Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 55

Jtul tut kerem te abatin ta stojol Dios

Jtul tut kerem te abatin ta stojol Dios

¿MELEL te tʼujbil ta ilel te tut kerem ini? Samuel te sbiile. Te winik te yak ta pikbeyel sjol yuʼune, jaʼ te Elí te mukʼul sacerdote yuʼun Israel. Te machʼatik la yikʼik bael ta stojol Elí te tut kereme, jaʼnix te smeʼ stat te Elcana (Elqaná) sok te Ana.

Aytonaxwan chaneb o joʼeb yaʼbilal te Samuele. Jaʼukmeto yame xnain ta Nailpakʼ templo yuʼun Jehová sok te Elí soknix yantikxan sacerdoteetik. ¿Binwan yuʼun te Elcana sok te Ana te la yikʼik bael te Samuel te kʼax tuto yuʼun ya x-abatin ta stojol Jehová ta Nailpakʼ templo? Ya kiltik bael te bin yuʼune.

Te kʼalal mato xkʼot ta pasel ini, kʼax ay ta mel oʼtan-a te Anae. Jaʼ ta swenta te bitʼil ma xjuʼ sta alale, yoʼtanuknax te yakuk sta jtuluk yale. Jich yuʼun, ta jun buelta-a te kʼalal bajtʼ ta Nailpakʼ templo tey la skʼopon-a te Jehovae: ¡Aay, Jehová, ma xachʼayon ta awoʼtan! Teme ya awakʼbon jtul jkerem al, jamal ya kalbat te ya kakʼbat ta atojole, jichme ya x-abatin ta atojol te jayeb kʼajkʼal kuxule.

Aʼiybot skʼop yuʼun Jehová te Anae. Jich ta patil ayin te Samuele. Kʼax kʼux la yaʼiy ta yoʼtan te Ana te alal yuʼune, jajch ta snojptesel ta swenta te Jehová te kʼalal kʼax tuto-ae. Jich la yalbey te smamlale: Jaʼto teme mukʼubix jtebuk-a te Samuele, te kʼalal maba ya skʼanix ilel kuʼun-ae, yame kikʼ bael ta Nailpakʼ templo, yuʼun tey ya x-abatin ta stojol te Jehovae.

Jich yakalik ta spasel te Ana sok te Elcana te bitʼil ya kiltik ta lokʼombae. Yuʼun te Samuele kʼax lek nojptesot yuʼun te smeʼ state, jich tseʼelnax yoʼtan yuʼun te ya x-abatin ta stojol Jehová ta Nailpakʼ templo. Ta jujun jaʼbil ya xbajtʼik te smeʼ stat ta yichʼel ta mukʼ te Jehová ta Nailpakʼ templo te kʼax mukʼ skʼoplale, soknix ta yulaʼtayel te tut kerem yuʼunike. Sok ta jujun jaʼbil te Anae ya yichʼ bael yachʼil kʼuʼul te maʼyuk skʼab te jaʼnix spasoj ta swenta te Samuele.

Kʼax bael te jaʼbile, yaknanix ta abatinel ta stojol Jehová-a te Samuele, lek ya x-ilot yuʼun te Diose soknix te lume. Yan te Ofni (Hofní) sok te Finees (Finehás) te snichʼnab te mukʼul sacerdotee, ma lekukik stukel, melel bayal bintik chopol ya spasik, soknix ya yakʼbeyik skʼaxuntay smantal Dios te yantike. Snujpʼ te yakuk slokʼeslan ta sacerdoteil te Elí, jaʼukmeto maba jich ya spas.

Te jchʼiel kerem Samuel ma xyijkʼitay sba ta spasbeyel yaʼtel te Jehová yuʼun te bintik chopol yak ta pasel ta Nailpakʼ temploe. Jaʼukmeto ayix ora te maʼyuk ya xkʼopoj sok jtul winik te Jehovae, yuʼun ma bayaluk te machʼatik kʼux ta yoʼtanik te Jehovae. Kʼalal chʼixan jtebuk te Samuele, kʼot ta pasel ini:

Wayal ta Nailpakʼ templo-a te Samuel kʼalal ay machʼa kʼopoj te tijbot swayel yuʼune. La sjakʼ te Samuele: Liʼ ayoni. Jajch ta ora sok bajtʼ te banti ay te Elí, jich la yal: La awikʼon tal, jaʼ yuʼun liʼ ayoni.

La sjakʼ te Elí: Maba la kikʼat tal; baan ta awayib. Jich yuʼun te Samuel chaʼbajtʼ ta swayib.

Ta patil ikʼot ta xchebal buelta: ¡Samuel! Jich jajch te Samuel chaʼbajtʼ te banti ay te Elí. La awikʼon tal, jaʼ yuʼun liʼ ayoni. Jaʼukmeto te Elí la sjakʼ: Maba la kikʼat tal, jnichʼan. Sujtan bael ta awayib. Jich yuʼun chaʼsujt bael ta swayib te Samuele.

¡Samuel!, xchi ta yoxebal buelta te machʼa yak ta kʼope. Jich yuʼun te Samuel bajtʼ ta animal te banti ay te Elí. Liʼ ayoni; jaʼat la awikʼon ta ora ini, xchi. Ta yorail-abi te Elí la snaʼix-a te jaʼ te Jehová te yak ta ikʼawe. Jaʼ yuʼun jich la yalbey te Samuele: Baan, wayanxan, teme ya schaʼyikʼate, jichme ya awalbey: Kʼopojan Jehová, ya kaʼiy stojol joʼon te awabatone.

Jaʼ yuʼun jich la yal te Samuel te kʼalal kʼopoj yan buelta te Jehovae. Jich yuʼun te Jehová la yalbey te Samuel te ya yichʼik castigo te Elí sok te chaʼtul snichʼnabe. Ta patil lajik bael te Ofni sok te Finees kʼalal yakalik ta yakʼbeyel guerra-a te filisteoetike, jich yuʼun kʼalal te Elí la yaʼibey skʼoplal te bin kʼot ta pasele, jawtsʼuj bael la swakʼ snukʼ jich laj yuʼun. Jich kʼot ta pasel te bin yaloj te Jehová.

Mukʼub te Samuele, kʼot ta slajibal juez yuʼun Israel. Kʼalal mamalix-ae, jich albot yuʼun te lume: Lea jtul ajwalil yuʼun ya swentainonkotik. Ma la skʼan te Samuele, melel jaʼ ajwalil yuʼunik te Jehovae. Jaʼukmeto te Jehová la yalbey te Samuel te akʼa schʼuun te bin ya yal te lume.

1 Samuel 1:1-28; 2:11-36; 3:1-18; 4:16-18; 8:4-9.

Naʼbeyaxan skʼoplal

Te Samuel spisil ora la spas te bin ya smulan te Jehová

Te Samuel spisil ora jaʼ la spas te bintik lek ya yil te Jehovae, manchukme chopol te bintik la spasik te yantike. ¿Bin utʼil ya xjuʼ ya jtʼumbeytik te stalele?