Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te Biblia sok te bin ya xchole

 JXAJTʼ 2

Chʼay te Nichimal Kʼinal

Chʼay te Nichimal Kʼinal

Jtul chʼul abat te ma la xchʼuun mantal la yakʼbey xkʼaxuntay smantal Dios te Adán sok te Evae, jich och te mulil sok te lajele

TE KʼALAL mato ayuk-a te ants winiketike, te Dios la spas te chʼul abatetik, te jaʼ espirituetik te ma xjuʼ ta ilele. Ay jtul chʼul abat te la xkʼaxuntaybey smantal te Dios sok la sloʼlay te Eva te yakuk sloʼbey sit te teʼ te yaloj te Dios te ma xjuʼ ta pikele. Ta patil te chʼul abat ini la sbiilin Satanás o Pukuj.

Te Satanás la stuuntes jkojt chan yuʼun jich kʼopoj sok te Eva sok la yalbey te ayla bin lek yakik ta mukbeyel ta stojolik yuʼun te Diose. Jaʼnix jich la yalbey teme yala sloʼbeyik sit te teʼe mala xlajik yuʼun, jich la skʼan yakʼ ta naʼel te yakik ta lotiyel yuʼun te Diose. Te Pukuj kʼax tʼujbilnax te bin utʼil la yalbey te Adán sok te Eva teme yala xkʼaxuntaybeyik smantal te Diose jichla ya staik pʼijil oʼtanil yuʼun sok jich yala xjuʼ spasik te bin ya skʼan yoʼtanike. Jaʼukmeto, lotil spisil te bin la yal te Pukuje: jaʼ sbabial lot te la yichʼ alel ta Balumilal. Te jloʼlaywanej ini jaʼ yak ta skontrainel te bin utʼil ya xmantalaj te mukʼ Ajwalile, teme toj te mantaliletik yuʼune sok teme lek ta chʼuunele.

Te Eva la xchʼuun te loʼlayele. Jajch ta bikʼtajel yoʼtan yuʼun te sit te teʼe, jich la skʼok sloʼ sok la yakʼbey sloʼ euk te smamlale. Manchukme maʼyuk skʼoplal yilel te la xkʼaxuntayik te mantale, jaʼukmeto, tulan mulil te bin la spasike. Snaʼojik te ma lek te bin la spasike: ma la skʼan xchʼuunik te wentainel yuʼun te Jpaswanej yuʼunik te machʼa akʼbotik spisil te bin ay yuʼunike soknix te stojil xkuxlejalike.

«Jaʼ ya yejchentesbat ajol, yan te jaʼate yitnax yok yak awejchentesbey stukel.» (Génesis 3:15)

Te Dios la yalbey te jkʼaxuntayej mantaletik te bin ya xkʼot ta pasel ta swenta te bin la spasike. Ta sbabial la yalbey skʼoplal te ay machʼa ya stikun tal –jaʼ te Tsʼumbalil te albil skʼoplal- te ya slajin te chane, te jaʼ te Satanase. Ta patil la yal te yananix xlajik-a te Adán sok te Evae. Jaʼukmeto, la snaʼbey yoʼbolil sba te yal xnichʼnab te ya staike, jich yuʼun te Dios maba la yakʼ lajukik ta ora te Adán sok te Evae. ¿Bin ya xjuʼ smaliyik te yal xnichʼnab te Adane? Te Jehová la yal te machʼa ya stikun tale jaʼ ya slajin spisil te wokolil te jajch ta Edén ta skaj te la yichʼ kʼaxuntayel te mantale. Jaʼukmeto ¿machʼa-a te Jkoltaywanej ini sok bin utʼil ya yakʼ kʼotuk ta pasel te skʼanojel yoʼtan te Dios te bitʼil ya xtikunot tal yuʼune? Kʼalal yaktal ta tsʼibayel-a te Bibliae kʼunkʼun kaj ta naʼbeyel te sujtʼib te jojkʼoyel ini.

Ta patil te Dios la sten lokʼel ta Nichimal kʼinal te Adán sok te Evae. Te kʼalal maba ayikix ta nichimal kʼinal-ae, jajchik ta tulan aʼtel yuʼun te bitʼil ya xkuxinike. Tey abi te Evae ayin te sba yale, te Caín sbiile. Kʼax te kʼajkʼale te Adán sok te Eva la staikxan yantik yal xnichʼnabik, jich bitʼil te Abel soknix te Set te jaʼ kʼot ta antiguo smeʼstat te Noé.

(Lokʼem ta capítulo 3 kʼalal ta 5 yuʼun Génesis sok Apocalipsis 12:9.)