Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Te Biblia sok te bin ya xchole

 JXAJTʼ 19

Te bin albil jilel skʼoplal yak ta kʼoel ta pasel ta kʼajkʼal ini

Te bin albil jilel skʼoplal yak ta kʼoel ta pasel ta kʼajkʼal ini

Te Jesús ya yal te bin utʼil ya xjuʼ ta naʼel te kʼalal ayix ta Ajwalil-ae sok te nopolix-a te slajibal te bintik chopol ay ta balumilale

TA JUN buelta te kʼalal ayik ta wits Olivoiltik te banti tʼujbilnax ta ilel bael te lum Jerusalén sok te templo yuʼune, chan tul jpuk kʼopetik yuʼun te Jesús stukel noptsajik bael ta stojol ta sjojkʼobeyel ta swenta te bin yalojix-ae. Lajeltonax yalbeyel skʼoplal-a te Jesús ta swenta te ya yichʼ lajinel te templo sok te ay yalojix ta swenta-a te «slajibal te bintik ay ta balumilal» (Mateo 13:40, 49NM). Jich yuʼun la sjojkʼobeyik: «¿Bin ora ya xkʼot ta pasel ini sok bin señail te kʼalal liʼ ayatix-ae sok te jaʼix-a te slajibal te bintik ay ta balumilal?» (Mateo 24:3NM).

Te sujtib te la yakʼ te Jesús la yal te ay bin naʼil ya xkʼot ta pasel te kʼalal ya yichʼ lajinel te Jerusalén sok te templo yuʼune. Jaʼukmeto, te bin la yal te Jesús ma teyuknax laj skʼoplal-a, melel yato xkʼot ta pasel ta swolol Balumilal. Te bin utʼil ya xjuʼ ta naʼel te kʼalal liʼ ayix-a te Jesuse, jaʼ te yakuk yichʼ ichʼel ta mukʼ te señail ini: te bitʼil ay bintik junax yorail ya xkʼot ta pasel ta swolol te Balumilale. Te señail ini jaʼme ya skʼan yakʼ ta naʼel te bitʼil te Jehová la yotsesix ta Ajwalil te Jesús te jaʼ te Mesiase, te Ajwalil ini nopolme ya slajin te bintik chopol sok yame yakʼ lamal kʼinal ta swolol Balumilal. Te bintik albil jilel skʼoplal yuʼun te Jesús te ya xkʼot ta pasele, jaʼme señail te slajibal te bintik chopol ay ta Balumilale, jich bitʼil te política, te lotil religionetik jaʼnix jich te bitʼil ay machʼatik namal yakʼoj sbaik ta stojol te Diose, sok jaʼme señail te nopol ya xtal te achʼ balumilale.

Te Jesús la yal te kʼalal ya xjajchix ta Ajwalinel ta chʼulchan-ae, ta swolol Balumilal yala xjajch guerraetik, wiʼnal, tulan nijkʼel, sok tulan chamel ta bayuk. Jaʼnix jich te ants winiketik stukelnax ya skʼan xjajch swentain sbaik. Sokxan te smelelil jnopojeletik yuʼun yala spukik ta alel ta spisil nacionetik te lek yachʼil kʼop yuʼun te Ajwalinel yuʼun Diose. Te slajibal te señailetike jaʼ te «tulan wokol», jaʼme yorail-a te xkʼuxul te woklajel te maʼyuk jich ya xkʼotxan ta pasele (Mateo 24: 21).

¿Bin utʼil ya snaʼik te jnopojeletik yuʼun Cristo te nopolix yorail-a te ya xtal te woklajele? Te Jesús la yalbey te jnopojeletik yuʼune: «Ta skuenta te higuera nopaik te bin utʼil ay te slokʼombail kʼop» (Mateo 24:32). Kʼalal ya xkaj ta lokʼel tal te yabenal te higuera teʼ, jich ya xnaʼbaj te nopolix-a te verano, o yorail te xkʼuxul kʼajkʼal. Jaʼnix jich, te kʼalal ya xkʼot ta pasel ta junax yorail te bintik albil jilel yuʼun te Jesuse, jichme ya xnaʼbaj-a te nopolix te slajibal kʼajkʼale. Te Jesús la yal te jaʼnax te Tatile ya snaʼ te bin kʼajkʼalil sok te bin yorail ya xjajch te tulan wokole. Jich yuʼun ay bin tulan skʼoplal la yal te Jesús: «Wikʼilukme asitik, yuʼun ma naʼbiluk awuʼunik te bi ora ya xkʼot te yoraile» (Marcos 13:33, XCD).

(Lokʼem ta capítulo 24 sok 25 yuʼun Mateo, te capítulo 13 yuʼun Marcos sok te capítulo 21 yuʼun Lucas.)

^ párr. 14 Teme ya akʼan anaʼbeyxan skʼoplal ta swenta te bin la yalbey jilel skʼoplal te Jesús, ilawil te sbalunebal capítulo yuʼun te libro ¿Bin ya yakʼ ta nopel ta smelelil te Bibliae?, te pasbil yuʼun te stestigotak te Jehová.

Naʼbeyaxan skʼoplal

¿Yakotikixbal ta kuxinel ta «slajibal cʼahcʼal»?

Nopa ta swenta te bintik yak kʼoel ta pasel sok te stalel ants winiketik, te jaʼ ya yakʼ ta ilel te ayotikix ta slajibal kʼajkʼal te ya yalbey skʼoplal ta Biblia.