¿BIN utʼil ya xjuʼ snaʼbeyik sba te ants winiketik te machʼa-a te Mesiase? Jaʼnix te Dios ya yakʼ ta naʼel te machʼa-a te Mesiase. Ay kʼaxemix 400 jaʼbil-a te lajemix ta tsʼibayel te Escrituras Hebreas, o Antiguo Testamento, te kʼalal jtul chʼul abat te Gabriel sbiil chiknaj ta stojol te María te jaʼ jtul achʼix te ay ta kuxinel ta norte yuʼun Galilea-a te ay ta lum Nazaret. Te Gabriel la yalbey te María te ya sta jtul alal. Manchukme mato tabiluk ta winik-a, jaʼukmeto, ta swenta xchʼul espíritu te Diose la yikʼ, o la sta yal te Mariae. Te alal ini, jaʼ te machʼa albil skʼoplal te ya yichʼ yaʼtel ta Ajwalil te ya xpasawan ta mantal ta sbajtʼel kʼinal. Te xkuxlejal te jip jtul Xnichʼan te Dios te ayto ta chʼulchan-ae la skʼasesbey ta xchʼujtʼ te Mariae.

Te María sok spekʼelil yoʼtan la xchʼuun te bin albot yuʼun te Diose. Ta patil kʼot jtul chʼul abat ta stojol te José te carpintero winik te smakojix-a te María, yuʼun akʼbot snaʼ te bin uʼtil la sta te alale, jich nujpun sok. Julukme ta koʼtantik te yichʼoj albeyel skʼoplal te ya x-ayin ta lum Belén te Mesiase, maba ta Nazaret (Miqueas 5:2). ¿Bin utʼil ya xkʼot ta pasel te bin albil skʼoplal ini?, melel te lum Belén ay 150 kilómetro te yiloj sba sok te lum Nazaret.

Ta patil, jtul ajwalil yuʼun Roma la yal ta mantal te akʼa yichʼ pasel censo, yuʼun jich ya snajkʼan sbiilik te ants winiketik ta slumalik te banti jajchemik tale. Jich te José sok te María, bajtʼik ta lum Belén ta snajkʼanel sbiilik, melel tey jajchemik talel-a. Tey nopolix yorail-a te ya x-ayin yal te María (Lucas 2:3). Te Jesús ayin ta sna wakax sok la yichʼ waytesel ta yawil sweʼel wakax. Te Dios la stikun bael bayal ta jtul chʼul abatetik ta yalbeyel te jtsob jkanan tuminchijetik te ayik ta akiltik te bitʼil ayinelto te Mesías, o Cristo te albil skʼoplale.

Jaʼnix jich ay yantik ants winiketik te ya yakʼik ta naʼel te yuʼunix jaʼ-a te Jesús te Mesías te albil skʼoplale. Te j-alwanej Isaías la yalbey skʼoplal te ay machʼa ya xchajpanbot sbe yuʼun te Cristo te kʼalal ya xjajch spas te aʼtelil te mukʼ skʼoplale (Isaías 40:3). Te winik te machʼa albil skʼoplale jaʼ te Juan te J-akʼ ichʼjaʼ. Ta Jun buelta te Juan kʼalal la yil te yak ta talel te Jesús, jich la yal: «¡Jaʼ te Jkolel Tuminchij yuʼun Dios te ya xchʼaybey smul machʼatik ayik ta Balumilal!». Ay chaʼoxtul jnopojeletik yuʼun te Juan te oranax la stʼunik bael te Jesuse. Ay jtul te machʼa jich la yal ta jamal: «La jtajkotikix te Mesiase» (Juan 1:29, 36, 41).

Jaʼukmeto, ay machʼaxan te la yalbey ta jamal skʼoplal te Jesús: Te kʼalal te Juan la yakʼbey yichʼ jaʼ te Jesuse, te Jehová la yakʼbey sbiilin Mesías ta swenta te xchʼul espíritu sok jich la yal: «Jaʼ jnichʼan ini te kʼux ta koʼtan, te bayal yutsil koʼtan ta stojol» (Mateo 3:16, 17). ¡Te bin albil skʼoplal ta swenta te Mesías kʼotix ta pasel!

Jaʼukmeto ¿bin ora kʼot ta pasel ini? Ta yaʼbilal 29 ta jkʼajkʼaleltik, jaʼ-a te kʼalal tsʼakaj te cuatrocientos ochenta y tres jaʼbil te yalojbey jilel skʼoplal te Daniele. Jaʼ ini jaʼnaxme te chaʼox chajp señail te ya yakʼ ta naʼel te yuʼunix jaʼ-a te Jesús te Mesiase. Jich yuʼun, ¿binwan ya xcholbey skʼoplal te jayeb kʼajkʼal ya xkʼax ta Balumilale?

(Lokʼem ta capítulo 1 kʼalal ta 3 yuʼun Mateo, te capítulo 1 yuʼun Marcos, te capítulo 2 yuʼun Lucas sok te capítulo 1 yuʼun Juan.)