Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Ayinanikme ta stojol te skʼuxul yoʼtan te Diose

 APÉNDICE

¿Bin ya yal te Biblia ta swenta te slajinbeyel sjunal te nujpunel sok te ya schʼoj sbaik jilele?

¿Bin ya yal te Biblia ta swenta te slajinbeyel sjunal te nujpunel sok te ya schʼoj sbaik jilele?

Te Jehová ya skʼan te ya skʼotesik ta pasel te bin jamal la yalbey sbaik te machʼatik nujpunemike. Kʼalal te Jehová la snujpuntes te sbabial ants sok te winike, jich la yal: «Te winic [...] ya yicʼ sba soc te yihnam, jun-nax ya xcʼoht schebalic». Bayal cien jaʼbil ta patil, te Jesucristo la schaʼyal te kʼopil-abi sok jich la yalxan: «Ha yuʼun te bin jun-nax la yacʼ te Diose, ma me ayuc machʼa ya sjat» (Génesis 2:24; Mateo 19:3-6). Jich bitʼil te ya kiltike, ta sit te Jehová sok te Jesuse, ma jun chebuknax kʼajkʼal ya xkuxinik te machʼatik ya xnujpunike, jaʼto ya xat sbaik-a teme yuʼun laj te winik o te antse (1 Corintios 7:39). Ta skaj te chʼultesbil yuʼun Dios te nujpunele, ma lek te oranax ya yichʼ lajinel sjunal te nujpunele. Te Jehová ya spʼaj te machʼa jichnax ya yijkʼitay sbaik teme ma ta skajuk antsiwej o antsinel jich bitʼil ya yal te Biblia (Malaquías 2:15, 16).

Jich bitʼil ya yal te Bibliae, ¿bin swentailnax te ya xjuʼ ta lajinbeyel sjunal te nujpunele? Te Jehová yaloj te ya spʼaj te yalel ta mulile (Génesis 39:9; 2 Samuel 11:26, 27; Salmo 51:4). Kʼaxto ya spʼaj te jich ya yakʼ ta lajinbeyel sjunal te nujpunel te kʼalal ay machʼa ya xyal ta mulile. (Ta sbalunebal capítulo, párrafo 7, ya yalbey skʼoplal te bintik smakoj te yalel ta mulile.) Ta melel,  te machʼa yakʼojbey ta swenta snopel teme ya slajinbey sjunal te nujpunel o maʼuke, jaʼ te machʼa maba yalem ta mulile (Mateo 19:9). Jich yuʼun teme ya skʼan ya slajinbey sjunal te nujpunel yuʼune, maba chopol ya yil te Jehovae. Mame ayuk jtuluk hermano ta congregación ya suj ta spasel-abi. Te kʼalal ya yichʼ ta wenta te bin kʼot ta pasele, yaniwan spasbey perdón te sjoye sok teme ya yil te yuʼun-nix sujtesoj yoʼtan-ae. Jich yuʼun, jaʼ ay ta swenta snopel teme ya slajinbey sjunal te nujpunel o maʼuke sok jaʼnix ay ta swenta te bintik ya xkʼot ta pasel ta patile (Gálatas 6:5).

Ay yantik bintik ya xkʼot ta pasel te ya yakʼ wokolil te banti jtul hermano o hermana ya snop te ya schʼoj jilel te sjoy o ya slajinbey sjunal te nujpunel yuʼune, manchukme maba yalem ta mulil te sjoye. Te kʼalal jich ya xkʼot ta pasele, te Biblia ya yal ta swenta te machʼa ya schʼoj jilel te sjoye «ma me xchaʼnuhpun xan o acʼa schaʼlecubtesbe xan sba yoʼtanic» (1 Corintios 7:11). Jaʼ yuʼun te j-abat yuʼun Diose maba libre ay ta sleel yan machʼa ya xnujpun sok (Mateo 5:32). Akʼa kiltik bintik-a te ya xkʼot ta pasel te ya yakʼ wokolil te jich ay ya schʼoj sbaik jilele.

