Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Aʼyejetik te lokʼem ta Biblia

 AʼIYEJ 101

La smilik te Jesuse

La smilik te Jesuse

¡ILAWIL te bin xiʼbantik sba kʼot ta pasele! La smilik te Jesuse. Jipil ta jchʼix teʼ. Sbajojbeyik lawux ta skʼab sok ta yakan. ¿Bin yuʼun te jich la spasik ini?

Jaʼ yuʼun te ay ants winiketik te ma lek la yilik te Jesuse. ¿Yabal anaʼ machʼatik-a? Te jtule jaʼ te chopol chʼul abat te Satanás te Pukuje. Jaʼ te machʼa la yakʼ skʼaxuntaybey smantal Jehová te Adán sok te Evae. Jaʼnix te Satanás la spas te yakuk x-utsʼinot yuʼun skontratak te Jesuse.

Te kʼalal mato sjijpanojik ta jchʼix teʼ te Jesuse, kʼax bayal te bintik chopol pasbot yuʼun te skontratake. ¿Yatobal xjul ta awoʼtan te tal yikʼik bael te Jesús te kʼalal ay ta awal tsʼunubil Getsemaní-ae? ¿Machʼatik-a te skontratak ini? Jaʼ te jwolwanejetik yuʼun te religionetike. Yame kiltik te bin kʼot ta pasele.

Kʼalal ikʼot bael te Jesús yuʼun te jwolwanejetik yuʼun religionetik, lokʼik bael ta anel te jpuk kʼopetik yuʼune. Xiwik jich stukel la yijkʼitayik jilel te Jesús sok te skontratake. Jaʼukmeto te Pedro sok te Juan maba namal bajtʼik. Muken la stʼunik bael te Jesuse yuʼun jich ya yilik te bin ya xkʼot ta pasel ta stojole.

Te sacerdoteetik la yikʼik bael te Jesús ta stojol te Anás, te kʼax ta mukʼul sacerdoteil euke. Te ants winiketik maba jalajik tey-a. Ta patil la yikʼik bael ta sna Caifás te Jesuse, te jaʼ ochem ta mukʼul sacerdote ta yorail-abi. Tey stsoboj sbaik bayal ta jtul jwolwanejetik yuʼun te religionetike.

Tey la schajpanik-a te kʼop ta sna te Caifase. La yikʼik tal chaʼoxtul winiketik swenta ya yalik lotil kʼop ta stojol te Jesuse. Spisil te jwolwanejetik yuʼun te religionetik jich la yalik: Akʼa yichʼ milel te Jesuse. Jich jajch stubtaybeyik sit yelaw sok la spujik ta majel.

Te kʼalal yak ta kʼoel ta pasel spisil ini, te Pedro nakal ta amakʼ-a. Ta ajkʼabal-abi ay bayal sik jich yuʼun la stsumik kʼajkʼ. Te kʼalal yakalik ta skʼatinel kʼajkʼ-a te ants winiketike, ilot yuʼun jtul criada te Pedroe sok jich la yal: Jaʼnix jich te winik ini sjoy sba sok te Jesuse.

La sjakʼ te Pedroe: Maʼuk, ma jaʼuk joy jba sok.

Oxeb buelta la yichʼ albeyel yuʼun te ants winiketik te Pedro te jaʼ sjoy sba sok te Jesuse. Jaʼukmeto te kʼalal jich albot ta jujun bueltae, la smuk ta yoʼtan. Te kʼalal jich la yal ta yoxebal bueltae, la sut sba te Jesús ta yilel te Pedroe. Jich te Pedro kʼax la smel yoʼtan yuʼun te bitʼil la smuk ta yoʼtan te Jesuse, jich lokʼ bael sok la yokʼetay sba.

Ta sakubel kʼinal yuʼun viernes, te sacerdoteetik la yikʼik bael te Jesús te banti la stsob sbaik spisil te Sanedrín, tey la schajpanik-a te bin la spasbeyik te Jesuse. La yikʼik bael ta stojol te Poncio Pilato te gobernador yuʼun skʼinal Judea.

Jich la yalbeyik te Pilatoe: Chopol te winik ini. Akʼa yichʼ milel. Te kʼalal laj yoʼtan te Pilato ta spasbeyel jojkʼoyeletik te Jesuse, jich la yal: Maʼyuk bin chopol spasoj ya kil te winik ini. Jich yuʼun te Pilato la yal ta mantal te akʼa yikʼik bael te Jesús ta stojol te gobernador yuʼun Galilea te Herodes Antipas te ay ta Jerusalén-ae. Jaʼnix jich ma la stabey smul te Jesuse, jich la stikun sujtel ta stojol te Pilatoe.

Te Pilato kʼan skoltay bael te Jesuse. Jaʼukmeto te skontratak te Jesús la skʼambeyik te Pilato te akʼa yakʼ ta libre te yan jchukel te jaʼ te j-elekʼ winik te Barrabás sbiile. Nopol staix olil kʼajkʼal-a te la yichʼ lokʼesel ta amakʼ te Jesús yuʼun te Pilatoe sok jich la yalbey te ants winiketik: ¡Ilawilik te ajwalil awuʼunike! Jaʼukmeto te principal sacerdoteetik jich la yalik ta aw: ¡Lokʼesa! ¡Mila! Jich jil ta libre te Barrabás, yan stukel te Jesús la yikʼik bael ta milel.

Ta olil kʼajkʼal bael yuʼun viernes-a la sjijpanik ta jchʼix teʼ te Jesuse. Manchukme ma chikan ta ilel liʼ ta lokʼombae, jaʼnix jich ay chaʼtul winiketik te la yichʼik jijpanel ta jujun jejch, ta olil ay te Jesús yuʼun jich ya xlajik-a. Te kʼalal jtebxanix skʼan xlaj-a te Jesuse, jtul te chopol winik jich la yal: Naʼawon te kʼalal ya x-ochat ta ajwalinele. Jich la yal te Jesuse: Jamal ya kalbat te yame ajokinon ta Nichimal kʼinal.

¿Mabal jichuk te kʼax tʼujbil te bin la yichʼ alele? ¿Yabal anaʼ bin nichimal kʼinal la yalbey skʼoplal te Jesuse? ¿Banti ayin te nichimal kʼinal te la spas ta xjajchibal te Diose? Ayin liʼ ta Balumilal. Jich yuʼun te kʼalal ya xmantalteswan te Jesús ta chʼulchane, yame schaʼkuxajtes te winik ini swenta jich ya smulambey yutsilal te achʼ Nichimal kʼinal liʼ ta Balumilale. ¿Mabal jichuk te kʼax tʼujbil skʼoplal ini?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.