Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te Biblia sok te bin ya xchole

 JXAJTʼ 22

Te jpuk kʼopetik ma xiw yoʼtanik ta xcholel te skʼop Dios

Te jpuk kʼopetik ma xiw yoʼtanik ta xcholel te skʼop Dios

Manchukme tal tulan nutsel ta stojol te jnopojeletik yuʼun te Cristo, jaʼukmeto esmajik ta oranax

AYIX slajunebal kʼajkʼal smoel bael ta chʼulchan-a te Jesuse, ta yaʼbilal 33 aywan ciento veinte ta jtul jnopojeletik te stsoboj sbaik ta jun na ta Jerusalén te jaʼ yakalik ta spasel te kʼin Pentecostés yuʼun te judioetike. Ta oranax ay bin chiknaj ta aʼiyel jich bitʼil tulan ikʼ, jich te jnopojeletik jajchik ta kʼop ta yantik kʼopetik te ma jaʼuk skʼopike. ¿Bin-a te yak ta kʼoel ta pasele? Jaʼ te bitʼil akʼbotik te chʼul espíritu yuʼun Dios ta stojolike.

Ay bayal te machʼatik talemik ta ulaʼtaywanej ta Jerusalén te talemik ta yanyantik nación ta spasel te kʼine. Chamnax la yaʼiyik te kʼalal te jnopojeletik yuʼun te Jesús jajchik ta kʼop ta skʼopiknix te ants winiketike. Te Pedro la xcholbey skʼoplal te bin kʼot ta pasele, la sjultesbey ta yoʼtanik te bin albil jilel yuʼun te j-alwanej Joel ta swenta te bitʼil te Dios ya smal te xchʼul espíritu ta stojol te j-abatetik yuʼune, sok te jich ya xjuʼ spasik chajp aʼteliletik (Joel 2:28, 29). Te milagroetik ini, jamal la yakʼ ta ilel te jaʼikix te jnopojeletik yuʼun te Cristoe, te ma jaʼukikix te nación yuʼun Israel te yichʼojik-a te bendición yuʼun te Diose. Jich yuʼun, te machʼatik ya skʼan x-abatinik ta stojol te Dios ya skʼan te yakuk stʼunik te Cristoe.

Jaʼukmeto, te skontratak te Jesús jajch snutsik te jnopojeletike. Jun buelta la yichʼik chukel chaʼoxtul jnopojeletik, jaʼukmeto, tal jtul chʼul abat ta ajkʼabal te la skoltay lokʼel sok albotik ta mantal yuʼun te manchuk ya skom sbaik ta xcholel te skʼop Diose. Kʼalal sakub te kʼinale, ochik bael ta templo te jnopojeletik, tey jajch yalbeyik skʼoplal-a te Jesuse. Kʼax ilinik te jwolwanejetik yuʼun te religión te la yalik mantal te akʼa yijkʼitayik ta xcholel te skʼop Diose. Jaʼukmeto, te jpuk kʼopetik ma xiw yoʼtanik melel jich la sutik: «Jaʼ bayal xan skʼoplal te ya jchʼuumbeytik smandar Dios te bin utʼil te smandar winiketike» (Hechos 5:28, 29).

Ipajxan te nutsele. Ay chaʼoxtul judioetik te la slebeyik smul te jnopojel Esteban kʼalal la yalik te jaʼla yak ta sbolkʼoptayel te Dios jich yuʼun la xchʼojik ta ton. Te machʼatik la yilik te la yichʼ milel te Esteban tey ay euk-a te Saulo te talem ta Tarso te jaʼ jtul winik te kʼax ay slab yoʼtan ta swenta te machʼatik stʼunojik te Cristoe. Ta patil te kʼalal kʼot ta pasel ini, te Saulo bajtʼ ta Damasco yuʼun kʼan bajtʼ stsak tal spisil te machʼatik stʼunojik te Cristoe. Te kʼalal yak ta bael ta be-ae chiknaj tal xojobil kʼinal ta chʼulchan te makbot sit yuʼune. La yaʼiy te ay machʼa kʼopoj tal te jich albot yuʼune: «Saulo, Saulo, ¿bin yuʼun te yak akontraimbelon? Ma snaʼix-a te bitʼil ay te Sauloe, jich yuʼun la sjojkʼoy: ¿Machʼaat-a, Kajwal? Jich sutbot yuʼun: Joʼon Jesuson» (Hechos 9:3-5).

Ta patil te kʼalal kʼaxemix oxeb kʼajkʼal-ae, te Jesús la stikun bael jtul jnopojel te Ananías sbiil yuʼun jaʼ ya sjambey te site. Te Saulo la yichʼ jaʼ, jich jajch ta xcholel skʼop Dios sok yip yoʼtan. Ta patil la yichʼ naʼbeyel sba jich bitʼil te jpuk kʼop Pablo te Sauloe, te maba lujb ta beel ta bayuk ta xcholbeyel skʼoplal te Cristoe.

Ta xjajchibal te jnopojeletik jaʼnax ya xcholbeyik yaʼiy ta swenta te Ajwalinel yuʼun Dios te judioetik sok te samaritanoetike. Jaʼukmeto, ta jun buelta jtul chʼul abat chiknaj ta stojol te Cornelioe, te jaʼ jtul soldado yuʼun Roma te xchʼuunej te smelelil Diose. Te chʼul abat ini la yakʼ ta ikʼel tal te jpuk kʼop Pedro, jich kʼot sok yantik jnopojeletik, la xcholbeyik yaʼiy skʼop Dios te Cornelio sok te machʼatik ay yuʼun ta snae. Te kʼalal yakto ta kʼop-a te jpuk kʼop Pedroe, te Cornelio sok te machʼatik ay yuʼun la yichʼik te chʼul espíritu, jich te Pedro la yal mantal te akʼa yichʼik jaʼ ta swenta sbiil te Jesuse. Tey la sta yorail-a te jam te be yuʼun te kuxlejalil ta sbajtʼel kʼinal ta swenta spisil ants winiketik ta yanyantik nación. Jich te jtsojb jchʼuunjeletike, chapal ayik ta xcholel te lek yachʼil kʼop ta swolol Balumilal.

(Lokʼem ta Hechos 1:1–11:21.)