Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

¿Bin ya yakʼ ta nopel ta smelelil te Bibliae?

 YOʼEBAL KAPITULO

Te stojol kolel jaʼ te mukʼul majtʼanil yakʼojbotik te Diose

Te stojol kolel jaʼ te mukʼul majtʼanil yakʼojbotik te Diose
  • ¿Bin-a te stojol kolele?

  • ¿Bin-utʼil la yakʼ te stojol kolel te Jehovae?

  • ¿Bin lekilal ya xjuʼ ya ata yuʼun?

  • ¿Bin-utʼil ya xjuʼ ya awakʼ ta ilel te bayal skʼoplal ta awoʼtane?

1, 2. 1) ¿Bin yuʼun te bayal skʼoplal ta awoʼtan jun majtʼanil te ya awichʼ akʼbeyele? 2) ¿Bin yuʼun te jaʼ jun mukʼul majtʼanil te stojol kolel te kichʼojtik akʼbeyele?

¿BIN-A te kʼax tʼujbil majtʼanil awichʼoj kʼebanbeyele? Swenta kʼax bayal skʼoplal ya xkʼot jun majtʼanil ma puersauk te bayal stojole. Ma jaʼuk ay skʼoplal te jayebto la yichʼ tojel te majtʼanile. Te bin bayal skʼoplale jaʼ teme ya yakʼbat sbujtsʼkʼinal awaʼiye o teme ya xtuun awuʼun ta akuxlejale.

2 Manchukme bayal te bintik ya xjuʼ ya skʼebanbatike, ay jun majtʼanil te ma xjuʼ ya spaj te yantik majtʼaniletike. Jaʼ te majtʼanil te yakʼoj te Dios ta swenta te ants winiketike, melelnix-a te bayal bintik yakʼojbotik te Jehovae, jaʼukmeto te bin bayalxan skʼoplale jaʼ te bitʼil la yakʼ sba ta lajel te Jesucristo te sNichʼane (kʼopona te sjun Mateo 20:28). Jich bitʼil ya kiltik bael ta kapitulo ini te stojol kolele jaʼme te majtʼanil te kʼax bayal skʼoplal akʼbilotike, melel ya yakʼbotik bayal tseʼel oʼtanil  sok ya xjuʼ ya jtatik te bin-nix ya xtuun kuʼuntik-ae. Jichme la yakʼ kiltik te kʼax kʼuxotik ta yoʼtan ta jujuntul te Jehovae.

¿BIN-A TE STOJOL KOLELE?

3. ¿Bin-a te stojol kolele? ¿Bin ya skʼan ya xkʼot lek ta koʼtantik swenta yuʼun jich ya kiltik-a te bitʼil bayal skʼoplal te majtʼanil akʼbilotike?

3 Te stojol kolele, jaʼme te bin ya stuuntes te Jehová swenta ya xkolotik yuʼun te mulil sok te lajele (Efesios 1:7). Swenta ya xkʼot lek ta koʼtantik te nojptesel ya yakʼ te Bibliae, jaʼ ya skoltayotik te bin kʼot ta pasel ta tsʼumbil kʼinal Edén. Teme ya xkʼot ta koʼtantik te bin la schʼay te Adán te kʼalal la skʼaxuntaybey smantal te Diose, jichme ya kiltik te bin yuʼun te bayal skʼoplal ya skʼan ya xkʼot ta koʼtantik te stojol kolel yakʼojbotik te Diose.

4. ¿Bin yilel-a te skuxlejal te Adán te kʼalal tojil winik-ae?

