Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Te Biblia sok te bin ya xchole

 JXAJTʼ 18

Te milagroetik yuʼun te Cristo

Te milagroetik yuʼun te Cristo

Te milagroetik yuʼun te Jesús ya yakʼ ta ilel te bin utʼil ya stuuntes te yuʼel te kʼalal ya x-och ta Ajwalile

TE Dios la yakʼbey yuʼel te Xnichʼan ta spasel bayal milagroetik te maʼyuk machʼa ya xpajot yuʼune. Te milagroetik te la spas ay la yichʼ ilel ta komon sitil. Jich te Jesús la yakʼ ta ilel te ya xjuʼ yuʼun slajinel spisil te bintik ya yakʼ tulan wokolil sok te skontratak te Dios te ya yutsʼin te ants winiketike, te maʼyuk machʼa juʼem yuʼun slajinele. Yame kiltik bael chaʼoxchajp.

Te wiʼnale. Te sbabial milagro yuʼun te Jesús jaʼ te kʼalal la skʼatpʼun ta vino te jaʼe, jich la yakʼ ta ilel te ya xjuʼ yuʼun yakʼel bayal weʼel uchʼelil. Ta cheb buelta la yesmajtes chaʼoxpejch pan sok chaʼoxkojt chay, jich la smakʼlin bayal ta jmil ants winiketik. Te kʼalal la spas te cheb milagro ini, bayal weʼelil la spas sobrail.

Te chamele. Te Cristo la slekubtes te ants winiketik te ay swokolik «ta chamel sok te banti kʼux ya yaʼiyike» (Mateo 4:23). La slekubtes maʼsitetik, te machʼatik kojkʼ chikinetik, te machʼatik chamen xchial yok skʼabik, te jkʼael chameletik, sok te machʼatik yichʼoj tupʼul ikʼ. Ta swenta te yuʼele maʼyuk chamel te ma juʼ yuʼun slekubtesele.

Te tulan yikʼal jaʼal. Ta jun ajkʼabal te Jesús sok te jnopojeletik yuʼun te yakalik ta beel ta barco ta mar yuʼun Galilea, jajch tulan ikʼ. Te jnopojeletik bayal xiwik yuʼun, yan stukel te Jesús la stoy moel sit ta chʼulchan sok jich la yal: «¡Chʼaban! ¡Lamajan!», jich chʼab ta oranax te ikʼe (Marcos 4:37-39). Ta yan buelta te Jesuse been ta ba jaʼ te kʼalal ay tulan ikʼ-ae (Mateo 14:24-33).

Te chopol espirituetik. Te chopol espirituetik ini ay yuʼelik, ma spaj te ants winiketike. Ay bayal ta jtul ants winiketik te ya x-utsʼinotik yuʼun sok te ma juʼemuk yuʼunik te ya x-ijkʼitayotik yuʼun te espirituetik te skontrainej te Diose. Jaʼukmeto, ma la xiʼ stukel te Jesuse. Yan stukel te chopol espirituetik te kʼalal la yilik te Jesús xiwik yuʼun, melel ta oranax la xchʼuunbeyik smantal te kʼalal albotik yuʼun te akʼa yijkʼitayik te machʼatik yuʼuninejike.

Te lajele. Te Biblia ya yal te jaʼ «slajibal jkontrainwanej» te lajele, melel yananix slajinotik bael ta jpisiltik-a (1 Corintios 15:26). Jaʼukmeto, te Cristo maba makbot sbe yuʼun te lajele, melel la xchaʼkuxajtesbey skerem al te jtul meʼba ants sok la xchaʼkuxajtes jtul achʼix. Jaʼukmeto, te banti kʼax naʼbil skʼoplal jaʼ ta swenta te yamigo Lázaro, te machʼa ayix xchanebal kʼajkʼal slajel te la yichʼ chaʼkuxajtesel ta comon sitil yuʼun te Jesuse. Jaʼnix jich te skontratak te Jesús la snaʼik stojol te yuʼunix ay yuʼel-ae (Juan 11:38-48; 12:9-11).

Jaʼukmeto, te machʼatik la slekubtes te Jesuse chaʼtsakotik ta chamel sok chaʼlajik bael. Jich yuʼun, ¿bin swentailix-a te milagroetik la spase? Ay bayal swentail, melel jich la yakʼ ta naʼel-a te bin albil skʼoplal ta swenta te Ajwalinel yuʼun Mesías yananix xkʼot ta pasel-a. Te Ajwalil stsabil yuʼun te Dios yananix slajin ta jkʼaxel-a te wiʼnale, te chamele, te tulan yikʼal jaʼale, te chopol espirituetik soknix te lajele. Jich chikan ta ilel te jaʼ te Jehová yakʼojbey yuʼel te Xnichʼan yuʼun jich ya xjuʼ yuʼun spasel ini.

(Lokʼem ta sjun Mateo, Marcos, Lucas sok Juan.)