Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Te Biblia sok te bin ya xchole

 JXAJTʼ 9

Te Ium Israel ya skʼan jtul ajwalil

Te Ium Israel ya skʼan jtul ajwalil

Te Saúl te sbabial ajwalil yuʼun Israel, la xkʼaxuntaybey smantal te Jehová. Te Dios la xchap skʼop sok te David te jaʼ la sjelolin te Saule, sok la yalbey ta jamal te maʼyuk bin ora ya xlaj ta mantalteswanej

TE KʼALAL lajix bael-a te Sansón, kuxin ta Israel jtul winik te yichʼoj yaʼtel ta juez sok ta j-alwanej te Samuel sbiile. Te israeletik jkʼaxel la skʼan skʼayinbeyik stalel te yantik nacionetik kʼalal la yalbeyik te Samuel te yala skʼanik jtul ajwalil. Te Jehová ma la smulan te bin la skʼanik te israeletik, jaʼukmeto la xchʼuun sok la yalbey ta mantal te Samuel te akʼa yotses ta ajwalil te Saule. Te winik ini pekʼel yoʼtan-a, jaʼukmeto ta patil jajch stoy sba sok la xkʼaxuntaybey smantal te Diose. Jich yuʼun te Jehová la spʼaj te ajwalil Saúl sok la yalbey ta mantal te Samuel te jaʼuk ya sjelolin te jchʼiel kerem David. Jaʼukmeto yame skʼan xkʼax bayal jaʼbil yuʼun jich ya x-och ta ajwalil-a.

Ay jun buelta te David bajtʼ yulaʼtay te sbankiltake, te jaʼ ochemik ta soldadoetik yuʼun-a te Saúl te ayik ta guerra. Te kʼalal kʼot te David la yil te yakalik ta nijkʼel yuʼun xiwel te soldadoetike. ¿Bin yuʼun? Jaʼ yuʼun te ay jtul mukʼul jtsalaw soldado te Goliat sbiil te yak ta slabanel te soldadoetik yuʼun Israel soknix te Jehová. Tal bayal slab yoʼtan te David jich yuʼun la skʼan stsak sba sok te Goliate, manchukme jchiʼel keremto stukel-a. Jaʼnax yichʼoj ta skʼab te sjimochʼ sok chaʼoxpʼij tonetik, jich lokʼ ta stael te mukʼul winik te aywan oxeb metro snajtʼile. Jich bitʼil te labanwan te Goliat, te David la yalbey te ya xba stsak sba sok ta swenta sbiil te Jehovae. Jpʼijnax ton la stuuntes te David ta smilel te Goliate. Ta patil la stsakbey lokʼel te espada yuʼun sok la sbojbey lokʼel sjol. Te kʼalal la yilik te yantik soldado filisteoetike, lokʼik bael ta anel yuʼun xiwel.

Chamnax la yaʼiy te ajwalil Saúl te bitʼil ma xiw yoʼtan te David, jich yuʼun la yakʼbey mukʼ yaʼtel ta soldado. Jaʼukmeto, te kʼalal te ajwalil la yil te ya xjuʼ yuʼun tsalaw te Davide, tal sbikʼtal yoʼtan ta stojol te yoʼtanuk kʼan smile. Lokʼ bael ta anel te David yuʼun jich ma xyichʼ milel-a. Manchukme kʼax bayal jaʼbil te la snakʼ sba ta bayuknax te David maʼyuk bin ora la stoy sba ta stojol te Saule. ¿Bin yuʼun te jich la spase? Melel snaʼoj te jaʼ te Jehová te yakʼojbey yaʼtel ta ajwalil te Saúl. Kʼalal kʼax bael te kʼajkʼale ay ta guerra-a te laj te Saule. Jich och ta yachʼil ajwalil te Davide, jich bitʼil yaloj te Jehová.

«Joʼon ya kakʼbey yichʼ yip sbajtʼel kʼinal te sjuktajib te ban kʼalal skuentainej.» (2 Samuel 7:13)

Te David kʼan spasbey jun templo yuʼun te Jehová. Jaʼukmeto, albot yuʼun te Dios te jaʼ ay ta swenta jtul stsʼumbal te machʼa ya spas te temploe, jaʼ ini kʼot ta stojol te Salomón te jaʼnix xnichʼane. Manchukme ma akʼbot spas te temploe, jaʼukmeto, te David ay bin lek akʼbotxan stukel. Te Jehová la yalbey te David te jaʼ ta swenta stsʼumbal ya xchiknaj tal yantik ajwaliletik te maʼyuk machʼa ya xpajot yuʼune. Tey chiknaj tal-a te Jkoltaywanej te albil skʼoplale, te jaʼ te Tsʼumbalil te yalojbey skʼoplal te Dios ta Edene. Te machʼa skʼoplal ini jaʼ te Mesías te Tsabil yuʼun Dios. Te Jehová la stsa te Mesías yuʼun ya yakʼ ta Ajwalil te ya xwentainwan ta sbajtʼel kʼinale.

Te bitʼil la yakʼ ta ilel te David te la yal bayal wokol ta stojol te Jehová jaʼ te kʼalal la stsob te bintik ya yichʼ tuuntesel swenta te ya yichʼ pasel te temploe, jaʼnix jich la stsob oro sok plata. Soknix ta swenta te chʼul espíritu akʼbot ta yoʼtan stsʼibayel salmoetik, o kʼayojetik te ya yalbey yutsil skʼoplal te Jehová. Te kʼalal mato xlaj-a te Davide la yalbey yutsil skʼoplal Jehová yuʼun spisil te bintik juʼ yuʼun spasele: «Te espíritu yuʼun Jehová kʼopoj ta jwenta, ay ta ke te skʼope» (2 Samuel 23:2).

(Lokʼem ta 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 sok Juan 7:42.)

Naʼbeyaxan skʼoplal

Lekil ajwaliletik sok chopol ajwaliletik

¿Bin yuʼun te la xat sba te Israele, sok bin kʼot ta swenta te chaʼchajp ajwaliletike?