Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 48

Pʼij la yakʼ sbaik te gabaonetike

Pʼij la yakʼ sbaik te gabaonetike

AY BAYAL ta jpam lumetik yuʼun Canaán te ya xchajpan sbaik ta yakʼbeyel guerra te Israele. Ya skuyik te ya xjuʼ yuʼunik tsalawe. Yan stukel te yajwal te lum Gabaón ma schʼuunik te jich ya xkʼot ta pasele. Jaʼ schʼuunejik te yak ta koltayel yuʼun Dios te israeletike, jaʼ yuʼun ma skʼan ya yakʼik guerra ta stojol Dios. Jich yuʼun, ¿yabal anaʼ bin ya spasik te gabaonetike?

La skuy sbaik te kʼax namal te banti nainemike. Jich yuʼun ay chaʼoxtul te la slapik bael chʼiʼem kʼuʼuletik sok stepik te lajemikixe. La skuchik bael ta sburroik kostaletik te pokoʼubenikixe sok takin pan te ayix kʼajkʼal yichʼoj pasele. Ta patil bajtʼik ta stojol te Josué jich la yalik: Talemonkotik ta jpam lum te kʼax namal aye, yuʼun kaʼiyojbeykotik skʼoplal te mukʼul Dios Jehová awuʼunike. La kaʼiykotik spisil te bintik la spas ta Egipto. Jich yuʼun te jwolwanejetik la yalbonkotik te akʼa jchajpankotik talel weʼelil swenta yuʼun te beele sok te jichuk ya xjulonkotik ta yalele: Abatonkotik awuʼun. Ala kaʼiykotik ta jamal te maba ya awakʼik guerra ta jtojolkotike. Ilawilik chʼiʼemix te jkʼuʼ jpakʼkotike jaʼ yuʼun te namal talemonkotike, sok takijemix te pan ta skaj te ayix kʼajkʼal yichʼoj pasele.

Te Josué sok te yantik jwolwanejetik la schʼuumbeyik te bin la yalik te gabaonetike. Jaʼ yuʼun la yalbeyik ta jamal te ma xyakʼbeyix guerrae. Jaʼukmeto ta yoxebal kʼajkʼal ta patil la snaʼik stojol te nopolnax ayik ta nainel te gabaonetike.

Te Josué jich la sjojkʼoy: ¿Bin yuʼun la awalbonkotik te kʼax namal te banti talemexe?

Jich la yalik te gabaonetike: Yuʼun la kichʼkotik albeyel ta swenta te Jehová Dios awuʼunik te la yalbeyex ta jamal te ya yakʼbeyex spamal te skʼinal Canaán. Jich yuʼun jaʼ la jxiʼkotik te ya kichʼkotik milele. Jaʼukmeto te israeletik la skʼotesik ta pasel te bin jamal yalojike, jich maba la smilik te gabaonetike. Jaʼ lek la yilik te la yabatinike.

Te ajwalil yuʼun Jerusalén ilin yuʼun te bitʼil lamal yoʼtan la yakʼ sbaik te gabaonetik sok te lum Israele. Jaʼ yuʼun jich la yalbey chantul yantik ajwaliletik: Laʼik sok koltayawonik ta yakʼbeyel guerra te Gabaón. Jich bajtʼ yakʼik guerra te joʼtul ajwaliletike. ¿Pʼijbal la yakʼ sbaik te gabaonetik te bitʼil lamal yoʼtan la yakʼ sbaik sok te lum Israele? Yame kiltik bael.

Josué 9:1-27; 10:1-5.