Te machʼa ma skʼan ya yakʼbey te bintik ya xtuun yuʼun te sfamiliae. Ay winiketik te ma xyakʼ te bintik ya xtuun ta yutil nae, ma yuʼunuk ma xjuʼ yuʼun yakʼel, yuʼun-nanix maba ya skʼan ya yakʼ-a, ta skaj-abi jkʼaxel maʼyuk bin ay yuʼun te sfamiliae. ¿Bin ya yal te Biblia ta swentaik-abi? Jich ya yal: «Teme ay machʼa ma ba ya yaʼbe bin ya xtuhun yuʼun te machʼatic [...] ay yuʼun ta sna, la smuc te schʼuhunel yoʼtan soc cʼax hich chopol a te bin utʼil machʼa ma ba schʼuhunej te Diose» (1 Timoteo 5:8). Teme ay jtul winik te maba ya sjel te stalele, te yiname ya xjuʼ ya snop teme ya skʼan ya slajinbey sjunal te nujpunel yuʼune sok teme yuʼun jaʼ lek ya xkʼot ta lokʼel sok te yalatake. Jich yuʼun, teme ay jtul j-abat yuʼun Dios te jich ya yichʼ albeyel skʼoplal te maba ya skʼan ya yakʼbey te bintik ya xtuun yuʼun te sfamiliae, te ancianoetik ta congregación yame yilik ta lek ta swenta-abi, melel ya xjuʼ ya yichʼ lokʼesel ta congregación yuʼun.

Kʼax tulan utsʼinel. Ay machʼatik te bayal ya x-ilinik te jich ya xjajch smajik te sjoy te ya xjuʼ ya stsakot ta chamel yuʼun o ya yakʼbey ta woklajel te skuxlejale. Teme jaʼ jtul j-abat yuʼun  Dios te kʼaxto ya xmajawane, te ancianoetike ya yilik ta lek teme yuʼun-nix jich-ae, melel te machʼa kʼaxto ya x-ilin sok te ya xmajawane ya xjuʼ ya yichʼ lokʼesel ta congregación yuʼun (Gálatas 5:19-21).

Tulan utsʼinel ta skaj te yichʼel ta mukʼ te Diose. Ay winiketik o antsetik te ya sleik bin-utʼil ya smak te sjoyik ta yichʼel ta mukʼ te Jehová sok ya sujik te sjoyik ta skʼaxuntayel te mantaliletik ta Biblia. Te kʼalal jich ya xkʼot ta pasel-abi, te j-abat yuʼun Dios yame yil ta lek teme jaʼ lek te ya schʼoj jilel te sjoy yuʼun jich ya xjuʼ ya schʼuunbey te smantal Dios te bin-utʼil smantal winiketike (Hechos 5:29).

Manchukme ay jich ya xkʼot ta pasel-abi, mame skʼan te ya yichʼ albeyel te machʼa maʼyuk smul te akʼa schʼoj jilel o te ya x-ayin sok te sjoye. Manchukme ya xjuʼ ya yakʼik koltayel sok tojobtesel ta swenta Biblia te ancianoetik sok yantik hermanoetik te tulan schʼuunel yoʼtanike, ma xjuʼ ya snaʼik spisil te bintik kʼoem ta pasele, jaʼnax ya snaʼ stukel te Jehovae. Teme ay jtul hermana o hermano ya smukʼubtes te kʼop jajchem yuʼun sok te sjoy yuʼun ya skʼan ya schʼoj jilele, maba yak ta yichʼel ta mukʼ te Dios sok te bitʼil chajpanbil yuʼun te nujpunele. Jaʼnix jich, te Jehová ya yil teme ma smeleliluk te bin ya yichʼ alele, manchukme kʼax lek chajpanbil yuʼun. Ta melel, «spisil jamal chican ta ilel ta sit te Machʼa ya xcʼohotic ta pasbeyel cuenta yuʼune» (Hebreos 4:13). Jich yuʼun teme ay bin ya xkʼot ta pasel te jkʼaxel ya yakʼ wokolil te ma xjuʼ ta chajpanele, te j-abat yuʼun Diose yaniwan xkʼot ta nopel yuʼun te ya schʼoj jilel te sjoye, ta swenta-abi mame ayuk machʼa ya xjuʼ xlabanot yuʼun. Ta melel, «jujutuhlotic ya [...] cacʼtic cuenta ta stojol Dios» (Romanos 14:10-12).