Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Te Biblia sok te bin ya xchole

 JXAJTʼ 15

Jtul j-alwanej te lokʼesbil ta slumal la yil te bin yato xkʼot ta pasel

Jtul j-alwanej te lokʼesbil ta slumal la yil te bin yato xkʼot ta pasel

Te Daniel la stsʼibaybey skʼoplal ta swenta te Ajwalinel yuʼun Dios sok te bitʼil ya xjul te Mesías. La yichʼ uʼuninel te Babilonia

TE Daniel te jaʼ jtul israel jchʼiel kerem te jun yoʼtan ta stojol Dios, la yikʼik bael ta chukel ta Babilonia. Te Daniel sok te yantik judioetik akʼotik ta libre jtebuk manchukme chukulik ta Babilonia. Te Daniel jokinot yuʼun Dios spisil ora te jayeb jaʼbil kuxin ta Babiloniae. Jaʼnix jich, koltayot yuʼun Dios te kʼalal la yichʼ chʼojel ochel ta yutil xchʼen chojetik sok akʼbot yil te bintik yato xkʼot ta pasele. Te Bintik tulan skʼoplal la stʼsibay jilel te Daniel jaʼ ta swenta te Mesías sok te Ajwalinel yuʼune.

Te bin ora ya xjul te Mesías. ¿Bin ora ya skʼan smaliyik te lum yuʼun Dios te ya xjul te «Mesías te Jwolwanej», o te Jnitawale? Te Daniel la yichʼ cholbeyel te kʼalal ya yichʼ alel mantal te ya xchaʼyichʼ pasel te tsʼajkʼetik yuʼun Jerusalén, teyme ya xjajch ta ajtayel-a te 69 semana te jaʼbil kʼoeme. Jich bitʼil te jun semana yichʼoj jukeb kʼajkʼal, jich yuʼun te jun semana te ya yalbey skʼoplal te Biblia jich kʼoem te bitʼil jukeb jaʼbile. Ta yaʼbilal 455 te kʼalal mato jaʼuk te jkʼajkʼaleltike, la yichʼ alel ta mantal te ya xchaʼyichʼ pasel te Jerusalén, jaʼ ini, kʼot ta pasel te kʼalal maba kuxulix-a te Daniele. Teme teyto ya xjajch kajtaytik-a te 69 «semana», te yichʼoj 483 jaʼbil kʼoeme, ya xkʼot ta lokʼel ta jaʼbil 29 ta jkʼajkʼaleltik. Jich yuʼun ¿bin kʼot ta pasel? Yatome kiltik bael ta patil. Jaʼnix jich te Daniel akʼbot snaʼ ta swenta te Mesías te «ya yichʼ milel», yuʼun jich ya stojbey smul te ants winiketike (Daniel 9:24-26).

Te Mesías ya x-och ta Ajwalil ta chʼulchan. Chajpnax te bin akʼbot yil te Daniele, la yil te ay «machʼa pajal sok jtul xnichʼan winik», te jaʼ te Mesiase, te yak ta noptsajel bael ta smukʼul juktajib te Diose. Jich yuʼun te Jehová la yakʼbey yaʼtel ta «kuentainwanej, akʼbot yutsilal sok te banti ya xkuentainwan» sbajtʼel kʼinal ma xlaj yaʼtel ta mantalteswanej. Ta patil ay bin akʼbotxan snaʼ te Daniel ta stojol te Ajwalinel yuʼun te Mesías, te bitʼil te Ajwalil yuʼun ya xmantalaj sok yantik ants winiketik te jaʼ te «machʼatik chʼultesbilik te jaʼ yuʼunik te Machʼa mero toyol ay» (Daniel 7:13, 14, 27).

Te Ajwalinel yuʼun Dios yame slajin spisil te ajwaliletik ta balumilal. Te Daniel akʼbot snaʼ yuʼun Dios te bin swentail te xwayich te Nabucodonosor te ajwalil yuʼun Babilionia te yak ta mel oʼtan yuʼune. La yil ta xwayich mukʼul lokʼomba te pasbil ta oro te sjole, te stan sok te skʼab pasbil ta plata, te xchʼujtʼ sok te yaʼ pasbil ta cobre, te yakan pasbil ta hierro, te snukʼ yakan, o yok pasbil ta hierro sok chikʼbil lum. Patil tojch talel jpʼij ton, jaʼ jul smajbey snukʼ yakan te lokʼomba jich la swuytiklambey. Te Daniel la xcholbey yaʼiy te ajwalil, te jaʼ skʼoplal Babilonia te sjol lokʼomba te pasbil ta oroe, te yantikxan koel sbakʼetal jaʼ skʼoplal yantik ajwaliletik te ya xchiknajik tal ta patile. Te Ajwalinel yuʼun Dios yame xjajch ta aʼtel te kʼalal yakalik ta mantalteswanej-a te slajibal ajwaliletik te jaʼ snukʼ yakan te lokʼomba te pasbil ta hierro sok chikʼbil lum, sok yame slajin spisil te ajwaliletik te ayik ta balumilal. Ta patil yame x-Ajwalin stukel ta sbajtʼel kʼinal ta swolol Balumilal (Daniel, capítulo 2).

Te Daniel lato yil te bitʼil la yichʼ lajinel te Babilonia. Jich te bitʼil yichʼoj albeyel skʼoplale, te ajwalil Ciro la yuʼunin te lume. Ta patil te kʼalal nopol ya xtsʼakajix-a te setenta jaʼbil te jochol jilel te lum Jerusalén, te judioetik chaʼsujtik bael ta slumalik. Te kʼalal la chaʼpasikxan te Jerusalén sok te kʼalal jajch xchaʼpasik te templo yuʼun Jehová, la yichʼik wentainel yuʼun ajwaliletik, sacerdoteetik sok j-alwanejetik. Jaʼukmeto ¿Bin kʼot ta pasel te kʼalal kʼax te 483 jaʼbil te albil skʼoplale?

(Lokʼem ta sjun Daniel.)