4 Te kʼalal pasot yuʼun Jehová te Adane ay bin-a te kʼax bayal skʼoplal la yichʼ akʼbeyele, jaʼ te tojil kuxlejalile. Nopa awaʼiy te bin yilel-a te skuxlejal te Adán te kʼalal tojil winik-ae. Jaʼ te bitʼil maʼyuk mulil ta sbakʼetal-ae soknix te toj-a te spensare, maʼyuk bin-ora kʼan tsakotuk ta chamel, maʼyuk bin-ora kʼan mamalubuk soknix te ya xlaj baele. Jaʼnix jich kʼax lek yiloj sba sok-a te Jehovae. Te Biblia ya yal te snichʼanlaj Dios-a te Adane (Lucas 3:38). Jich yuʼun te Dios sok te Adán jich kʼoem-a te bitʼil jtul jkʼuxul oʼtan tatil sok te snichʼane. Ta melel, te Jpaswaneje ya xkʼopoj sok-a te Adán te ay ta Balumilale, la yakʼbey yaʼtel te ya x-akʼbot stseʼelil yoʼtan yuʼune sok la scholbey yaʼiy te bin ya skʼan ta stojole (Génesis 1:28-30; 2:16, 17).

5. ¿Bin ya skʼan ya yakʼ ta nopel te Biblia te kʼalal ya yal te la yichʼ pasel «hich yilel te bin utʼil Dios» te Adane?

5 La yichʼ pasel «hich yilel te bin utʼil Dios» te Adane  (Génesis 1:27). Jaʼ ini mame yuʼunuk ya skʼan ya yal te pajal sit yelaw sok te Diose. Jich bitʼil te la jnoptikix tal ta sbabial kapitulo yuʼun te libro ini, te Jehovae jaʼ jun espiritu te ma chikanuk ta ilele (Juan 4:24). Jich yuʼun ma chʼichʼbakʼetuk. Te Adán jich la yichʼ pasel kʼoem te bin-utʼil te Dios te kʼalal la yichʼ akʼbeyel te bintik yilel stalel te Diose, jich bitʼil te kʼuxul oʼtanil, pʼijilal, tojil oʼtanil sok te ay yip soknix yantikxan talelil. Ay bin yan te tulan skʼoplal te bin yuʼun pajal sok-a te sTate, jaʼ te bitʼil jaʼnix ay ta swenta stsael-a te bin ya skʼan ya spas ta skuxlejale, jich bitʼil ta swenta te bin leke o te bin ma lekuke, melel ma jichuk la yichʼ pasel te bitʼil te chambalametik te jaʼnax ya spasik te bin kʼayemik ta spasele. Te jaʼuk la stsa te schʼuunbeyel smantal te Diose, kuxin ta sbajtʼel kʼinal ta Nichimal Kʼinal te jichuke.

6. ¿Bin la schʼay te Adán te kʼalal la skʼaxuntaybey smantal te Diose? ¿Bin kʼot ta stojolik-euk te stsʼumbale?

6 Chikan ta ilel te kʼax toyol la stoj te bitʼil la skʼaxuntaybey smantal Dios te Adane, melel la yichʼ albeyel te ya xlaj baele. Ta swenta te mulil-abi jich la schʼay te stojil kuxlejal te Adán soknix ta swenta te bintik lek ta tael-ae (Génesis 3:17-19). Mel-oʼtantik sba ini, melel ma jaʼuknax la schʼay te stojil kuxlejal te Adane, jaʼnix jich chʼay yuʼunik-euk te stsʼumbale. Te Bibliae jich ya yal ini: «Ha yuʼun hich te bin utʼil och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic» (Romanos 5:12). Ta melel jpisiltik kichʼojbeytik jilel te smul te Adane. Jich yuʼun ya yalbey skʼoplal te Biblia te la schon sba ta mulil sok ta lajel te Adán soknix la schon spisil-euk te stsʼumbale (Romanos 7:14). Jich yuʼun te Adán sok te Evae maʼyukix  bin lek ya xjuʼ ya smaliyik ta jkʼaxel, melel jaʼnix ta stukelik te la skʼaxuntaybeyik smantal te Diose. Jaʼukmeto, ¿binwan ya xkʼot ta stojol te stsʼumbal te Adán te teynix talemotik-euk-ae?

