Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Te Biblia sok te bin ya xchole

 JXAJTʼ 13

Lekil ajwaliletik sok chopol ajwaliletik

Lekil ajwaliletik sok chopol ajwaliletik

Te nación yuʼun Israel la xat sba, sok ay bayal te ajwaliletik yuʼune maba jun yoʼtan la yakʼ sbaik ta stojol te Jehová. Te babilonioetik la slajinik te Jerusalén

MATO jaluk yijkʼitaybel xchʼuunel Jehová-a te Salomone, te nación yuʼun Israel la xat sba, jich kʼot ta pasel te bitʼil albil skʼoplal yuʼun te Jehovae. Te kʼalal och ta ajwalil te Rehoboam te xnichʼan Salomón, tulan yoʼtan la yakʼ sba ta swenta te lume, jich yuʼun te lajun chajp xnichʼnab Israel te ayik ta norte la stukeltay sbaik. Yan stukel te chaʼchajp xnichʼnab Israel te jun yoʼtan la yakʼ sbaik ta banti mantalteswan te David ta Jerusalene, jilik ta sur yuʼun Judá.

Ta skaj te bitʼil la xkʼaxuntayik mantal sok te ma la yakʼ xchʼuunel yoʼtanik te chaʼchajp ajwaliletik yuʼun te Israel, maba jal la smulanik te lamal kʼinal sok te skʼulejalike. Jaʼukmeto, te machʼatik la spasik te bin kʼax chopole, jaʼ te machʼatik ayik ta banti norte yuʼun te Israele, melel ta xjajchibalto tal te ajwaliletik yuʼun la xjachik te lotil religión. Manchukme te Dios la stikun j-alwanejketik, jich bitʼil te Elías sok te Eliseo te jaʼik te ay machʼatik la xchaʼkuxajtesike, mananix jaʼuk la xchʼuunik yuʼun-a. Jich yuʼun, te Diose la yakʼ ta kʼabal te Israel ta stojol te Asiriae.

Ta patil, te kʼalal ay kʼaxemix ta cien jaʼbil-ae, te machʼatik ayik ta sur yuʼun Judá jaʼnix jich la yichʼik castigo yuʼun te Diose. Manchukme la yichʼik jultesbeyel yoʼtanik yuʼun j-alwanejetik te ajwaliletike, jaʼukmeto, chaʼoxtulnax te machʼatik la yichʼik ta mukʼ te bin la yichʼik albeyel jich kʼan stojobtesik te lume. Jich bitʼil te ajwalil Josías la yakʼ ta yoʼtan slajinel te yichʼel ta mukʼ te lokʼombaetik sok jajch xchaʼpasxan ta lek te templo yuʼun te Jehová. Te kʼalal yakalik ta aʼtel-ae la staik te libro te banti ay te Ley yuʼun Moisés. Jich te Josías tijbotxan yoʼtan yuʼun ta yakʼbeyel yipal slajinel te lokʼombaetike.

Mel oʼtantik sba, melel te yantik te machʼatik la sjelolin te Josías ma jichuk aʼtej stukelik. Jich yuʼun te Jehová la yakʼ ta kʼabal ta stojol babilonioetik te Judá, jich la yichʼ lajinel te Jerusalén sok te templo yuʼune. Te machʼatik kuxul jilik la yichʼik ikʼel bael ta Babilonia, soknix te Dios la yal, te ya xkʼax setenta jaʼbil, ta patil ya xchaʼsujtik tal ta slumalik. Te lum Judá jich jil te bitʼil jochol takin kʼinal.

Maʼyuk jtuluk stsʼumbal David ya xjuʼ x-och ta ajwalil, jaʼto te kʼalal ya xtal te Ajwalil te albil jilel skʼoplale, jaʼ te Mesías. Jteb ma spisiluk te ajwaliletik te chiknajik tal ta stsʼumbal te David la yakʼik ta ilel te bitʼil te ants winiketik maʼyuk spʼijilik yuʼun ya spasawanik ta mantal. Melel, jaʼnax chapal stukel te Mesiase. Jich yuʼun, te Jehová la yalbey te slajibal ajwalil yuʼun te stsʼumbal te David: «Te corona [...]ma jichuk ya xkʼot ta pasel jaʼto kʼalal ya xtal te machʼa jaʼnix ay ta skuenta, joʼon ya kakʼbey ta skʼab» (Ezequiel 21:26, 27).

(Lokʼem tal 1 Reyes, 2 Reyes, 2 Crónicas ta capítulo 10 kʼalal ta 36 sok Jeremías 25:8-11.)