Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Ayinanikme ta stojol te skʼuxul yoʼtan te Diose

 APÉNDICE

¿Bin-utʼil ta chajpanel te kʼop ta swenta jun negocio?

¿Bin-utʼil ta chajpanel te kʼop ta swenta jun negocio?

Ta 1 Corintios 6:1-8, te jpuk-kʼop Pablo la yal ta swenta te tulan kʼopetik ya xjajch yuʼunik te machʼatik jun schʼuunel  yoʼtanike. Ta sbabial, la yal te bin maba lek la yil ta swenta te ay chaʼoxtul jchʼuunjeletik ta Corinto te la yakʼ sbaik «ta chahpanel yuʼun machʼatic ma ba schʼuhunejic Dios» (versículo 1). Te Pablo la yalxan te ya skʼan chajpanel ta yutil congregación te tulan kʼop jajchem yuʼunike ma jaʼuk te ya yakʼik ta stojol juecetik. Akʼa kiltik chaʼoxchajpuk te bin yuʼun jich la stsʼibay te Pabloe, soknix te bintik maba ochem skʼoplal tey-ae.

Te kʼalal ya xjajch kʼopetik yuʼun te machʼatik jun schʼuunel yoʼtanik ta swenta negocio, te Jehová jaʼ ya smulan te yakuk jpastik tulan ta schajpanel te bitʼil ya skʼan stukele, mame jaʼuk te bitʼil ya jkʼantike (Proverbios 14:12). Jich bitʼil la yal te Jesús, jaʼ lek te ya jchajpantik ta ora, yuʼun jich maba ya xmukʼub te kʼop kuʼuntike (Mateo 5:23-26). Ay chaʼoxtul j-abatetik yuʼun Dios te la stsakik te talelil yuʼun jachkʼop ta patil ya yikʼ sbaik ta stojol juecetik. Te jpuk-kʼop Pablo la yal teme ay machʼa yak skontrainbel sbaike, tsabil kʼoem. ¿Bin yuʼun? Melel yaniwan yakʼ ta chopolkʼoptaybeyel sbiil te Diose sok te congregacione. Swenta ma jichuk ya xkʼot ta pasel-abi, yame skʼan ya jpastik te bin la yal te Pabloe: «¿Ma bal haʼuc lec xan te ya xcuhch awuʼunic te bin ma stojiluc ta pasel ta atojolic?» (versículo 7).

Te Pablo jaʼnix jich la yalxan te ay machʼatik tsabilik yuʼun Dios te ya schajpanik tulan kʼopetik. La yal te ay winiketik ta yutil congregación te pʼijubenik ta swenta te ya snopik te Bibliae. Ta melel te ancianoetike pʼijubtesbilik ta lek yuʼun «ya schahpan[ik] cʼop ta yohlil te yermanotac» ta swenta «te bintic scuenta te cuxlejal liʼi» (versículo 3-5). Jaʼnix jich, te Jesús la yal te bin-utʼil ta chajpanel te kʼopetik ta swenta te tulan muliletike, jich bitʼil te leaw ta kʼop o te loʼlaywanej, ay oxchajp te bin ya xjuʼ ta pasele. Te sbabiale, jaʼ te ya skʼan ya schajpanik ta schebalik te kʼop yuʼunike, teme maba chajpaj yuʼunike, ta schebal te bin ya skʼan spasele, jaʼ te ya yikʼ bael jtul o chaʼtul testigo, teme mananix chajpajxan-ae, yame xbajtʼik ta stojol te ancianoetik ta congregacione (Mateo 18:15-17).

Jaʼukmeto, te ancianoetike ma puersauk te ay yaʼtelik ta licenciadoil o ya yakʼik koltayel ta swenta negocio, sok mame jichuk ya skuy sbaik-a. Sok maba ya yalik te bintik ya skʼan  pasel swenta ya xchajpaj yuʼunik-a te tulan kʼop yuʼun negocio te jajchem yuʼunik te chaʼtul hermanoetike. Te bin ya spasike jaʼ te ya skoltayik ta schaʼtulul te hermanoetik te yakuk spasik ta skuxlejalik te bin ya yal te Biblia sok te yakuk slebeyik schajpajibal te kʼop yuʼunik ta slekil yoʼtanik. Teme kʼax chujkʼul te kʼop jajcheme, jaʼniwan lek te ya sjojkʼoybeyik te superintendente yuʼun circuito o ta Betel yuʼun te stestigotak te Jehová. Jaʼukmeto ay bintik ya xkʼot ta pasel te ma puersauk jich ya yichʼ pasel te bitʼil la yal te jpuk-kʼop Pabloe. Akʼa kiltik chaʼoxchajpuk.

Te kʼalal ay machʼa ya yakʼ demanda, maba ya skʼan ya yal te yuʼun ya x-utsʼinwane. Yuʼun-niwan ay jich ya yal te ley te jich ya skʼan pasele o swenta jich maʼyuk kʼop ya xchajpaj-a te kʼope. Puersaniwan jich ya skʼan pasel jich bitʼil te kʼalal ya yichʼ lajinbeyel sjunal te nujpunele, te machʼa ya swentain jilel te alaletike, te skʼanbeyel stojol sweʼel te alaletike, te skʼanel seguro, o yakʼel ta ilel te yuʼun-nix smelelil-a te testamento pasbile. Jaʼnix jich teme ay jtul j-abat yuʼun Dios te ya skʼan ya skoltay sba ta swenta te demanda yichʼoje, yaniwan xjuʼ sjach demanda ta stojol-euk te machʼa akʼbot demanda yuʼune. *

Te j-abat yuʼun Dios te ya xbajtʼ ta stojol juez yuʼun ya yakʼ ta chajpanel te kʼopetik te la kilbeytikix skʼoplale, maba yak ta skʼaxuntayel te tsitsel la yal te jpuk-kʼop Pabloe, jaʼnax teme maba ya spas yuʼun ya yaʼiy tsalawe. * Mame xchʼay ta koʼtantik bin-a te tulan skʼoplal kuʼuntike, jaʼ te schʼultesbeyel sbiil te Jehová sok te ayuk lamal kʼinal soknix te junuk ayotik ta congregacione. Te bin kʼax naʼbil jbatik yuʼun te bitʼil jnopojelotik yuʼun te Cristoe, jaʼ te kʼuxul-oʼtanil te «ma stuqueluc nax ya sle te bila ya scʼan yoʼtane» (1 Corintios 13:4, 5, XCD; Juan 13:34, 35).

^ párr. 1 Teme ay jich kʼot ta pasel te ay jtul j-abat yuʼun Dios te ya spas mukʼul mulil ta stojol te machʼa jun schʼuunel yoʼtan soke, jich bitʼil teme ay machʼa tsakawan ta utsʼinwanej, majawan, milawan o la yaʼiy mukʼul-elekʼ, snujpʼ te ya yichʼ naʼel ta stojol te machʼatik mukʼ yaʼtel yichʼojike, manchukme ya yichʼ chajpanel yuʼun juez.

^ párr. 2 Swenta ya anaʼbeyxan skʼoplal, ilawil te La Atalaya 15 yuʼun marzo ta 1997, pág. 17-22, sok te 15 yuʼun octubre ta 1991, pág. 25-28.