Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 52

Te Gedeón sok te 300 ta jtul winiketik yuʼun

Te Gedeón sok te 300 ta jtul winiketik yuʼun

¿YABAL awil te bin yak ta kʼoel ta pasel liʼ ini? Jaʼik te winiketik yuʼun guerra ta Israel. Te machʼatik ya awil te nijatike yakalik ta yuchʼel jaʼ. Te machʼa tekʼel ta stsʼeelike jaʼ te juez Gedeón te yak ta yilel bin utʼil ya yuchʼik jaʼ te winiketike.

Ilawil ta lek te bitʼil ma pajaluk yakalik ta yuchʼel jaʼ te winiketike. Ay chaʼoxtul te machʼatik ya spajkan sbaik ta jkʼaxel ta tiʼ jaʼ. Jaʼukmeto ay jtul te machʼa ya slochʼ moel ta skʼab te jaʼe, yuʼun jich ya xjuʼ ya yil-a te bin ya xkʼax ta sjoyobale. Jaʼ ini kʼax bayal skʼoplal, melel te Jehová la yalbey te Gedeón te akʼa stsa te machʼatik ya yilik kʼinal te kʼalal ya yuchʼik jaʼe. Te yantike yame sujtik bael ta snaik. Yame kiltik bin yuʼun.

Ay bayal swokolik yan buelta te israeletike, jaʼ yuʼun te ma la schʼuumbeyik smantal te Jehovae. Jaʼ kʼax bayalikxan te madianetike, la yutsʼinik te israeletike. Jich yuʼun te israeletik la skʼambeyik koltayel te Jehová, jich koltayotik yuʼun.

Te Jehová la yalbey te Gedeón te akʼa stsa soldadoetik, jich yuʼun te Gedeone la stsob 32,000 ta jtul winiketik yuʼun ya xbajtʼ yakʼik guerra sok te 135,000 ta jtul soldadoetik te skontratakike. Jaʼukmeto te Jehová la yalbey te Gedeón: Kʼax bayal ta jtul te winiketik awikʼoje. ¿Bin yuʼun te jich la yale?

Jaʼ yuʼun teme juʼ yuʼunik tsalaw ta guerra te israeletike, yaniwan skuyik te juʼ yuʼunik ta stukeliknaxe, sok te maniwan puersauk ya yichʼik koltayel yuʼun te Jehová. Jich yuʼun te Jehová la yalbey te Gedeón: Albeya spisil te machʼatik ya xiwike akʼa sujtukik bael ta snaik. Te kʼalal jich la spas te Gedeón 22,000 ta jtul winiketik sujtik bael. Jaʼnax jilik 10,000 ta jtul winiketik ta yakʼbeyel guerra te 135,000 ta jtul skontratakike.

Jaʼukmeto, ¡ilawil! te Jehová jich la yal: Kʼax bayalto te winiketik awikʼoje. Jaʼ yuʼun te Jehová la yalbey te Gedeón te akʼa yuchʼik jaʼ te winiketik ta banti yak ta okinel te jaʼe, sok te akʼa stikun bael ta snaik te machʼatik ya spajkan sbaik ta yuchʼel te jaʼe. Jaʼnix jich te Jehová la yal: Yame kakʼ yaʼiy tsalaw te 300 ta jtul winiketik te la yilik kʼinal te kʼalal yakalik ta yuchʼel jaʼ-ae.

Kʼot yorail te la yakʼik guerrae. Te Gedeón la yakʼ ta oxchajp te 300 ta jtul winiketik yuʼune. La yakʼtiklambey xulubil ta jujuntul sok jochol kʼibetik te yak ta tilel kʼajkʼ ta yutile. Te kʼalal nopolix-a te olil ajkʼabale, la stsob sbaik ta spisilik ta sjoyobal te skontratakike. Jich ta yoxchajpalik pajal la yokʼesinik te xulubiletike, pajal la stopʼik te kʼibetike, sok awunik: ¡Ta swenta te espada yuʼun Jehová sok Gedeón! Te kʼalal wijkʼ sitik te soldadoetike, ma snaʼikix te banti ya xbajtʼike sok xiwik yuʼun, spisil lokʼik bael ta anel, jich juʼ yuʼunik tsalaw te israeletike.

Jueces, capítulo 6 kʼalalto ta 8.