Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

¿Bin ya yakʼ ta nopel ta smelelil te Bibliae?

 APÉNDICE

¿Machʼa-a te Miguel te jtsobaw yuʼun te chʼul-abatetike?

¿Machʼa-a te Miguel te jtsobaw yuʼun te chʼul-abatetike?

AY CHEʼOXEBNAX textoetik ta Biblia te ya yalbey skʼoplal jtul chʼul-abat te sbiilinej Miguel. Ta textoetik-abi, ya yal te aynanix bintik yak ta spasel-ae. Ta sjun Daniel ya yakʼ ta ilel te yak ta yakʼbeyel guerra te chopol chʼul-abatetike, ta sjun Judas ya yakʼ ta ilel te la stij sba ta kʼop sok te Pukuje, jaʼnix jich ta sjun Apocalipsis ya yakʼ ta ilel te yak ta yakʼbeyel guerra te Satanás sok te chopol espirituetik yuʼune. Jich ta spisil-ora yak ta skoltaybeyel skʼoplal te Jehová te bitʼil jaʼnax stukel ya xmantalaje sok yananix stsak sba sok-a te skontratak te Diose. Te kʼalal jich ya spase, snujpʼ ta lek te bin ya skʼan ya yal te sbiile, jaʼ te «¿aybal Machʼa jich bitʼil te Diose?». Jich yuʼun, ¿machʼa-a te Miguele?

Nail akʼa juluk ta koʼtantik te ay chaʼoxtul ants winiketik te ma junuknax te sbiilike. Jich bitʼil te Jacob te ayin bayal sfamiliae, Israel kʼot te yan sbiile, te jpuk-kʼop Pedro, Simón te yan  sbiile (Génesis 49:1, 2; Mateo 10:2). Jaʼnix jich te Biblia ya yakʼ ta ilel te biilil Miguel, te jaʼ yan sbiil te Jesucristoe sok jich sbiilinej te kʼalal mato talem ta Balumilal-ae sok te kʼalal chaʼsujt bael ta chʼulchan. Akʼa kiltik chaʼoxchajpuk skʼoplal ta Biblia te bin yuʼun jich ya kaltike.

Jtsobaw yuʼun chʼul-abatetik. Te Biblia ya yal ta swenta te Miguel, jaʼ «te jtsobaw yuʼun te chʼul aʼbatetic» (Judas 9). Lame kiltikix ta swenta te Miguel, jaʼ te jtsobaw yuʼun te chʼul-abatetike, jaʼ ya yakʼ ta naʼel te jtulnax te chʼul-abat te ya stsobawane. Jaʼnix jich te Biblia maʼyuk ya yal te ay chaʼoxtul jtsobawetike, melel jtulnax te machʼa ya yalbey skʼoplal ta swenta-abi. Jaʼnix jich ya yalbey skʼoplal te aʼtelil ya spas te Jesús jich bitʼil jtsobaw yuʼun chʼul-abatetik. Ta Biblia ya yalbey skʼoplal te bin ya spas te Jesucristo te chaʼkuxajemixe, melel jich ya yakʼ ta ilel ta 1 Tesalonicenses 4:16: «Ha nix te Cajwaltic ya xco talel ta chʼulchan ta scuenta tulan aw ta mandar, soc scʼop jtsobaw chʼul aʼbat». Te texto-abi ya yal ta swenta te Jesús te yalaj xkʼopoj jich bitʼil jtsobaw yuʼun chʼul-abatetik. Jich yuʼun, chikan ta ilel te jaʼnix Jesús te Miguel te jtsobaw yuʼun te chʼul-abatetike.

Jwolwanej. Te Biblia jich ya yal: «Te Miguel soc te chʼul aʼbatetic yuʼun la stsal sbahic soc te dragón [...] soc te aʼbatetic yuʼun» (Apocalipsis 12:7). Te Miguel jaʼ te Jwolwanej yuʼun te ipal chʼul-abatetik te jun yoʼtanik ta stojol te Diose. Ta Apocalipsis ya yakʼ ta ilel te jaʼ jtul Jwolwanej yuʼun ipal chʼul-abatetik te Jesuse (Apocalipsis 19:14-16). Jaʼnix jich te jpuk-kʼop Pablo jamal la yalbey skʼoplal ta swenta «te Cajwaltic Jesús soc te chʼul aʼbatetic yuʼun te ay yipic» (2 Tesalonicenses 1:7). Jich yuʼun te Bibliae ya yalbey skʼoplal te Miguel sok «te chʼul aʼbatetic yuʼun» jaʼnix jich ya yal ta swenta te Jesús sok «te chʼul aʼbatetic yuʼun» (Mateo 13:41; 16:27; 24:31; 1 Pedro 3:22). Jich bitʼil te jnaʼojtik te ay jtsojbnax ipal chʼul-abatetik te jun yoʼtanik ta stojol te Diose, chikan ta ilel te jaʼnix te Jesucristo te Miguel te yak ta aʼtel ta chʼulchane. *

^ párr. 2 Yame atabeyxan skʼoplal ta swenta te biilil Miguel te jaʼ ya skʼan ya yal te jaʼ te sNichʼan Dios ta libro Perspicacia para comprender las Escrituras ta vol. 2, paj. 386, 387, te jaʼ spasojik te stestigotak Jehová.