7, 8. ¿Bin cheb skʼoplal smakoj te stojol kolel yakʼoj te Jehovae?

7 Ta swenta te stojol kolele, te Jehová lokʼ ta yoʼtan skoltayel spisil te ants winiketike. ¿Bintik smakojbey skʼoplal te stojol kolele? Ay cheb. Te sbabiale, jaʼ te kʼalal ay bin ya yichʼ tojel swenta yuʼun ay bin ya kichʼtik sujtesbeyel tal o jaʼ te kʼalal ya yichʼ tojbeyel skuxlejal jtul ants winik te yichʼoj tsakel yuʼun j-elekʼetike. Te schebale, jaʼ te kʼalal ya yichʼ tojel teme ay bin la yichʼ tsʼilajtesbeyel jtul ants winike. Jich bitʼil teme ay jkojt chambalam ya xkʼax ta yan kʼinale, te yajwal te chambalame yame stoj te bin ya yixlan jilele.

8 Jich bitʼil te la kiltikixe, ta jpisiltik la yutsʼinbotik jilel te jkuxlejaltik te Adane. ¿Bin-utʼil ya xjuʼ ya yichʼ tojel te bin chʼay kuʼuntike, sok yuʼun jich ya kichʼtik akʼel ta libre yuʼun te bitʼil abatinbilotik yuʼun te mulil sok te lajele? Akʼa kiltik te bin-utʼil la yakʼ te stojol kolel te Jehovae sok te bin-utʼil ya xjuʼ ya ata lekilal yuʼune.

¿BIN-UTʼIL LA YAKʼ TE JEHOVÁ TE STOJOL KOLELE?

9. ¿Bin yilel te kuxlejalil la skʼan akʼel ta swenta te stojol kolele?

9 Te bin chʼaye jaʼ te tojil kuxlejalil yuʼun te ants winiketike. Swenta ya schaʼyichʼ tael te kuxlejalil ini, ma tikʼuk-a te ya yichʼ akʼbeyel skuxlejal jtul jmulawil winike (Salmo 49:7, 8). Jichnix ya skʼan ya yichʼ tojel te bin-utʼil chʼaye. Jich chikan ta ilel ta Biblia te mantalil ya yal ta swenta te bin stojil ya skʼan pasele. Ta swenta te mantalil-abi jich ya yal: «Te machʼa ya slajimbe scuxlejal  yan, acʼa stoj ta scuxlejal» (Deuteronomio 19:21). Jich yuʼun, ¿bin-utʼil la skʼan la yichʼ tojel te tojil kuxlejalil te la schʼay te Adane? Jaʼ te kʼalal la yichʼ akʼel yan tojil kuxlejalil swenta jich la kichʼtik manbeyel jkoleltik (1 Timoteo 2:6).

10. ¿Bin-utʼil la yakʼ te stojol kolel te Jehovae?

10 ¿Bin-utʼil la yakʼ te stojol kolel te Jehovae? La stikun tal ta Balumilal jtulnax sNichʼan te kʼax toj stukele. Jaʼnax yuʼun te ma machʼauknax la stikun tal, jaʼ la stikun tal te machʼa kʼax kʼux ta yoʼtane, jaʼ te jip jtul sNichʼane (kʼopona te 1 Juan 4:9, 10). Te Nichʼanil ini jun yoʼtan la yijkʼitay jilel skuxlejal ta chʼulchan (Filipenses 2:7). Jich bitʼil te la kiltikix tal ta yan kapituloe, te Jehová la spas jun milagro swenta jich te skuxlejal te sNichʼane la skʼasesbey ta schʼujtʼ te Mariae. Ta swenta te chʼul espiritu yuʼun te Diose, jich ma la skuch jxujtʼuk mulil stukel te Jesuse (Lucas 1:35).

Te Jehová la yakʼ te jip jtul sNichʼan swenta yuʼun la yakʼ te stojol jkoleltike

11. ¿Bin-utʼil te jtulnax winik la yakʼbey stojol skolel bayal miyon ta tul ants winiketike?

