Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 34

Weʼelil te yan yilel-ae

Weʼelil te yan yilel-ae

¿YABAL anaʼ te bin yakalik ta stamel te ants winiketike? Jich yilel te bitʼil toib, o meʼ sik. Sak te sbonile, sok jich yilel te bitʼil yabenal teʼ te jaynaxe. Jaʼukmeto ma toibuk, melel ya xjuʼ ta weʼel.

Mato xkʼax jun u-a te lokʼik tal ta Egipto te israeletike. Ayik ta jochol takin kʼinal. Ma xchʼi lek weʼelil tey-a, jaʼ yuʼun jich la yalbeyik te Moisese: Jaʼ lek te lajukotik ta skʼab te Jehová ta skʼinal Egipto. Tey la jweʼkotik-a te bin la skʼan koʼtankotike.

Jaʼ yuʼun jich la yal te Jehovae: Yame kakʼ tal weʼelil ta chʼulchan jichuk jaʼal. Jich kʼot ta pasel yuʼun. Ta yan kʼajkʼal, te israeletik la yilik te bintik saknax ta ilel te bin ko tal ta chʼulchane, la sjojkʼoybey sbaik: ¿Bin-a ini?

Te Moisés jich la yal: Jaʼ te weʼelil te ya yakʼbeyex aweʼik te Jehová. Te ants winiketike la yakʼbeyik sbiilin MANÁ. Te maná jich sbujtsʼ te bitʼil jayal pan te pasbil sok chab.

Te Moisés jich la yalbey te ants winiketike: Tamaik te jich yipal ya aweʼik ta jujuntule. Jaʼ yuʼun, ta jujun sab jich la spasik. Te kʼalal ya xkʼixnaj tal te Kʼajkʼale ya x-ulub te maná te ma yichʼoj tamele.

Jaʼnix jich la yal te Moisés: Mame ayuk machʼa ya skʼej te maná ta swenta yuʼun yan kʼajkʼal. Jaʼukmeto ay chaʼoxtul te machʼatik jich la spasike. ¿Yabal anaʼ bin ya spas teme la yichʼ kʼejele? ¡Jaʼ te bitʼil ya xtojk schanul ta yan kʼajkʼal sok ya xkaj ta tuubel te maná!

Jaʼukmeto te Jehová la yal te akʼa stamik bayal maná ta jun kʼajkʼal yuʼun te semanae. Jaʼ ini jaʼme te swakebal kʼajkʼal yuʼun te semanae. Soknix te Jehová la yal te akʼa skʼejik swenta yuʼun te yan kʼajkʼale, melel maba ya yakʼ weʼelil ta sjukebal kʼajkʼal. ¡Te kʼalal ya skʼejik te maná ta sjukebal kʼajkʼale ma xtojk schanul sok ma xtuub! ¡Jaʼ ini, jaʼ yan milagro!

Te 40 jaʼbil te ayinik ta jochol takin kʼinal te israeletike, jaʼ la sweʼik te maná.

Éxodo 16:1-36; Números 11:7-9; Josué 5:10-12.