Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 89

Ay ta Templo te Jesuse

Ay ta Templo te Jesuse

¿MABAL jichuk te kʼax ilinem te Jesús liʼ ini? ¿Yabal anaʼ bin yuʼun? Jaʼ ta swenta te jbikʼtal oʼtan winiketik te ayik ta Templo yuʼun Dios ta Jerusalén. La yelkʼambeyik stakʼin te ants winiketik te kʼalal talik ta yichʼel ta mukʼ te Diose.

¿Yabal ata ta ilel te wakaxetik, tuminchijetik, tsumutetik te ayik tey ta lokʼombae? Te winiketik ini yakalik ta xchonel ta Templo te chambalametike. ¿Yabal anaʼ bin yuʼun? Jaʼ ta swenta te bitʼil te israeletik ya xtuun yuʼunik te chambalametik sok te jamal mutetik swenta ya yakʼik ta chikʼbil majtʼanil ta stojol Dios.

Te Ley yuʼun Dios yalojbey skʼoplal teme ay jtul ants winik ta Israel te ay bin chopol ya spase yananix yakʼ majtʼanil ta stojol Dios-a. Soknix ta swenta bin yantik skʼoplal jaʼnix jich la yakʼik majtʼaniletik ta stojol Dios. Jaʼnax yuʼun, ¿bantiwan ya xjuʼ ya staik jamal mutetik sok chambalametik yuʼun ya yakʼik ta majtʼanil?

Ay chaʼoxtul te machʼatik ay jamal mutetik sok chambalametik yuʼunik te ya yakʼik ta majtʼanile. Jaʼukmeto ay bayal ta jtul israeletik te maʼyuk schambalamik sok jamal mutetik yuʼunik. Sok ay yantik te kʼax namal nainemik ta banti ay te Jerusalén jich ma xjuʼ yuʼunik yichʼel tal jkojtuk chambalam ta Templo. Ta skaj-abi ya xtalik ta Templo te ants winiketik ta smanel chambalametik o jamal mutetik. Jaʼukmeto te winiketik ini kʼax toyem la skʼambeyik stojol te bintik la schonike, jich la yelkʼambeyik stakʼin te ants winiketike. Soknix ma jichuk ya skʼan te ya xchombajik ta Templo yuʼun te Diose.

Ta swenta ini, ilin yuʼun te Jesuse. Jich la skotpʼin bael te mesaetik te banti ay te takʼine sok jich la sbuskʼin koel spisil. Soknix la spas chicote ta chʼajan jich la sten lokʼel ta Templo te chambalametike. Sok la yalbey ta mantal te jchon tsumutetike: ¡Lokʼesaik bael spisil ini! Mame xakʼatpʼunik ta snail chombajel te sna te jTate.

Ay chaʼoxtul jnopojeletik yuʼun te Jesús te jokimbil yuʼun ta Templo yuʼun Jerusalén. Chajpnax la yilik te kʼalal jich la spas te Jesuse. Jich yuʼun jul ta yoʼtanik te bin tsʼibaybil skʼoplal ta swenta te sNichʼan te Diose: Ta swenta te bitʼil bayal skʼoplal ta koʼtan te anae, til te koʼtan jich bitʼil kʼajkʼ.

Te kʼalal ayto ta Jerusalén-a te Jesús ta kʼin Pascua, jajch spas bayal milagroetik. Ta patil lokʼ bael ta Judea jich sujt bael ta Galilea. Jaʼnax yuʼun te kʼax ta skʼinal Samaria. Yame kiltik te bin kʼot ta pasel tey-ae.

Juan 2:13-25; 4:3, 4.