʼoponel te sjun Salmo 19:7, 11 sok Apocalipsis 4:11.

2. ¿Bin utʼil ya xjuʼ ya skoltayotik ta jkuxlejaltik te bin ya yal te Bibliae?

Ay chaʼoxchajp nojptesel yuʼun te Biblia te ya yakʼbotik kiltik te bin utʼil ya skʼan Dios te ya jsitintay jbatik te kʼalal ay bin ya xtal ta jtojoltike. Ay yantik leyetik te jamal ya yalbotik te bin ya skʼan pasele (Deuteronomio 22:8). Ta swenta te bintik smelelil ya yakʼ ta nopel te Bibliae, yame skʼan ya jtuuntestik te jpʼijiltik yuʼun jich ya jnaʼtik-a te bin ya skʼan pasele (Proverbios 2:10-12). Te Biblia ya yakʼ ta nopel te jaʼ jun majtʼanil te kuxlejalil te yakʼojbotik te Diose. Ta snaʼel ini jaʼme ya stojobtesotik ta skanantayel te jkuxlejaltik soknix te skuxlejal te yantike. Akʼa yichʼ kʼoponel te sjun Hechos 17:28.

3. ¿Bintik-a te cheb mantaliletik te mukʼ skʼoplale?

Ay cheb mantaliletik te mukʼ skʼoplal la yal te Jesuse. Te sbabiale, jaʼ te yakuk jnaʼbeytik sba te Diose, te kʼuxuk ta koʼtantike sok te junuk koʼtantik ya x-abatinotik ta stojole, melel jaʼ kuxulotik ta Balumilal yuʼun-abi. Te mantalil ini yame skʼan ya kichʼtik ta mukʼ ta spisil te bintik ya jpas ta jkuxlejaltike (Proverbios  3:6). Te machʼatik ya yakʼ sbaik ta tojobtesel yuʼun te Diose yame xjuʼ yamigoinik sok yame staik smelelil tseʼel oʼtanil soknix kuxlejalil ta sbajtʼel kʼinal. Akʼa yichʼ kʼoponel te sjun Mateo 22:36-38.

Te schebal mantalile, jaʼ ya yalbey skʼoplal te bin utʼil ya skʼan lek ya kil jbatik sok te yantike (1 Corintios 13:4-7). Te kʼalal ya jpas ta jkuxlejaltik ini, jichme yakotik ta skʼayimbeyel stalel te Dios ta swenta te bin utʼil ya yil te ants winiketike. Akʼa yichʼ kʼoponel te sjun Mateo 7:12 sok 22:39, 40.

4. ¿Bin utʼil ya skoltayotik ta jkuxlejaltik te leyetik yuʼun te Diose?

Te leyetik yuʼun te Diose ya yakʼ ta nopel te bin utʼil ya skʼan te junuknax ayik te jwol na ta swenta kʼuxul oʼtanil (Efesios 4:32; Colosenses 3:12, 14). Te Biblia jaʼnix jich ya yakʼ ta nopel te manchuk ya schʼoj sbaik jilel te machʼatik nujpunemike, melel jich jun yoʼtan ya xnainik ta spisilik-a. Akʼa yichʼ kʼoponel te sjun Génesis 2:24.

Te kʼalal ya jchʼuuntik spasel ta jkuxlejaltik te leyetik yuʼun te Bibliae jaʼnix jich ya skoltayotik te ayuk lamal kʼinal kaʼiytik sok ya skoltayotik te manchuk ya kichʼtik tenel lokʼel ta oranax ta jun aʼtelile. Ay machʼatik ya sle j-aʼteletik yuʼunik te jaʼ ya skʼanik te machʼatik ya spas ta skuxlejalik te mantaliletik yuʼun te Diose, ants winiketik te ma snaʼik elekʼ sok te ya yoʼtaninik ta lek te yaʼtelike (Proverbios 10:4, 26; Hebreos 13:18). Jaʼnix jich te Bibliae ya yakʼ jnoptik te junuk koʼtantik sok te bin ay kuʼuntike, jaʼuk bayal skʼoplal ta koʼtantik te lekuk ayotik ta stojol te Diose ma jaʼuk te bayal jbiluktike. Akʼa yichʼ kʼoponel te sjun Mateo 6:24, 25, 33 sok 1 Timoteo 6:8-10.

Te kʼalal jaʼ ya jpas ta jkuxlejaltik te mantaliletik yuʼun te Bibliae, jichme ma xkutsʼintik te jbakʼetaltike, jich bitʼil te ley yuʼun Dios te ya yal ta swenta te yakubele, ya skanantayotik yuʼun ma stsakotik chamel soknix ma jmil jbatik yuʼun (Proverbios 14:30; 22:24, 25; 23:20). Te Jehová maba skomojotik ta yuchʼel vino sok yantikxan uchʼbalil, jaʼukmeto jaʼ ma smulan teme ya xjelaw kuʼuntik ta uchʼele (Salmo 104:15; 1 Corintios 6:10). Te leyetik yuʼun te Biblia ya skoltayotik ta skanantayel te jtaleltike sok te bintik ya jnop ta koʼtantike (Salmo 119:97-100). Jich bitʼil te j-abatotik yuʼun te Diose ma jaʼuknax ya kichʼtik ta mukʼ te mantaliletik yuʼun te Dios swentanax yuʼun ya jta jlekilaltik-a, te bin yuʼun ya jpastike jaʼ te bitʼil ya jkʼan ya kichʼtik ta mukʼ te jTatik te ay ta chʼulchan te jaʼ te Jehovae. Akʼa yichʼ kʼoponel te sjun Mateo 5:14-16.

 

Naʼbeyaxan skʼoplal

¿BIN YA YAKʼ TA NOPEL TA SMELELIL TE BIBLIAE?

Te kuxlejalil te lek ya yil te Diose

Ya xjuʼ te lek ya yilotik te Jehová ta jkuxlejaltik. Jaʼnix jich ya xjuʼ te ya kamigointike.

¿BIN YA YAKʼ TA NOPEL TA SMELELIL TE BIBLIAE?

Ayukme skʼoplal ta awoʼtan te kuxlejalil jich bitʼil ya yil te Diose

¿Bin yilel ya yil Dios te skʼasesel alal, yichʼel chʼichʼ sok skuxlejal jkojt chambalam?

SWENTA JKʼOPLALTIK

Kʼana nojptesel yuʼun Biblia te ma tojbile

Kʼana nojptesel yuʼun Biblia te ma tojbil jaʼ chikan te bin ora sok te banti ya akʼane.