Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Te Biblia sok te bin ya xchole

 JXAJTʼ 23

Pujk ta bayuk te lek yachʼil kʼop

Pujk ta bayuk te lek yachʼil kʼop

Te jpuk kʼop Pablo been ta xcholbeyel skʼoplal ta swenta te Ajwalinel yuʼun Dios ta lumlumtik sok ta mar

TE KʼALAL och ta jnopojel yuʼun Cristo te Pablo jajch xchol sok spisil yip yoʼtan ta swenta te Ajwalinel yuʼun Diose. Jaʼukmeto, jaʼ ayix ta swenta te ya xba kʼaxuk tulan nutsel ta stojole. Te jpuk kʼop Pablo maba la skom sba ta beel ta lumlumtik te ayik ta namal ta xcholbeyel skʼoplal ta swenta te Ajwalil te ya yakʼ kʼotuk ta pasel te skʼanojel yoʼtan te Dios te ay ta xjajchibalto tal ta swenta te ants winiketike.

Te kʼalal been ta sbabial buelta te Pabloe, bajtʼ yulaʼtay te lum Listra, tey la slekubtes jtul winik-a te koxo ayineme. Te ipal ants winiketik te la yilik te bin kʼot ta pasele, jajchik ta yawtayel te jaʼla diosetik te Pablo sok te Bernabe te jokinbil yuʼune. Wokol juʼ yuʼunik skomel te ants winiketik te manchuk ya x-akʼbotik chikʼbil majtʼanil ta stojolik. Jaʼukmeto, ta patil te ants winiketik jaʼ la xchʼuunbeyik lokʼel skʼop te skontratak te Pablo, jich yuʼun la xchʼojik ta ton. Manchukme la skuyik te laj yuʼunike, jaʼukmeto, maba laj te Pabloe, melel maba jalaj bayal kʼajkʼal te chaʼsujt bael ta banti lum Listra ta yakʼbeyel yip yoʼtan te jnopojeletike.

Ta patil ay chaʼoxtul jchʼuunjeletik yuʼun Cristo te judío stsʼumbalike, jajch yalik ta swenta te jchʼuunjeletik te maba judioetik te akʼa xchʼuunik chaʼoxchajp Leyetik yuʼun te Moisés. Ta swenta te ya xjuʼ yichʼ chajpanel te kʼop ini, te Pablo la skʼan te akʼa yichʼ albeyel skʼoplal ta stojol te jpuk kʼopetik sok te ancianoetik yuʼun Jerusalén. Te kʼalal la yilik ta lek te bin ya yal ta Sjun Dios sok te kʼalal la skʼanikix-a te koltayel yuʼun te chʼul espiritue, jich la stsʼibaybeyik bael carta te jchʼuunjeletik sok la yalbeyik ta mantal te manchuk ya yichʼik ta mukʼ te lokʼombaetik, sok te ma sweʼik te chʼichʼe sok te ma stiʼbeyik stiʼbalul te bin tsʼotbilnax ta snukʼ sok te manchuk ya yaʼiyik antsiwej o ma xyakʼ sbaik ta antsinele. Te mantaliletik ini, «jaʼik te tulan skʼoplale», jaʼukmeto, maba ya skʼan yal te jkʼaxel ya skʼan stʼunik te Ley yuʼun te Moisés (Hechos 15:28, 29).

Te kʼalal been xchebal buelta te Pabloe, la yulaʼtay te lum Berea te ay ta Grecia ta ora ini. Te judioetik te yakalik ta kuxinel tey-ae, sok spisil yoʼtan la xchʼuunik te skʼop Diose, melel ta jujun kʼajkʼal la sle yilik ta Sjun Dios teme yuʼunix melel-a te bin yakalik ta snopele. Ta patil maba jalaj bayal kʼajkʼal te chaʼlokʼ bael ta anel te Pablo ta skaj te skontratake. Bajtʼ kʼalal ta lum Atenas te banti kʼot yakʼ sba ta ilel ta stojol ants winiketik te bayal spʼijilike, te Pablo chajpnax te bitʼil la yal skʼop Dios tey-ae, melel la yichʼ ta mukʼ te machʼatik chʼambot yaʼiyik te skʼope, sok la snaʼ stsajtayel te bitʼil kʼopoje, jaʼ ini ya xjuʼ jnopbeytik.

Ta patil te kʼalal yoxebalix buelta been ta xcholel skʼop Dios te Pabloe, bajtʼ ta lum Jerusalén. Te kʼalal bajtʼ ta temploe, tey kʼan yichʼ milel yuʼun ipal chopol ants winiketik. Jaʼukmeto, te soldadoetik yuʼun Roma la stsakik lokʼel sok la yikʼik bael yuʼun ya yichʼ ichʼel ta kʼop. Jich bitʼil te yuʼunix jaʼ slumal-a te Romae, jich yuʼun la skʼan skoltay sba ta kʼop ta stojol te gobernador Félix. Te judioetik ma juʼ yuʼunik yakʼel ta ilel teme melel te ay smule. Manchukme ma la stabeyik smul te Pabloe, te Festo te jaʼ yan gobernador, yoʼtanuk kʼan yakʼ ta kʼabal ta stojol te judioetike. Ta swenta yuʼun ma xkʼot ta pasel ini, te Pablo la skʼan chajpanel ta stojol te César, jich sutbot yuʼun te gobernadore: «Ta stojol César ya xbaat» (Hechos 25:11, 12).

Te Pablo la yichʼ ikʼel bael ta barco ta Italia yuʼun tey ya yichʼ chajpanel-a. Jaʼukmeto, te barco la smaj sba ta ton ta skʼinal Malta te ay ta yolil mar, jich te Pablo kʼax yuʼun tey-a te yorail sike. Te kʼalal kʼotix ta Roma-a, bajtʼ ta nainel cheb jaʼbil ta manjanbil na. Manchukme kanantaybil yuʼun soldadoetik, maʼyuk bin ora chebaj yoʼtan, ma la skom sba ta xcholbeyel skʼoplal ta swenta te Ajwalinel yuʼun Dios ta stojol te machʼatik ya x-ulaʼtayot yuʼune.

(Lokʼem ta Hechos 11:22–28:31.)