Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 51

Te Rut sok te Noemí

Te Rut sok te Noemí

TA Biblia yame ata jpajk libro te sbiilinej Rut. Jaʼ ya yalbey skʼoplal te bin kʼot ta pasel ta namey ta swenta jwol na te kuxin ta yorail-a te kʼalal ay juecetik ta Israel. Te Rut jaʼ jtul ants te talem ta skʼinal Moab, ma jaʼuk slumal te Israel te lum yuʼun te Diose. Jaʼukmeto kʼalal te Rut la snop ta swenta te smelelil Dios Jehová, kʼux la yaʼiy ta yoʼtan. Te Noemí jaʼ jtul ants te ayix bayal yaʼbilal stukel te jaʼ la skoltay te Rut ta snaʼbeyel sba te Jehovae.

Te Noemí j-israel ants stukel. Te kʼalal ayin wiʼnal ta Israel te Noemí sok te smamlal soknix te chaʼtul skerem al bajtʼik ta nainel ta skʼinal Moab. Te kʼalal kʼax bael te kʼajkʼale laj smamlal te Noemie. Ta patil te chaʼtul keremetik yuʼune nujpunik sok chaʼtul moab antsetik Rut sbiil te jtule sok Orfa (Orpá) te yane. Jteb ma sta lajuneb jaʼbil ta patil lajik bael te chaʼtul keremetik yuʼun te Noemie. ¡Kʼax mel oʼtantik sba! ¿Binwan ya spasix-a te Noemie?

Ta jun buelta te Noemí la snop te ya sujt bael ta slumal te kʼax namal te sbelale. Te Rut sok te Orfa la skʼan sjokinik te Noemie jich yuʼun la stʼunik bael. Jaʼukmeto te kʼalal ayix kʼajkʼal-a te yakalik ta beele. Te Noemí jich la yalbey te chaʼtul yalibe: Sujtanik bael ta sna te ameʼike.

Te Noemí la yujtsʼiy jilel te chaʼtul yalibe. Te Rut sok te Orfa jajchik ta okʼel, yuʼun kʼax kʼux ta yoʼtanik te Noemie. Jich la yalik: ¡Maʼuk! Yame jokinatkotik bael ta alumal. Te Noemí jich la yal: Sujtanik bael kantsil alatak. Jaʼ lek ayex-a teme jaʼ ya xbaex sok te machʼatik ay awuʼunike. Jich yuʼun te Orfa sujt bael ta slumal. Yan stukel te Rute ma la skʼan bajtʼ.

Te Noemí jich la schaʼyalbey te Rute: Te Orfa sujtix bael stukel. Jokina bael. Jaʼukmeto te Rute jich la yal: Ma xawalbon te ya kijkʼitayate akʼa jokinat bael, yuʼun te banti ya xbaate tey ya xboon-a, sok te banti ya xnainate tey ya xnainon-a. Jaʼ jlumal ya xkʼot te alumale sok jaʼ Dios kuʼun ya xkʼot te Dios awuʼune. Te banti ya xlajate tey ya xlajon-a sok tey ya kichʼ mukel-a. Te kʼalal jich la yal te Rute, te Noemí maʼyuk bin la yalbeyix yuʼun–a.

La sta yorail te kʼotik ta Israel te chaʼtul antsetike. Tey nainik-a. Ta oranax jajch ta aʼtel te Rute, melel jaʼ yorail te yak ta lokʼel-a te cebadae. Ay jtul winik te Booz (Boaz) sbiil, te jaʼ la yakʼbey stsob cebada te Rut ta banti te skʼinale. ¿Yabal anaʼ machʼa-a te smeʼ te Booze? Jaʼ te Rahab te nain ta lum Jericó.

Ta jun buelta te Booz jich la yalbey te Rute: Kaʼiyoj spisil te bintik apasoje, sok te awakʼoj ta ilel yutsil awoʼtan ta stojol te Noemie. Ya jnaʼ te la awijkʼitay jilel te ameʼ atat sok alumal, te talat ta nainel ta kʼinal te maba anaʼojbey sbae. ¡Akʼa yakʼ ta ilel yutsil yoʼtan ta atojol te Jehovae!

Te Rut jich la yal: Kajwal, kʼax bayal yutsil awoʼtan ta jtojol la amukʼubtesbon kʼinal kaʼiy yuʼun te bintik la awalbone. Te Booz kʼax la smulambey stalel te Rute, jich yuʼun maba kʼax bayal kʼajkʼal te nujpunike. ¡Kʼax tseʼel yoʼtan la yaʼiy te Noemí yuʼun ta swenta ini! Jaʼukmeto jaʼ kʼaxtoxan tseʼel yoʼtan yuʼun te Noemí kʼalal te Booz sok te Rut la staik jtul alal, la yakʼbeyik sbiilin Obed. Ta patil te Obed jaʼ kʼot ta mamuchil yuʼun te Davide, yatome jnoptikxan bael ta patil ta swenta te Davide.

Sjun Rut 1-4.