11 ¿Bin-utʼil te jtulnax winik la yakʼbey stojol skolel bayal miyon ta tul ants winiketike? Jaʼukmeto, ¿bin-utʼil kʼot ta jmulawiletik ta spisil te ants winiketike? Julukme ta koʼtantik te jaʼ te kʼalal la sle smul te Adane, jich la schʼay te bin kʼax mukʼ skʼoplale te jaʼ te tojil kuxlejalile, jaʼ te bin maba juʼix yuʼun skʼasesbeyel jilel te stsʼumbale. Te bin-nax la skʼasesbey jilele jaʼ te mulil sok te lajele. Te Biblia jich ya yakʼbey sbiilin te Jesuse «te slajibal Adán», melel toj te skuxlejale sok maʼyuk bin-ora la sle smul stukel (1 Corintios 15:45). Jich kʼot ta sjelol Adán te Jesuse, yuʼun jich la yakʼbotik jkoleltik. Spisil la schʼuunbey smantal te sTate sok la yakʼ ta lajel te tojil kuxlejalil yuʼune. Jich la stojbey smul te Adane soknix ay bin lek ya xjuʼ ya yakʼ jmaliytik jich bitʼil te  stsʼumbalotik te Adane (Romanos 5:19; 1 Corintios 15:21, 22).

12. ¿Bin la yakʼ ta ilel te Jesús ta swenta spisil te wokolil kʼax yuʼune?

12 Te Biblia ya scholbey ta lek skʼoplal te bintik wokolil kujch yuʼun te Jesús te kʼalal mato xlaj-ae. La smajik sok la sjijpanik ta jchʼixnax teʼ, jich kʼax bayal swokol ta lajel (Juan 19:1, 16-18, 30; ilawil te apéndice «¿Yabal skʼan ya jtuuntestik crus te jchʼuunjelotik yuʼun Cristoe?»). ¿Bin yuʼun te bayal woklaj te Jesuse? Jich bitʼil te yato kiltik ta yan kapitulo, te Satanase yaloj te malaj ayuk jtul ants winik te jun yoʼtan ya yakʼ sba ta stojol te Jehová teme ya sta wokolile. Te bitʼil jun yoʼtan kujch yuʼun wokolil te Jesuse, jich la yakʼ ta ilel te lotil te bin yaloj te Satanase. Soknix la yakʼ ta ilel te ya xjuʼ jun yoʼtan ya yakʼ sba ta stojol Jehová jtul tojil winik te jaʼ ya stsa te bin ya skʼan ya spas ta skuxlejale, manchukme bayal wokolil ya x-akʼbot yuʼun te Pukuje. ¡Kʼax bayal akʼbot stseʼelil yoʼtan te Jehová te kʼalal la yil te sNichʼan te kʼax kʼux ta yoʼtan te jun yoʼtan la yakʼ sba ta stojole! (Proverbios 27:11.)

13. ¿Bin-utʼil la yichʼ tojel te jkoleltike?

13 ¿Bin-utʼil la yichʼ tojel te jkoleltike? Ta u nisán yuʼun te judioetik ta schanlajunebal kʼajkʼal yuʼun te yaʼbilal 33 ta jkʼajkʼaleltik, te Jehová la yakʼ ta lajel te sNichʼan te toj stukele. Ta swenta ini, te tojil kuxlejalil yuʼun te Jesuse, jun-nax buelta la yakʼ ta lajel ta sbajtʼel kʼinal (Hebreos 10:10). Ta yoxebal kʼajkʼal slajel-a te Jesuse, la yichʼ chaʼkuxajtesel yuʼun Jehová jich bitʼil jun espiritu. Te kʼalal kʼot ta chʼulchane, kʼot yakʼ ta stojol sTat te stojil kuxlejal te la yakʼ ta lajel ta swenta skoltayel te stsʼumbal te Adane (Hebreos 9:24). Te skuxlejal te Jesús te la yakʼ ta majtʼanile tsakbot yuʼun te Jehová ta swenta skolel spisil ants winiketik te bitʼil abatinbilik yuʼun  te mulile soknix te lajele (kʼopona te sjun Romanos 3:23, 24).

