Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

¿Bin ya yakʼ ta nopel ta smelelil te Bibliae?

 APÉNDICE

¿Yuʼun-nixbal ayin ta diciembre-a te Jesuse?

¿Yuʼun-nixbal ayin ta diciembre-a te Jesuse?

TE Biblia maba ya yalbotik te b-nix-ora ayin-a te Jesuse. Jaʼukmeto ay chaʼoxchajp te bin ya yalbotik te banti ya yakʼ ta naʼel te manix ta diciembreuk ayin-a te Jesuse.

Ta Belén, ta lum te banti ayin te Jesuse, ¿bin yilel-a te kʼinal ta yuil diciembree? Te calendario yuʼun te judioetik ay yichʼoj jun u te Kislev sbiil, te jaʼ smakoj bael te slajibal u yuʼun noviembre sok sjajchibal yuʼun diciembre, ta yorail-abi ay bayal sik sok jaʼal. Ta patil ya xtal te u Tebet, te jaʼ smakoj bael te slajibal u yuʼun diciembre sok sjajchibal yuʼun enero, te jaʼ yorail-a te kʼax bayal sike sok ya xko bayal toib ta banti ba witstikil. Akʼa kiltik te bin ya yal te Biblia ta swenta te bin yilel te kʼinal-abi.

 Te Esdras ya yakʼ ta naʼel te kʼax bayalaj sik sok jaʼal-a ta u kislev. La yal te bayal ta tul ants winiketik la stsob sbaik ta Jerusalén «ta jtahb (20) cʼahcʼal ta sbalunebal u [kislev]» te «yaquic ta nihquel [...] yuʼun te haʼale». Jaʼnix jich la yal te bin la yalik te ants winiketik te la stsob sbaik tey-ae: «Yorahil haʼal, ma xhuʼ ya xʼayinotcotic ta calle» (Esdras 10:9, 13; Jeremías 36:22). Ta swenta-abi, te kʼalal nopolix-a te u yuʼun diciembree, te jkanantuminchijetike ya stsobik-a te stuminchijik swenta jich ma xkʼax ajkʼabal yuʼunik ta akiltik.

Jaʼukmeto, te Biblia ya yal ta swenta te ajkʼabal te kʼalal ayin-a te Jesuse, aylaj jkanantuminchijetik te yakik ta skanantayel stuminchijik ta akiltik. Jaʼnix jich la yal te Lucas ta swenta te kʼajkʼal-abi, te jkanantuminchijetike «yaquic ta scanantayel stuminchijic ta ahcʼabal» ta nopol lum Belén-a  (Lucas 2:8-12). ¿Labal awil te yakik ta skanantayel ta akiltik ta ajkʼabal te stuminchijik te jkanantuminchijetike? Jich bitʼil te ay bayal jaʼal sok sik ta diciembre ta lum Belén, ¿yabal xjuʼ xkʼax ajkʼabal yuʼunik ta akiltik te jkanantuminchijetik-abi? Maʼuk. Jich yuʼun ta swenta te bintik kʼot ta pasel te kʼalal ayin-a te Jesuse ya yakʼ ta ilel te ma diciembreuk ayine. *

Te bin jamal ya yakʼ ta naʼel te sJun Diose jaʼ te bin-ora laj te Jesuse, yan stukel te bin-ora ayine ma xyal ta jamal. Ta swenta ini, ya yakʼ xjul ta koʼtantik te bin la stsʼibay te ajwalil Salomone: «Ha lec xan a te lec cʼoblalil te bin utʼil lequil perfume, soc ha lec xan a te bin cʼahcʼalil ya xcham te bin utʼil te bin cʼahcʼalil ayine» (Eclesiastés 7:1). Jaʼ ini ya yakʼ xkʼot ta koʼtantik bin yuʼun te Biblia ya yalbey lek skʼoplal te aʼtelil la spas te Cristoe sok ta swenta te slajele, yan stukel te bin-ora ayine ma xyalbey lek skʼoplal stukel.

Kʼalal ayin te Jesuse ay jkanantuminchijetik ta ajkʼabal ta akiltik-a

^ párr. 2 Teme ya akʼan ya anaʼbeyxan skʼoplale, ilawil te libro Razonamiento a partir de las Escrituras, ta pajina 111-114, te jaʼ spasojik te stestigotak Jehovae.

Naʼbeyaxan skʼoplal

¿Bin yuʼun ma spasbeyik skʼinul te bin ora ayin Jesús te stestigotak te Jehovae?

Bayal machʼatik ya snaʼik te lokʼem tal ta lotil relijion te spasbeyel skʼinul te bin ora ayin te Jesuse, jaʼukmeto yananix spasik-a te kʼin ini. Ilawil bin yuʼun te ma spasik te kʼin ini te stestigotak te Jehovae.