Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 39

Nichimaj snabateʼ te Aarone

Nichimaj snabateʼ te Aarone

ILAWIL te nichimetik sok te almendra te kʼanubenike chʼi tal ta banti te nabateʼ o ta teʼ. Jaʼ ini jaʼ snabateʼ te Aarone. ¡Te nichimetik ini sok te sit almendra te kʼanubenike ta junax ajkʼabal chʼiik tal! Kiltik bin yuʼun te jich kʼot ta pasele.

Te israeletik jalajemikix ta beel ta bayuknax ta jochol takin kʼinal. Ay machʼatik te ma skʼanik te jaʼ ya xwolawan te Moisese, soknix ma skʼanik te jaʼ ay ta mukʼul sacerdote te Aarone. Te machʼa jich ya snope jaʼ te Coré, jaʼnix jich te Datán, te Abiram soknix te 250 ta jtul winiketik te ay yaʼtelik yuʼun te lume. Ta spisilik ini talik ta stojol te Moisés, jich la yalbeyik: ¿Bin yuʼun te ya atoy aba ta jtojolkotike?

Te Moisés la yalbey te Coré soknix te machʼatik tʼumbilik yuʼune: Ta sab pajel yame awichʼik tal te schikʼojibal pom sok yame awakʼbeyik spomil. Ta patil yame xtalex ta Nailpakʼ templo yuʼun te Jehová. Yame kiltik machʼa ya stsa stukel.

Ta yan kʼajkʼal te Coré sok te 250 ta jtul te machʼatik tʼunotik yuʼune bajtʼik ta Nailpakʼ templo. Sok ay yantik te bayal bajtʼik ta koltayel yuʼune. Te Jehová kʼax ilin yuʼun. Lokʼanik bael ta stojol te snailpakʼik te chopol winiketik ini, xchi te Moisese. Ma xapikbeyik te bintik ay yuʼunike. Te ants winiketike la schʼuunik, jich la skʼej sbaik lokʼel ta snailpakʼik te Coré, Datán sok te Abiram.

Jich la yal te Moisese: Ta swenta ini jichme ya anaʼik-a te machʼa ya stsa te Jehová. Yame sjam sba te lume. Ya sbikʼtiklan koel te chopol winiketik ini.

Te kʼalal lajnax yoʼtan ta kʼop-a te Moisese, la sjam sba te lume. Te snailpakʼik sok te bintik ay yuʼunik te Coré, Datán sok te Abiram soknix spisil te machʼatik jokimbilik yuʼune chʼayik koel ta yutil lum, jich la smak sba te lume. Te kʼalal te ants winiketik la yaʼiybeyik yaw te machʼatik yakalik ta bikʼel koel yuʼun te lume, jich jajchik ta aw yuʼun: ¡Animajukotik bael! ¡Yaniwan sbikʼotik bael euk te lume!

Te Coré sok te 250 ta jtul te machʼatik tʼunotik yuʼune nopolto yakʼoj sbaik ta Nailpakʼ templo. Jaʼ yuʼun te Jehová la yakʼ taluk kʼajkʼ, jich spisil kʼajkʼik. Jich te Jehová la yalbey te Eleazar te snichʼan Aarón te akʼa stsakbey schikʼojibal spomik te machʼatik lajikixe soknix te akʼa spas ta jayal takʼin swenta yuʼun ya yichʼ potsel-a te yawil chikʼbil majtʼanile. Te spojtsil yawil chikʼbil majtʼanil ini, ya xtuun ta swenta yakʼbeyel snaʼ te israeletik te bitʼil jaʼnax ya x-abatinik ta sacerdoteetik ta stojol Jehová te Aarón sok te snichʼnabe.

Jaʼukmeto te Jehová la yakʼxan ta naʼel ta lek te jaʼ stsaoj ta sacerdote te Aarón sok te snichʼnabe. Jaʼ yuʼun jich la yalbey te Moisese: Akʼa yichʼik tal snabateʼik te jujunchajp stsʼumbal Israel. Ta swenta te stsʼumbal Leví akʼa yichʼ tal snabateʼ te Aarón. Jich yuʼun te jujunchʼix nabateʼe yame awakʼ ta stojol skaxaul te chapbil kʼop te ay ta yutil te Nailpakʼ temploe. Te snabateʼ te machʼa jtsaoj ta sacerdotee yame yakʼ snich.

Ta yan kʼajkʼal te Moisés la yil ini, ¡ta snabateʼ te Aarón lokʼ tal snichimal sok almendra te kʼanubenike! ¿Kʼotbal ta awoʼtan bin yuʼun te Jehová la yakʼ nichimajuk te snabateʼ te Aarone?

Números 16:1-49; 17:1-11; 26:10.