Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te Biblia sok te bin ya xchole

 JXAJTʼ 8

Te Dios la skoltay lokʼel te israeletik

Te Dios la skoltay lokʼel te israeletik

Te Josué la yikʼ bael te israeletik ta yuʼuninel te skʼinal Canaán. Te Jehová la yakʼ juecetik yuʼun ya xkoltaybot te lum yuʼun ta skʼab te skontratake

TE KʼALAL mato x-ochik ta Canaán-a te israeletike, te Jehová ay yalojix bayal ta cien jaʼbil-a te jaʼ ya yuʼunin te kʼinal te Abrahán sok te stsʼumbale. Jich yuʼun, te Josué la yikʼ bael te israeletik te nopol ya x-ochikix-a ta banti te Kʼinal Albil skʼoplal te ya yuʼuninike.

Te Dios la snop ta yoʼtan slajinel te cananeoetike, melel jmilawetik sok kʼax ilaytik sba te bin la spasike. Jich yuʼun te Jehová la yalbey mantal te israeletik te akʼa slajinik spisil te machʼatik ayik ta Canaán.

Jaʼukmeto, te kʼalal mato x-ochik ta Canaán te israeletike, te Josué la stikun bael cheb jtsajtaywanejetik ta yilel te kʼinale. Te winiketik ini ochik ta Jericó ta patil jilik ta sna jtul ants te Rahab sbiile. Manchukme snaʼoj te israel winiketik te machʼatik kʼotike, jaʼukmeto la snakʼ ta yutil sna. ¿Bin yuʼun te jich la spase? Jaʼ yuʼun te ay yaʼiyojbey skʼoplal te milagroetik spasoj te Jehová ta stojol te lum yuʼune, jich yuʼun la yakʼ xchʼuunel yoʼtan ta stojol te Diose. Te Rahab la skʼanbey te jtsajtaywanejetik te manchuk ya xmilotik yuʼun soknix te jayeb machʼatik ay yuʼun te kʼalal ya x-och yuʼuninik te kʼinale.

Ta patil te israeletik ochik ta Canaán sok kʼotik ta Jericó. Te Jehová la yakʼ jinuk koel te tsʼajkʼetik yuʼun Jericó, jich te ipal soldadoetik la slajinik ta jkʼaxel te lume, jaʼukmeto, te Rahab sok te machʼatik ay yuʼun kuxul jilik. Jich te Josué sok te soldadoetik yuʼune jalajik wakeb jaʼbil ta smakel te Kʼinal Albil skʼoplal yuʼun Dios te ya yuʼuninike. Ta patil te kʼinal te la smakike la yichʼ pukbeyel ta jujun chajp te stsʼumbal Israel.

Te kʼalal nopol ya xlajix-a te yaʼtel te Josué la tsob spisil te nación yuʼun Israel. La yalbey te akʼa juluk ta yoʼtanik te bin la spas te Jehová ta swenta te namey kʼinal smeʼstatik sok la yalbey te junuk yoʼtan yakuk yakʼ sbaike. Jaʼukmeto, te kʼalal laj bael te Josué sok te sjoʼtake, te israeletik la yijkʼitayik xchʼuunel te Jehová, jich jajch xchʼuunik te lotil diosetike. Bayal buelta te israeletik ma la xchuunbeyik smantal te Dios jich jalajik trescientos jaʼbil ta spasel. Te kʼalal jich la spasike, te Jehová la yakʼtiklan ta kʼabal ta stojol te filisteoetik sok ta skʼab yantikxan skontratakik. Jaʼukmeto, te kʼalal la skʼanik koltayel te israeletike, tikunbotik ta stojolik jtul jkoltaywanej yuʼun te Jehová. Lajchayeb ta jtul jkoltaywanejetik la stsa te Jehová te la sbiilinik juecetik.

Ta sjun Jueces ya xcholbey skʼoplal te xkuxlejalik te jkoltaywanejetike, ta sbabial jaʼ ya xcholbey skʼoplal te juez Otniel sok ta slajibal ya xcholbey skʼoplal te jtul winik te kʼax bayal yip ayin ta Balumilal te juez Sansón. Te bintik ya xchol ta sjun Jueces, ay bin bayal skʼoplal ya yakʼ ta nopel, teme ya jchʼuunbeytik smantal te Jehovae, jichme lek ya xkʼootik ta lokʼel yuʼun, yan teme maʼuke yame jtatik jwokoltik yuʼun.

(Lokʼem ta sjun Josué, Jueces sok Levítico 18:24, 25.)