¿BIN LEKILAL YA XJUʼ YA ATA YUʼUN TE STOJOL KOLELE?

14, 15. ¿Bin ya skʼan ya jpastik swenta ya xjuʼ ya jtatik «te perdón yuʼun te jmultique»?

14 Jich bitʼil te la yichʼix tojel te jkoleltike bayalme bintik ya xjuʼ ya jmulanbeytikix yutsilal manchukme jmulawilotik. Akʼa kiltik chaʼoxchajpuk te bintik lek ya jtatik ta kʼajkʼal ini soknix ta pajel chaʼbej ta swenta te mukʼul majtʼanil yakʼojbotik te Diose.

15 Ya yichʼ tael perdón yuʼun te mulile. Jich bitʼil te la kichʼtik kʼasesbeyel jilel te mulile, jich yuʼun wokol ya kaʼiytik spasel te bintik leke. Jpisiltik ya jle jmultik ta swenta te bitʼil ya xkʼopojotike o ta swenta te bintik ya jpastike. Jich yuʼun jaʼ wokolyal te bitʼil la stojbotikix te jkoleltik te Jesuse yame xjuʼ ya jtatik «te perdón yuʼun te jmultique» (Colosenses 1:13, 14). Jaʼukmeto yame skʼan te ya jsujtes koʼtantik ta smelelile. Jaʼnixme jich ya skʼan ya jkʼanbeytik sok spekʼelil koʼtantik te Jehová te yakuk spasbotik perdon ta swenta te schʼuunel koʼtantik ta stojol te bitʼil la yakʼ sba ta lajel te sNichʼane (kʼopona te 1 Juan 1:8, 9).

16. ¿Bin yuʼun te ya xjuʼ ya kichʼtik ta mukʼ te Dios jich bitʼil te jnaʼojtik te lek ayotik ta site? ¿Bin-utʼil ya skoltayotik teme lek ayotik ta stojol te Jehovae?

16 Lek ya kaʼiy jbatik te bitʼil lek ayotik ta sit te Diose sok te maba ya spʼajotike. Teme pʼajbil ya kaʼiy jbatik yuʼun te Diose mame ayuk bin ya xjuʼ ya jmaliytik soknix ya xjuʼ ya jnoptik te ma xtuunotik ta jkʼaxele. Jaʼukmeto wokolyal te bitʼil la yichʼix tojel te jkoleltike, te Jehová ya spasbotik perdon sok ta swenta yutsil yoʼtan ya xjuʼ ya kichʼtik ta mukʼ manchukme jmulawilotik, melel ya  jnaʼtik te lek ayotik ta site (Hebreos 9:13, 14). Jichme maʼyuk bin ya smakotik te kʼalal ya jkʼopontike (Hebreos 4:14-16). Soknix teme lek ayotik ta stojol te Jehovae, yame jmulanbeytik yutsil te lamalkʼinal ta koʼtantike, sok lekme ya kaʼiy jbatik soknix yame jtatik bayal tseʼel oʼtanil.

17. ¿Bintik utsilaletik ya xjuʼ ta tael ta swenta te bitʼil la yakʼ sba ta lajel ta jwentatik te Jesuse?

