Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 78

Te bin tsʼibaybil ta pajkʼ

Te bin tsʼibaybil ta pajkʼ

¿BIN yak ta kʼoel ta pasel liʼ ta lokʼombae? Te ants winiketik ini yakalik ta spasel mukʼul kʼin. Kʼax bayal ta jmil ants winiketik te mukʼ skʼoplalik ikʼotik ta kʼin yuʼun te ajwalil yuʼun Babilonia. Yakalik ta stuuntesel te copaetik te pasbilik ta oro sok ta plata soknix te mukʼul tazaetik te la yichʼik talel ta templo yuʼun Jehová ta Jerusalén. Ta oranax chiknaj yal skʼab winik te ay bin jajch stsʼibay ta pajkʼe. Jajchik ta xiwel ta spisilik.

Te smam te Nabucodonosor te Belsasar sbiile, jaʼ ayix ta ajwalil-a. Tulan awun te ajwalil yuʼun yakuk x-ikʼbotik tal ta stojol te pʼijil winiketik yuʼune. Jich la yal: Te machʼa ya snaʼ yilel te bin tsʼibaybil ini sok te ya yakʼbon jnaʼ te bin swentaile, yame yichʼ akʼbeyel bayal majtʼaniletik sok jaʼme ya xkʼot ta yoxebal ajwalil te banti kʼalal jwentaineje. Jaʼukmeto maʼyuk jtul pʼijil winik te juʼ yuʼun skʼoponel te bin tsʼibaybil ta pajkʼ sok yalbeyel te bin swentaile.

Kʼalal la yaʼiy stojol te smeʼ te ajwalil te yakalik ta kʼope och bael te banti yakalik ta weʼel uchʼele. Jich la yalbey te ajwalile: Awokoluk, mame xiwat. Liʼnix te banti ya xwentainwanate ay jtul winik te ay ta yoʼtan te espíritu yuʼun te chʼul diosetike. Te kʼalal jaʼ ay ta ajwalil-a te Nabucodonosor te amamuche, la yakʼbey yaʼtel ta swentainel te machʼatik ay spʼijilike. Daniel te sbiile. Tikuna tal ta ikʼel, jaʼme ya yakʼbat anaʼ te bin swentail te bin tsʼibaybile.

Jich yuʼun la yakʼ tal ta ikʼel ta oranax. Ta patil te kʼalal ma la skʼan stsak te majtʼaniletik akʼbot te Daniele, jajch yalbey skʼoplal te bin yuʼun lokʼesot ta ajwalil yuʼun Jehová te smamuch te Belsasare. Jich la yal: Kʼax jtoyba winik-a. Jich yuʼun akʼbot castigo yuʼun te Jehovae.

Jich albotxan te Belsasar yuʼun te Daniel: Te jaʼate anaʼoj spisil te bin kʼot ta pasel ta stojole, jaʼukmeto yato atoy aba jich bitʼil te Nabucodonosor. La atikun tal ta ichʼel te copaetik sok te mukʼul tazaetik te jaʼ yuʼun te Templo yuʼun Jehová te la atuuntesike. Sok la awalbey yutsil skʼoplal te diosetik te pasbilik ta teʼ sok ta ton, jaʼ maba la awichʼ ta mukʼ stukel te Mukʼul Jpaswanej kuʼuntike. Jich yuʼun te Dios la stikun tal ta atojol te kʼabal te la stsʼibay te kʼopetik ini.

Jich la yal te Daniele: Jich ay te bin tsʼibaybile, MENE, MENE, TEKEL, PARSIN.

MENE ya skʼan ya yal te yajtayojbatix te skʼajkʼalel awaʼtel ta ajwalil te Diose, sok la yakʼbeyix slajibal. TEKEL ya skʼan ya yal te la yichʼix pʼisel awalal ta balanza, chiknaj ta ilel te maba lekate. PARSIN ya skʼan ya yal te bantito kʼalal awentaineje yame yichʼ akʼbeyel ta stojol te medoetik sok te persaetike.

Te kʼalal yakto ta kʼop-a te Daniele, ochik te persaetik sok te medoetik ta yakʼbeyel guerra te Babiloniae. La yuʼuninik te lume sok la smilik te Belsasare. ¡Ta ajkʼabalnax-abi kʼot ta pasel te bin swentail te bin tsʼibaybil ta pajkʼe! Jaʼukmeto, ¿binwan ya xkʼot ta stojol te israeletike? Yatome kiltik bael ta patil. Ta ora ini kiltikxan te bin kʼot ta pasel ta stojol te Daniele.

Daniel 5:1-31.