Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Ayinanikme ta stojol te skʼuxul yoʼtan te Diose

 APÉNDICE

¿Bin-utʼil ya skʼan ya kiltik te machʼa lokʼesbil ta congregacione?

¿Bin-utʼil ya skʼan ya kiltik te machʼa lokʼesbil ta congregacione?

Maʼyuk bin yan jich kʼax kʼux ta aʼiyel te kʼalal ay jtul machʼa ay ta yutil jnatik o jtul kamigotik te kʼux ta koʼtantik te ya yichʼ lokʼesel ta congregación ta skaj te maba la sujtes yoʼtan yuʼun te smule. Jaʼukmeto te bin yilel ya kiltik te mantaliletik yuʼun Dios ta swenta-abi, teyme ya xchiknaj ta ilel-a te bantito kʼalal kʼux ta koʼtantik te Diose sok teme jun koʼtantik ya jchʼuuntik te mantaliletik yuʼune. * Jich yuʼun akʼa kiltik cheʼoxebuk jojkʼoyeletik te yaniwan jpasbey jbatike.

¿Lekbal te jun koʼtan jbatik sok te machʼa lokʼesbil ta congregacione? Te Biblia jich ya yal: «Ma me xajoquinic te machʼa ya scuy sba ta hermano, teme ha jʼantsiwej, o te ay stʼutʼil, schʼuhunej lotil diosetic, jʼixtaʼcʼop, jyacubel o jʼelec; ma me xajoquin abahic ta weʼel soc» (1 Corintios 5:11). Jaʼnix jich ya stsitsotik: «Machʼayuc a [...] te ma ba ya xʼayin ta stojol te bintic ay ta nopel yuʼun Cristo, [...] ma me xawicʼ ochel ta anahic soc ma me xawalbe te lec te tale. Como te machʼa ya yalbe te lec te tale, pajal chopol yaʼtel ya xcʼoht soc» (2 Juan 9-11). Te La Atalaya 15 yuʼun noviembre ta 1981, pág. 19, jich la yal: «Jaʼnax teme la kalbeytik “¡Bin xchi awoʼtan!” ya kutik te machʼa lokʼesbilix ta congregacione, jich ya xjuʼ ya xjajchotik ta aʼyej sok lekniwan ya xjajch kil jbatik sok. ¿Yabal jkʼantik jich ya jpastik ta stojol te machʼa lokʼesbilix ta congregacione?». Te kʼalal ay machʼa ya yichʼ lokʼesel ta congregacione, maba ya jokinix jbatik sok, maba junix koʼtantik ya jchʼuuntik Dios sok.

¿Jkʼaxelbal ma xjuʼ ya jkʼopontik? Jkʼaxel ma xjuʼ, ay bayal swentail te bin yuʼune. Ta sbabial, yuʼun jun koʼtantik ya jkʼan ya kakʼ jbatik ta stojol te Dios sok te sKʼope. Jich bitʼil te kʼux ta koʼtantik te Jehová jaʼ yuʼun ya jchʼuunbeytik smantal ta spisil-ora,  jaʼnix jich te kʼalal maba kʼun ta pasel ya kaʼiytike. Soknix kʼoem ta koʼtantik te toj stukel sok te kʼuxotik ta yoʼtane soknix yakʼojbotik mantaliletik ta swenta jlekilaltik (Isaías 48:17; 1 Juan 5:3). Te schebale, jaʼ te ya xjuʼ ya sbolobtesotik te stalel te machʼa yichʼoj lokʼesel ta congregación ta skaj te maba sujtesoj yoʼtane. Jich yuʼun te kʼalal maba ya jokin jbatik soke maba ya yutsʼin te jkuxlejaltike, te schʼuunel koʼtantike soknix jich lek ay-a te congregacione sok jich lek skʼoplal-a (1 Corintios 5:6, 7). Te yoxebale, jaʼ te ya sta slekilal te machʼa la spas tulan mulile. ¿Bin-utʼil? Teme ya jchʼuuntik spasel te mantalil ya yal te Biblia sok teme jun koʼtantik ta swenta te bin kʼot ta chapel yuʼun te comité judicial, yaniwan xjuʼ xtijbot yoʼtan te machʼa spasoj tulan mulil te bitʼil maba yichʼoj ta mukʼ te koltayel yuʼun te ancianoetike. Jich yuʼun teme jun koʼtantik ta schʼuunel te mantale yaniwan xjuʼ ya xkʼunub yoʼtan sok jich ya sjeltay te stalele. Kʼalal ya yil te maʼyuk machʼa jun-nax yoʼtan sba sok te machʼatik ay yuʼune, yaniwan xjajch «snaʼ qʼuinal» ta swenta te kʼax mukʼ te mulil spasoje sok ya xjajch ta spasel te bintik ya skʼan pasele swenta ya sujt tal ta stojol te Jehovae (Lucas 15:17).