17 Ya jmaliytik te kuxlejalil ta sbajtʼel kʼinal ta Nichimal Kʼinal. Ta Romanos 6:23 jich ya yal: «Como te stojol te mulil, ha te lajele». Jaʼnix jich ya yalxan te versiculo-abi: «Yan te mahtanil yuʼun Dios, ha te cuxlejal sbahtel qʼuinal ta scuenta te Cajwaltic Cristo Jesús». Ta yoxebal kapitulo yuʼun te libro ini, lame kilbeytikix skʼoplal te utsilaletik te ya yichʼ akʼel ta Nichimal Kʼinal te nopol ya xkʼotix ta pasele (Apocalipsis 21:3, 4). Ta swenta te bitʼil la yakʼ sba ta lajel te Jesús ta jwentatike yame xjuʼ ya jtatik spisil te utsilaletik ini, jichnix bitʼil te ya xkuxinotik ta sbajtʼel kʼinal te banti ma stsakotikix chamele. Swenta ya xjuʼ ya kichʼtik spisil-abi, yame skʼan ya kakʼtik ta ilel te ay bayal skʼoplal ta koʼtantik te majtʼanile, jaʼ te stojol te jkoleltike.

 ¿BIN-UTʼIL YA XJUʼ YA AWAKʼ TA ILEL TE YA AWAL WOKOLE?

18. ¿Bin yuʼun ya skʼan ya kalbeytik bayal wokol te Jehová ta swenta te stojol jkoleltik la yakʼbotike?

18 ¿Bin yuʼun ya skʼan ya kakʼtik ta ilel te ay bayal skʼoplal ta koʼtantik te stojol jkoleltik te la yakʼ te Jehovae? Te jun majtʼanile, jaʼ bayalxan skʼoplal ya xkʼot te kʼalal la slokʼes stiempo, la slajin stakʼin sok te bayal aʼtej yuʼun te machʼa la yakʼe. Jaʼnix jich ya yakʼ stseʼelil koʼtantik te kʼalal ya kiltik te yuʼun-nix kʼuxotik ta yoʼtan-a te machʼa la yakʼbotik te jmajtʼantike. Jich yuʼun te stojol jkoleltike jaʼ te mukʼul majtʼanil kichʼojtik akʼbeyel ta jpisiltike, melel kʼax mukʼ te bin la yakʼbotik te Diose. Ta sjun Juan 3:16 jich ya yal: «Como hich cʼux ta yoʼtan Dios te bahlumilal te la sticon tal te hip jtuhl Snichʼan». Ta swenta te stojol jkoleltik la yakʼbotik te Jehovae jichme la yakʼ ta ilel te kʼax kʼuxotik ta yoʼtane. Jaʼnix jich chikan ta ilel te bayal kʼuxotik ta yoʼtan te Jesuse, melel jun yoʼtan la yakʼ sba ta lajel ta jwentatik (kʼopona te sjun Juan 15:13). Ta swenta te majtʼanil yuʼun te stojol jkoleltike yame skʼan ya jnaʼtik te yuʼun kʼuxotik ta yoʼtan ta jujuntul te Jehová sok te sNichʼane (Gálatas 2:20).

Te bin-utʼil ya xjuʼ ya awakʼ ta ilel te ay bayal skʼoplal ta awoʼtan te majtʼanil yuʼun te stojol kolele, jaʼ te ya apas tulan ta snaʼbeyel sba te Jehovae

19, 20. ¿Bintik-utʼil ya xjuʼ ya awakʼ ta ilel te ay bayal skʼoplal ta awoʼtan te stojol jkoleltik te la yakʼ te Diose?

19 Jich yuʼun, ¿bintik-utʼil ya xjuʼ ya awakʼ ta ilel te bitʼil ay bayal skʼoplal ta awoʼtan te majtʼanil te yakʼojbat te Diose? Ta nail te bin ya skʼan ya apase, jaʼ te yakuk anaʼbey sba te machʼa la yakʼbat te majtʼanil ini, jaʼ te Jehovae (Juan 17:3). Yame xjuʼ ya apas te kʼalal ya anop te Biblia sok yame skoltayat te libro ini. Te kʼalal ya anaʼbeyxan sba ta lek te Jehovae jichme kʼux ya awaʼiyxan ta awoʼtan. Te kʼalal ya xmukʼubxan te skʼuxul awoʼtan ta stojole,  jichme ya akʼan ya apasbeyxan te bin lek ya yile (1 Juan 5:3).

