Te ajwalil Ben-adad (Ben-Hadad) yuʼun Siria bayal buelta la yochintay te Israel. Pero ta jujun buelta te ya yichʼ ochintayel te ajwalil yuʼun Israel te j-alwanej Eliseo spisil-ora ya yalbey swenta ya xlokʼ ta anel-a. Jich yuʼun te Ben-adad la yakʼ ta tsakel te Eliseo. La snaʼ stojol te ay ta lum Dotán, la stikun soldado siriaetik swenta ya stsakik talel.

Te siriaetik ajkʼabal kʼotik ta Dotán. Ta sakubel kʼinal, te jkoltaywanej yuʼun te Eliseo lokʼ ta fuera sok la yil te joytaybil ta bayal soldadoetik te lume. Bayal xiw yuʼun sok jich awun: “Eliseo, ¿bin ya jpastik?”. Te Eliseo jich la sut: “Jaʼ bayalxan soldadoetik sok joʼonkotik te bitʼil stukelike”. Tey-abi, te Jehová la yakʼbey yil te jkoltaywanej yuʼun te Eliseo te nojel ta kawuetik sok ta karretaetik yuʼun kʼajkʼ te witsetik te ay ta sjoyobal te lume.

Kʼalal kʼan tsakotuk bael yuʼun soldado siriaetik te Eliseo, la skʼopon te Diose: “Awokoluk Jehová, makbeya te sitike”. Ta oranax, te soldadoetik ma la snaʼik te banti ayik manchukme ya xjuʼ ya yilik kʼinal. Jich yuʼun te Eliseo la yaltiklanbey: “Ma jaʼuk te lum ini, chʼayemex. Tʼunawonik, ya  kikʼex bael te banti ay te winik te yakex ta sleele”. Jich la stʼunik bael te Eliseo jaʼto kʼalal kʼotik ta Samaria. Tey yak ta nainel-a te ajwalil yuʼun Israel.

Ta patil te siriaetik la yilik te banti ayike, pero maʼyuk bin ya xjuʼ ya spasikix-a. Te ajwalil yuʼun Israel la sjojkʼoybey te Eliseo: “¿Yabal jmiltiklan?”. Te siriaetik la sleik bin-utʼil la yutsʼinik te Eliseo, jich yuʼun ay ta skʼab te ya yakʼbey spakol te jichuke, pero ¿labal spas? Maʼuk. Jich la sutbey te ajwalile: “Ma xa amiltiklan. Akʼbeya sweʼelik sok tikunlana bael”. Jich yuʼun te ajwalil la schajpan bayal weʼelil, ta patil la stikunlan bael ta snaik.

«Ha smucʼul coʼtantic ini ta stojol Dios: teme hich ya jcʼambetic te bin ya scʼan yoʼtan stuquel, ya yaʼiyotic» (1 Juan 5:14).