Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Aʼyejetik te lokʼem ta Biblia

 AʼIYEJ 47

Jtul j-elekʼ ta lum Israel

Jtul j-elekʼ ta lum Israel

¡ILAWIL te winik ini, ay bin yak ta smukel ta yutil lum ta snailpakʼ! Jaʼ jlijkʼ tʼujbil kʼuʼul, sok jpejch oro soknix chaʼox jsejp plata spisil ini la yichʼ tal ta lum Jericó. Jaʼukmeto, ¿bin la skʼan yichʼ pasbeyel spisil te bintik ay ta Jericó? ¿Yatobal xjul ta awoʼtan?

Jaʼ te lajuk yichʼ lajinele, yan stukel te oro sok te plata la skʼan ichʼel bael ta yawil kʼulejalil ta Nailpakʼ templo yuʼun Jehová. Yuʼunix la skʼaxuntaybeyik smantal-a te Dios te ants winiketik ini. La yelkʼambeyik te bin jaʼ yuʼun te Diose. Acán sbiil te winike, te machʼatik jokimbilik yuʼune jaʼnix te machʼatik jayeb ay yuʼune. Yame kiltik bael te bin kʼot ta pasele.

Te kʼalal yelkʼanojix-a te Acán te biluketik ini, te Josué la stikun bael winiketik ta guerra ta stojol te lum Hai. Jaʼukmeto la yichʼik tsalel. Ay chaʼoxtul te lajike, te yantike lokʼik bael ta anel. Te Josué bayal la smel yoʼtan yuʼun. La spajkan sba ta lum jich jajch ta skʼoponel Dios, jich la yal: ¿Bin yuʼun te jich ya awakʼ kʼotuk ta pasel ini?

Jich la yal te Jehová: ¡Jajchan! Staoj smul te lum Israele. La stsakik te bin la skʼan yichʼ lajinele o te lajuk yichʼ akʼel ta Nailpakʼ templo kuʼune. Yelkʼanojik jlijkʼ tʼujbil kʼuʼul te maba yalojbeyik skʼoplale. Maba ya kakʼbeyex bendición jaʼto teme la alajinik te tʼujbil kʼuʼul sok te machʼa yichʼoj spisil ini. Te Jehová la yalbey te Josué te ya yakʼbey snaʼ te machʼa-a te chopol winik ini.

Jich yuʼun te Josué la stsob tal spisil te lume, jich te Jehová la slokʼes ta yolil ants winiketik te chopol winik Acán. Jich la yal te Acán: Jtaoj jmul. La kil jlijkʼ tʼujbil kʼuʼul, jpejch oro soknix chaʼox jsejp plata. Kʼax bayal la jmulan jich la kichʼ baele. Ya xjuʼ ataik ta nailpakʼ kuʼun, tey jmukoj spisil-a.

Te kʼalal la staik te biluketike la yichʼik bael ta stojol te Josué. Jich te Josué la yalbey te Acán: ¿Bin yuʼun te la awakʼotik ta wokole? Jaʼ yuʼun ya yakʼbat awokol yoʼtik te Jehová. Jich yuʼun spisil te ants winiketik la schʼojik ta ton te Acán sok te jayeb machʼatik ay yuʼune jaʼto te kʼalal lajike. ¿Mabal yakuk yakʼ jnoptik te ma lek te ay bin ya jtsaktik bael te ma kuʼuntikuke?

Ta patil te israeletik chaʼbajtʼik ta guerra ta stojol te lum Hai. Ta ora ini te Jehová la skoltay te lum yuʼun jich juʼ yuʼunik tsalaw.

Josué 7:1-26; 8:1-29.