20 Ayukme schʼuunel awoʼtan ta swenta te stojol kolele. Jich ya yichʼ alel ta swenta te Jesuse: «Te machʼa ya schʼuhun te Nichʼanil ay scuxlejal sbahtel qʼuinal» (Juan 3:36). ¿Bin-utʼil ya xjuʼ ya kakʼtik ta ilel te ay schʼuunel koʼtantik ta stojol te Jesuse? Mame jaʼuknax ta swenta te bintik ya kaltike. Jich bitʼil ya yal te sjun Santiago 2:26, «ha nix hich chamen te schʼuhunel-oʼtanil teme mayuc yaʼtelule». Jich yuʼun te smelelil schʼuunel oʼtanile yame xchiknaj sok yaʼtelul. Te bin-utʼil ya xjuʼ ya kakʼtik ta ilel te ay schʼuunel koʼtantik ta stojol te Jesuse, jaʼme te kʼalal ya jpastik tulan ta skʼayinbeyel stalel jich bitʼil ta swenta te bintik ya kaltike soknix te bintik ya jpastike (Juan 13:15).

21, 22. 1) ¿Bin yuʼun te ya skʼan ya xbootik ta tsoblej te ya yichʼ pasel ta jujun jaʼbil ta swenta te Weʼel Uchʼel yuʼun Kajwaltike? 2) ¿Bin ya jnopbeytik bael skʼoplal ta swakebal sok ta sjukebal kapitulo?

21 Baan ta tsoblej te ya yichʼ pasel ta jujun jaʼbil ta swenta te snaʼojibal Weʼel Uchʼel yuʼun Kajwaltik. Ta schanlajunebal yuʼun nisán ta yaʼbilal 33, ta ajkʼabal-abi te Jesuse la sjach jilel te snaʼojibal te «weʼelil [uchʼel] yuʼun Cajwaltique», te jich sbiil ya yal ta Biblia (1 Corintios 11:20; Mateo 26:26-28). Jaʼnix jich naʼbil sba kuʼuntik jich bitʼil Snaʼojibal slajel te Cristoe. Te Jesús la sjach jilel ta pasel ini, yuʼun jich la skoltay te jpuk-kʼopetik yuʼune soknix spisil te yantik smelelil jchʼuunjeletik ta swenta snaʼel te bin tulan skʼoplale, te kʼalal la yakʼ ta lajel te tojil kuxlejalil yuʼun ta swenta stojol jkoleltik. Jaʼnix jich la yalbey skʼoplal te Jesús te jich ya skʼan pasel te kʼalal la yal te mantalil ini: «Pasahic ta scuenta jnaʼojibal» (Lucas 22:19). Ta swenta te Snaʼojibal slajel te Cristoe jaʼme ya yakʼ xjul ta koʼtantik te bitʼil bayal kʼuxotik ta yoʼtan te Jehová  sok te Jesús te kʼalal la stojbotik te jkoleltike. Jaʼnix jich ya kakʼtik ta ilel te ay bayal skʼoplal ta koʼtantik te stojol jkoleltik te kʼalal ya xbootik-a te tsoblej ya yichʼ pasel ta jujun jaʼbile. *

22 Te stojol jkoleltike jaʼme jun majtʼanil te yakʼojbotik te Jehová te maʼyuk bin yan jich ya spajbey stojole (2 Corintios 9:14, 15). Jaʼnix jich ya xjuʼ ya staik lekilal yuʼun-euk te machʼatik lajemikixe, jaʼ ini yame jnopbeytik bael skʼoplal ta swakebal sok ta sjukebal kapitulo.

^ parr. 21 Ta apéndice «Te snaʼojibal Weʼel Uchʼel yuʼun Kajwaltik ya yakʼ ta ichʼel ta mukʼ te Diose», yame atabeyxan skʼoplal te bin swentail te Weʼel Uchʼel yuʼun Kajwaltike.