¿Jaxan teme jaʼ la yichʼ lokʼesel ta congregación te machʼa ay kuʼuntik ta yutil nae? Ta skaj te jun jchʼichʼeltik soke wokolniwan ya kaʼiytik te jun koʼtan ya kakʼ jbatik ta stojol te Jehovae. Te kʼalal ay jich ya xkʼot ta pasel-abi, ¿bin-utʼil ya skʼan ya kiltik te machʼa la yichʼ lokʼesel ta congregacione? Manchukme maba spisil ya kalbeytik skʼoplal, jaʼnax ya kilbeytik chaʼchajpuk skʼoplal.

Ayniwan yak ta nainel sok te machʼatik ay yuʼun ta yutil sna te machʼa yichʼoj lokʼesel ta congregacione. Te lokʼesel ta congregacione maba ya xatot yuʼun te bitʼil jun schʼichʼelike, te machʼatik ay yuʼune maba ya skomik te machʼa lokʼesbil ta congregación teme yuʼun ya skʼan te jun ya spasik biluk aʼtelil ta yutil nae. Jaʼukmeto ta swenta te bitʼil jun koʼtantik ta stojol te Jehovae ma xjuʼ te jun koʼtan jbatik sok ta spasel yaʼtel te Diose, melel jaʼ stukel la xat sba lokʼel ta swenta te schʼuunel yoʼtane. Teme ay ya kakʼ sjokinotik ta yichʼel ta mukʼ Dios ta sjunal nae, ma xjuʼ ya kakʼbeytik schol te bin ya jnoptik tey-ae. Jaʼukmeto  teme pekʼelto yaʼbilal te machʼa la yichʼ lokʼesel ta congregacione, te meʼil tatiletike ya xjuʼ ya spʼijubtesik ta swenta te Bibliae, melel jaʼ ayto ta swentaik spʼijubtesel sok ta stsitsel (Proverbios 6:20-22; 29:17). *

Jaʼukmeto, ¿jaxan teme maba sjokinejotikix ta nainel te machʼa la yichʼ lokʼesel ta congregacione? Teme jich-abi, maba ya jkʼoponix jbatik sok, jaʼnax teme yuʼun ay bin tulan ya skʼan chajpanel ta swenta te jfamiliatike. Mame jaʼuk te ya jletik bin-utʼil ya jkʼopon jbatik soke. Ta skaj te jun koʼtantik ta stojol te Jehová sok te organización yuʼune, ya kichʼtik ta mukʼ te tsitsel ta Bibliae. Teme ya yilotik te jun koʼtantik ya jchʼuuntik te mantalile. Jich ya yilik te yuʼun-nix ya jkʼantik ya xlekub-a te machʼa yichʼoj lokʼesele sok yaniwan xjuʼ xtijbot yoʼtan ta schʼuunel te tojobtesel la yichʼe (Hebreos 12:11). *

^ párr. 1 Te bintik ya yal te Biblia ta swenta te machʼatik lokʼesbilik ta congregacione, jaʼnix jich ya yichʼ pasel ta swenta te machʼatik stukel yoʼtan slokʼesoj sbaike, jaʼ te machʼatik maba ya skʼan ya x-ayinikix ta congregacione.

^ párr. 2 Swenta ya anaʼbeyxan skʼoplal te machʼatik pekʼelto yaʼbilalik te lokʼesbilik ta congregación te nainemikto sok te smeʼ statike, ilawil te La Atalaya 1 yuʼun octubre ta 2001, pág. 16, 17, sok te 15 yuʼun noviembre ta 1988, pág. 20.

^ párr. 1 Teme ya akʼan ya anaʼbeyxan skʼoplal te mantaliletik ta Biblia ta swenta te machʼatik ay bin kutoj jbatik sok te lokʼesbil ta congregacione, ilawil te La Atalaya 15 yuʼun abril ta 1988, pág. 26-31, sok te 15 yuʼun noviembre ta 1981, pág. 20-25.