Ta lum Filipos, ay jtul sirbienta achʼix te ya snaʼ te bin ya xkʼot ta pasel ta skaj te uʼuninbil yuʼun chopol espiritu. Bayal takʼin la spasik ganar te yajwaltak yuʼun te bin ya snaʼe. Te kʼalal kʼot te Pablo sok te Silas ta Filipos, bayal kʼajkʼal tʼunotik yuʼun te achʼix chikan te banti bajtʼike. Te chopol espiritu ya yakʼ x-awun te achʼixe: “Te winiketik ini, jaʼ j-abatetik yuʼun te Dios te Machʼa toyol aye”. Jich yuʼun te Pablo la yalbey te chopol espiritu: “Ta swenta sbiil te Jesús ya jpasat ta mantal te lokʼan ta yoʼtan te achʼixe”. Jich lokʼ te chopol espiritue.

Te kʼalal la yilik te yajwaltak te achʼix te ma xjuʼ ya spasikix ganar bayal takʼin soke, bayal ilinik yuʼun. La sjochik bael te Pablo sok te Silas ta stojol te ajwaliletik, te juesetik sok la yaltiklanbeyik: “¡Te winiketik ini ma schʼuunik te ley, yakik ta sjachel kʼop ta spamal te lume!”. Te juesetik la yakʼik ta majel te Pablo sok te Silas sok la yakʼik ta otsesel ta karsel. Te machʼa swentainoj te karsel la yotseslan ta skʼubulil te karsel te banti ma xchiknaj te kʼinale. Sok la xojtiklanbey yokik ta jotbil tablaetik.

Jich yuʼun te Pablo sok te Silas kajik ta kʼayoj ta yalbeyel yutsilal te Jehová, te yantik jchukeletik yakik ta yaʼiyel stojol. Ta oranax-abi, ta olil ajkʼabal tal tulan nijkʼel te la syukʼilan te karsele. Jam spisil te puertaetike, til te kadenaetik sok jam te jotbil tablaetik te banti xojol yokik te jchukeletike. Te jkanankarsel animalnax och bael kʼalalto ta yutil te karsel sok la yil te jamal spisil te puertaetike. La skuy te anikix bael spisil te jchukeletike, jaʼ yuʼun la stsak jun espada yuʼun ya smil sba-a.

Ta yorailnax-abi, te Pablo awun: “¡Ma xa amil aba! ¡Liʼ ayonkotik ta jpisiltik!”. Te jkanankarsel bajtʼ ta oranax ta stojol te Pablo sok te Silas, la snijan sba ta stojolik. La sjojkʼoylanbey: “¿Bin ya skʼan ya jpas yuʼun ya jta jkolel?”. Jich la sutbeyik: “Te jaʼat sok te machʼatik ay awuʼune ya skʼan ya achʼuunik te Jesuse”. Jich yuʼun te Pablo sok te Silas kajik ta yakʼbeyel snop te skʼop te Jehová, te jkanankarsel sok te machʼatik ay yuʼun ta snae la yichʼik jaʼ.

«Ya me yaqʼuex ta cʼabal, ya yutsʼinex, ya yaqʼuex ta sinagogahetic soc ta cárceletic, soc ya me yiqʼuex bahel stehcʼanex ta stojol ajwaliletic soc gobernadoretic ta scuenta te jbihile. Ha me yorahil a te yac awalbeyic testigo-cʼop» (Lucas 21:12, 13).